LUKA 17

Machelitso Kachilanga nu Khukhola Vwoni

(Mat 18:6-7,21-22; Mk 9:42)

1Yesu yavoolela veechi veve, “Vindu vilombanga vandu nivakhola vwoni vili himbi khwikholekha; navutswa mundu uchilanga vindu vienevo nivikholekha ali khu vutiinyu muno! 2Vwakhavele vulahi mundu mwenoyo khusungwa ni lichina likali liu khusielela mwing'ori mwemwe nu khusiuvwa mu inyanza, khuvira khuchila mulala khu vatititi yava akwi mu vwoni. 3Khulwa yako, muve vacheli khu ka mukholanga! Niiva musuuvili woshio aliitsa khukhola vwoni, mumukondeshele, khandi niiva aliitsa khwikanila, mumusemehe. 4Niiva aliitsa khumukholela vwoni hali saba khulitukhu lilala, khandi shia lwosi lwa yitsanga khu munyi navoola, ‘Mali khwikanila’, khutukha mumusemehe.”

Lisuuvila

5Varumwa vavoolela Mwami, “Khukhonye khuve ni lisuuvila li tsingulu!”

6Mwami yachipa, “Niiva mwakhavele ni lisuuvila li tsingulu khuli lukuutsa lutititi muno, mwakhavoolele musala kusasanga mukhuyu yuku, ‘Rinyukha ni miili, wiraache mu inyanza!’ khandi kwakhalondi makhuva kenyu.

Muhinzilu ku Murumishi Akhola

7“Khuvoole mulala khu munyi ali nu murumishi ulimanga mulimi inoho wayitsanga makondi. Lwa yitsanga narula mu mulimi, mumuvoolelanga hamba vwangu ulii shiukhulia? 8Shikali kario tawe! Nikhali, mulamuvoolela ‘Khulombele shiukhulia shiu khulukolovo, mawifwale inguvu yu khuhinzilila khandi wirecheshe khukhuha shiukhulia lwa khuliitsanga shiukhulia nu khung'wa; ninakhamala khulia unyala khulia shioshio.’ 9Shialiitsa khusanditsa murumishi wewe shichila ukholi ka yavoolelwa akhole? 10Khulwa yako, nindio khandi kali khu munyi. Lwa muvetsanga numukholi koosi ka muvetsanga numuvoolelwi mukhole, vooli, ‘Khutsi khuli vutswa varumishi; khukholi vutswa ka khwenyekhanga khukhole.’ ”

Yesu Yahonyinya Vandu Valwala Vuchele Likhomi

11Lwa Yesu yali nali khu luchendo lwelwe natsitsanga Yerusalemi, yavirila khu mupaka kuli hakari ha Samaria nende Galilaya. 12Lwa yali niyinjilanga mu muchitsi, yakana na vandu likhomi vali nivalwala vuchele; vali nivasinjile ihale wene 13nivalaanjilila nivavoola, “Yesu! Muruchi! Khuvele tsimbavasi.”

14Lwa Yesu yalola vandu venavo yavavoolela, “Simushi mutsi vasalisi vamukole.” Lwa vali nivatsitsanga vakholwa khuva vanihu. 15Lwa mulala khuvo yalola uhoni, yakalukha, niyitsominyanga Nyasaye nalaanjilila nu mwoyo mukali. 16Yasikama ha vilenje via Yesu, namusanditsa. Mundu mwenoyo yali Musamaria. 17Yesu yareeva, “Shiumuvele vandu likhomi vamuhoni? Ni hena ha vandi tisa vali? 18Shichila shina mundu mucheni uyu nakalukha wonyene khusanditsa Nyasaye?” 19Khulwa yako, Yesu yamuvoolela, “Sinjila utsi; lisuuvila liolio limali khukhuhonyinya.”

