DUKU 12

Chisɔsi‑a a fɛ denɛ n na si

(Matiu 10:26-33; 12:32; 10:19-20)

1A tima chɛ a, mɔ wu sɛsɛ a kan‑da wan Chisɔsi tena. Mɔɛ n da a ni koo, an ni ka wan tɛn tɛn‑da an nyɔn ma. Mbɛ Chisɔsi‑a a kuu sɔ a fɔ‑a a fɛ denɛ n pɛn ye, a ɔ, “Mmɔ 'a Chu mɔɛ chɛ nu, miin mu Fayisii n na, yisinɛ ɛ wan an boo ɔ. Wo wo kun ma fɛn an yisinɛ chɛ boo ɔ. Yisin chɛ mu an 'na nɛnɛn feaya an na. 2Koe min na mu, boo kundu ee to doma kɔɔ, ɛ bɔ wan ya a ma tee dɔndɔ a. 3Chɛ an‑na a fɔ, wo e bai kan kɔ kan min fɔ‑a wo dechee a, mɔɛ n mbe a a min‑da wan baa kun tɛ. A sin, wo dechee ɛ wɛwɛɛ min fɔ‑a, dunya ɛ a a min‑da wan chɛndɛ chɛ.

4“N dia nyɔɛ nu, n ni a ma din wo tena, mbɛ wo ma chian mɔ gbu ma wo fa ko a. Ɛ wo fa‑a wan, chɛɛ a ee ko ɔ ko dɔ mende ma‑a chɛ gbakɔ. 5Chɛɛ wo e chian min ma, n mbe a yian‑da wan wo a. Wo chian Yataa dɔndɔ gbe an ma. An mbe mɔ gbu fa, mbɛ a‑a a a ta ta ɔ, ɛ minda kaina. Wo dan chɛ a, mbɛ wo ni chian Yataa ma.

6“Baa ee soenɛ ma mɔ gbu ya a. Chɛɛ chɛ gbɛɛ ɔ, Yataa ee nyina an dɔndɔ wɛɛ ma. 7Wo sin benden mu kaka soenɛ n ma. Wo kundi nan fan bɛɛ wo kun ma, Fa Yataa‑a a danɛ sɔn fan. Chɛ an‑na a fɔ, wo ma chian mɔ gbu ma.

8“N ni a ma din wo tena, mbɛ ni mɔ ɔ mɔ min mbe dɔn‑da fanka ɔ, mbɛ n fɛ mɔɛ mu a a, n bɛɛ, n fan Mɔ Gbu 'a Denɛ, n mbe dɔn‑da wan an mɔɛ chɛ wakoe ma maeka n ya kɔɔ. 9Chɛɛ ni mɔ ɔ mɔ‑a a fɔ fanka ɔ, mbɛ n fɛ mɔ ma a a, n bɛɛ n mbe a fɔ‑a wan maeka n ya kɔɔ, mbɛ n fɛ mɔ ma a a.

10“A sin, n fan, Mɔ Gbu 'a Denɛ, ni mɔ ɔ mɔ‑a n main, Yataa ɛ kun fan a ni a boo bɔ a ɔ. Chɛɛ ni mɔ ɔ mɔ‑a Yataa Nyina main, a ee a boo bɔ‑a a mɔ sima chɛ 'a main chɛ ɔ.

11“Ni an na‑a wo a wo gbɛmbo koe a mmɔ 'a samun chɛ chenɛ n na, ni an na‑a wo a ya ɔ sɔɛ n chen kɔɔ, ni an na‑a wo a kun ti n bɛɛ chen kɔɔ, wo ma wo faa gbaa wo fɔ bai ko a, ni a fɔ buɛ ko a. 12A mu min na, Yataa Nyina ɛ wo kan‑da wan a tima chɛ a, wo e bai min fɔ‑a.”

Chisɔsi‑a tai tɛ, a si nyanɛ ma

13Mbɛ kamin dɔndɔ fanka chɛ ɔ, a‑a a fɔ Chisɔsi ye, a ɔ, “Ticha, nn fa 'a fenɛ min to nn ko a, a fɔ n kɔɔ kaima ye, a ni a du nn ma.”

14Mbɛ Chisɔsi ɔ, “Mɔ ɔ mɔ ma gbasaya be ni n ma, wo fa chɛ du koe a, wo tɛ wo fea i kɔɔɛ a.” 15Mbɛ a‑a a fɔ an ye, a ɔ, “Wo wo kun ma fɛn, fen koya yama min kɔ min boo ɔ. Koe min na mu, mɔ gbu ni nyan boo ɔ boo, chɛ an mbe ee a ma i ni fɔɛ chɛndɛ ma sɔn.”

