MARIKO 13
13
Yesu Yalomoloma Khuli Litempeli Lipomolwa
(Mat 24:1-2; Luka 21:5-6)
1Lwa Yesu yali narulanga mu Litempeli, mulala khu veechi veve yamuvoolela, “Mwechitsi, lolakhu! Machina malahi ku khuchenyinya nende miumbakho chiako!”
2Yesu yamuvoolela, “Ulolanga miumbakho mikali yichi? Khali lichina lilala livulakhuho liliitsa khurikala nilicheleshe khu lindi. Kosi kaliitsa khusiuvwa hasi.”
Vutiinyu nende Litambitswa
(Mat 24:3-14; Luka 21:7-19)
3Lwa Yesu yali niyikhale khu Shikulu shia Misayituni khuluveka lundi lwi Litempeli, Petro, Yakobo, Yohana, nende Andereya vatsia khuye muvwivisi. 4Vareeva Yesu, “Khuvoolele, yaka kaliitsa khwikholekha inyinga shina; khandi ni shina shiliitsa khuva shimanyilu ndi vindu yivi viosi viliitsa khwikholekha?”
5Yesu yavavoolela, “Muve vacheli, khandi mundu avuli khumukaatakhu. 6Vandu vanyishi valiitsa khwitsa khuvirila mu lira lianje nivavoola, ‘Ninzi ye!’ khandi valiitsa khukaata vanyishi. 7Lwa mulihulila maahe nende makhuva khulondokhana khu maahe, muvuli khutechela. Vindu khuli vienevo viliitsa khwikholekha, navutswa matukhu kukhumalilikha kaliitsa khuva nikashili khutukha. 8Vivala viliitsa khukwana vivala vindi. Vwami vuliitsa khwinjilila vwami vundi. Shivala shiliitsa khutechela shia havundu hosi, khandi inzala iliitsa khuvaho. Vindu yivi viosi vili khuli isalila yu mukhali wenyanga khwivula mwana wu khuraanga.
9“Navutswa munyi vene muve vacheli; shichila valiitsa khumukumila nu khumuhila mushiina. Valiitsa khumushutila mu masinagogi; muliitsa khusinjila imbeli wa vamihi nende vami, shichila inzi khuvilwatsila Ivanjeli. 10Navutswa mwilwatse Ivanjeli khu vandu voosi matukhu kukhumalilikha nikashili khutukha. 11Lwa muliitsa khukumilwa numuhilwa mushiina, muvuli khuheendakhu mioyo khulondokhana khu shia muliitsa khuvoola. Lwa isaa iliitsa khuva niyakhatukha, vooli shiosi shia muliitsa khuva numuheelelwi muvoole. Makhuva ka muliitsa khuvoola shikaliitsa khuva kenyu tawe. Kaliitsa khurula khu Roho Mutakatifu. 12Vandu valiitsa khutsama vamwavo vavo khwiirwa; khandi vatata valiitsa khutsama vaana vavo. Vaana valiitsa khulekana na vivuli vavo, khandi valiitsa khuchila viirwi. 13Vandu valala valiitsa khumuhima shichila inzi. Navutswa mundu uliitsa khwitsumishitsa khutukha khumatukhu kukhumalilikha, aliitsa khuhonyinywa.”
Shindu Shitamanu Muno Shiukhutechelitsa
(Mat 24:15-28; Luka 21:20-24)
14“Muliitsa khulola ‘Shindu Shitamanu Muno Shiukhutechelitsa’ nishisinjile havundu ha shitushili shivuli khuva nishiliho.” (Usoma amanye: khutukha amanye shia kavoolanga) “Nalwo lwa vandu vali mu lusomo lwa Yudeya valiitsa khwilukha vatsia mu vikulu. 15Mundu uli khushisechese shi inzu yeye aliitsa khuvula khwikha, inoho khwinjila munzu khuvukula shindu shiosi. 16Mundu uli mu mulimi aliitsa khuvula khukalukha khuvukula inguvu yeye. 17Vandu vakhali vaheelitsa nende vanunyinyanga vaana valiitsa khuva khu vutiinyu muno mumatukhu kenako! 18Musaale khu Nyasaye kavuli khwikholekha mumatukhu ku vushindu! 19Vutiinyu vuliitsa khuvaho mumatukhu kenako vuliitsa khuva vutamanu muno, vwa vandu mu shivala shiosi vashili khulolakhu khurula Nyasaye naloonga shivala khutukha mumatukhu kanu. Inoho shindu shivulakhuho shiliitsa khwikholekhakhu khandi khuli shienesho. 20Navutswa Mwami Nyasaye wachehitsa matukhu kenako; niiva yakhuvuli khukachehitsa, mundu avulakhuho unyala khwihonolokha. Navutswa shichila vandu veve vayarovola, wachehitsa matukhu kenako.
