LUKA 7
7
Yesu Yahonyinya Murumishi wu Mwimilili wa Vasikali va Varoma
(Mat 8:5-13)
1Lwa Yesu yali namali khuvoolela vandu vindu vienevo viosi, yasimukha natsia mu litaala lia Kaperenamu. 2Khu, mwimilili wa vasikali va Varoma yali nu murumishi wewe wa yali niyayaanza. Murumishi mwenoyo yalwalanga khali nava himbi khukhutsa. 3Lwa mwimilili wa vasikali mwenoyo yahulila makhuva shichila Yesu, yaruma vasakhulu va Vayahudi khuye khumureeva yitsi khuhonyinya murumishi wewe. 4Lwa vasimukha nivatsia khu Yesu, vamusaya nu mwoyo kwosi, nivavoola, “Toto, utushili umukholele ka yenyanga, 5shichila wayaanza vandu vi shivala shieru, khandi neye wakhumbashila lisinagogi.”
6Khulwa yako, Yesu yasimukha natsia navo. Lwa yali nali himbi khu inzu, mwimilili wa vasikali mwenoyo yaruma valina veve khu Yesu, vamuvoolele, “Mwami, lekha khunyakhana; shichila mbula vunyali vu khukhwinjilitsa mu inzu yanje. 7Nashio shivune shiachila nimbula khwitsa khukhulola. Navutswa voolakhu vutswa likhuva, khu murumishi wanje ahone. 8Khali inzi ndi mundu uli hasi ha vimilili vandi vali nu vunyali; khandi ndi na vasikali vandi hasi hanje. Mbolelanga musikali mulala, ‘Simukha utsi,’ khandi atsia; khandi mbolela wundi, ‘Hamba,’ mayitsa; mbolela murukwa wanje, ‘Khola yishi,’ makhola.”
9Lwa Yesu yahulila ndio, yali nilichenya, nakalukhana navoolela shituma shia vandu vamulondanga, “Muvoolelanga ndi shili khulolakhu mundu uli ni lisuuvila khuli yili, khali mu shivala shia Israeli.”
10Vandu vali nivarumwa khu Yesu vakalukha mu inzu yu mwimilili wa vasikali va Varoma mwenoyo, nivanyola murumishi wewe nali mulamu.
Yesu Yisimushitsa Mwana wu Mukhutsakhali
11Matukhu nikamali khuvirakhu mati, Yesu yasimukha natsia mu litaala lialaangwangwa Naini, halala na veechi veve nende shituma shikali shia vandu. 12Lwa yali nali himbi khutukha mu shilivwa shi litaala lienelo, yalola vandu nivachinji mmbili ku mukhutsu -- mwana mutelwa wonyene wu mukhutsakhali; shituma shikali shia vandu vanyishi khurula mu litaala vali nu mukhutsakhali mwenoyo. 13Lwa Mwami Yesu yamulola, yamulolela tsimbavasi, namuvoolela, “Lekha khulila.” 14Nalwo lwa Yesu yasimukha natsia khukumila khu lisanduku liu mukhutsu; khandi yavo vali nivachinji vasinjila vulunji. Yesu yavoola, “Musatsa muvukha, khuvoolelanga ndi uvushi.” 15Mukhutsu mwenoyo yikhala, naraanga khulomoloma, ma Yesu namuhaana khu mama wu mwana mwenoyo.
16Vandu voosi varia nivaraanga khwitsominya Nyasaye; nivavoola, “Muprofeti wi tsingulu umali khunyolekha mu khutsi vene! Nyasaye umali khwitsa khuhonyinya vandu veve.” 17Makhuva khulondokhana khu vindu via Yesu yali nakholi kalanda shia havundu hosi mu lusomo lwa Yudeya khandi mu shivala shia himbi.
Veechi va Yohana Yaruma khu Yesu
(Mat 11:2-19)
18Lwa veechi va Yohana vavoolela Yohana khulondokhana khu vindu yivi viosi, yalaanga veechi vavili khuvo 19navaruma khu Mwami Yesu vamureeve, “Nivi wa Yohana yavoola uliitsa khwitsa inoho khutsililile khulindilila wundi?”
20Lwa veechi venavo vatukha khu Yesu, vavoola, “Yohana Mubatisi umali khukhuruma khu yivi khukhureeve, ‘Nivi wa yavoola uliitsa khwitsa inoho khutsililile khulindilila wundi?’ ”
21Mumatukhu kenako, Yesu yahonyinya vandu vanyishi vali nivalwala tsikhutsu nende va matimoni kali nikinjila muvo; khandi nahonyinya vandu vanyishi vali nivavekhula nivalola. 22Yesu yavachipa, “Kalushi mutsi muvoolele Yohana ka munyi vene muloli khandi numuhulila: vandu vavekhula valolanga; vandu valema vachendanga; vandu valwala vuchele vahoni; vandu vikala maroyi vahulilanga; vandu vakhutsa vayisimushitswa khurula mu likhutsa khandi vamanani vamali khwilwatsilwa Ivanjeli. 23Ali ni ikhaavi mundu ukhahaya hayanga khulondokhana khwinzi.”
24Lwa varumwa va Yohana vali nivamali khurulaho, Yesu yaraanga khulomoloma khu vituma via vandu makhuva khulondokhana khu Yohana, navoola, “Lwa mwasimukha nu mutsia mu shiangalangwi, mwasuuvilanga muliitsa khulola shina? Shitundu shi imbuutsa ihuutsanyinyanga? 25Ni shina shia mwatsia khulola? Mundu niyifwali tsinguvu tsiu vukuuli vululu? Vandu vifwalanga tsinguvu khuli tsienetso vamenyanga mu tsinzu tsia vami. 26Mboleli, ni shina shia mwatsia khulola? Muprofeti? Ni kilikali, muvoolelanga ndi khali khuvira muprofeti. 27Yohana neye wa Mahandiko Matakatifu kavoolanga makhuva khulondokhanakhu,
‘Nyasaye yavoola,
niitsa khuruma murumwa wanje imbeli wowo;
khwitsa khukhulombela injila.’ ”
28Yesu yavavoolela, “Muvoolelanga kilikali ndi mu vandu voosi vamenyanga mu shivala shinu, mundu avulakhuho uli nu vunyali vunyishi khuvira Yohana; navutswa woyo uli mutititi muno mu Vwami vwa Nyasaye, neye uli nu vunyali khuvira Yohana.”
29Lwa vahulila makhuva kenako, vandu voosi, khali vasololi vu vushuru nivalimu, vitsominya Nyasaye lwa ali wi likhola liu vulunji; shichila Yohana Mubatisi yali wa vabatisa; 30navutswa Vafarisayo nende veechitsi va Malako vambakhana ka Nyasaye ali nako khulondokhana khuvo, nivambakhana Yohana khuvabatisa.
31“Ni shina shianyala khusasanyinya khu vandu vamatukhu kanu, khandi valolekhanga khuli shina? 32Valolekhanga khuli vaana nivikhale musokoni. Shituma shia vaana shilala shilaanjililanga nishivoolela shindi,
‘Khwamwimbila tsinyimbo tsi shiselelo shiu khuhilana,
navutswa mwambakhana khusieva;
khwamwimbila tsinyimbo tsiu khwikhula,
navutswa mwambakhana khwikhula!’
33Yohana Mubatisi yitsa, nahonganga vuchila khulia khandi vuchila khung'wakhu idivai; numuvoola, ‘Litimoni lili muye.’ 34Mwana wu Mundu yitsa, nalia shiukhulia khandi nang'wa, manumuvoola, ‘Lolikhu mundu uyu! Nu mundu munyeseli khandi nu mutandi wi idivai, nu mulina wa vasololi vu vushuru nende vooni vandi!’ 35Khulwa yako, vusitsa vwa Nyasaye vumanyikhananga khuva vwatoto khuvirila mu vandu voosi vavuhuchililanga.”
Yesu Yali Mungo mwa Simoni Mufarisayo
36Litukhu lindi, mulala khu Vafarisayo yalaanga Yesu khwitsa khulia shiukhulia naye. Yesu yasimukha natsia mu inzu yu mundu mwenoyo, niyikhala nalia. 37Khwali nu mukhali mwoni mu litaala lienelo. Lwa yahulila ndi Yesu aliitsanga shiukhulia mu inzu yu Mufarisayo; yitsa ni ichupa yu vukuuli vululu niyitsule makura ku khwivekha, 38manasokonyola inyuma wa Yesu, ha vilenje ha Yesu, nalilanga, khandi nasavitsa vilenje via Yesu ni miliika chiechie; niyeeya vilenje vienevo ni liswi liu khu murwi kwekwe. Yatsunzuna vilenje via Yesu, namuvekha makura. 39Lwa Mufarisayo yalola ndio, yireevana mwene, “Niiva toto mundu uyu nu muprofeti, yakhamanyi nu mukhali shina umutiilakhu uyu khandi limenya lukanu shina liamenyanga, shichila nu mukhali wu kholanga vwoni.”
40Yesu yamuchipa, “Simoni, ndi ni likhuva lia nyenyanga khukhuvoolela.” Nalwo lwa Simoni yamureeva, “Mwechitsi, mbolela likhuva lienelo?”
41“Litukhu lindi, mundu yikopitsa vandu vavili tsidinari. Mulala yamuha tsidinari tsimia tsiranu, na wundi tsidinari makhomi karanu. 42Lwa vakhaywa khurunga, yamanya navasemeha voosi. Ni viina khuvo unyala khuyaanza muno mundu mwenoyo?” 43Simoni yamuchipa, “Suuvilanga nu mundu wali ni likoovi linyishi wasemehelwa.” Khulwa yako, Yesu yamuvoolela, “Uvooli vulahi vwene.” 44Lwa Yesu yishevukha naheenza mukhali mwenoyo yavoolela Simoni, “Ulolanga mukhali uyu? Nakhinjila munzu mwomwo, navutswa wambakhane khumba matsi kukhusava vilenje vianje, nikhali mukhali uyu usaavitsi vilenje vianje ni miliika chiechie khandi weeyi vilenje vianje ni liswi lielie. 45Shiunzunzunikhu tawe; navutswa khurula lwa ninjila munu ashili khulekha khutsunzunakhu vilenje vianje. 46Shiumbeshikhu murwi kwanje makura tawe; navutswa uveshi vilenje vianje makura. 47Khulwa yako, muvoolelanga ndi umali khusemehwa khurula mu vwoni vwevwe vunyishi, shichila amanyinyanga vuyaanzi vunyishi; navutswa mundu usemehelwi hatititi amanyinyanga vuyaanzi vutititi.”
48Yesu yavoolela mukhali mwenoyo, “Umali khusemehwa khurula mu vwoni vwovwo.”
49Khulwa yako, vandu vali nivaliitsanga shiukhulia naye, varaanga khuvoolelana vene khuvene, “Uyu nu mundu shina, khali asemehanga vandu khurula mu vwoni?”
50Nalwo lwa Yesu yavoolela mukhali mwenoyo, “Lisuuvila liolio limali khukhuhonyinya. Simukha utsi mu milembe.”
Currently Selected:
LUKA 7: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