Khwitsa khu Vwami vwa Nyasaye

(Mat 24:23-28,37-41)

20Vafarisayo valala vareeva Yesu lwa Vwami vwa Nyasaye vuliitsa khwitsa. Yesu yavachipa, “Vwami vwa Nyasaye vuliitsa khuvula khwitsa munjila ya muliitsa khuvulola ni tsimoni tsienyu nu vwitsanga. 21Mundu avulakhuho uliitsa khuvoola, ‘Lola, vuli hanu!’ inoho, ‘Vuli yeyo!’ Shichila Vwami vwa Nyasaye vuli mu munyi.”

22Khulwa yako, Yesu yavoolela veechi veve, “Matukhu kaliitsa khutukha lwa muliitsa khwenya khulola litukhu lilala khumatukhu ku Mwana wu Mundu, navutswa muliitsa khuvula khulilola. 23Vandu valiitsa khuvaho valiitsa khumuvoolela, ‘Loli, yeyo!’ inoho ‘Loli, hanu!’ Navutswa muvuli khutsiayo inoho khuvalondayo. 24Khuli luheni luhemukhanga mu malesi khandi lwashitsa vulavu khurula khuluveka lulala khutukha khu lundi, nindio khandi Mwana wu Mundu nave khulitukhu lielie.#17:24 Mahandiko Matakatifu kandi kakhale kavula “khulitukhu lielie.” 25Navutswa lukhuraanga, Mwana wu Mundu aliitsa khunyakhana vululu muno, nu khwambakhanwa na vandu va matukhu kanu. 26Khuli lwa kikholekha mumatukhu ka Nuhu, nindio khandi kaliitsa khwikholekha mumatukhu ku Mwana wu Mundu. 27Vandu vatsililila khulia nivang'wa; vandu vasatsa nende vakhali nivahilana, khutukha khulitukhu liukhumalilikha lwa Nuhu yinjila mu liaro. Matsi ki michelelo kitsa manyishi khandi nikavamulula voosi. 28Nindio khandi kikholekha mumatukhu ka Loti. Vandu voosi vatsililila khulia nivang'wa, nivakuula khandi nivakuulanyinya; khandi varaaka nivumbakha. 29Navutswa khulitukhu lia Loti yarula mu litaala lia Sodomu, mulilu nende salufa viaroonya khurula mwikulu, niviira voosi. 30Nindio khandi kaliitsa khwikholekha khulitukhu liu Mwana wu Mundu aliitsa khumanyinywa.

31“Khulitukhu lienelo, mundu uli khu shisechese shi inzu aliiitsa khuvula khwikha nu khwinjila munzu khuvukula vindu vievie; munjila indala yeneyo, mundu uli mu mulimi aliitsa khuvula khukalukha munzu. 32Mwamanya kikholekha khu mukhali wa Loti! 33Mundu uchelitsanga khuhonyinya vulamu vwevwe, aliitsa khuvukoritsa; navutswa mundu ukoritsanga vulamu vwevwe, aliitsa khuvuhonyinya. 34Muvoolelanga kilikali ndi mu vutukhu vwenovo, khuliitsa khuva na vandu vavili nivakoni khu shitali shilala; mulala aliitsa khuvukulwa, ma wundi yivalwi inyuma. 35Khuliitsa khuva na vakhali vavili nivasietsanga imu halala; mulala aliitsa khuvukulwa, ma wundi yivalwi inyuma. [ 36Vandu vavili valiitsa khuva nivahinzilanga mu mulimi; mulala aliitsa khuvukulwa, ma wundi yivalwi inyuma.”]#17:36 Mahandiko Matakatifu kandi kakhale kavula luvaso 36.

37Khulwa yako, veechi veve vamuvoolela, “Mwami, ni hena?” Yesu yavachipa, “Havundu hosi ha mmbili kukhutsi kuli, vilitsa vivunjelitsanga havundu henaho?”

Currently Selected:

LUKA 17: LLLCATHOLIC

Highlight

Copy