Luk 17
17
Îkanûkia rîa ûrîa ûgatûma muntû ûngî eeyia
(Mat 18.6-7,21-22; Mar 9.42)
1Jesû areera aritwa baawe atîrî, “Mantû ja gûtûma muntû eeyia no mwanka jeeje. Îndî wûi kîrî ûrîa ûkajareta! 2Bwabua muntû ûu akaogeerwa iiga rîa kûthia nkingo na akagerwa îrieene, antû eeja gûtûma ûmwe wa baba baniini eeyia. 3#Mat 18.15 Imenyeereni! Muntû akëeja gûkwîîria, mûkaanie; na akëeja kwirira mûrekere. 4Akëeja gûkwîîria maita mûgwanja ntukû îmwe, îndî na akeeja maita mûgwanja agîkwîraga, ‘Ndîkwirira,’ no mwanka ûmûrekere.”
Wîtîkio
5Atûmwa bareera Mwathani atîrî, “Twongeere wîtîkio bweetû!” 6Mwathani arauga, “Bûkëethîrwa bûrî na wîtîkio bûbûnini ta mpîndî ya mûthandûkû, bwoomba kwîra mûkûû jûjû: ‘Kûûka na ûgaciaande îrieene,’ na jûkabwathîkîra.”
Ngûgî ya nthûûmba
7Ningî Jesû arabooria, “Nî muntû ûrîkû kîrî buî, arî na nthûûmba yaawe yuumîte kûrima kana yuumîte kûrîîthia ng'ondu, ûmîîra ‘Kûrûka ntûti na ûrîe biakûrîa?’ 8Anga teeka akamîîra, ‘Îkîra nguû irîa ûtumagîra ûkîruga na ûndugîre biakûrîa. Rîu ûndeetere mpambe ndîe na nyue, naagwe ûcoke ûrîe na ûnyue?’ 9Nthûûmba îîu îtîcokagîrua nkaatho nîûntû bwa kûthithia ûrîa îbuîrîte kûthithia. 10Tontû bûû, kinya buî rîrîa bwathithia jonthe jarîa bûkûbuîrîte kûthithia, ugageni atî, ‘Tuî tûrî nthûûmba itîagîrîte, tûthithîrie ûrîa tûbuîrîte kûthithia.’”
Jesû kworia antû îkûmi baarî na mûtigiri
11Rîrîa Jesû aarî rûgendoone eetîte Jerusalemu, nî aakûrûkîrîîre mwankeene jwa Samaria na Galili. 12Agîtonyaga ntûûreene îmwe nî aatirimanîre na antû îkûmi baajîtue nî mûtigiri. 13Antû bau bararûngama gataaria na barakaya bakiugaga, “Itû Jesû Mwathi weetû, twigîîrue kîaao.” 14#Ala 14.1-32 Jesû akûboona arabeera, “Îteeni bûgacionanie kîrî athînjîri-Mûrungu.” Barî njîreene barabua. 15Rîrîa ûmwe waao oonere akworua aracoka agîkumagia Mûrungu na kajû gakanene. 16Nî aairingîre nthî mbere ya Jesû aramûcokeria nkaatho. Muntû ûu aarî Mûsamaria. 17Jesû arooria, “Tî antû îkûmi boorerue? Barîkû bau bangî kenda? 18Gûtî ûngî ûracoka gûcokeria Mûrungu nkaatho, tiga mûgeni ûûjû.” 19Rîu Jesû areera muntû ûu atîrî, “Ûkîîra na ûciîtîre nîûntû wîtîkio bwaaku nîbu bwatûma ûbua.”
Kwîja kwa Ûnene bwa Mûrungu
(Mat 24.23-28,37-41)
20Jesû akûûrua nî Afarisayo bamwe rîrîa Ûnene bwa Mûrungu bûkeeja, nî aabeerîre atîrî, “Ûnene bwa Mûrungu bûtîîja bûkionagwa bwîrwa nîbu bûbû! 21Ningî gûtî muntû ûkoomba kuuga, ‘Tegeeni bûrî aja!’ Kana auga, ‘Tegeeni bûrî arîa!’ Nîkwîthîrwa Ûnene bwa Mûrungu nî kîrî buî bûrî.”
22Rîu areera aritwa baawe, “Îgiita rîgakinya rîrîa bûkairîrîria kwona Mûtaana wa Muntû kinya noo ntukû îmwe îndî bûtîmwona. 23Antû bakabwîra, ‘Tegeeni arî arîa!’ Kana babwîre, ‘Tegeeni arî aja!’ Buî menyeni bwîta, kana bûbathingata. 24Nîkwîthîrwa ntukû îrîa Mûtaana wa Muntû akeeja akoonwa nî antû bonthe o ta ûrîa rweni rwenagia rûkoonwa îgûrû rîonthe. 25Îndî mbere no mwanka aambe athangîkue mono na aregwe nî nthukî îîjî. 26#Kîam 6.5-8 O ta ûrîa gwakari îgiiteene rîa Noa, nîu gûkeethîrwa gûkari rîrîa Mûtaana wa Muntû akeeja. 27#Kîam 7.6-24 Antû nî baarîîjaga na bakanyua, na nî baagûranaga na bakagûrwa, mwanka ntukû îrîa Noa aakûrûkîre ndeene ya sabina. Mbura ya maburiko nî yaurîre na îrathiria antû bonthe. 28#Kîam 18.20—19.25 Gwakari o ta ûu îgiita rîa Loti. Antû nî baarîîjaga na bakanyua, na nî baagûranaga na bakagûrwa. Nî baandaga mbeeû na bagaaka nyomba. 29Îndî ntukû îrîa Loti aaumagarîre Sodomu, nîrîo ngai ya mwanki jwa ûbiriti yaurîre kuuma îgûrû na îraîthia antû bonthe. 30O ûu nîu gûgakara ntukû îrîa Mûtaana wa Muntû akoonanua. 31#Mat 24.17-18; Mar 13.15-16 Ntukû îîu muntû ûrîa ûkeethîrwa arî îgûrûgûrû rîa nyomba, agákinya nthî kûjûkia into biaawe birîa birî nyomba. Ningî ûrîa ûkeethîrwa arî muundeene, agácoka nja. 32#Kîam 19.26 Nî bûkûririkana mwekûrû wa Loti! 33#Mat 10.39; 16.25; Mar 8.35; Luk 9.24; Joh 12.25 Muntû wonthe ûrîa ûcwaga kwonokia ûtûûro bwaawe akabwaga. Îndî ûrîa ûraîrwa nî ûtûûro bwaawe akabwonokia. 34Ndîbwîra atî, ûtukû bûu, antû baîrî bakeethîrwa bamami gîtandeene kîmwe na ûmwe ajûkue na ûngî atigwe. 35Eekûrû baîrî bakeethîrwa bagîkiaga barî amwe, na ûmwe ajûkue na ûngî atigwe. [ 36Antû baîrî bakeethîrwa barî muundeene jûmwe na ûmwe ajûkue na ûngî atigwe.]”#17.36 Mauku jamwe ja Kîgriiki jatî na mûstarî jûjû. 37Aritwa baawe baramûûria atîrî, “Mwathani, nîkû mantû jaja jagakarîka?” Nawe arabeera, “Arîa kiimba kîrî, nîo nderi ciûthûranaga.”
Currently Selected:
Luk 17: KIMERUBIBLE
Highlight
Share
Copy
Want to have your highlights saved across all your devices? Sign up or sign in
KIMERU BIBLE WITH DC
©Bible Society of Kenya, 2009, 218
