DUKU 21

Fuinya musu‑a boo fenɛ be Yataa ma

(Maki 12:41-44)

1Mbɛ Chisɔsi‑a a kunɛ kɔɔ sɔ, a‑a nyan tɔɛ chɛ n yen Yataa 'a kata chɛ ɔ, an mbe an boo fenɛ n na bea‑a kɔpɔ sa kakaa chɛ ɔ. 2Mbɛ a yɛ‑a wan to, a‑a fuinya musu yɔnden dɔndɔ yen, ɛ kɔpɔ gbɛnsɛn den fea a bea‑a. 3Mbɛ a ɔ, “Tea a, n ni a ma din wo tena, mbɛ fuinya musu yɔnden chɛ, a‑a kɔpɔɛ min na bea ka, a benden mu mɔɛ tɔɛ chɛ n gbɛɛ‑a kɔpɔɛ miin na bea ka. 4A mu min na, chɛ n‑na min be ka, an‑na a ya a chenama an kun ma, chɛɛ musu chɛ ta kɔpɔɛ gbɛɛ an nɛ a boo ɔ. Kɔpɔ dɔ mende kan kɔ kan mbe ee to a boo ɔ.”

Chisɔsi‑a Yataa 'a kata yɔn koe kɔɔ fɔ an ye

(Matiu 24:1-2; Maki 13:1-2)

5Mɔɛ dɔ n ni wan Yataa 'a kata ma dia‑a tena. An dɔ, a ni nyin kaka, a nyanden mu sen nyima nyima n fan dɔ. A sin, mɔɛ n‑na an boo fenɛ siama be wan kata chɛ gbu a bonchen koe a. Chɛɛ Chisɔsi ɔ, 6“Wo e ka kawa‑a sanche fenɛ miin gbɛɛ ma, tima ɛ che‑a wan, an gbɛɛ ni yɔn. Ɛ te‑a wan, a sen kan kɔ kan mbe ee to‑a sa ɔ a nyɔn kundu a.”

Chisɔsi‑a bai sa, a si dunya danka a koe n ma

(Matiu 24:3-14; Maki 13:3-13)

7Mɔɛ dɔ n‑na a ɔ tisa wan, an dɔ, “Ticha, koe chɛ n mbe ma‑a sɔyɔ? Ni tima sin ma‑a che‑a, koe chɛ n mbe ma‑a tima min na, fen mbe ma‑a an tɔmɔsi a?”

8Mbɛ Chisɔsi ɔ, “Wo wo kun ma fɛn, an ma na wo woo. Koe min na mu, mɔ sɛsɛ mbe na‑a wan n tɔɛ ɔ, an mbe a fɔ‑a wan, an dɔ, an fan mu Chasi a, kunka mansa. Mbɛ an‑na a fɔ to, an dɔ, tima gbu, an che‑a ka. Chɛɛ wo ma bea an fɛ. 9Ni wo sin‑na chɛɛ n ma tɔɛ a min, a basan butuinɛ n bɛɛ a, wo ma chian. Koe min na mu, koe chɛ n pɛn pɛn fan mbe ma‑a. Chɛɛ chɛ an mbe ee a ɔ yian‑da, mbɛ tima gbu che‑a.”

