MARIKO 12
12
Lukanu lwa Vandu Vakoteshitsa Mulimi
(Mat 21:33-46; Luka 20:9-19)
1Yesu yalomoloma khuvo mu tsinganu navoola, “Litukhu lindi, khwaliho nu mundu wali niyaraaka misabibu mu mulimi kwekwe. Yakwevela lukaka, nayeeva havundu hu khukhamululila idivai. Yumbakha munaara kwa vandu vanyala khusinjilakhu nivalinda mulimi. Yakoteshitsa mulimi kwenoko khu valimi vakoteshitswa, natsia mu luchendo ihale wene. 2Lwa litukhu liatukha liu khuchesa, yaruma murumishi wewe khu valimi vakoteshitswa vamuheekhu shitonye shieshie khurula khu lichesa liavo. 3Valimi vakoteshitswa vakumila murumishi mwenoyo, nivamurumula, khandi nivamukhunga vuchila shindu. 4Mwene mulimi yaruma murumishi wundi; valimi vakoteshitswa vamwaraana tsinguma mu murwi, nivamuha tsisoni. 5Mwene mulimi yaruma khandi murumishi wundi, manivamwiira; nivakhola vandi malala mele, varumula valala, khandi niviira vandi. 6Mundu wali narikale khurumwa wonyene, yali mwana wewe wayayaanza. Lukhumalilikha, yaruma mwana wewe khu valimi vakoteshitswa, navoola, ‘Ndi ni lisuuvila valiitsa khuha mwana wanje luyali.’ 7Navutswa valimi vakoteshitswa vavoolelana vene khuvene, ‘Uyu neye mwana wu mwene mulimi, hambi khumwiiri, ma miandu chiechie chiliva chieru!’ 8Khulwa yako, vakumila mwana mwenoyo, nivamwiira khandi nivasiuva mmbili kwekwe ilwanyi wu mulimi kwi misabibu.”
9Yesu yavareeva, “Musuuvilanga mwene mulimi kwi misabibu anyala khukhola shina? Aliitsa khwiira valimi vakoteshitswa, makoteshitsi mulimi kwi misabibu kwenoko khu valimi vakoteshitswa vandi. 10Ni kilikali, munyala khuva mwamanya shia Mahandiko Matakatifu yaka kavoolanga?
‘Lichina lia vumbashi vambakhana livula vukhonyi
liamanya nilikwa liu mukona khuvira machina kandi koosi.
11Yaka nako ku Mwami yali nakholi;
nikava ku khuchenyinya mu tsimoni tsieru!’ ”
12Vimilili va Vayahudi vachelitsa khukumila Yesu, shichila vali vamanyi uvooli lukanu lwenolo khuvarindila. Navutswa varia shituma shia vandu. Khulwa yako, vamulekha nivarulaho.
Lireevo khu Lirunga Vushuru
(Mat 22:15-22; Luka 20:20-26)
13Vafarisayo valala nende vandu valala khurula mu vandu vu mukaanda kwa Herode varumwa khu Yesu khutsia khumureeka na mareevo. 14Vatsia khu Yesu nivamureeva, “Mwechitsi, khwamanya uvoolanga katoto, uvulakhu shindu shikhuheenditsanga mwoyo shichila mundu. Khali uvula liheenda mwoyo liosi khulondokhana khu liiva lia vandu, navutswa wechitsanga vandu katoto shichila lienya lia Nyasaye. Khuvoolele, malako keru kahuchililanga khurunga vushuru khu Mwami wa Roma inoho khuvula khurunga?”
15Navutswa Yesu yalola vwikhola kholitsi vwavo vukhuva valunji, navachipa, “Shichila shina muchelitsanga khundeka? Ndereli isenti indala ngolekhu.”
16Vamulerela isenti indala; navareeva, “Likoondo nende lira lili khu isenti yili ni lia viina?” Vamuchipa, “Ni liu Mwami wa Roma.”
17Khulwa yako, Yesu yavoola, “Nu vulahi, runji khu Mwami wa Roma viu Mwami wa Roma, khandi khu Nyasaye via Nyasaye.” Vachenyela Yesu.
