MATIU 14
14
An‑na Chɔn kunɛ tɛ a a, min ni yii chɛ mɔɛ n kunɛ ɔ, Yataa chia a
(Maki 6:14-29; Duku 9:7-9)
1A tima chɛ a, mbɛ Ɛdɔdi,#14:1 Mansa Ɛdɔdi Wa 'a denɛ dɔndɔ an nɛ, min tɔ ni Ɛdɔdi Andipasi. min ni mansa a Kadidi chɛnyɛ ɔ, a‑a Chisɔsi ma tɔɛ chɛndɛ a min kaka. 2Mansa Ɛdɔdi‑a Chisɔsi wakoe chɛ a min kɛn, mbɛ a‑a a fɔ mɔɛ chɛ n ye a baima, a ɔ, “Chɔn, min ni yii chɛ mɔɛ n kunɛ ɔ, Yataa chia a, an‑na a kɔɔ sɔ ka to a ka saya ɔ. Chɛ an fɛ mu, gbasaya chɛ sima ɛ a boo ɔ kamaya ko wa chɛ n ma koe a.”
3-4Mansa Ɛdɔdi na‑a chɛ fɔ koe min na, a na‑a a kɔɔ kaima Fiipi 'a musu bɔ wan a boo ɔ, bɔɔɛ Ɛdɔdiyasi. Chɔn ni a fɔ wan a ye, mbɛ a‑a ko yama an ma ka. Ɛdɔdiyasi wakoe a, Mansa Ɛdɔdi‑a mɔɛ n sɔ Chɔn bia koe a. An‑na a chii, mbɛ an‑na a a dɛ pimbi chenɛ a. 5A toen ni a ni Chɔn fa, chɛɛ a chianden ni Chu mɔɛ n fan ma. Koe min na mu, Chu mɔɛ n danden fan ni Chɔn na, mbɛ Yataa 'a gbonka chɛ mɔɛ mu a a.
6Chɛɛ Chɔn ni pimbi chen chɛ an na, mbɛ Mansa Ɛdɔdi‑a mɔɛ n chee bɛnɛ ɔ, buɔdia bɔ koe a, a si a suun tee ma. Ɛdɔdiyasi 'a den musuma na‑a tɔmbɔɛ don fan mɔɛ chɛ n ya kɔɔ, min na‑a Mansa Ɛdɔdi faa chima kaka, 7mbɛ a‑a a kai a tena, a ɔ te, ni a‑a a ɔ tisa fen kɔ fen ko a, ɛ a be‑a wan a ma.
8Mbɛ den chɛ de‑a a fɔ a ye, ɛ fenɛ min dɔ tisa. Mbɛ a‑a a fɔ Mansa Ɛdɔdi ye, a ɔ, a ya kɔɔɛ a, a toen mu Chɔn kunɛ an na sa ɔ piiti ɔ, Chɔn min ni yii chɛ mɔɛ n kunɛ ɔ, Yataa chia a.
9Bai chɛ‑a Mansa Ɛdɔdi faa yɔn fan a ɔ benden ba a. Chɛɛ a ban‑da gbɛ a kai‑a fanka ɔ. Chɛ‑a a ma wan, mbɛ a‑a mɔɛ n sɔ pimbi chenɛ a, na koe a Chɔn kunɛ a. 10Mbɛ an ta‑a, an‑na a kunɛ tɛ a a. 11Mbɛ an na‑a a kunɛ a piiti ɔ, mbɛ a be‑a den chɛ ma. Den chɛ ta‑a a a, mbɛ a‑a a be a de ma. 12Chɛ gbakɔ, Chɔn fɛ mɔɛ n na‑a, mbɛ an ta‑a pimbi chen chɛ a, an‑na a su ya, mbɛ an‑na a tɔn. Mbɛ an ta‑a Chisɔsi tena, mbɛ an‑na a ɔ yian a a, koe min chɛ‑a a ɔ.
Chisɔsi‑a kamin wu duu da kɔ
(Maki 6:30-44; Duku 9:10-17; Chɔn 6:1-14)
13Chɔn fa koe chɛ‑a a fo kɛn Chisɔsi ma, mbɛ a sɛ‑a dɛndɛ ɔ. A ka‑a kaina chɛ a ni ka kaina, mbɛ a‑a chia bia a ta kaina ɔ maundenɛ. Chɛɛ mɔɛ n‑na chɛ a min kɛn, mbɛ an bɛɛ‑a an na sɔ duu sɛsɛ ɔ, an‑na a sɔ a fɛ an chen ma chia a. 14Chisɔsi puin‑da a bɔ dɛndɛ chɛ ɔ, mbɛ a‑a mɔ fanka wa chɛ yen, miin‑na a sɔ ka a fɛ. Mbɛ an ma chinchinɛ‑a a bia, a‑a an gbɛɛ baun miin gbandien ni ka.
15Tee bea ma, Chisɔsi fɛ denɛ n gbɛn‑da a ma, mbɛ an‑na a fɔ a ye, an dɔ, “Ɛ nyan fan i ni mɔɛ chɛ n na ta konko chɛ n dɔ mmɔ 'a tindanɛ, an ni daun fenɛ yan. Koe min na mu, pimbi e na bun‑da, a sin mmɔ ee ka duu baima.”
16Chɛɛ Chisɔsi ɔ, “An ma ta kan kɔ kan. Wo wandi gbu wo fen den be an ma, an ni a daun.”
17Mbɛ an dɔ, “Fenɛ min mbe dechee nɛ nn boo ɔ, an mu biidi duu a, ni nyɛ fea.”
