LUKA 2

Livulwa lia Yesu Kristo

(Mat 1:18-25)

1Mumatukhu kenako, Mwami Augasito wamihanga Varoma yahaana lilako ndi vandu voosi mu lusomo lwenolo vavalitswi. 2Yili liali livalitswa liu khuraanga lwa Kurenio yali nali gavana wa Siria. 3Shia mundu wosi yasimukha natsia khuvalitswa mu litaala li ingo wavo.

4Yosefu yasimukha narula mu litaala lia Nazareti lili mu lusomo lwa Galilaya natsia mu litaala lia Betselehemu mu lusomo lwa Yudeya, wa Mwami Daudi yali niyivulwa. Yosefu yasimukha natsiayo, shichila yali mwitsukhulu wa Daudi. 5Yosefu yasimukha natsia khuvalitswa na Mariya, wa yali niyaselela khuva mukhali wewe, neye yali waheelitsa; 6khandi nivali mu litaala lia Betselehemu, litukhu liu khwivula mwana liatukha. 7Mariya yivula mwana wewe wu khuraanga shiyayi, namuvoheela mu tsinguvu khandi namwalishitsa khu mulinga kwi tsing'ombe tsiliilakhu -- shichila vwiyangu vwali nuvuvula mu inzu ya vacheni.

Vayi nende Tsinjelosi

8Khwali na vayi valala mu lusomo lwi shivala shienesho vakonanga tsindolo mu vikuri nivalinda viayo viavo via makondi. 9Injelosi yu Mwami Nyasaye yalolekha khuvo, ma vukhumi vwa Nyasaye nuvwakha khuvo. Navo varia nivatechela muno, 10navutswa injelosi yavavoolela, “Muvuli khuria! Mulerele likhuva lilahi, lichila vandu voosi vave ni likhoya linyishi muno. 11Nunundi, muhonyinyi wenyu wivulwi mu Litaala likali lia Daudi, neye ni Kristo Mwami! 12Yishi shiliitsa khuva shimanyilu khu munyi: muliitsa khunyola mwana navoheelwi mu tsinguvu tsiu mwana mutoro niyalishitswi khu mulinga kwi tsing'ombe tsiliilakhu.”

13Hene yaho, shituma shikali shi tsinjelosi tsiliihe liu mwikulu shialolekha ni injelosi yeneyo, nivimbanga tsinyimbo tsiu khwitsominya Nyasaye: 14“Vukhumi vuve khu Nyasaye ikulu mwikulu, na milembe mu shivala khu vandu va yayaanza!”

15Lwa tsinjelosi tsiasimukha ni tsikalukha mwikulu, vayi vavoolelana vene khuvene, “Chendi khutsi mu litaala lia Betselehemu khulole shindu shikholeshe, shiu Mwami Nyasaye akhuvoolele makhuva khulondokhanakhu.”

16Vasimukha nivatsia vwangu, nivanyola Mariya nende Yosefu, khandi nivalola mwana nakoni khu mulinga. 17Lwa vayi valola mwana mwenoyo, vavavoolela makhuva koosi ki injelosi yali nivooli shichila mwana mwenoyo. 18Vandu voosi vahulila makhuva ka vayi vavavoolela vali nilichenya. 19Navutswa Mariya yavikha makhuva kenako koosi mu mwoyo kwekwe, nakanakanakhu. 20Vayi vakalukha nivimbanga tsinyimbo tsiu khwitsominya Nyasaye khu koosi ka vali nivahulili khandi nivaloli; kali vutswa khuli injelosi yali nivooli.

Mwana Yakulikhwa Lira

21Khulitukhu lia munane, liu mwana khushevwa, vamukulikha lira Yesu; lira lia injelosi yali niyavoola aliitsa khukulikhwa nashili khuvelekhwa.

Yesu Yahilwa mu Litempeli

22Matukhu katukha ka Yosefu nende Mariya vakhola mulukha ku khunihitswa, khuli Malako ka Musa kavoolanga. Khulwa yako, vavukula mwana nivamuhila Yerusalemi khumuhaana imbeli wu Mwami Nyasaye, 23khuli kali ni kahandikwa mu malako ku Mwami Nyasaye, “Shia mwana wi shiyayi mukhulundu khwivulwa aliitsa khuhaanwa khu Mwami Nyasaye.” 24Vasimukha nivatsia khukhola khandi musango kwi vituti vivili inoho vinamusotsi vivili khuli malako ku Mwami Nyasaye kavoolanga.

