MATIU 10

Chisɔsi‑a a fɛ den tan kun ma fea n sɔ, a 'a wai chɛ koe a

(Maki 3:13-19; 6:7-13; Duku 6:12-16; 9:1-6)

1Chɛ gbakɔ, mbɛ Chisɔsi‑a a fɛ denɛ n chee, an mɔ tan kun ma fea ni. A‑a an chee, a‑a gbasaya be wan an ma, nyina yama n gbain koe a mɔɛ n fɛ. A yɛ to, a‑a gbasaya be wan an ma, mɔɛ n baun koe a an 'na gbandi n gbɛɛ ɔ. 2A 'a sɔ mɔ tan kun ma fea chɛ n tɔɛ n fan nɛ. A saa tɔɛ an nɛ Saimɔn, a na‑a tɔ dɔ mende be min ma a ɔ, Pita, ni Saimɔn dɔɛ kaima Anduu. Chimisi ni a dɔɛ Chɔn, miin ni kai Sɛbɛdi 'a denɛ n na. 3Fiipi ni Batɔɔmiu. Matiu, min ni pawa bia mɔɛ a, ni Tɔmɔsi. Chimisi, kai Afiɔsi 'a denɛ, ni Tadayɔsi. 4Saimɔn min ni chɛnyɛ ma chɛɛ chɛ mɔɛ a, ni Chudasi Isikayɔti, min na‑a danka Chisɔsi ma tachɛ a.

5-6A fɛ den tan kun ma fea chɛ nu, Chisɔsi‑a an sɔ wan ta koe a, a 'a wai chɛ koe a. A‑a an na si wan, a ɔ, “Wo ta Chu mɔɛ n tena, an fan maen mu yɔ sa nu, miin chen gba ɔ chɛenɛ ɛ an ti n ma, koe min na mu, an‑na an kan kɔ sɔ Yataa a. Wo ma ta kaina, Chu mɔɛ n mbe ee kaina. A yɛ to, wo ma ta Samayia duu n dɔ. 7Wo ta Chu mɔɛ n fan tena, mbɛ wo‑a a fɔ an ye, mbɛ Yataa‑a a kuu sɔ a 'a mansa wai chɛ‑a dunya ɔ. 8Wo gbandi mɔɛ n baun, mbɛ wo‑a fɔɛ a yɛ chɛ n sun da a, miin faenɛ ɛ. Wo mɔɛ chɛ n baun, gboo ma gbandi yama ɛ miin ma, mbɛ wo‑a nyina yama n gbain mɔɛ n fɛ. N‑na gbasaya chɛ be wo ma gbama an na. N ma fen bia ni wo boo ɔ. Chɛ an fɛ mu, wo wɛɛ, wo ta, wo ni mɔɛ n deman. Wo ma an dɔ tisa fen kɔ fen ko a. 9Ni wo sin ma‑a ta‑a, wo ma ta fen kɔ fen na wo boo ɔ. Wo ma ta kɔpɔ a, 10wo ma basachi bia wo boo a, wo ma tu tungbɔɛ a, wo ma doma fea ya, wo ma kɔɔwa fea ya. A mu min na, wo e ma‑a wai chɛ‑a mɔɛ min ko a, an mɔɛ chɛ an mbe wo da kɔ‑a.

11“Ni wo ta‑a duu kan kɔ kan dɔ, wo ta wo ni wo ya a kan mɔɛ a, min mbe dɔn‑da a ni a boo si wo kɔɔ. Ni a‑a a boo si wo kɔɔ, wo ma a 'a sondaya a, aan wo ni bɔ an duu chɛ ɔ. 12Ni wo don‑da chen chɛ a, wo nɔ mɔɛ n dua. 13Ni an‑na wo bia chɛndɛ, an mbe dua‑a wan. Chɛɛ ni an ma wo bia ni chɛndɛ, an mbe fo‑a wan dua chɛ a. 14Chɛɛ ni mɔ ɔ mɔ ma a boo si ni wo kɔɔ an chen chɛ a, ni mɔ ɔ mɔ ma a boo si ni wo kɔɔ an duu chɛ ɔ, ni an ma an too ma sɔ ni wo ma, wo bɔ nɔ. Ni wo ma‑a bɔ‑a, wo wo chenɛ a gbɔngbɔn fifii chɛ a, min mbe a ɔ yian an na, mbɛ an‑na koe min ma ka, a ma nyin. 15N ni a ma din wo tena, mɔ yama chɛ nu suun Sɔdɔn duu ɔ, an fea Komoa#10:15 Mɔɛ chɛ nu miin ni Sɔdɔn an fea Komoa a, an 'na ko yama maenɛ da a ni koo, a ben an kundi ma an kun ma. Yataa na‑a an ban suun ta an na. a, an mbe ee tɔɔya‑a, Yataa ɛ dunya gbɛmbo‑a tee min na, yɔ chɛ nu an duu chɛ ɔ, an mbe tɔɔya‑a buɛ min dɔ.”

