MARIKO 15

Yesu Yahilwa khu Pilato

(Mat 27:1-2,11-14; Luka 23:1-5; Yoh 18:28-38)

1Nukushili mu mavwevwe, vasalisi vakali nende vasakhulu, veechitsi va Malako, na vandu vi Shikhaalo shiosi, vakanila halala, nivaloshitsa ka vakhola. Vavoha Yesu ni minyololo, nivamurulitsaho. 2Vahila Yesu khu Pilato. Pilato yamureeva, “Nivi Mwami wa Vayahudi?” Yesu yamuchipa, “Katoto uvooli.”

3Vasalisi vakali vayaala Yesu khulondokhana khu vindu vinyishi. 4Khulwa yako, Pilato yamureeva khandi, “Uvulakhu lichipu liu nyala khuhaana? Hulishitsa vindu vinyishi vichilanga nivakhuyaala!”

5Navutswa Yesu yambakhana khuvoolakhu shindu shiosi, ma Pilato nava nilichenya.

Yesu Yakhalachilwa Likhutsa

(Mat 27:15-26; Luka 23:13-25; Yoh 18:39—19:16)

6Shia litukhu liu Mulukha kwa Pasaka, Pilato yali nu mwiima kukhuvoholola muvohe mulala wa Vayahudi venyanga khuvohololwa. 7Mumatukhu kenako, mundu walaangwangwa Baraba yali wavohwa mucheela nende vandu vanuuli vali niviira vandu mumatukhu ki shileeche. 8Lwa shituma shia vandu vivunjelitsa, nivareeva Pilato akhole khuli ya vakholelanga shia khase khosi, 9Pilato yavareeva, “Mwenyanga muvohololele Mwami wa Vayahudi?” 10Pilato yali namanyi ndi vasalisi vakali vali vahaani Yesu khuye, shichila vali ni imbotokha.

11Navutswa Vasalisi vakali vavwanyinya mulilu mu shituma shia vandu vareeve Pilato avavohololele Baraba. 12Pilato yalomoloma khandi khu shituma shia vandu navoola, “Mwenyanga khole shina mundu wamulaanganga Mwami wa Vayahudi?”

13Navo valaanjilila nivavoola, “Avambwi!”

14Pilato yavareeva, “Ni shindu shina shitamanu shiakholi?” Navo valaanjilila ikulu muno nivavoola, “Avambwi!”

15Pilato yenya khuyaanzitsa shituma shia vandu, navavohololela Baraba. Yahaana lilako Yesu ashiutwi, nu khuvambwa.

Vasikali Vakholela Yesu Shihenye henye

(Mat 27:27-31; Yoh 19:2-3)

16Vasikali vahila Yesu mu lwanyi lu mukari (kavoolanga Mupritoriomu), nivalaanga halala mukaanda kwa vasikali voosi. 17Vafwala Yesu ikaanzu ya sambarau, nivalukha ingara ya mavwa, nivafwala Yesu khu murwi kwekwe. 18Varanga khushelitsa Yesu, nivavoola, “Uhindile Mwami wa Vayahudi.”

19Varumula Yesu nu lusala khu murwi kwekwe, vamusutsila maree, nivamusikamila nu khusaala khuye. 20Lwa vali nivakhamala khumukholela shihenye henye, vamufwalula ikaanzu ya sambarau nivamufwala tsinguvu tsietsie. Vamurulitsa ilwanyi nivatsia khumuvamba.

Yesu Yavambwa khu Musalaba

(Mat 27:32-44; Luka 23:26-43; Yoh 19:17-27)

21Lwa vali nivali khunjila vakana nu mundu walaangwangwa Simoni, khurula mu litaala lia Kurene, nali tata wa Alekisanda nende Rufu. Simoni yali narulanga mu shivala shiavo natsitsanga mu litaala likali; ma vasikali nivamunika khuchinga musalaba kwa Yesu. 22Vahila Yesu havundu halaangwangwa Golokotsa, kavoolanga, “Havundu hi Shihanga.” 23Vachelitsa khuha Yesu idivai yatsukanyinywa lunyasi lulaangwangwa manemane, navutswa Yesu yambakhana khuching'wa.

24Khulwa yako, vamuvamba khandi nivakavulana tsinguvu tsietsie vene khuvene. Vakhuva ikura khumanyinya shia inguvu ya mundu yenyekhanga anyole.

25Tsiali nitsili tsisaa tsivaka tsia mavwevwe lwa vavamba Yesu. 26Makhuva kachila Yesu nakhalachilwa kavoolanga: “Uyu neye Mwami wa Vayahudi.” 27Vavamba khandi Yesu na vandu vanuuli vavili, mulala khuluveka lu mukhono kwekwe musatsa na wundi khuluveka lu mukhono kwekwe mukhali. [ 28Munjila iyi, Mahandiko Matakatifu karweshitswa kavoolanga, “Yasanga mulinyakhana lia vooni.”]#15:28 Mahandiko Matakatifu malala kakhale kavula luvaso lwa 28.

29Vandu vavirakhuho vanuyanuya mirwi chiavo, nivasiuvila Yesu manyeko: “Shio! Yivi wavoola uliitsa khupomolanyinya Litempeli, khandi uliumbashe mumatukhu kavaka! 30Yikha hasi khurula khu musalaba, wihonyinyi mwene!”

31Munjila indala yeneyo, vasalisi vakali nende veechitsi va Malako, vakholela Yesu shihenye henye, khandi nivavoolelana vene khuvene, “Yahonyinyanga vandi, navutswa shianyala khwihonyinya mwene tawe! 32Leshi khulole Masiha, Mwami wa Israeli niyikha hasi khurula khu musalaba nunundi, khu khusuuvile muye!”

Vandu vavili vali nivavambwa na Yesu, vamunyeka khandi.

Likhutsa lia Yesu

(Mat 27:45-56; Luka 23:44-49; Yoh 19:28-30)

33Lwa tsisaa sita tsiu mbasu tsiatukha, shivala shiosi shiamwama nishikwa shisuundi khutukha tsisaa tisa. 34Lwa tsisaa tisa tsiatukha, Yesu yalila nu mwoyo mukali, “Eloi, Eloi, lama Sabaktani,” nakhwo khuvoola, “Nyasaye Wanje, Nyasaye Wanje, shichila shina unzivale?”

35Vandu valala valiho vahulila navoolanga ndio, nivavoola, “Hulishitsi, alaanganga Eliya!”

36Mulala khu vandu venavo yilukhaka vwangu navukula shitasi, maniyinikha mu idivai. Yavoha khu shisala. Yashichinguula ikulu khutukha khu munwa kwa Yesu, navoola, “Lindilili! Khulole niiva Eliya aliitsa khumurulitsa khu musalaba!”

37Yesu yalila nu mwoyo mukali, nakhutsa.

38Luvaala lwali nulwelela mu Litempeli lwarandukhamu hali khavili, khurula ikulu khutukha hasi. 39Mwimilili wa vasikali imia indala wali nasinjile imbeli wu musalaba, yalola khuli Yesu yalila#15:39 yalila: Mahandiko malala kakhale kavula “Yesu yalila.” khandi khuli yakhutsa. Yavoola, “Ni kilikali, mundu uyu yali Mwana wa Nyasaye!”

40Khwaliho na vandu vakhali valala, vaheenzelelanga khurula ihale wene. Valala khuvo vali Mariya Magadalena, Mariya mama wa Yakobo mushie nende Yosefu, nende Solome. 41Vali valondi Yesu lwa yali nali mu lusomo lwa Galilaya, khandi vali vamukhonyi. Vakhali vandi vanyishi vali nivaruli naye Yerusalemi valiho khandi.

Khuyeveelwa khwa Yesu mu Shilindwa

(Mat 27:57-61; Luka 23:50-56; Yoh 19:38-42)

42Lwa khulukolovo khwatukha, shichila liali Litukhu liu Khwirechekha, nakhwo khuvoola litukhu li Lisabato nilili himbi khutukha; 43Yosefu, wi litaala lia Arimatseya, mulala khu vandu vali nivamanyikhana vi Shikhaalo, wali nalindililanga khandi Vwami vwa Nyasaye khwitsa, yasimukha natsia khu Pilato vuchila khuria; nareeva mmbili kwa Yesu.

44Pilato yali nilichenya lwa yahulila ndi Yesu umali khukhutsa. Yalaanga mwimilili wa vasikali imia indala, namureeva niiva Yesu umali khukhutsa. 45Lwa yahulila ka mwimilili wa vasikali imia indala yali namuvoolele, yahaana mmbili kwa Yesu khu Yosefu. 46Yosefu yakuula luvaala, niyishitsa mmbili kwenoko hasi, khandi nakuvoha muluvaala. Yakura mu shilindwa shiali nishiayeevwa mu lwanda. Yakolongominyakhu lichina likali, nilikhunikha mu vwinjililu vwi shilindwa. 47Mariya Magadalena nende Mariya mama wa Yosefu vali nivaheenzelelanga, nivalola ha mmbili kwa Yesu kwayeveelwa.

Currently Selected:

MARIKO 15: LLLCATHOLIC

Highlight

Copy