MAKI 7

Chisɔsi‑a bai sa, a si Chu mɔɛ n bemba n 'na kanɛ ma

(Matiu 15:1-9)

1Chu mɔɛ dɔ nu, miin ni Fayisii n na, an bɛ Chu n 'na sawa kan mɔɛ dɔ n na, an na‑a ka wan Chuusaɛn duu ɔ. Mbɛ an na kan‑da Chisɔsi 'a tindanɛ. 2An na‑a a ɔ yen fan, mbɛ an woo mɔɛ n‑na kanɛ min to an boo ɔ, Chisɔsi fɛ denɛ dɔ n nii bea tena an kan chɛ fɛ. Koe min na mu, an fɛ den chɛ nu, an mbe ee an boo a ko a chia ma, yɔ kan chɛ‑a a fɔ buɛ min dɔ, mɔ e na daunɛ chɛ.

( 3Koe min na mu, Fayisii nu, ni Chu mɔɛ tɔɛ nu, an mbe bea sawa chɛ n fan fɛ, an woo mɔɛ n‑na miin to an boo ɔ. An mbe ee fen kɔ fen daun, ni an ma an boo a ko ni, a chia ma. 4A sin, an gbu ee daun fen daun, ni an ka‑a machiti ɔ, mɔɔ ni an‑na an fandi ko pɛn. Sawa n ni kɔkoo, an na‑a miin ma sɔn, an sin ni bea wan an fɛ. Sawa nu, yɔ mɔɛ ɛ a boo a ko buɛ min dɔ, a chia ma. A yɛ to, kɔpu nu, da nu, pani kumusu nu, a basan sofa n bɛɛ ta sawa n na).

5Mbɛ Fayisii n bɛ sawa kan mɔɛ n na, an‑na Chisɔsi ɔ tisa, an dɔ, “Mmɔ woo mɔɛ n‑na kanɛ min to mmɔ boo ɔ, a nyin fan mɔ ɔ mɔ ko a. Chɛɛ i fɛ denɛ n‑na an fandi bɔ kan chɛ kɔɔ. Koe min na mu, an mbe ee an boo a ko a chia ma, yɔ kan chɛ‑a a fɔ buɛ min dɔ, mɔɛ e na daunɛ chɛ. I‑a chɛ yen ka ma?”

6Mbɛ Chisɔsi ɔ an ma, “Yataa 'a gbonka chɛ mɔɛ Aisaya na‑a min fɔ suun, a si wo ma, a teaen ni gba! Nɛnɛn fea ti mu wo a, yɔ a na‑a a nyɛn buɛ min dɔ, mbɛ,

‘Yataa ɔ te, a ɔ, wo e basɔmaya be dechee a ma wo da ɔ wan.

A ɔ, chɛɛ a wakoe ee wo faa ɔ.

7Wo e samun gbama an chɛ a tena,

koe min na mu, wo e mɔɛ n kan gbɛ wo ta kanɛ an na,

wo e ta‑a a ma‑a, yɔ a 'a sawa‑a a fɔ ka wan.’ ”

8Chisɔsi ɔ, “Wo ta sin, wo e Yataa 'a sawa to wan, mbɛ wo bea‑a wo ta kanɛ fɛ.”

9A ɔ te to an ma, “Yiimatɛ chia ɛ wan wo boo ɔ, wo kunɛ bɔ koe a Yataa 'a sawa n kɔɔ, min mbe a ma, wo ni bea wo ta sawa n fɛ. 10Mosisi na‑a a fɔ wan, a ɔ, ‘Wo ni kooya be wo fa ma, a basan wo de a.’ A yɛ to, a ɔ, ‘Ni mɔ ɔ mɔ‑a bai yama sa a fa ma ni a de, wo ni an mɔɛ chɛ fa.’ 11Chɛɛ wo tana, wo e mɔɛ n kan fan, an ni chɛ fɔ an fa n ye, a basan an de n na. Mbɛ an toen ni, an ni fenɛ min be an ma, min ma gbɔsɔɛ ɛ an ma, an ban‑da a be‑a Yataa ma.”#7:11 a be‑a Yataa ma - An ta chɛnyɛ koɛ ɔ, an dɔ, “kɔbanɛ.” 12A ɔ, “Wo e kafai be wan mɔɛ chɛ ma, a ma na koe chɛ a fa ye, chɛ ma, a de ye. 13Chia chɛ a mu, wo e kanɛ min chɛ mɔɛ n na, ɛ a ma mɔɛ n ni Yataa bai to, mbɛ an bea wo ta fɛ. Ko dɔ mende n sin mbe wan to nɔ, yɔ chɛ, wo e miin ma tena.”

Chisɔsi ɔ te, fenɛ min mbe mɔɛ ma nyamui Yataa tena

(Matiu 15:10-20)

14Mbɛ Chisɔsi‑a mɔ fanka chɛ n chee to a tena. A ɔ, “Wo gbɛɛ, wo wo too ma sɔ, n da a bai ma, wo ni a ɔ gbɛ. 15-16Mɔ gbu e min don i da a, an mbe ee a ma, i ma ni nyamui Yataa ya kɔɔ, fɔ e min‑na bɔ i da ɔ.”#7:15-16 Bai chɛ n fan saen mu a kun ma Maki 'a gboo kɔma dɔ n dɔ. Bai chɛ n dɔ: Wo wɛn too ɛ koe a min, wo chɛ a min.

17A‑a mɔ fanka chɛ n to kɛn, mbɛ a don‑da chenɛ a, a fɛ denɛ n‑na a ɔ tisa wan, an dɔ, a ni a da a bai chɛ fasai an ye. 18Chisɔsi ɔ an ma, “Wo e ka n fɛ wan, chɛɛ chɛ gbɛɛ ɔ, wo yiima ma tɛ ni, a ni ben mɔɛ tