MATIU 24

Chisɔsi‑a Yataa 'a kata yɔn koe kɔɔ fɔ an ye

(Maki 13:1-2; Duku 21:5-6)

1Mbɛ Chisɔsi bɔ‑a Yataa 'a kata chɛ ɔ, a bun‑da ta‑a. Mbɛ a fɛ denɛ n gbɛn‑da a ma, an dɔ, a ni a ya a yɛ Yataa 'a kata chɛ ma. 2Mbɛ Chisɔsi‑a a fɔ an ye, a ɔ, “Mm, an gbɛɛ ma kawaen fan mu. Chɛɛ n ni a ma din wo tena, mbɛ kata chɛ gbɛɛ, wo e ka min yen‑da, tima ɛ che‑a wan, a ni te gbo. A sɔ senɛ dɔndɔ wɛɛ ee to‑a sɔ ɔ, a gbɛɛ a ɛ kan‑da wan duu gboo a.”

Chisɔsi‑a bai sa, a si dunya danka a koe n ma

(Maki 13:3-13; Duku 21:7-19)

3Chɛ gbakɔ, Chisɔsi ni wan si ɔ Wodifi kɔnkɔɛ kun ma, mbɛ a fɛ denɛ n na‑a a tena. Mbɛ an dechee a nɔ, an dɔ, “I‑a bai miin fɔ ka, a ɔ yian nn na, ni sɔyɔ mu koe chɛ n mbe ma‑a. Nn mbe a ɔ sɔn‑da ka ma, mbɛ dunya danka che‑a, i na koe a? A tɔmɔsi ɛ ma‑a fen na?”

4Mbɛ Chisɔsi ɔ, “Wo wo kun ma fɛn, an ma na wo woo. 5Koe min na mu, mɔ sɛsɛ n mbe na‑a wan n tɔɛ ɔ. An mbe a fɔ‑a wan, an dɔ, an fan mu Chasi a, kunka mansa. A sin, an mɔɛ chɛ n mbe mɔ sɛsɛ sɔ‑a wan chia yama ma. 6Wo e chɛɛ ma tɔɛ a min‑da wan wo a tindanɛ, wo ni chɛɛ ma tɔɛ a min pɔɔ. Koe chɛ n mbe ma‑a wan, chɛɛ wo ma chian. Chɛ ni ma wɛɛ, a ee a ɔ yian, mbɛ tima che‑a dunya ban koe a. 7A yɛ to, chɛnyɛ n mbe butuinɛ chɛ‑a wan an nyɔn na, mbɛ chɛnyɛ mɔɛ dɔndɔɛ n‑na chɛɛ chɛ an bɛ chɛnyɛ mɔ dɔ mende n na. Kɔnkɔ ma chianden ba ɛ ma‑a wan chɛnyɛ sɛsɛ ɔ, a sin to, duu gboo wɛɛ ɛ samba‑a wan chɛnyɛ sɛsɛ ɔ, dɔndɔ dɔndɔɛ a. 8Ko yawaenɛ saa n fan nɛ ka miin mbe ma‑a. Ko yawaenɛ chenama n mbe gbaa, miin mbe na tena ma‑a chɛ n gbakɔ.

9“Mɔɛ nu dunya gbɛɛ ɔ, an mbe too‑a wan wo a, a mu min na, n fɛ mɔɛ mu wo a. An mbe wo bia‑a wan, mbɛ an‑na ko ma gbaaenɛ sa wo ma, mbɛ an‑na wo fa. 10N fɛ mɔɛ n sɛsɛ mbe ka‑a wan n fɛ a tima chɛ a. An mbe too‑a wan an nyɔn na, mbɛ an‑na an nyɔn ma tachɛ ya ɔ sɔɛ n ma. 11A tima chɛ a, mɔ sɛsɛ n mbe fania fɔ‑a wan, mbɛ Yataa 'a gbonka chɛ mɔɛ mu an na. An sin mbe mɔ sɛsɛ n sɔ‑a wan chia yama ma. 12Ko yama ma mɔɛ n mbe kɔkoa‑a wan kan kɔ kan dunya ɔ. Ni chɛ sin ma‑a, mɔ gbu sɛsɛ ee to‑a to a fian mɔ gbu a. 13Chɛɛ i wɛn mbe i faa bia‑a aan a danka a, Yataa ɛ i baun‑da wan. 14Mbɛ a sin, sakana bai chɛndɛ chɛ, a si Yataa 'a mansaya ma, mɔɛ n mbe a ɔ yian‑da wan mɔɛ gbɛɛ a dunya gbɛɛ ɔ. Chɛ ɛ a ma‑a wan, mɔɛ n ni sakana bai chɛndɛ chɛ a min chɛnyɛ koɛ kan kɔ kan dɔ. A sin, a tima a mu dechee, dunya ɛ danka‑a.”

