LEVI 24
24
Malako khu Tsitaaha tsili Havundu Hatakatifu
(Khur 27:20-21)
1Mwami Nyasaye yavoolela Musa, 2“Voolela Vaisraeli vakhulerele makura ki tsitaaha malahi kene khurula khu misayituni chiaminwa vulahi vwene, nikanyalikha vulavu vutsililile khwakha shia khase khosi. 3Shia khulukolovo khwosi, Haruni aliitsa khutsihaambitsa nu khutsilekha khutsililila khwakha khutukha mu mavwevwe, havundu henaho imbeli wu Mwami Nyasaye, ihale wene khurula khu luvaala luli imbeli wi Lisanduku li Lilakano, lili Havundu Hatakatifu Hene. Lilako yili, liliitsa khutsililila khulondwa khumatukhu koosi kaliitsa khuvaho. 4Haruni aliitsa khutsililila khulinda vulahi tsitaaha tsili khu shikuru shi itaaha shialombwa khu itsahabu inyukha, khutsililila khwakha vuchila khutsima imbeli wu Mwami Nyasaye.
Malako khu Mikati Mitakatifu
5“Muliitsa khuvukula vusi vunyukhu tsikilo tsivili, mulombe mikati likhomi na chivili. 6Muliitsa khuvikha mikati chienecho, mu tsimbaso tsivili khu imesa yalombwa khu itsahabu, ili imbeli wu Mwami Nyasaye, shia luvaso luliitsa khuvamu ni mikati sita. 7Muliitsa khuvikha vubani mu shia luvaso, khuli shihanwa shiu khusambwa khu Mwami Nyasaye khutsianakana ni mikati. 8Shia litukhu liosi li Lisabato, khumatukhu koosi kaliitsa khuvaho, muliitsa khutsililila khuvikha mikati imbeli wu Mwami Nyasaye. Yuku nakwo muhinzilu kwa Vaisraeli, valiitsa khukhola mihika ni mihika. 9Mikati chienecho, chiliitsa khuva chia Haruni nende vitsukhulu veve, khandi valiitsa khulia mikati chienecho, nivali Havundu Hatakatifu, shichila nashio shitonye shitakatifu muno khu vihanwa via vahaananga khwinzi Mwami Nyasaye, khuvirila khu mulilu.”
Khusalilitswa Shichila Khunyeka Nyasaye
10Litukhu lindi, mwana wi shiyayi, wu mukhali Muisraeli yivula khu Mumisri yachenda chenda mu Vaisraeli. Mwana wi shiyayi mwenoyo, yakwana nu mundu Muisraeli mu maheemo ka vandu vamenyamu. 11Mwana wi shiyayi wu mukhali Muisraeli yanyeka Nyasaye, khali namulaama. Vamuvukula, nivamuhila khu Musa. Mama wu mwana wi shiyayi mwenoyo, yali ni lira Shelomitsi, wali nali mwana wi shikhana wa Diburi, warulanga mu vandu vuluhia lwa Dani. 12Vamuvukula nivamuvoha mucheela, nivalindilila Mwami Nyasaye khuvavoolela ka vamukhola.
13Mwami Nyasaye yavoolela Musa, 14“Rulitsa mundu woyo mu maheemo ka vandu vamenyamu. Mundu wamuhulila nalaamanga, aliitsa khutiila makhono keke khu murwi ku mundu mwenoyo, khumanyinya ndi ukholi vutamanu; ma Vaisraeli voosi vamulese na machina, khutukha lwa aliitsa khukhutsa. 15Uvoolele Vaisraeli ndi mundu unyala khulaama Nyasaye, aliitsa khusalilitswa shichila vwoni vwevwe. 16Mundu unyekanga Mwami Nyasaye aliitsa khwiirwa. Vaisraeli voosi valiitsa khumulesa na machina. Ave nu mundu Muisraeli inoho mundu mucheni unyekanga Mwami Nyasaye, aliitsa khwiirwa.
17“Niiva mundu aliitsa khwiira wundi, mundu mwenoyo, aliitsa khandi khwiirwa. 18Mundu uliitsa khwiira muruku ku mundu wundi, aliitsa khurunga muruku kundi -- vulamu vuliitsa khurunga vulamu vundi.
19“Niiva mundu aliitsa khusalilitsa mureende wewe, kakholi khu wundi kenako, kaliitsa khukholwa khuye. 20Niiva aliitsa khumeneka wundi shikuumba, shikuumba shilala khu vikuumba vievie shilitsa khumenekwa. Niiva aliitsa khuhutuula wundi imoni, indala khu tsimoni tsietsie iliitsa khuhutuulwa. Niiva aliitsa khutong'ola wundi lino, lilala khu mino keke liliitsa khutong'olwa. Khali kave ninjila shina yaliitsa khusalilitsilamu wundi, nindio khali ye aliitsa khusalilitswa. 21Mundu uliitsa khwiira muruku ku wundi, aliitsa khurunga muruku kundi. Navutswa mundu uliitsa khwiira wundi, aliitsa khandi khwiirwa. 22Lilako yili liliitsa khurumikha khu munyi voosi. Liliitsa khuva lia Vaisraeli nende vandu vacheni vamenyanga mu munyi, shichila ninzi Mwami Nyasaye, uli Nyasaye wenyu.”
23Lwa Musa yali namali khuvoolela Vaisraeli makhuva kenako, varulitsa mundu mwenoyo mu maheemo ka vandu vamenyamu, nivamuhila ihale wene khurulaho. Vamulesa na machina, khutukha lwa yakhutsa. Khulwa yako, Vaisraeli vakhola khuli Mwami Nyasaye, yali navoolele Musa vakhole.
Currently Selected:
LEVI 24: LLLCATHOLIC
Highlight
Share
Compare
Copy
Want to have your highlights saved across all your devices? Sign up or sign in
© The Bible Society of Kenya, 2013