16Mbɛ a‑a tai chɛ tɛ an tena, a ɔ, “Nyan tɔ dɔndɔ ni wan nɔ, sɛnɛ ni min boo ɔ. Chin fen sɛsɛ na‑a ma wan a a, an sɛnɛ chɛ ɔ. 17Chɛ ko a, a‑a a yii na chii wan, a ɔ, ‘Kaina ɔ ma koo, n mbe n 'na chin fen chɛ n gbɛɛ a sɔn kaina. N mbe fen ma gbɛ sanche?’ 18Mbɛ a ɔ, ‘N yii puin‑da, n mbe bea kɔma chɛ n fasan‑da wan, mbɛ n‑na a chenama n sɔ. Ni n‑na chɛ ma, n mbe chin fen chɛ n gbɛɛ, ni fen dɔ mende nu, n ta mu miin na, n mbe an gbɛɛ chɛ‑a wan nɔ. 19Mbɛ n mbe a fɔ‑a wan n fandi ye, n dɔ, “Nɛma tɔɛ, fen chɛndɛ gbɛɛ, n toen mu miin na fɔɛ chɛ ɔ, an mbe wan n boo ɔ. An sin mbe san sɛsɛ ya‑a wan n na. N faa ma gbaa ni to fɔɛ chɛ ɔ fen kan kɔ kan ko a. Chɛɛ n mbe daunɛ chɛ‑a wan, n ni minɛ chɛ, mbɛ n yɛ‑a, n‑na buɔdia bɔ.” ’ 20Chɛɛ Yataa‑a a fɔ wan a ye, a ɔ, ‘I wooen mu. Yɛɛ chɛ ma, e fa tena wan. Ni i sin fa‑a, fen chɛ n gbɛɛ, i‑a miin na sɔn ka i wandi ko a, i wan ta ee ma‑a an na.’ ”

21Mbɛ Chisɔsi ɔ te gbɛ, “Chɛ n bɛɛ mbe ka wan, miin mbe nyanɛ a sɔn an fandi ko a, chɛɛ an ma nyan ni Yataa ta chia a.”

Chisɔsi‑a kanɛ chɛ, a si mɔ gbu 'a faagbaa ma

(Matiu 6:25-34)

22Mbɛ Chisɔsi‑a a fɔ a fɛ denɛ n ye, a ɔ, “Chɛ an‑na a fɔ, n ni a ma din wo tena, mbɛ wo ma wo gbɔsɔ wo da daun fenɛ ko a, ma koe a fɔɛ ɔ. N mbe ee baa, wo ni wo gbɔsɔ wo gboo ko a, wo e fen chii. 23Koe min na mu, mɔ gbu fɔɛ ma daun fenɛ dechee an na, a yɛ to, koa dechee an ma koe a mɔ gbu gboo ko a. 24Wo ŋaŋaa n yen bɛ, an mbe ee chin fen chin, n mbe ee baa, an ni a a sɛ bea a. Chɛɛ chɛ gbɛɛ ɔ, Yataa ɛ an da kɔ wan. Wo nan gbu sin benden mu kaka ŋaŋaa n ma. 25Wo dɔndɔ wɛɛ, faa ni gbaa boo ɔ boo a 'a fɔɛ ko a, chɛ ee a ma tima kundu ɛnden bɛɛ ni sa a kun ma. 26Koe ɛnden chɛ, wo ee che ka buɛ min dɔ a ma‑a, wo ma wo faa gbaa koe tɔɛ chɛ n ko a. 27Wo fia ɔ kɔn chɛ n yen bɛ, miin mbe fu, an mbe koa buɛ min dɔ. An mbe ee wai chɛ, an sin mbe ee koa nyan an fandi ko a. Chɛɛ n ni a ma din wo tena, mbɛ mansa Sɔɔmon#12:27 Tima min na Sɔɔmon ni mansa a, an ni mansa a, min nyanden ni a ni ben mansa tɔɛ n gbɛɛ ma dunya ɔ. nyanden ni wɛɛ boo ɔ boo, koa nii a ma, min ni nyin a ni che kɔn fu chɛ n dɔ. 28Yataa an mbe kɔnɛ chɛ n ma chii, kɔnɛ min mu ɛ nɛ bi, mbɛ sinan a tɛ‑a, mbɛ wo‑a a minda. Ni ɛ ka wan, wo ma chii koe a boo ɔ, a mu a ma gbɔsɔɛ an na. Wo 'a danaya ɔ dɔɔ gba.

29“Chɛ an‑na a fɔ, wo faa ma gbaa wo daun fen ko a, a basan wo min fen na. 30A mu min na, wo Fa Yataa‑a a ɔ sɔn fan, mbɛ wo gbɔsɔen fan mu chɛ n gbɛɛ ko a. Yataa sɔn bai n fan faa ɛ gbaa tima ɔ tima fen chɛ n ko a. 31Chɛɛ wo e min ma, wo a ma wo ma gbɔsɔɛ a don koe a Yataa 'a mansaya kɔɔ. Ni wo‑a chɛ ma, ɛ to‑a wan nɔ a ni fen chɛ n gbɛɛ be wo ma, miin ma gbɔsɔɛ ɛ wo ma.”