Chisɔsi‑a Chuusaɛn yɔn koe kɔɔ fɔ an ye

(Maki 13:14-20; Duku 21:20-24)

15Chisɔsi ɔ, “Yataa 'a gbonka chɛ mɔɛ Danɛɛ na‑a bai fɔ wan suun a 'a gboo ɔ, a si fen ma nyamuienɛ ma, miin mbe fenɛ n yɔn. Wo wɛn mbe gboo chɛ kan‑da, wo ni a ɔ gbɛ chɛndɛ chɛ ni bai chɛ fasaien mu fen na. Fen ma nyamuien chɛ, wo e a yen‑da wan sɔ ɔ Yataa 'a kata ɔ. 16Ni wo‑a chɛ yen ma‑a, wo wɛn mbe Chudia chɛnyɛ ɔ, wo bui sa a a kɔnkɔɛ n dɔ, wo fɔɛ ko a. 17I wɛn mbe baa ma, i ma don to chenɛ a, i boo fen kan kɔ kan ya koe a. 18I wɛn mbe i 'a sɛnɛ ɔ, i ma yɛ to duu ɔ, koa ya koe a. 19A tima chɛ a, koe n mbe yaua‑a gba, miin mbe bu ma musu n nan gbu tan‑da, a basan kuinsa n na. 20Wo samunɛ chɛ Yataa tena, wo ma na bui chɛ chɛ sama ɔ, ni chɛ ma, wo ma na a chɛ suin tee ma.#24:20 Chu n 'n sawa nii ma dɔn ni, mɔ ni tachɛ chɛ a ben mai dɔndɔɛ ma suin tee ma. 21Koe min na mu, an tima chɛ a, ko yawaenɛ min mbe ma‑a, ɛ ben‑da wan a kɔma ma, min ma‑a a ka dunya a dan tima ma, a sɔ sanche ma. A sin a nyɔn sima ee ma‑a to kuɔ fɔ. 22Chɛɛ Yataa‑a a tee chɛ n ma wua, ko yawaen bia tee chɛ nu. Ni a nii ma an ma wua ni, mɔ gbu kan kɔ kan kun nii bɔ‑a a ɔ. Chɛɛ a‑a tee chɛ n ma wua a 'a mɔɛ chɛ n fan ko a, a‑a a boo sɔ miin ma, an ma koe a a 'a mɔɛ n na.”

Chisɔsi‑a bai sa, a si a yɛ koe ma to dunya ɔ

(Maki 13:21-27; Duku 21:25-28)

23Chisɔsi ɔ, “A tima chɛ a, ni mɔ ɔ mɔ‑a a fɔ i ye, a ɔ, i ya a na wɛ, i ni mmɔ kun ka mansa yen nɛ, i ma dan a a. Ni mɔ ɔ mɔ‑a a fɔ, a ɔ, a yen ko pan, i ma dan a wɛɛ a. 24A mu min na, fania kunka mansa an mbe na‑a wan, an basan fania fɔ mɔɛ n na, miin mbe an fandi ya Yataa 'a gbonka chɛ mɔɛ n na. An mbe kamaya koe n ma‑a wan, an ni koe tɔmɔsi n yian, mɔɛ n woo koe a. Ni an mbe kun fan, an mbe mɔɛ chɛ n bɛɛ woo‑a wan, Yataa‑a a boo sɔ miin ma, ma koe a a 'a mɔɛ n na. 25Wo‑a ɔ yen gbɛ, mbɛ koe miin mbe na tena ma‑a, n ban‑da an dɔ yian‑da wo a.

