Luk 9

Jesû gûtûma aritwa îkûmi na baîrî

(Mat 10.5-15; Mar 6.7-13)

1Jesû nî eetîre aritwa barîa îkûmi na baîrî amwe, na arabaa inya na waatho bwa kwînga roho inthûûku cionthe na kworia barîa baajîtue. 2Rîu arabatûma beeta gûtûmîîria mantû jegiî Ûnene bwa Mûrungu, na kwooria barîa baajîtue. 3#Luk 10.4-11; Maj 13.51 Aabatûmîre akiugaga, “Bûkájûkia gantû kinya karîkû gagûtumîra rûgendoone rweenu: Bûkájûkia rûturo, kana kîondo, kana biakûrîa, kana mbeecha. Ningî bûgákamata nguû ijîîrî. 4Mûciî jûrîa bûkagwatwa ûgeni, kareeni ku mwanka rîrîa bûkauma ntûûreene îîu. 5Bûkiuma ntûûra îrîa îkarega kûbûgwata ûgeni, ringaringeni tîîri îrîa îkeethîrwa îrî magûrûûne jeenu nîkenda yaa ûkûûjî bwa kûmîgambithia.” 6Tontû bûû, aritwa baraumagara na bareeta bagîtumîîragia Nteto Injega na bakîoragia antû barîa baajîtue ntûûreene cionthe.

Herode kwigua mantû jegiî Jesû

(Mat 14.1-12; Mar 6.14-29)

7 # Mat 16.14; Mar 8.28; Luk 9.19 Rîrîa Herode ûrîa waarî mûnene wa nthîgûrû ya Galili, aigîrue mantû jarîa Jesû aarî akûthithia, nî aathangîkîre nkoroone mono nîûntû kûrî bo baugaga atî, “Nî Johana Mûbatithania ûriûkîte kuuma kîrî akuû.” 8Kûrî bangî baugaga, “Nî Elija ûracokere na bangî bakauga, ‘Nî ûmwe wa iroria birîa biatûûraga teene ûriûkîte.’” 9Herode arauga, “Ûu nkwigua antû bakîaria mantû jamwegiî nûû? Anga ntagitîre Johana Mûbatithania nkîngo?” Tontû bûû, Herode nî eendaga kwona muntû ûu.

Jesû kûmaathîra antû ngiri ithaano

(Mat 14.13-21; Mar 6.30-44; Joh 6.1-14)

10Atûmwa bagûcoka, nî beerîre Jesû jonthe jarîa baarî bakûthithia. Nawe arabatongeeria barî bonka bareeta ntûûreene yeetagwa Bethisaida. 11Rîrîa kîrîndî kîamenyere kûrîa aarî agwîta, kîramûthingata mwanka ku. Jesû arabagwata ûgeni na arambîrîria kûbaritana mantû jegiî Ûnene bwa Mûrungu. Ningî arooria barîa baajîtue. 12Gwatua gûtûka aritwa barîa îkûmi na baîrî bareeta kîrî Jesû na baramwîra, “Rîîkania na kîrîndî gîîte ntûûreene na miuundeene îrîa îrî akuî gîgaicûîre biakûrîa na gûntû gwa kûrara nîûntû aja tûrî gûtîtwîrwe nî antû.” 13Îndî Jesû arabeera, “Bacwîreni gîntû gîa kûrîa.” Baramûcokeria, “Gûtî biakûrîa tûrî nabio tiga mîgaate îtaano na makûyû jaîrî akî; nonga twîîta kûgûrîra kîrîndî gîkî kîonthe biakûrîa.” 14Kîrîndî kîu kîaarî na arûme ta ngiri ithaano. Jesû areera aritwa baawe atîrî, “Beereni bakare nthî ikundi bia antû mîrongo îtaano îtaano.” 15Aritwa barathithia ûu beerîrwe, na barakarithia antû bonthe nthî. 16Rîu Jesû arajûkia mîgaate îîu îtaano, na makûyû jaîrî, na araraithîîria bwa îgûrû, na arabitharima na arabing'enyûranga. Aranenkera aritwa nîkenda bagaîra antû. 17Bonthe bararîa na baranyira; aritwa baroothûrania birîa biatigeere baroojûria ikabû îkûmi na biîrî.

Peterû kuuga Jesû nîwe Mesia

(Mat 16.13-19; Mar 8.27-29)

18Ntukû îmwe Jesû nî aarî na aritwa baawe gûntû gûtaarî na antû akîrombaga. Arabooria atîrî, “Antû baugaga ndî ûû?” 19#Mat 14.1-2; Mar 6.14-15; Luk 9.7-8 Nabo baramûcokeria atîrî, “Bamwe baugaga ûrî Johana Mûbatithania na bangî bakauga ûrî Elija na kinya bangî bakauga ûrî kîroria kîmwe kîa birîa bia teene kîriûkîte.” 20#Joh 6.68-69 Rîu arabooria, “A buî buugaga ndî ûû?” Peterû aramûcokeria atîrî, “Ûrî Mesia, kuuma kîrî Mûrungu.”