Lireevo khu Lisimushitswa Khurula mu Likhutsa
(Mat 22:23-33; Luka 20:27-40)
18Vasadukayo valala, vavoolanga khwisimukha khwa vandu vakhutsa khurula mu likhutsa khuvulaho, vasimukha nivatsia khu Yesu, nivavoola, 19“Mwechitsi, Musa yakhuhandichila lilako yili: ‘Niiva mundu aliitsa khukhutsa aleshe mukhali wewe vuchila khwivulakhu vaana, amwavo wu mundu mwenoyo aliitsa khukalushitsa mukhutsakhali mwenoyo, khandi yivuli khuye vaana va amwavo wewe wakhutsa yali wivula.’ 20Khulwa yako, khwaliho na vamwavo saba; mukhulundu mwene yahila mukhali, nakhutsa vuchila khwivulakhu mwana wosi. 21Amwavo wewe wa khavili yakalushitsa mukhutsakhali mwenoyo, nakhutsa vuchila khwivulakhu vaana. Malala mele kikholekha khu amwavo wavo wa khavaka, 22khandi khu vali nivarikale voosi. Vamwavo voosi saba vakalushitsa mukhutsakhali mwenoyo, nivakhutsa vuchila khwivulakhu vaana. Lukhumalilikha lwene, mukhutsakhali mwenoyo yakhutsa. 23Khulitukhu lia vandu vakhutsa valiitsa khwisimukha khurula mu likhutsa, aliitsa khuva mukhali wa viina? Vamwavo saba voosi vali vamuhila.”
24Yesu yavachipa, “Mukorelwi! Mwamanya shivune? Shivune shili ndi mushili khumanyakhu Mahandiko Matakatifu inoho tsingulu tsia Nyasaye. 25Lwa vandu vakhutsa valiitsa khwisimukha khurula mu likhutsa, valiitsa khuva khuli tsinjelosi tsiu mwikulu; khandi valiitsa khuvula khuhilana. 26Makhuva khulondokhana khu vandu vakhutsa khwisimukha khurula mu likhutsa: Mushili khusomakhu mu shitabu shia Musa muliango kuvoolanga makhuva khulondokhana khu shisakha shiakhanga mulilu? Shikahandikwamu ndi Nyasaye yavoolela Musa, ‘Ninzi Nyasaye wa Aburahamu, Nyasaye wa Isaka, khandi Nyasaye wa Yakobo?’ 27Shikali ni Nyasaye wa vandu vakhutsa tawe; navutswa ni Nyasaye wa vandu vashili mwoyo. Khulwa yako, mwakorwa.”
Lilako Likali Liene
(Mat 22:34-40; Luka 10:25-28)
28Mulala khu Vechitsi va Malako yaliho, nahulila khuli vali nivahangalitsane mulilomoloma. Lwa yalola ndi Yesu uchipi vulahi Vasadukayo, yatsia khuye, namureeva, “Ni Lilako shina likali liene khuvira kandi?”
29Yesu yachipa, “Lilako liu khuraanga nalio yili, ‘Israeli, hulishitsa! Mwami Nyasaye, uli Nyasaye weru neye Mwami Nyasaye wonyene. 30Uyaanze Mwami Nyasaye, uli Nyasaye wowo nu mwoyo kwokwo kwosi, ni tsingulu tsiotsio tsiosi, khandi tsinganakani tsiotsio tsiosi.’ 31Lilako lia khavili nalio yili, ‘Uyaanze mureende wowo khuli mwene wiyaanza.’ Lilako lindi livulakhuho likali liene khuvira kavili yaka.”
32Mwechitsi wa Malako yavoolela Yesu, “Mwechitsi, uvooli kilikali, Mwami Nyasaye neye Nyasaye wonyene khandi khuvulakhuho nyasaye wundi, nikakhali ye wonyene; 33khandi khutukha mundu ayaanze Nyasaye nu mwoyo kwekwe kwosi, ni tsinganakani tsietsie tsiosi khandi ni tsingulu tsietsie tsiosi; khandi ayaanze mureende wewe khuli mwene yiyaanza. Nu vulahi khulonda Malako kavili yaka, khuvira khuhaana vihanwa viu khusambwa nu khukhola misango chindi chiosi.”
34Yesu yalola khuli mwechitsi wa Malako yali namuchipi nu vusitsa namuvoolela, “Ushili khuva ihale wene khurula khu Vwami vwa Nyasaye.”
Khurula lwenolo, mundu avulakhuho wachelitsa khureeva Yesu mareevo kandi.