26“Chɛ an fɛ mu, ni mɔɛ n n‑na a fɔ wo ye, an dɔ, wo ni wo ya a ta, wo ni kunka mansa yen fuinɛ ma, wo ma ta nɔ. Ni an‑na a fɔ, an dɔ, a yen ko nun dɔ dumu chɛ ɔ, wo ma dan a wɛɛ a. 27Koe min na mu, n fan, Mɔ Gbu 'a Denɛ, n mbe na‑a wan mɔ ɔ mɔ ni n yen, yɔ mɔ ɔ mɔ ɛ banda manɛ yen buɛ min dɔ, ni a man‑da mia banda a. 28Ni doa n ma‑a kaina min, fen su ɛ nɔ a tindanɛ. Koe tɔmɔsi chɛ n bɛɛ, an mbe a ɔ yian‑da wan wo a, mbɛ tima che‑a n na koe a to.

29“Ko yawaen tee chɛ n mbe ben‑da dechee, mbɛ tee ee na‑a man‑da,

mbɛ kau wɛɛ ɛ pimbi‑a wan.

Tɔmbuaka n mbe bea‑a wan a ka banda a.

Fen kɔ fen min mbe banda a, Yataa ɛ a ɔ samba‑a wan a ka a gba ɔ.

30Mbɛ fenɛ ɛ ma‑a wan banda ma, min mbe a ɔ yian‑da mɔɛ n na, mbɛ n fan, Mɔ Gbu 'a Denɛ, n mbe ka na‑a na. Ni n sin ma‑a na‑a, mɔɛ nu dunya gbɛɛ ɔ, an mbe di chɛ‑a wan chinchimaya ɔ. Koe min na mu, mɔɛ gbɛɛ ɛ n yen‑da wan na‑a gbasaya wa ɔ dugbu ɔ, a yɛ to, n mbe ma‑a wan man‑da Yataa 'a manɛ a. 31Ni buu fɛ‑a gbankon, n mbe n 'na maeka n na ta‑a wan dunya gbɛɛ ɔ, an ni mɔɛ chɛ n na sɔn sɔn, n‑na n boo sɔ miin ma, ma koe a n 'na mɔɛ n na.”

Chisɔsi‑a tai tɛ, a si kɔnɛ ma

(Maki 13:28-31; Duku 21:29-33)

32Mbɛ Chisɔsi ɔ, “Wo wo yii na chii kɔnɛ#24:32 Puu koɛ ɔ, an kɔn chɛ tɔ ni fiki. ma. Ni wo‑a a yen pɔmbɔ‑a, a ni ma gbɛ wo yii ma, mbɛ sama ɔ ma yansan to. 33A chia dɔndɔ gbe chɛ a mu, ni wo‑a koe chɛ n yen ma‑a, a ni ma wo yii ma, mbɛ tima ɔ ma yansan to, n na koe a. 34N ni a ma din wo tena, mbɛ koe chɛ n gbɛɛ mbe ma‑a pɛn, wo nyɔn sima chɛ n mbe e na ban dunya ɔ. 35Dunya gbɛɛ ɛ ban‑da wan, chɛɛ n da a bai ee ka‑a a gba ɔ kuɔ fɔ ko a.”

Chisɔsi ɔ te, mmɔ ya ni ma a ya ɔ, tee ɔ tee a

(Maki 13:32-37; Duku 17:26-30, 34-36)