21“Niiva mundu aliitsa khumuvoolela, ‘Lola, Masiha ali hanu!’ Inoho, ‘Lola, ali yeyo!’ -- Muvuli khusuuvila muye. 22Masiha vu vuvehi nende vaprofeti vu vuvehi valiitsa khwitsa. Navo valiitsa khukhola viloleshitsu nende vindu viu khuchenyinya khukaata vandu va Nyasaye yarovola, nikanyalikha. 23Navutswa muve vacheli! Mali khumuvoolela vindu viosi matukhu ku khwikholekha nikashili khutukha.
Khukalukha khu Mwana wu Mundu
(Mat 24:29-31; Luka 21:25-28)
24“Nukhwakhamala vutiinyu vwa matukhu kenako, liuva liliitsa khumwama, khandi mweli kuliitsa khutsima khwakha, 25tsinyining'ini tsiliitsa khwakukha khurula mu malesi, khandi tsingulu tsiu mwikulu khwinuya nyinywa mu makono katsio. 26Mwana wu Mundu aliitsa khulolekha mu malesi niyitsanga ni tsingulu tsinyishi nende vukhumi. 27Aliitsa khuruma tsinjelosi tsietsie khuvunjelitsa vandu va Nyasaye yarovola khurula mu tsimbeka tsine tsiosi tsiu khulilova.
Liechitso khu Musala ku Mukhuyu
(Mat 24:32-35; Luka 21:29-33)
28“Mweche liechitso yili khurula khu musala ku mukhuyu. Lwa tsisia tsiakwo tsivetsanga nitsili tsimbisi khandi tsinyelele, kuraanganga khwamulukha masambu, mamumanya shimiyu shili himbi khutukha. 29Munjila indala yeneyo, lwa muliitsa khulola vindu yivi nivikholekhanga, muliitsa khumanya ndi inyinga yakhava himbi khutukha, yirecheshe khuraanga. 30Musuuvilitsanga ndi vindu yivi viosi viliitsa khwikholekha, vandu voosi vashili mwoyo nunundi nivashili khukhutsa. 31Likulu nende lilova viliitsa khurulaho; navutswa makhuva kaanje kaliitsa khuvula khurulaho.
Mundu Avulakhuho Wamanya Litukhu Inoho Isaa
(Mat 24:36-44)
32“Mundu avulakhuho wamanya litukhu inoho isaa, khali tsinjelosi tsiu mwikulu, inoho Mwana, navutswa Tata wonyene neye wamanya. 33Muve vacheli, khandi mwirecheshe, shichila mwakorwa lwa isaa yeneyo iliitsa khutukha. 34Kaliitsa khwikholekha khuli mundu utsitsanga khu luchendo, arulanga munzu mwemwe naheele varumishi veve vunyali vu khuchisinjilila, shia murumishi khukhola muhinzilu kwekwe kwa yaheelwa, khandi voolela murumishi ulindanga ha muliango atsililile khuheenza. 35Khulwa yako, muve vacheli, shichila mwakorwa khumanya lwa mwene inzu aliitsa khukalukha, kave khulukolovo inoho hakari mu vutukhu inoho itaywa nitsia khulakula inoho nuvushele mu mavwevwe. 36Niiva aliitsa khukalukha vwangu avuli khumunyolakhu nu mushikonanga tsindolo. 37Kamuvoolelanga, mbolelanga vandu voosi: Heenzi!”
Currently Selected:
MARIKO 13: LLLCATHOLIC
Highlight
Share
Copy
Want to have your highlights saved across all your devices? Sign up or sign in
© The Bible Society of Kenya, 2013