Lireevo khu Masiha
(Mat 22:41-46; Luka 20:41-44)
35Lwa Yesu yali niyechitsanga mu Litempeli yareeva lireevo, “Vechitsi va Malako vanyala khuvoola ndina Masiha aliitsa khuva mwitsukhulu wa Daudi? 36Roho Mutakatifu yivaalila Daudi navoola,
‘Mwami Nyasaye yavoolela Mwami wanje;
yikhala hanu khuluveka lu mukhono kwanje musatsa
khutukha lwa khukuurila vatsiku vovo.’
37Daudi yamulaanga ‘Mwami’. Khulwa yako, Masiha anyala khuva ndina mwitsukhulu wa Daudi?”
Lichelihitswa khu Vechitsi va Malako
(Mat 23:1-36; Luka 20:45-47)
Shituma shikali shia vandu vahulishitsanga Yesu vasangala. 38Yesu yechitsa navoola, “Muve vacheli khu veechitsi va Malako, vayaanza khuchenda chenda nivifwali tsikaanzu tsiavo tsindaambi nu khuheelwa milembe na vandu musokoni; 39vayaanza khwikhala khu visoko vilahi muno mu masinagogi nende havundu hali nu luyali mu milukha. 40Vihonelanga vakhutsakhali nu khuvanuula vindu mu tsingo tsiavo; khandi vikholanga vasaalanga lisaala liraambi. Valiitsa khusalilitswa vululu muno!”
Shihanwa shiu Mukhutsakhali Yahaana
(Luka 21:1-4)
41Lwa Yesu yali niyikhale himbi ha livishilu li litempeli, yaheenza nalola khuli vandu valakhulamu tsisenti tsiavo. Vandu vahinda vanyishi valakhulamu tsisenti tsinyishi. 42Mukhutsakhali mumanani yitsa nalakhulamu tsiminjili tsivili tsi tsisenti tsilombanga ling'ondo. 43Yesu yalaanga halala veechi veve, navavoolela, “Muvoolelanga katoto ndi mukhutsakhali uyu ulakhuli mu lisanduku li vihanwa tsisenti tsinyishi khuvira vandi voosi. 44Vandu vahinda valakhulimu khurula khu vuhinda vwavo; navutswa ye, ulakhulimu viosi khurula mu vumanani vwevwe, shiosi shivele shimukhonye mu limenya lielie.”
Currently Selected:
MARIKO 12: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
MARIKO 12
12
Lukanu lwa Vandu Vakoteshitsa Mulimi
(Mat 21:33-46; Luka 20:9-19)
1Yesu yalomoloma khuvo mu tsinganu navoola, “Litukhu lindi, khwaliho nu mundu wali niyaraaka misabibu mu mulimi kwekwe. Yakwevela lukaka, nayeeva havundu hu khukhamululila idivai. Yumbakha munaara kwa vandu vanyala khusinjilakhu nivalinda mulimi. Yakoteshitsa mulimi kwenoko khu valimi vakoteshitswa, natsia mu luchendo ihale wene. 2Lwa litukhu liatukha liu khuchesa, yaruma murumishi wewe khu valimi vakoteshitswa vamuheekhu shitonye shieshie khurula khu lichesa liavo. 3Valimi vakoteshitswa vakumila murumishi mwenoyo, nivamurumula, khandi nivamukhunga vuchila shindu. 4Mwene mulimi yaruma murumishi wundi; valimi vakoteshitswa vamwaraana tsinguma mu murwi, nivamuha tsisoni. 5Mwene mulimi yaruma khandi murumishi wundi, manivamwiira; nivakhola vandi malala mele, varumula valala, khandi niviira vandi. 6Mundu wali narikale khurumwa wonyene, yali mwana wewe wayayaanza. Lukhumalilikha, yaruma mwana wewe khu valimi vakoteshitswa, navoola, ‘Ndi ni lisuuvila valiitsa khuha mwana wanje luyali.’ 7Navutswa valimi vakoteshitswa vavoolelana vene khuvene, ‘Uyu neye mwana wu mwene mulimi, hambi khumwiiri, ma miandu chiechie chiliva chieru!’ 8Khulwa yako, vakumila mwana mwenoyo, nivamwiira khandi nivasiuva mmbili kwekwe ilwanyi wu mulimi kwi misabibu.”
9Yesu yavareeva, “Musuuvilanga mwene mulimi kwi misabibu anyala khukhola shina? Aliitsa khwiira valimi vakoteshitswa, makoteshitsi mulimi kwi misabibu kwenoko khu valimi vakoteshitswa vandi. 10Ni kilikali, munyala khuva mwamanya shia Mahandiko Matakatifu yaka kavoolanga?