Chisɔsi‑a a ɔ yian a 'a sɔ mɔɛ n na, a si mɔnɛ ma, min mbe an ya ɔ

(Maki 13:9-13; Duku 21:12-17; 12:2-7)

16Chisɔsi‑a a fɔ a 'a sɔ mɔɛ n ye, a ɔ, “N yen ko wo a ta‑a, wo e ma‑a wan nɔ yɔ ni sa bɔ‑a kui n tɛ. Chɛ an‑na a fɔ, wo yiima a ni sɛn. A yɛ to, wo ni tea a tachɛ ko ɔ ko ɔ, wo e min ma‑a. 17Wo wo kun ma fɛn, a mu min na, an mbe wo bia‑a wan, an ni ta wo a gbakoo n chen kɔɔ. An mbe yɛ‑a wan to, an ni wo gbasi an 'na samun chɛ chenɛ n na. 18An mbe wo bia‑a wan, an ni ta wo a chɛnyɛ ti n tena, an mbe ta‑a wan wo a mansa wa n chen kɔɔ. An mbe chɛ n ma‑a wo a n bakoe an na. Chɛɛ wo e kun‑da wan Yataa 'a sakana bai chɛndɛ ɔ yian‑da mɔɛ chɛ n na, miin ma Chu mɔ a. 19Ni an na‑a wo a, mansa n chen kɔɔ, wo ma wo faa gbaa wo fɔ bai ko a, ni a fɔ buɛ ko a. A mu min na, an tima chɛ a, wo e bai ma sɔn‑da wan, wo e min fɔ‑a. 20Koe min na mu, wo e ma tena ka bai min fɔ‑a, a ee ma tena wo wandi an fɔ bai a. Chɛɛ a bai chɛ n mbe ka tena Yataa Nyina an tena. Fa Yataa ɛ a a na‑a wan, a ni bai chɛ n don wo da a, a fɔ koe a.

21“Mɔɛ n mbe an suun ma nyɔɛ n be‑a wan, an fa koe a. Fa n mbe an 'na denɛ n be‑a wan, denɛ n bɛɛ ni yɛ, an ni an woo mɔɛ n be. 22Mɔɛ n gbɛɛ mbe too‑a wan wo a, a mu min na, n fɛ mɔɛ mu wo a. Chɛɛ i wɛn mbe i faa bia‑a aan a danka a, Yataa ɛ i baun‑da wan. 23Ni an‑na ko yawaenɛ sa wo ma duu min dɔ, wo ben bui a, a ta duu dɔ mende ɔ. Ka n ni chɛ ma din wo tena. Wo ee Chu duu chɛ n na bɛn‑da, mbɛ tima che‑a n na koe a. N fan, Mɔ Gbu 'a Denɛ, n mbe na‑a tima min na.

24“Kan chɛ mɔɛ benden mu a 'a kan denɛ ma. Bɔi denɛ wɛɛ, an na ma kan ni, an fea a ti a. 25An mbe kan chɛ mɔɛ bia buɛ min dɔ, an mbe a 'a kan denɛ wɛɛ bia ka wan. Bɔi denɛ wɛɛ, an mbe a ti bia buɛ min dɔ, an mbe a wɛɛ bia ka wan. An‑na suun ya ɔ sɔɛ chee ka buɛ min dɔ, an dɔ, Bɛɛsɛbu#10:25 Bɛɛsɛbu: Sitana tɔ dɔ mende an nɛ. A fɔenɛ an nɛ, an‑na baa a bɔ ka buɛ min dɔ Chisɔsi ma, an mbe ee baa be to a fɛ denɛ n ma., an mbe sika a to nyɔn chee koe a tɔ dɔ mende a suun chɛ ɔ?

26“Chɛ an‑na a fɔ, wo ma chian an mɔɛ chɛ n ma. Koe min na mu, boo kundu ee to doma kɔɔ, ɛ bɔ wan ya a ma tee dɔndɔ a. 27N‑na bai min tɛnsɛ ka wo tena mmɔ dechee a, wo an dɔ yian baa kun tɛ. N‑na wo too wɛwɛɛ bai miin na ka, wo an fɔ dunya ye, wo kuiɛ ma sɛenɛ a. 28Wo ma chian mɔ gbu ma wo fa ko a. Ɛ wo fa‑a wan, chɛɛ a ee ko ɔ ko ma‑a wo nyina a, min mbe wo ɔ. Wo chian Yataa dɔndɔ gbe an ma. An mbe mɔ gbu fa, mbɛ a‑a a nyina wɛɛ, a‑a a a ta ta ɔ, ɛ minda kaina. 29Baa ee soenɛ ma mɔ gbu ya a. Chɛɛ a dɔndɔ wɛɛ ee fa, mɔɔ ni Fa Yataa dɔn‑da a ma. 30-31Wo sin benden mu kaka soenɛ n ma. Wo kundi nan fan bɛɛ wo kun ma, Fa Yataa‑a a danɛ sɔn fan. Chɛ an‑na a fɔ, wo ma chian mɔ gbu ma.”

