DUKU 16
16
Chisɔsi‑a tai tɛ, a si wai chɛ mɔɛ ma, min yii na ni di
1Mbɛ Chisɔsi‑a a fɔ a fɛ denɛ n ye, a ɔ, “Nyan tɔ dɔndɔ ni wan nɔ, wai chɛ mɔɛ ni min boo ɔ. Wai chɛ mɔɛ chɛ, an ni nyan tɔɛ chɛ boo fenɛ n gbɛɛ kun ma. Mɔɛ n na‑a a ɔ yian fan nyan tɔɛ chɛ a, mbɛ an wai chɛ mɔɛ chɛ, ɛ a boo fenɛ ɔ yayi tena wan. 2Chɛ fɛ, a‑a mɔɛ a ta wan wai chɛ mɔɛ chɛ chee‑a. A na‑a kɛn, nyan tɔɛ chɛ‑a a fɔ wan a ye, a ɔ, ‘N‑na koe miin na min, a si i ma, an na ma di n ye.’ A ɔ, ‘Na,’ a ɔ, ‘i ni i konan a si i 'a wai gbɛɛ ma, e min chɛ tee.’ A ɔ, ‘A mu min na,’ a ɔ, ‘e ee che to ma‑a n boo fen kan kɔ kan kun ma.’ 3Mbɛ wai chɛ mɔɛ chɛ‑a a fɔ a yiima ɔ, a ɔ, ‘N ma a ɔ sɔn, n mbe fen ma‑a gbɛ sanche.’ A ɔ, ‘N kun ti ɛ na tena wan gbɛ n bɔ‑a wai chɛ ɔ.’ A ɔ, ‘N dɔ ma gbɛ sɛnɛ sa koe a,’ a ɔ, ‘a yɛ to,’ a ɔ, ‘n mbe mau‑a wan n ni ben ben fen fuinɛ a.’ 4A ɔ, ‘N yii puin‑da, n mbe koe min ma tena,’ a ɔ, ‘min mbe a ma,’ a ɔ, ‘ni an‑na n bɔ wai chɛ ɔ,’ a ɔ, ‘n dia nyɔɛ n ni ma.’ A ɔ, ‘N dia nyɔɛ n mbe ma‑a wan,’ a ɔ, ‘miin mbe an boo si‑a n kɔɔ an 'na chenɛ n na.’
5“Mbɛ mɔɛ chɛ n gbɛɛ, a kun ti chɛ 'a kuiɛ ni ka miin ma, a‑a an chee dɔndɔ dɔndɔɛ a. Mbɛ a‑a kuiɛ bia mɔɛ saa chɛ ɔ tisa, a ɔ, ‘N kun ti chɛ,’ a ɔ, ‘a 'a kuiɛ minan nyɔn sima ɛ i ma?’ 6Mbɛ mɔɛ saa ɔ, ‘Tu kadɔn chɛmɛ sɛi an mbe n ma.’ Mbɛ wai chɛ mɔɛ chɛ ɔ, ‘I 'a kuiɛ gboo yen ko,’ a ɔ, ‘si, i ni a nyɛn yɔ tu kadɔn chɛmɛ naanin an mbe i ma.’ 7Mbɛ a‑a mɔɛ fean bɔɛ chɛ ɔ tisa, a ɔ, ‘Kuiɛ minan nyɔn sima ɛ i ma?’ Mbɛ a ɔ, ‘Chin fen kuu busɛ wu dɔndɔ an mbe n ma kuiɛ a.’ Mbɛ wai chɛ mɔɛ chɛ ɔ, ‘I 'a kuiɛ gboo yen ko,’ a ɔ, ‘si, i ni a nyɛn yɔ busɛ chɛmɛ sɛi an mbe i ma.’
8“Chɛ gbakɔ, kun ti chɛ‑a wai chɛ mɔ kafaen chɛ tando wan. A nii ma a tando ni a 'a kafaya chɛ an ko a. A na‑a a tando yiinadia chɛ an ko a, a‑a min bɔ. Dunya chɛ ɔ mɔɛ n yii na di kaka tachɛ koe a an nyɔn na, a ni ben Yataa 'a mɔɛ n ma.
9“Chɛ an‑na a fɔ, n ni a ma din wo tena, mbɛ wo ni wo dia nyɔɛ n yan wo 'a nyan chɛ n dɔ, wo e miin chɛ‑a nɛ dunya chɛ ɔ. Ni wo‑a chɛ ma, wo dia nyɔɛ n mbe ma‑a wan banda bu ɔ, miin mbe an boo a si‑a wo kɔɔ. 10Ni mɔ ɔ mɔ‑a danaya yian koe ɛndenɛ ɔ, ɛ danaya yian fan ko chenama wɛɛ ɔ. Chɛɛ mɔ ɔ mɔ min ma danaya yian ni koe ɛndenɛ ɔ, a ee che danaya a ko chenama wɛɛ ɔ. 11Ni wo ma danaya bɔ ni dunya chɛ ɔ nyanɛ ɔ, mɔ ɔ mɔ ee to‑a nɔ, a ni nyanɛ chɛndɛ konan wo ma. 12Mbɛ a sin, ni wo ma danaya bɔ ni mɔ dɔ mende ta boo fenɛ kun ma, mɔ ɔ mɔ ee to‑a nɔ a ni dan wo a, a ni fenɛ be wo ma wo wandi ta a a.
13“Chɛ an‑na a fɔ, mɔ ɔ mɔ ee che ma‑a wai chɛ mɔɛ a kun ti fea kɔɔ. Ni chɛ ma‑a, dɔndɔɛ ko a ee dia a ye a ni che dɔndɔɛ ɔ. Ɛ kooya be‑a wan dɔndɔɛ ma, a ni ben a bɔɛ ma. Chɛ an fɛ mu, e ee che wai chɛ‑a Yataa ye, mbɛ i‑a wai chɛ kɔpɔɛ wɛɛ ye dɔndɔ a.”
Chisɔsi‑a mɔɛ n kan, a si koe dɔ n ma
(Matiu 11:12-13; 5:31-32; Maki 10:11-12)
14Chu mɔɛ chɛ nu, miin ni Fayisii n na, an‑na Chisɔsi da a bai chɛ n na min kɛn, an‑na an pɔsɛ a di wan a ma, a mu min na, an kɔpɔ koen ni kaka. 15Mbɛ Chisɔsi ɔ, “Mɔɛ n mu wo a, miin mbe an fandi n ma mɔ chɛndɛ n na an bɔɛ n ya kɔɔ, chɛɛ Yataa‑a wo faa n dɔ sɔn fan. Mɔ gbu n mbe fenɛ min ya fen ma kawaenɛ a, an mu fen ma nyamuienɛ a Yataa tena.
16“Yataa‑a sawa miin be Mosisi ma, a basan da a bai chɛ n na, Yataa 'a gbonka chɛ mɔɛ chɛ n‑na miin nyɛn, an ni wan nɔ gbau gbau a. Mɔɛ n ni wan an kɔɔ aan Chɔn na‑a tima min na, min ni yii chɛ mɔɛ n kunɛ ɔ, Yataa chia a. A ka gbɛ a tima chɛ ma, sakana bai chɛndɛ a si Yataa 'a mansaya ma, an mbe gbɛ fɔ tena mɔɛ n ye, mbɛ a sin, mɔ ɔ mɔ ɛ gbɛ butuinɛ an chɛ tena don koe a an mansaya chɛ kɔɔ. 17A ɔ gbɛ dunya chɛ gbɛɛ ni ban. Sawa chɛ ɛnden bɛɛ nan gbu sin, a ka koe a a gba ɔ, a ɔ gbɛ kaka, a ni ben dunya ban koe ma.
18“A yɛ to, ni mɔ kaima kan kɔ kan ban‑da a 'a musu ɔ, mbɛ a‑a musu dɔ gbɛɛ si, mɔɛ chɛ‑a waa an ma basan ka musu a, a ee fuu ɔ min na, Yataa ya a. Mɔ kaima min sin mbe musu si‑a min chɛɛ ban‑da a ɔ, a mɔ kaima chɛ wɛɛ‑a waa an ma basan ka musu a, a ee fuu ɔ min na, Yataa ya a.”
Chisɔsi‑a tai tɛ, a si nyan tɔ dɔndɔ ma, an fea Dasayɔsi a
19Mbɛ Chisɔsi ɔ, “Tima dɔndɔ a, nyan tɔ dɔndɔ ni wan nɔ, min toen ni a ma chii koe a koa baa gbanden ba n dɔ, mbɛ a sin tee ɔ tee a, a ni buɔdia wa an dɔ. 20Yɔn tɔ dɔndɔ wɛɛ ni wan nɔ, min tɔ ni Dasayɔsi. A gboo gbɛɛ ma banden fan ni tɛɛ mɛsɛ a. An ni na wan a a, nyan tɔɛ chɛ 'a chenɛ da a. 21An ni chɛ ma, min mbe a ma, yɔn tɔɛ chɛ ɛ kun fan a ni daun fen pɛɛ mɛsɛ chɛ n sɔn sɔn a daun koe a a boo ɔ. A tima chɛ n na, wuu n bɛɛ ni na wan, an mbe a 'a tɛɛ chɛ n na fian fian.
22“Tima che‑a wan, mbɛ yɔn tɔɛ chɛ fa‑a, mbɛ maeka n ta‑a a a, an‑na a si kai Ebeami baima, banda bu ɔ. Mbɛ chɛ gbakɔ, nyan tɔɛ chɛ wɛɛ fa‑a, mbɛ an‑na a tɔn, 23chɛɛ a ta‑a ta ɔ wan, a ni kaina tɔɔya wa ɔ. Mbɛ a‑a a ya a sɛ, mbɛ a‑a Ebeami yen pɔɔ, Dasayɔsi ɛ si ɔ a baima. 24Mbɛ a‑a chee chɛ, a ɔ, ‘Fa Ebeami, n mbe nɛ tɔɔya wa an dɔ ta chɛ ɔ. Chinchin n ma, i ni Dasayɔsi sɔ n tena. A ni a boo ɛndenɛ don yii ɔ, a ni na, mbɛ a‑a a puin n da ɔ, min mbe a ma, n nɛnɛnɛ ma ni chima.’
25“Chɛɛ Ebeami ɔ, ‘N 'na den, i yii na chii, mbɛ tima min na i ni fɔɛ ɔ, Yataa na‑a fen chɛndɛ kan kɔ kan be wan i ma, i toen ni min na. Chɛɛ Dasayɔsi tana, a na‑a ko yawaenɛ dechee an dɔ yen. Chɛɛ sanche gbɛ, ɛ gbɛ buɔdia wa an dɔ nɛ, i sin mbe tɔɔya ɔ. 26A ka chɛ gbɛɛ ma, son ba an sinden mu mmɔ tɛ mmɔ bɛ. Mɔ ee che ka‑a nɛ a ta wo tena, n mbe ee baa, mɔɛ ka koe ma wo tena, a ben koe a nɛ nn tena.’ 27Mbɛ nyan tɔɛ chɛ ɔ, ‘Fa Ebeami, ni koe n mbe ka wan, n mbe i disa tena, i ni Dasayɔsi a ta fa 'a chenɛ a, 28a mu min na, n dɔ kaima duu n mbe nɔ. A ni ta, a ni an na si, min mbe a ma, an bɛɛ ma na na nɛ tɔɔya chɛ ɔ, n mbe ka min dɔ.’
29“Mbɛ Ebeami ɔ, ‘Mosisi‑a gboo min nyɛn, ɛ wan i dɔɛ n boo ɔ, a basan gboo chɛ n na, Yataa 'a gbonka chɛ mɔɛ tɔɛ n‑na miin nyɛn. I dɔɛ n ni an kan. Ni an‑na an kan, an ni an too ma sɔ bai chɛ n ma, miin mbe an dɔ.’ 30Mbɛ nyan tɔɛ chɛ ɔ, ‘Fa Ebeami, chɛ ee kun a ni a ma, an ni an too ma sɔ. Chɛɛ ni mɔɛ ɛ kun fan a ni a kɔɔ sɔ a ka saya ɔ, a ni ta an tena, a tima a mu, an mbe an kan kɔ sɔ‑a an 'na ko yama n na.’ 31Chɛɛ Ebeami ɔ, ‘Ni an mbe ee che an too ma sɔ‑a bai chɛ n ma gboo chɛ n dɔ, an mbe ee na‑a che‑a an ni dan a a, ni mɔɛ wɛɛ‑a a kɔɔ sɔ a ka saya ɔ.’ ”
Currently Selected:
DUKU 16: KONONT
Highlight
Share
Copy
Want to have your highlights saved across all your devices? Sign up or sign in
New Testament in Kono © The Bible Society of Sierra Leone, 2006.