‘Lichina lia vumbashi vambakhana livula vukhonyi
liamanya nilikwa liu mukona khuvira machina kandi koosi.
11Yaka nako ku Mwami yali nakholi;
nikava ku khuchenyinya mu tsimoni tsieru!’ ”
12Vimilili va Vayahudi vachelitsa khukumila Yesu, shichila vali vamanyi uvooli lukanu lwenolo khuvarindila. Navutswa varia shituma shia vandu. Khulwa yako, vamulekha nivarulaho.
Lireevo khu Lirunga Vushuru
(Mat 22:15-22; Luka 20:20-26)
13Vafarisayo valala nende vandu valala khurula mu vandu vu mukaanda kwa Herode varumwa khu Yesu khutsia khumureeka na mareevo. 14Vatsia khu Yesu nivamureeva, “Mwechitsi, khwamanya uvoolanga katoto, uvulakhu shindu shikhuheenditsanga mwoyo shichila mundu. Khali uvula liheenda mwoyo liosi khulondokhana khu liiva lia vandu, navutswa wechitsanga vandu katoto shichila lienya lia Nyasaye. Khuvoolele, malako keru kahuchililanga khurunga vushuru khu Mwami wa Roma inoho khuvula khurunga?”
15Navutswa Yesu yalola vwikhola kholitsi vwavo vukhuva valunji, navachipa, “Shichila shina muchelitsanga khundeka? Ndereli isenti indala ngolekhu.”
16Vamulerela isenti indala; navareeva, “Likoondo nende lira lili khu isenti yili ni lia viina?” Vamuchipa, “Ni liu Mwami wa Roma.”
17Khulwa yako, Yesu yavoola, “Nu vulahi, runji khu Mwami wa Roma viu Mwami wa Roma, khandi khu Nyasaye via Nyasaye.” Vachenyela Yesu.
Lireevo khu Lisimushitswa Khurula mu Likhutsa
(Mat 22:23-33; Luka 20:27-40)
18Vasadukayo valala, vavoolanga khwisimukha khwa vandu vakhutsa khurula mu likhutsa khuvulaho, vasimukha nivatsia khu Yesu, nivavoola, 19“Mwechitsi, Musa yakhuhandichila lilako yili: ‘Niiva mundu aliitsa khukhutsa aleshe mukhali wewe vuchila khwivulakhu vaana, amwavo wu mundu mwenoyo aliitsa khukalushitsa mukhutsakhali mwenoyo, khandi yivuli khuye vaana va amwavo wewe wakhutsa yali wivula.’ 20Khulwa yako, khwaliho na vamwavo saba; mukhulundu mwene yahila mukhali, nakhutsa vuchila khwivulakhu mwana wosi. 21Amwavo wewe wa khavili yakalushitsa mukhutsakhali mwenoyo, nakhutsa vuchila khwivulakhu vaana. Malala mele kikholekha khu amwavo wavo wa khavaka, 22khandi khu vali nivarikale voosi. Vamwavo voosi saba vakalushitsa mukhutsakhali mwenoyo, nivakhutsa vuchila khwivulakhu vaana. Lukhumalilikha lwene, mukhutsakhali mwenoyo yakhutsa. 23Khulitukhu lia vandu vakhutsa valiitsa khwisimukha khurula mu likhutsa, aliitsa khuva mukhali wa viina? Vamwavo saba voosi vali vamuhila.”
24Yesu yavachipa, “Mukorelwi! Mwamanya shivune? Shivune shili ndi mushili khumanyakhu Mahandiko Matakatifu inoho tsingulu tsia Nyasaye. 25Lwa vandu vakhutsa valiitsa khwisimukha khurula mu likhutsa, valiitsa khuva khuli tsinjelosi tsiu mwikulu; khandi valiitsa khuvula khuhilana. 26Makhuva khulondokhana khu vandu vakhutsa khwisimukha khurula mu likhutsa: Mushili khusomakhu mu shitabu shia Musa muliango kuvoolanga makhuva khulondokhana khu shisakha shiakhanga mulilu? Shikahandikwamu ndi Nyasaye yavoolela Musa, ‘Ninzi Nyasaye wa Aburahamu, Nyasaye wa Isaka, khandi Nyasaye wa Yakobo?’ 27Shikali ni Nyasaye wa vandu vakhutsa tawe; navutswa ni Nyasaye wa vandu vashili mwoyo. Khulwa yako, mwakorwa.”