10Mbɛ Chisɔsi‑a a fɔ to an ye, a ɔ, “Chɛnyɛ n mbe butuinɛ chɛ‑a wan an nyɔn na, mbɛ chɛnyɛ mɔɛ dɔndɔɛ n‑na chɛɛ chɛ an bɛ chɛnyɛ mɔ dɔ mende n na. 11Duu gboo ɛ samba‑a wan a ma chianden ba a, dunya gbɛɛ ɔ dɔndɔ dɔndɔɛ a. Kɔnkɔ ma chianden ba ɛ ma‑a wan kaina sɛsɛ, a basan gbandi n na. Banda wɛɛ a, ko ma chiandenɛ n mbe ma‑a wan, a basan koe tɔmɔsi chenama dɔ mende n na. 12Chɛɛ koe chɛ n gbɛɛ mbe e na to ma‑a, an mbe wo bia‑a wan, mbɛ an‑na ko ma gbaaenɛ sa wo ma. An mbe ta‑a wan wo a, wo gbɛmbo koe a, mmɔ 'a samun chɛ chenɛ n na, mbɛ an‑na wo sa pimbi chenɛ a. An mbe na‑a wan wo a, mansa n chen kɔɔ, an bɛ kun ti n na. An mbe chɛ gbɛɛ si‑a wan wo a, a si n bakoe ma. 13Chɛɛ chɛ an mbe ma‑a tima a wo ko a, wo ni Yataa 'a sakana bai chɛndɛ ɔ yian mɔɛ chɛ n na. 14Wo wo yiima ɔ bɛn tima ya ɔ, min mbe a ma, wo ma na wo faa gbaa wo wandi ma fɔ koe a. 15Koe min na mu, n mbe bai n don‑da wan wo da a, mbɛ n‑na yiimatɛ be wo ma. Ni wo‑a bai kan kɔ kan fɔ, wo chɛɛ ma nyɔɛ n mbe ee che‑a kɔɔsa bia chɛ‑a a ma. 16Wo woo mɔɛ n fandi gbu, ni wo suun ma nyɔɛ nu, a basan wo baachenɛ n fandi gbu a, an fan bɛɛ gbu n mbe wo be‑a kun ti n ma. An mbe wo dɔ n sin fa‑a wan. 17Mɔɛ n gbɛɛ mbe too‑a wan wo a, a si n ma. 18Chɛɛ wo kundi dɔndɔ wɛɛ wo kun ma, a ee to‑a a ɔ. 19Ni wo sɔ‑a gban, wo e kun‑da wan wo ni kuɔ fɔ fɔɛ ma sɔn wo wandi ko a.”

Chisɔsi‑a Chuusaɛn yɔn koe kɔɔ fɔ an ye

(Matiu 24:15-21; Maki 13:14-19)

20Mbɛ Chisɔsi ɔ, “Ni wo‑a Chuusaɛn duu yen, soya n‑na a a tindan, a tima a mu wo e a ɔ sɔn‑da, mbɛ a ɔ ma yansan to a te koe a. 21A tima chɛ a, mɔɛ miin mbe ma‑a Chudia chɛnyɛ ɔ, an ni bui sa a a kɔnkɔɛ n dɔ. Miin mbe ma‑a nɛ Chuusaɛn duu chɛ ɔ, an ni bɔ nɛ. Mɔɛ miin mbe tanda n bɛɛ ɔ, an ma yɛ to nɛ. 22A mu min na, a tee chɛ n ma, Yataa ɛ duu chɛ ɔ mɔɛ n tɔɔ‑a wan. A tima an na mu, koe miin gbɛɛ nyɛndenɛ ɛ Yataa 'a gboo ɔ a si an ma, an mbe bɔ‑a a a. 23A tima chɛ a, koe n mbe yaua‑a gba, miin mbe bu ma musu n nan gbu tan‑da, a basan kuinsa n na. Faayɔn ba ɛ na‑a wan chɛnyɛ chɛ ɔ, a sin, Yataa ɛ mɔɛ chɛ n mɔnɛ‑a wan. 24An chɛɛ ma nyɔɛ n mbe an dɔ n fa‑a wan, mbɛ an‑na an dɔ n ma yɔnɛ n na, chɛnyɛ dɔ mende tɔɛ chɛ n gbɛɛ ɔ. A sin, mɔɛ miin ma Chu mɔɛ n na, an mbe gbasaya din‑da wan Chuusaɛn mɔɛ n ma, aan an ta tima ni ban.”