18Mbɛ a ɔ, “Wo na an na nɛ.” Mbɛ an na‑a an na. 19A‑a a fɔ mɔ fanka chɛ ye, a ɔ, an ni si ben‑da bin gbii ɔ. Mbɛ a‑a biidi duu chɛ ya, a basan nyɛ fea chɛ a, a‑a a ya a si banda a, mbɛ a‑a tando be Yataa ma daun fen chɛ ko a. Mbɛ a‑a biidi chɛ ɔ kai kai, a basan nyɛ chɛ a, mbɛ a‑a a be a fɛ denɛ n ma, a du du koe a mɔɛ chɛ n ma. Mbɛ a fɛ den chɛ n‑na a ɔ du du mɔɛ chɛ n ma. 20Mɔ ɔ mɔ‑a daunɛ chɛ wan, a bu fa‑a gban. Mbɛ a fɛ denɛ n‑na an da tɔɛ a sɔn. An da tɔɛ chɛ bɛn‑da wan samba fa tan kun ma fea. 21Mɔ kaima miin ni nɔ, an taen fan ni wu duu nyɔn sima ɔ. Musu n bɛ den mɛsɛ n na, an na‑a daunɛ chɛ wan, chɛɛ an nii ma an dan ni a tima chɛ a.
Chisɔsi tachɛ‑a yii a
(Maki 6:45-52; Chɔn 6:15-21)
22An ban‑da kɛn mɔɛ chɛ n da tɔɛ chɛ a sɔn‑da, Chisɔsi‑a a fɛ denɛ n na ta dɛndɛ ɔ yii kaka dɔndɔɛ ma. A wandi sin to‑a a saa‑a mɔɛ chɛ n na, an ta koe a an baa nu. 23A‑a a saa kɛn mɔɛ chɛ n na, mbɛ a sɛ‑a kɔnkɔ dɔndɔ kun tɛ a dɔndɔ gbe a, min mbe a ma, a ni samunɛ chɛ. Fitii che‑a kan, a dɔndɔ gbe ɛ nɔ tun kɔnkɔɛ chɛ kun tɛ. 24A tima chɛ a, Chisɔsi fɛ denɛ n ni ka dɛndɛ min dɔ, a ni wan gbɛ yii wa chɛ tɛtɛ ma. Yii ni yau a tima chɛ a, min‑na a ma, dɛndɛ chɛ ni maa tena wan bechesa bechesa, a mu min na, fia wa dɛgbɛ an ni bɔ tena a ka an ya ɔ.
25Mbɛ sayi ma pimbi ɔ, tɛ kɔnɛ saa n konchee tima a, Chisɔsi tachɛ‑a yii a tan den tan den, mbɛ a ta‑a a fɛ denɛ n tan. 26Chɛɛ an‑na a yen kɛn na‑a tachɛ‑a yii chɛ a, an dɔ, “Fuɛ yen ko na‑a e.” Chiandia‑a an gboo fa wan aan, mbɛ an‑na yee tɛ gbankon.
27Mbɛ a ya kɔɔɛ a, Chisɔsi koɔ‑a an tena, a ɔ te, “Wo sɛmbɛ ka kaina chɛ an yee tɛ‑a. N fan mu, wo ma chian.”
28Mbɛ Pita ɔ, “Mansa, ni i wan gbu mu, n bɛɛ ni na wɛ, n ni i tan tachɛ‑a yii chɛ a.”
29Mbɛ Chisɔsi ɔ, “Na.” Mbɛ Pita bɔ‑a dɛndɛ chɛ ɔ, a bun‑da tachɛ‑a yii chɛ a, ta koe a Chisɔsi tan‑da. 30Chɛɛ a‑a a yen kɛn, fia‑a yii yaua, a chian‑da, mbɛ a bun‑da tunɛ‑a. Mbɛ a‑a yee tɛ, a ɔ, “Mansa, n deman.”
31Mbɛ Chisɔsi‑a a boo a ta, a‑a a bia a boo ma, a ɔ, “Danaya min mbe i ɔ n ko a, a ɔ dɔɔ. Fen‑na a ma i sika‑a?”
32An mbe sɛ‑a dechee dɛndɛ chɛ ɔ, fia gbu ɔ tɛ‑a. 33Mbɛ Chisɔsi fɛ den chɛ n gbɛɛ dɛndɛ chɛ ɔ, an‑na Chisɔsi tando, an dɔ, “Tea a, Yataa 'a denɛ mu i a.”
Chisɔsi‑a gbandi mɔɛ n baun, Kɛnesayɛti tanda ɔ
(Maki 6:53-56)
34Mbɛ an‑na a fo Kadidi yii wa chɛ tindi ma, an bɔ‑a wan dɛndɛ ɔ, mbɛ an na‑a Kɛnesayɛti tanda ɔ. 35Nɔ mɔɛ n na‑a Chisɔsi sɔn fan, min‑na a ma, an‑na an 'na mɔɛ n gbɛɛ chee ben‑da an tanda chɛ ɔ, na koe a Chisɔsi tan‑da. Mɔɛ n na‑a wan gbandi mɔɛ n gbɛɛ a a tena. 36An‑na Chisɔsi disa wan, min mbe a ma, a ni a ma gbandi mɔɛ chɛ n ni tu a 'a doma kai chen kana wɛɛ a. A sin gbandi mɔɛ miin gbɛɛ tu‑a a a, an baun‑da wan.
Currently Selected:
MATIU 14: KONONT
Highlight
Share
Copy
Want to have your highlights saved across all your devices? Sign up or sign in
New Testament in Kono © The Bible Society of Sierra Leone, 2006.