Jesû kuuga akathangîkua na ooragwe

(Mat 16.20-28; Mar 8.30—9.1)

21Rîu Jesû arabakaania batîkeere muntû kinya ûrîkû ûntû bûu. 22Ningî arabeera atîrî, “Mûtaana wa Muntû no mwanka athîînue mono na aregwe nî akûrû na athînjîri-Mûrungu barîa anene na aritani ba Waatho. Akooragwa îndî ariûke nyuma ya ntukû ya ithatû.”

23 # Mat 10.38; Luk 14.27 Rîu areera antû bonthe ûjû, “Këethîra muntû kinya ûrîkû nî akwenda kûnthingata, nî atige gûcienda akamate mûtharaba jwaawe ntukû cionthe anthingate. 24#Mat 10.39; Luk 7.33; Joh 12.25 Nîkwîthîrwa muntû ûrîa ûkeenda kwonokia ûtûûro bwaawe akaûrîrwa nîbu. Îndî o muntû ûrîa ûkaaga ûtûûro bwaawe nîûntû bwaakwa, akoonokua. 25Nî umithio bûrîkû muntû akoona, këethîra akaewa nthîgûrû yonthe îndî aage mwoyo na eenyange wengwa? 26Nîkwîthîrwa muntû ûrîa ûkaigua nthao nîûntû bwaakwa kana aigue nthao nîûntû bwa ûritani bwaakwa, nîu rîrîa Mûtaana wa Muntû akeeja arî na mwago jwaawe na jwa Îthe na araîka barîa atheru, akaigua nthao nîûntû bwa muntû ûu. 27Îndî ndîbwîra na mma atî kûrî bo barûngi aja batîkua mbere ya boona Ûnene bwa Mûrungu.”

Jesû kûgarûka na kûthaara

(Mat 17.1-8; Mar 9.2-8)

28 # 2Pet 1.17-18 Kûrî ta ntukû inyanya nyuma ya Jesû akuuga mantû jau, nî eetîre na Peterû na Johana na Jakubu baraitia kîrîmeene kûromba. 29Rîrîa aarombaga, ûthiû bwaawe na nguû nî biagarûkîre na bireerûa cwee. 30Antû baîrî baraambîrîa kwaria nawe: nabo baarî Musa na Elija. 31Baarî na mwago jûmûnene na baraaria na Jesû ûrîa akooragîrwa Jerusalemu nîkenda mûbango jwa Mûrungu jûûjûra. 32Îgiita rîu Peterû na bau bangî nî bamami toro îndito. Bagûûkîîra kuuma toroone baroona mwago jwaawe na baroona antû baîrî barûngi amwe nawe. 33Rîrîa antû bau beendaga gwîta, Peterû areera Jesû atîrî, “Mûritani, bwabua tûgatûûra aja. Reka twake tûgaanda tûthatû: kamwe gaaku na kangî ka Musa na kangî ka Elija.” Îndî Peterû atamenyaga ûrîa augaga. 34O akiugaga ûu, îtu rîrabakûnîkîra na aritwa baramaka mono. 35#Isa 42.1; Mat 3.17; 12.18; Mar 1.11; Luk 3.22 Baraigua kajû kuuma îtuune rîu gakiugaga, “Ûûjû nî Mûtaana waakwa ûrîa nthuurîte; mûthikagîîreni!” 36Kajû gakîthiria kwaria baroona Jesû arî wenka. Aritwa bau nî baakirîre ki, na îgiita rîu rîonthe bateera muntû kinya ûrîkû, mantû jarîa baarî bakwona.

Jesû kworia kaana kaarî na roho înthûûku

(Mat 17.14-18; Mar 9.14-27)

37Rûûneene barenama baumîte kîrîmeene, na antû babaingî baramûthagaana. 38Muntû ûmwe areetana, “Mûritani, ndakwerenca njû ûraithe mwana waakwa wa mûûmwe! 39Roho înthûûku îmûinyaga na agakaya na akagirîka na akarita mîûjî. Ningî nî îmûthangîkagia îgiita rîrîraaja îtîkûmûrekia. 40Naani ndîkwerenca aritwa baaku bamîînge îndî nî baremerwe.” 41Jesû aracokia, “Îbuî antû ba nthukî îtî na wîtîkio na închebûku! Ngatûûrania naabuî na mbûgwatîrîte mwanka rî? Reete mwana waaku aja.” 42Mbere ya mûtaana aakinya kîrî Jesû, roho îîu îramûgwîthia nthî na aragirîka. Îndî Jesû aragondokera roho îîu nthûûku na mwana ûu arabua. Jesû aramûcokia kîrî îthe. 43Antû bonthe bararigarua mono nî inya înene ya Mûrungu.