Lilako Likali Liene
(Mat 22:34-40; Luka 10:25-28)
28Mulala khu Vechitsi va Malako yaliho, nahulila khuli vali nivahangalitsane mulilomoloma. Lwa yalola ndi Yesu uchipi vulahi Vasadukayo, yatsia khuye, namureeva, “Ni Lilako shina likali liene khuvira kandi?”
29Yesu yachipa, “Lilako liu khuraanga nalio yili, ‘Israeli, hulishitsa! Mwami Nyasaye, uli Nyasaye weru neye Mwami Nyasaye wonyene. 30Uyaanze Mwami Nyasaye, uli Nyasaye wowo nu mwoyo kwokwo kwosi, ni tsingulu tsiotsio tsiosi, khandi tsinganakani tsiotsio tsiosi.’ 31Lilako lia khavili nalio yili, ‘Uyaanze mureende wowo khuli mwene wiyaanza.’ Lilako lindi livulakhuho likali liene khuvira kavili yaka.”
32Mwechitsi wa Malako yavoolela Yesu, “Mwechitsi, uvooli kilikali, Mwami Nyasaye neye Nyasaye wonyene khandi khuvulakhuho nyasaye wundi, nikakhali ye wonyene; 33khandi khutukha mundu ayaanze Nyasaye nu mwoyo kwekwe kwosi, ni tsinganakani tsietsie tsiosi khandi ni tsingulu tsietsie tsiosi; khandi ayaanze mureende wewe khuli mwene yiyaanza. Nu vulahi khulonda Malako kavili yaka, khuvira khuhaana vihanwa viu khusambwa nu khukhola misango chindi chiosi.”
34Yesu yalola khuli mwechitsi wa Malako yali namuchipi nu vusitsa namuvoolela, “Ushili khuva ihale wene khurula khu Vwami vwa Nyasaye.”
Khurula lwenolo, mundu avulakhuho wachelitsa khureeva Yesu mareevo kandi.
Lireevo khu Masiha
(Mat 22:41-46; Luka 20:41-44)
35Lwa Yesu yali niyechitsanga mu Litempeli yareeva lireevo, “Vechitsi va Malako vanyala khuvoola ndina Masiha aliitsa khuva mwitsukhulu wa Daudi? 36Roho Mutakatifu yivaalila Daudi navoola,
‘Mwami Nyasaye yavoolela Mwami wanje;
yikhala hanu khuluveka lu mukhono kwanje musatsa
khutukha lwa khukuurila vatsiku vovo.’
37Daudi yamulaanga ‘Mwami’. Khulwa yako, Masiha anyala khuva ndina mwitsukhulu wa Daudi?”
Lichelihitswa khu Vechitsi va Malako
(Mat 23:1-36; Luka 20:45-47)
Shituma shikali shia vandu vahulishitsanga Yesu vasangala. 38Yesu yechitsa navoola, “Muve vacheli khu veechitsi va Malako, vayaanza khuchenda chenda nivifwali tsikaanzu tsiavo tsindaambi nu khuheelwa milembe na vandu musokoni; 39vayaanza khwikhala khu visoko vilahi muno mu masinagogi nende havundu hali nu luyali mu milukha. 40Vihonelanga vakhutsakhali nu khuvanuula vindu mu tsingo tsiavo; khandi vikholanga vasaalanga lisaala liraambi. Valiitsa khusalilitswa vululu muno!”
Shihanwa shiu Mukhutsakhali Yahaana
(Luka 21:1-4)
41Lwa Yesu yali niyikhale himbi ha livishilu li litempeli, yaheenza nalola khuli vandu valakhulamu tsisenti tsiavo. Vandu vahinda vanyishi valakhulamu tsisenti tsinyishi. 42Mukhutsakhali mumanani yitsa nalakhulamu tsiminjili tsivili tsi tsisenti tsilombanga ling'ondo. 43Yesu yalaanga halala veechi veve, navavoolela, “Muvoolelanga katoto ndi mukhutsakhali uyu ulakhuli mu lisanduku li vihanwa tsisenti tsinyishi khuvira vandi voosi. 44Vandu vahinda valakhulimu khurula khu vuhinda vwavo; navutswa ye, ulakhulimu viosi khurula mu vumanani vwevwe, shiosi shivele shimukhonye mu limenya lielie.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013