Dɔn koe a Chisɔsi ma, ni ban koe a Chisɔsi ɔ

(Duku 12:8-9)

32Chisɔsi ɔ te to an nu ma, a ɔ, “Mɔ ɔ mɔ min mbe dɔn‑da fanka ɔ, mbɛ n fɛ mɔɛ mu a a, n bɛɛ n mbe dɔn‑da wan an mɔɛ chɛ wakoe ma Fa ya kɔɔ banda bu ɔ, gbɛmbo tee ma. 33Chɛɛ ni mɔ ɔ mɔ‑a a fɔ fanka ɔ, mbɛ n fɛ mɔ ma a a, n bɛɛ n mbe a fɔ‑a wan Fa ye banda bu ɔ, gbɛmbo tee ma, mbɛ n bɛɛ n fɛ mɔ ma an mɔɛ chɛ a.”

Chisɔsi na‑a mɔɛ n na dɛ‑a an nyɔn ma

(Duku 12:51-53; 14:26-27)

34Chisɔsi‑a a fɔ to an ye, a ɔ, “A ma ma wo yii ma, mbɛ n na‑a dunya chɛ ɔ, min mbe a ma, kuiɛ a kanɛ ni ma mɔɛ n tɛ ɔ. N ma na ni an na, chɛɛ n na‑a dɔfasanɛ an na an tɛ ɔ. 35N na‑a denɛ kaima n bɛ an fa n na, n ni an na chɛɛ. Denɛ musuma n bɛ an de n na, n ni an na chɛɛ. Den 'na musu n bɛ an de mɔɛ n na, n ni an bɛɛ a chɛɛ. 36Wo chɛɛ ma nyɔɛ gbau gbau n mbe ma‑a wo 'a chen na mɔɛ n fan na.

37“Mɔ ɔ mɔ kan kɔ kan, i wɛn toen mu i ni bea n fɛ, i yii ka i fa a, i ni i yii ka i de a, mbɛ i bea‑a n fɛ. A yɛ to, mɔɔ ni i‑a i yii ka i 'a den kaienɛ a, ni i 'a den musuenɛ, mbɛ i bea‑a n fɛ. 38Ni mɔɛ min mbe ee a ma bɛn‑da mɔnɛ ɔ bia koe a n ko a, ni fa koe a, a e na to bea‑a n fɛ, an mɔɛ chɛ ee che ma‑a n fɛ denɛ a. 39Ni mɔ ɔ mɔ ban‑da bea koe a n fɛ, a wandi fɔɛ ma kanda koe a, an mɔɛ chɛ ee kuɔ fɔ fɔɛ ma sɔn‑da. Chɛɛ mɔɛ min mbe a yii bɔ‑a a fɔɛ ɔ n ko a, an mɔɛ chɛ ɛ kuɔ fɔ fɔɛ ma sɔn‑da wan.”

Tɔnɔnɛ, mɔɛ chɛ n ko a, miin mbe an kai fa‑a Chisɔsi a

(Maki 9:41)

40Chisɔsi‑a a fɔ gbɛ an ye, a ɔ, “Ni mɔ ɔ mɔ‑a a boo si wo kɔɔ, a ma a si ni wo dechee an kɔɔ, chɛɛ a‑a a si ka n fan kɔɔ. A sin to, mɔɛ min mbe a boo si‑a n kɔɔ, a ma a si ni ka n dechee an kɔɔ, chɛɛ a‑a a si ka Yataa an kɔɔ, min‑na n sɔ. 41Mɔ ɔ mɔ min mbe a boo si‑a Yataa 'a gbonka chɛ mɔɛ kɔɔ, koe min na mu, a dan‑da a a, mbɛ Yataa 'a gbonka chɛ mɔɛ mu a a, Yataa ɛ tɔnɔnɛ be‑a wan an mɔɛ chɛ ma, yɔ ɛ min nyɔn sima be a 'a gbonka chɛ mɔɛ nu ma. Ni mɔ ɔ mɔ‑a a boo si mɔɛ kɔɔ, min tanden mu Yataa tena, a mu koe min na, a tandenɛ ɛ Yataa a, Yataa ɛ tɔnɔnɛ be‑a wan an mɔɛ chɛ ma, yɔ ɛ min nyɔn sima be mɔɛ chɛ ma, min tanden mu a a. 42N ni a ma din wo tena, mbɛ ni mɔ ɔ mɔ‑a yii chima kɔpu dɔndɔɛ wɛɛ be n fɛ denɛ den tachɛen bɛɛ ma, koe min na mu, ɛ n 'na fɛ dencha a, Yataa ɛ tɔnɔnɛ be‑a wan mɔɛ chɛ ma.”

Currently Selected:

MATIU 10: KONONT

Highlight

Copy