Chisɔsi‑a kanɛ chɛ, a si banda bu ɔ nyanɛ ma

(Matiu 6:19-21)

32Chisɔsi ɔ, “Wo wɛn mbe n fɛ, wo ma kɔkoo, chɛɛ wo ma chian. A a di wan Fa Yataa ye, na koe a wo a, a 'a mansaya kɔɔ. 33Wo wo boo fenɛ n ma tachɛ kɔpɔɛ a, mbɛ wo‑a a kɔpɔɛ chɛ n be yɔn tɔɛ n ma. Ni wo‑a chɛ ma, wo e ma‑a ka nyanɛ an na sɔn‑da wo wandi ko a banda bu ɔ. Kɔpɔ sa basachi nu, miin mbe banda bu ɔ, an mbe ee taa, an sin mbe ee pumbɔ. Wo 'a nyan fen chɛ nu banda bu ɔ, an mbe ee ban kuɔ fɔ ko a. Kanka ee che an kanka‑a. Chisi sin mbe ee che an yɔn‑da. 34A mu min na, wo 'a nyanɛ ɛ ma‑a sa ɔ kaina, wo faa ɛ ma‑a nɔ wan tima ɔ tima.”

Chisɔsi ɔ te, an ni an ma bɛn a na koe a

(Matiu 24:45-51)

35Chisɔsi ɔ, “Wo wo ma bɛn, mbɛ wo‑a wo 'a dambo a man wai chɛ koe a. 36Wo ma‑a yɔ bɔi denɛ nu, miin mbe an kun ti ma kɔn tena a na koe a chenɛ a, a ka musu si tɔmbɔɛ ɔ. Min mbe a ma, ni a na‑a, a ni chenɛ da tu, an mbe chenɛ da a ka‑a wan a ye bui chɛ a. 37Ɛ ma‑a wan bɔi den chɛ n ma buɔdia a, miin mbe ee chinɔ‑a, aan an kun ti ni yɛ. N ni a ma din wo tena, mbɛ kun ti chɛ ɛ a ma bɛn‑da wan, mbɛ a‑a a 'a bɔi den chɛ n chee, mbɛ a wandi gbu‑a daun fenɛ ya, a‑a a be an ma a daun koe a. 38Ni a na‑a su tɛ wɛɛ, ni a na‑a sayi ma pimbi wɛɛ ɔ a, ɛ miin tan‑da an ya a, ɛ ma‑a an ma buɔdia wa an na. 39Chɛɛ n ni a ma din wo tena, mbɛ ni chen ti ɛ a ɔ sɔn fan tima min na kanka ɛ na‑a a kanka koe a, a ee dɔn kanka ni a 'a chenɛ te, a ni don nɔ. 40A sin wo wɛɛ, wo wo ma bɛn, koe min na mu, n fan, Mɔ Gbu 'a Denɛ, n mbe na‑a wan tima ɔ tima, wo yii n mbe ee na‑a ma‑a min dɔ n na koe a.”

41Mbɛ Pita ɔ, “Fa, i‑a tai chɛ tɛ nn fan ko a, nn fɛn mu i fɛ denɛ n na, kɔ i‑a a tɛ mɔɛ gbɛɛ an ko a?”

42Mbɛ Mansa Chisɔsi ɔ, “Wo ma yɔ wai chɛ mɔɛ, danaya ni min dɔ, a basan yiimatɛ a. Ni a kun ti ma‑a ta‑a tachɛ ɔ, ɛ a to wan a bɔɛ n kun ma, daun fenɛ be koe a an ma, tima ma. 43Ni a kun ti yɛ‑a, a ni a tan, ɛ koe chɛ n ma‑a, yɔ a‑a a fɔ buɛ min dɔ a ye, ɛ ma wan ko chɛndɛ a a ko a. 44N ni a ma din wo tena, mbɛ kun ti chɛ ɛ gbasaya be‑a wan a ma, ma koe a a 'a chenɛ gbɛɛ kun ma. 45Chɛɛ ni wai chɛ mɔɛ chɛ‑a a fɔ, a ɔ, mbɛ kun ti chɛ ee fua tena yɛ‑a, mbɛ a bun‑da a bɔɛ n gbasi‑a, kai nu a basan musu n na. Ɛ ma‑a gbɛ daun chɛ an na, ni gbɛ min ba a, min mbe a bia‑a a ɔ bendenɛ a. 46Chɛɛ a kun ti chɛ ɛ yɛ‑a wan tee dɔndɔ a, a yii n mbe ee ma‑a a yɛ koe ɔ tima min na. Kun ti chɛ ɛ wai chɛ mɔɛ chɛ a tɔɔya‑a wan a yama yama boo a, mbɛ a‑a a bia, yɔ mɔɛ chɛ nu, a ee che a fa‑a miin na.