Jesû kwaria kaîrî mantû jegiî gûkua na kûriûka kwaawe

(Mat 17.22-23; Mar 9.30-32)

Rîrîa barigarîtue nî mantû jonthe jarîa athithîtie, Jesû areera aritwa baawe, 44“Thikîîreeni bwega nteto irîa nkabwîra nandî: Mûtaana wa Muntû agakunyaanîrwa nîkenda ooragwa.” 45Îndî aritwa baawe bararemwa gûciûra nteto iu nîûntû bataguûrîri kûmenya gîtûmi gîacio. Nî baaremerwe kûmûûria gîtûmi kîa nteto iu nîûntû nî baarî na ûguaa.

Ûrîa mûnene nkûrûki ya bangî

(Mat 18.1-5; Mar 9.33-37)

46 # Luk 22.24 Aritwa nî baambîrîrie gûkararania bakîuranagia ûrîa mûnene nkûrûki ya bangî kîrî bo nî ûrîkû. 47Rîrîa Jesû aamenyere ûrîa baathûgaanagia, nî aajûkîrie kaana arageeka akuî nawe 48#Mat 10.40; Luk 10.16; Joh 13.20 na arabeera, “Muntû wonthe ûrîa ûgwataga kaana ta gaka ûgeni riîtweene rîaakwa, nî ni agwataga ûgeni. Ningî wonthe ûrîa ûngwataga ûgeni nî Ûrîa waantûmîre agwataga ûgeni. Tontû bûû, ûrîa mûnini buru kîrî buî bwinthe, nîwe ûrîa mûnene nkûrûki ya bangî.”

Ûrîa ûtîrûjaga naabuî arî na ngwatanîro naabuî

(Mar 9.38-40)

49Johana aramûcokeria atîrî, “Mûritani, nî twonere muntû akîîngaga roho inthûûku agîtumagîra riîtwa rîaaku, naatuî twamûkaania nîûntû tî ûmwe weetû.” 50Îndî Jesû aramwîra, “Bûgákania muntû ta ûu nîûntû ûrîa ûtîkûthithia mantû giutatî kîa jarîa bûkûthithia, arî na ngwatanîro naabuî.”

Asamaria kûrega kûgwata Jesû ûgeni.

51Rîrîa ntukû ciaawe cia gwitia îgûrû ciaarî akuî, nî aatuîre ageeta Jerusalemu. 52Aratûma antû bamwe beetaga barî mbere nîkenda bathuranîra mantû jonthe mbere ya akinya. Bagwîta baratonya ntûûreene îmwe ya nthîgûrû ya Samaria. 53Îndî antû bararega kûmwîtîkîîria nîûntû eetîte Jerusalemu. 54#2Ane 1.9-16 Rîrîa bamwe ba aritwa baawe tabo Johana na Jakubu, boonere ûu, barooria Jesû, “Mwathani, nî ûkwenda twîtie mwanki kuuma îgûrû jûbathirie?” 55Îndî arabaraithîria na arabakaania. 56Rîu Jesû amwe na aritwa baawe barakûrûka na bareeta ntûûreene îngî.

Barîa babuîri kwîthîrwa barî athingati ba Jesû

(Mat 8.19-22)

57Barî njîreene, muntû ûmwe areera Jesû, “Ngakûthingata o kunthe kûrîa ûgeeta.” 58Jesû arauga, “Mbîrwa irî na marinya jaacio na nyoni irî na itara; îndî Mûtaana wa Muntû atî antû a kûrara.” 59Areera muntû ûngî, “Nthingata.” Îndî muntû ûu arauga, “Mwathani, ka mpambe mbîte nthike baaba.” 60Jesû aramwîra, “Tiga akuû bathike akuû baao; îndî gwe îta ûgatûmîîrie mantû jegiî Ûnene bwa Mûrungu.”

61 # 1Ane 19.20 Muntû ûngî aramwîra, “Mwathani, ngakûthingata, îndî ka mpambe mbîte nkeere antû ba mûciî jwaakwa batigwe bwega.” 62Jesû aramûcokeria, “Muntû wonthe akîrîmaga na mûraû akaraithîria nyuma, muntû ta ûu atîagîrîte gûtonya Ûnene bwa Mûrungu.”

Currently Selected:

Luk 9: KIMERUBIBLE

Highlight

Copy