25Mumatukhu kenako, khwaliho nu mundu walaangwangwa Simioni wamenyanga mu Yerusalemi. Yali mundu mulahi, waheetsanga Nyasaye luyali; khandi yalindililanga khuhonyinywa khwa Vaisraeli. Roho Mutakatifu yali naye 26khandi yamusuuvilitsa ndi aliitsa khuvula khukhutsa nashili khulolakhu Masiha wu Mwami Nyasaye yali niyalaaka. 27Roho yimilila Simioni niyinjila mu Litempeli. Lwa vivuli valera mwana wavo Yesu mu Litempeli khumukholela ka Malako kavoolanga, 28Simioni yavukula mwana mu makhono keke, manasanditsa Nyasaye navoola:

29“Yivi Mwami Nyasaye, umali khurweshitsa nunundi lilaaka liolio,

khandi khutukha useevuli inzi murumishi wowo atsi mu milembe.

30Mali khulola ni tsimoni tsianje vuhonyinyi vwovwo,

31vu warecheshitsa imbeli wa vandu voosi:

32Vulavu vu khumanyinya lienya liolio khu vandu vi tsimbia tsindi,

khwenya khulerela Vaisraeli vovo vukhumi.”

33Vivuli vu mwana vali nilichenya, shichila vindu via Simioni yavoola khulondokhana khu mwana. 34Simioni yavakasitsa, navoolela Mariya, nali mama wa Yesu, “Nyasaye urovole mwana uyu khu ativitsi nu khuhonyinya vanyishi mu shivala shia Israeli. Neye aliitsa khuva shimanyilu khurula khu Nyasaye, shia vandu vanyishi valiitsa khulomolomakhu vindu vitamanu, 35khu tsinganakani tsiaviswa tsia vanyishi tsilimanyikhana. Livelela, khuli shivavi shiuchi liliitsa khulivira mu mwoyo kwokwo mwene.”

36Khwaliho khandi nu muprofeti mukhali walaangwangwa Ana, nali mwana wi shikhana wa Fanweli, warulanga mu vandu vuluhia lwa Asheri. Yali mushele muhindila; yamenya mihika saba chionyene mulukhali lwelwe; 37nakwa mukhutsakhali khutukha, lwa yamala mihika makhomi munane na chine. Yahonganga vutukhu nu mbasu mu Litempeli, vuchila khulia, nasaala khu Nyasaye.

38Lwa Ana yatukhaho isaa yeneyo, yasanditsa Nyasaye navoola makhuva khulondokhana khu mwana khu vandu valindililanga litukhu lia Nyasaye aliitsa khuvoholola vandu va Yerusalemi.

Likalukha Nazareti

39Lwa Yosefu nende Mariya vali nivamali khukhola koosi ka malako ku Mwami Nyasaye kavoolanga, vakalukha ingo mu litaala liavo Nazareti mu lusomo lwa Galilaya. 40Mwana yavilukha nava ni tsingulu. Yali nu vusitsa vunyishi, khandi Nyasaye namuvoolela tsimbavasi.

Mwana Yesu mu Litempeli

41Shia muhika vivuli va Yesu vatsitsanga Yerusalemi khulitukhu liu Mulukha kwa Pasaka. 42Lwa Yesu yali nali ni mihika likhomi na chivili, vasimukha nivatsia khulondokhana khuli mwiima kwavetsanga. 43Lwa mulukha kwali nu kuvwele, vivuli va Yesu varaanga khukalukha ingo; navutswa Mwana Yesu yarikala mu Yerusalemi. Vivuli veve shivamanyakhu urikaleyo tawe; 44vakanakana ali mu shituma shia vandu; khu vachenda khulitukhu liosi ni vamukhavanga khali mu viikho nende mu valina vavo. 45Navutswa shivamunyola tawe. Vakalukha, nivatsia khumukhava mu Yerusalemi. 46Khulitukhu lia khavaka, vamunyola nali mu Litempeli, niyikhale na veechitsi va Vayahudi, navahulishitsanga nu khuvareeva mareevo. 47Vandu voosi vahulila Yesu vachenyinywa shichila vucheli vukhuchipa khwekhwe. 48Lwa vivuli veve vamulola, vali nilichenya. Mama wewe yamureeva, “Mwana wanje, shichila shina nu khukhola ndio? Inzi nende tata wowo khuvele ni liheenda mwoyo likali muno khuli khukhunyola.”

49Yesu yavareeva, “Shichila shina numukhava inzi? Shiumumanyikhu khutukha mbe nindi mu inzu ya Tata wanje?” 50Navutswa vivuli veve shivahulila lichiupu lielie, lia yavavoolela tawe.

51Khulwa yako, Yesu yakalukha navo mu litaala lia Nazareti, nahulila malako kavo. Mama wewe yavikha mu mwoyo kwekwe makhuva kenako koosi. 52Yesu yahindila mu mmbili khandi mu vusitsa, nayaanzitsa Nyasaye nende vandu.

Currently Selected:

LUKA 2: LLLCATHOLIC

Highlight

Copy