47“Mbɛ ni wai chɛ mɔɛ‑a a ɔ sɔn, a kun ti toen mu a ni fen ma a ye, chɛɛ a ma a ma ni, yɔ a kun ti toen mu min ni ma, ɛ gbasi sɛmbɛndenɛ ma sɔn‑da wan. 48Chɛɛ ni wai chɛ mɔɛ ma a ɔ sɔn a kun ti toen mu fen na, mbɛ a‑a ko dɔ mende ma, ɛ gbasi ma sɔn min ko a, ɛ gbasi ɛndenɛ an ma sɔn‑da. Ni a chenama ma‑a mɔ ɔ mɔ boo ɔ, a ni a wai chenama chɛ. I boo ɛ che‑a buɛ min dɔ a ma sɔn koe a, i ni a chɛ ka a buɛ chɛ ɔ, a ma sɛenɛ a.”

Chisɔsi ɔ te, a na‑a ta an sɔ koe a dunya a

(Matiu 10:34-36)

49Chisɔsi ɔ, “N na‑a ta an sɔ koe a dunya chɛ a. Ɛ ma‑a wan n ma buɔdia a, ni an ta chɛ ma‑a bia‑a gbɛ. 50Chɛɛ chɛ e na to ma‑a, n mbe tɔɔya ɔ bia‑a wan a ɔ benden ba a. N mbe ma‑a wan faayɔn ba ɔ aan an tɔɔya chɛ danka a ni si. 51A ma ma wo yii ma, mbɛ n na‑a dunya chɛ ɔ, min mbe a ma, kuiɛ a kanɛ ni ma mɔɛ n tɛ ɔ. N ma na ni an na, chɛɛ n na‑a dɔfasanɛ an na an tɛ ɔ. 52A ka gbɛ sanche ma, suun ma nyɔ duu n tɛ ɛ du‑a wan, mɔ sawa n mbe yɛ‑a wan kaka dɔndɔɛ ma, mbɛ mɔ fea n yɛ‑a kaka dɔndɔɛ ma. 53Fa n bɛ an 'na denɛ kaima n na, an mbe sɔ‑a wan an nyɔn na kan. Den suun musu n bɛɛ mbe sɔ‑a ka wan an nyɔn na an bɛ an 'na denɛ musuma n na. Mbɛ de mɔɛ n bɛ an 'na den 'na musu n na, an bɛɛ sɔ‑a an nyɔn na kan.”

Chisɔsi‑a kanɛ chɛ, a si ko ɔ gbɛ waiya ma

(Matiu 16:2-3; 5:25-26)

54Mbɛ Chisɔsi‑a a fɔ to mɔ fanka fanka chɛ ye, a ɔ, “Ni wo‑a dingbii yen ka‑a tee bea tena, wo e a fɔ wan dɔndɔ gbe, mbɛ sona ɛ na tena wan, a sin ɛ na wan. 55Mbɛ ni wo‑a fia a tinsɔn ɛ bɔ‑a a ka dunya denkɔɛ, wo e a fɔ wan to, mbɛ kaina ɛ na tena wan win‑da, a sin mbe ma wan. 56Wo wan nɛnɛn fea ti nu, wo e banda ma fɛn fan, an fea duu gboo a, mbɛ wo‑a a ɔ sɔn ni banda ɛ na tena wan nyan‑da. Wo e a ɔ sɔn fan to ni a ee nyan tena. Chɛɛ wo ee che koe chɛ n sin fasai‑a, miin mbe ma tena sanche.

57“A nyin fan wo wandi ni a ɔ sɔn, koe min nyin a ma koe a wo boo ɔ. 58Ni mɔ ɔ mɔ‑a i ma siibia, a ma i ma gbɔsɔɛ a bai chɛ ni sa wo tɛ ɔ. I ma dɔn wo ni ta kuti ɔ, min mbe a ma, wo ni sɔ chiti tɛ mɔɛ n chen kɔɔ. Ni chɛ ma‑a, chiti tɛ mɔɛ n bɛɛ mbe i be‑a wan sawa kun ma fɛn mɔɛ n ma, mbɛ sawa kun ma fɛn mɔɛ n bɛɛ‑a i sa pimbi chenɛ a. 59N ni a ma din i tena, mbɛ e ee bɔ‑a pimbi chen chɛ a aan, kɔpɔɛ chɛ dankama gbɔdɛ, an mbe i a bɔnɔ‑a min na, i ni a be.”

Currently Selected:

DUKU 12: KONONT

Highlight

Copy