36Chisɔsi ɔ, “Chɛɛ mɔ ɔ mɔ ma a tee gbu sɔn, a basan a tima a, n na koe a. N fan, Yataa 'a denɛ wɛɛ, n ma a ɔ sɔn, ni n mbe na‑a tima min na. Maeka n bɛɛ, an ma a ɔ sɔn. Fa Yataa dɔndɔ gbe, an‑na a ɔ sɔn. 37Tima min na, n fan, Mɔ Gbu 'a Denɛ, n mbe yɛ‑a dunya chɛ ɔ to, koe n mbe ma‑a ka wan, yɔ an ni buɛ min dɔ Nowa 'a tima a. 38Mɔɛ n ni wan ko ɔ ko ma‑a Nowa 'a tima a, yɔ mɔ gbu kan kɔ kan mbe min ma. An ni daun fenɛ n daun fan, a yɛ to, an mbe an min. Mɔɛ n ni musu n fuu wan, musu n sin ni be wan kai n ma. Chɛ an ni a a, yii nii ma dunya ya ni tima min na, mbɛ Nowa sɛ‑a dɛndɛ wa dɛgbɛ ɔ. 39A sin, mɔɛ chɛ n nii ma ko ɔ ko ɔ sɔn ni, aan yii‑a dunya gbɛɛ a tunɛ, mbɛ a‑a an gbɛɛ fa. Ɛ ma‑a ka wan to an tee chɛ ma, tee min ma, n fan, Mɔ Gbu 'a Denɛ, n mbe na‑a tee min na. 40A tee chɛ a, ni kamin fea ma‑a wai chɛ‑a sɛnɛ ɔ, dɔndɔɛ ɛ ya‑a wan, mbɛ dɔndɔɛ sin to‑a nɔ. 41Ni musu fea ma‑a tu chɛ‑a mun dɔndɔɛ ɔ, dɔndɔɛ ɛ ya‑a wan, mbɛ dɔndɔɛ wɛɛ to‑a nɔ.

42“Chɛ an‑na a fɔ, wo wo kun ma fɛn, a mu min na, wo ma tee sɔn, tee min na, wo 'a mansa ɛ na‑a. 43Ni chen ti na‑a a ɔ sɔn fan, tima min na mu, kanka ɛ na su ɔ, a nii dɔn‑da a ni chinɔ. A ni ma‑a wan a ya a aan, min ni a ma‑a, kanka chɛ nii a 'a chenɛ da yɔn, a ni don. 44Chɛ an‑na a fɔ, wo ma bɛndenɛ ni ma tima ɔ tima ko a. A mu min na, wo ee na‑a tee sɔn‑da, n fan, Mɔ Gbu 'a Denɛ, n mbe na‑a tee min ma.”

Chisɔsi‑a tai tɛ, a si wai chɛ mɔɛ chɛndɛ ma

(Duku 12:41-48)

45Mbɛ Chisɔsi‑a tai tɛ, a ɔ, “Chɛ an fɛ mu, wo ma yɔ bɔi denɛ, danaya ni min dɔ, a basan yiimatɛ a. Ni a kun ti ma‑a ta‑a tachɛ ɔ, ɛ a to wan a bɔɛ n kun ma, daun fenɛ be koe a an nu ma, tima ma. 46Ni a kun ti yɛ‑a, a ni a tan, ɛ koe chɛ n ma‑a, yɔ a‑a a fɔ buɛ min dɔ a ye, ɛ ma wan ko chɛndɛ a a ko a. 47N ni a ma din wo tena, mbɛ kun ti chɛ ɛ gbasaya be‑a wan a ma, ma koe a a 'a chenɛ gbɛɛ kun ma. 48Chɛɛ bɔi den chɛ, ni bɔi den chɛndɛ ma a a, ɛ a fɔ‑a wan, a ɔ, mbɛ kun ti chɛ ee fua tena yɛ‑a, 49mbɛ a bun‑da a bɔɛ n gbasi‑a. A yɛ to, mbɛ a bea‑a daun ba chɛ fɛ, a basan gbɛ min ba a, an bɛ kɔn gbasi kai n na. 50Chɛɛ a kun ti chɛ ɛ yɛ‑a wan tee dɔndɔ a, a yii mbe ee ma‑a a yɛ koe ɔ tima min na. 51Kun ti chɛ ɛ bɔi den chɛ a tɔɔya‑a wan a yama yama boo a, mbɛ a‑a a bia, yɔ nɛnɛn fea ti chɛ n mbe bia buɛ min dɔ. Bɔi den chɛ, ɛ ma‑a wan kaina dɔndɔɛ, di chɛ a, a basan mɔnɛ ɔ nyin na daunɛ a, an bɛ nɛnɛn fea ti chɛ n na.”

Currently Selected:

MATIU 24: KONONT

Highlight

Copy