Chisɔsi‑a bai sa, a si a yɛ koe ma to dunya ɔ

(Matiu 24:29-31; Maki 13:24-27)

25Chisɔsi ɔ, “Da fii koe n mbe bun‑da wan ma‑a kau a, ni tee, a basan tɔmbuaka n na. Faayɔn ba basan kɔndɔfii wa a, an mbe ma‑a wan chɛnyɛ n dɔ, dunya ma. Chianɛ ɛ ma‑a wan mɔɛ n dɔ, a si yii wa n tu kuiɛ ma, a basan an fonfo yii kuiɛ a. 26Mɔɛ n mbe bɔn‑da wan a ma chiandia a, ni an‑na an yii na chii koe chɛ n ma, miin mbe na tena ma‑a dunya ɔ. Koe min na mu, gbasaya fenɛ miin gbɛɛ ɛ banda a, an dɔ ɛ ma‑a wan a ka an gba n dɔ. 27Mbɛ an mbe n yen‑da wan, n fan, Mɔ Gbu 'a Denɛ, n mbe ma‑a na‑a gbasaya wa ɔ dugbu ɔ. A yɛ to, n mbe ma‑a wan man‑da Yataa 'a manɛ a. 28Ni koe chɛ n‑na a kuu sɔ ma‑a, wo wo faa bia, wo yiima diaenɛ ni ma. Koe min na mu, a ɔ ee yansan‑da to, mbɛ Yataa‑a wo kun ka.”

Chisɔsi‑a tai tɛ, a si foa kɔnɛ ma

(Matiu 24:32-35; Maki 13:28-31)

29Mbɛ Chisɔsi‑a tai chɛ tɛ an tena, a ɔ, “Wo wo yii na chii wɛ foa kɔnɛ#21:29 Puu koɛ ɔ, an kɔn chɛ tɔ ni fiki. ma, a basan kɔnɛ tɔɛ n na. 30Ni wo‑a an yamba n yen, an mbe pɔmbɔ‑a, a ni ma gbɛ wo yii ma, mbɛ sama ɔ ma yansan to. 31A chia dɔndɔ gbe chɛ a mu, ni wo‑a koe chɛ n yen ma‑a, wo ni a ɔ sɔn, mbɛ tima ɔ ma yansan to, Yataa ni a 'a mansaya ɔ yian.

32“N ni a ma din wo tena, mbɛ koe chɛ n gbɛɛ mbe ma‑a pɛn, wo nyɔn sima chɛ n mbe e na ban dunya ɔ. 33Dunya gbɛɛ ɛ ban‑da wan, chɛɛ n da a bai ee ka‑a a gba ɔ kuɔ fɔ ko a.”

Mmɔ mmɔ kun ma fɛn

34Chisɔsi ɔ, “Wo wo wandi kun ma fɛn. Wo ma daun chɛ ma wo ma gbɔsɔɛ a, a basan gbɛ a kɔɔen minɛ a. A yɛ to, wo ma dunya chɛ ɔ faagbaa n sa wo kun ma. Ni wo‑a chɛ ma, ni n 'na tima che‑a, koe chɛ n gbɛɛ, an mbe a ma wan, n ni wo tɛnɛ. 35A mu min na, a tee chɛ, ɛ ma‑a mɔ gbu gbɛɛ ma dunya ɔ tɛnɛ ma koe an na. 36Chɛ an‑na a fɔ, wo wo kun ma fɛn, a yɛ to, wo samunɛ chɛ tee ɔ tee a. Wo samunɛ chɛ, wo ni gbasaya ma sɔn koe chɛ n gbɛɛ ɔ bia koe a, miin mbe na tena wo tan‑da, mbɛ wo‑a an dɔ tandin. A yɛ to, wo samunɛ chɛ, wo ni che sɔ‑a n chen kɔɔ, wo kunɛ kɔɔ sɔenɛ a, n fan, Mɔ Gbu 'a Denɛ, n mbe na‑a tima min na.”

37Chisɔsi ni kanɛ chɛ wan tee ɔ tee a Yataa 'a kata ɔ. Ni tee na‑a bea, a ni ta wan mbɛ a chi‑a duu dɔndɔ ɔ, Wodifi kɔnkɔɛ ɔ. 38Ni banda ɔ ka‑a, mɔɛ n gbɛɛ ni na wan a tena Yataa 'a kata chɛ ɔ, sau ɔ sau ma an too ma sɔ koe a a ma.

Currently Selected:

DUKU 21: KONONT

Highlight

Copy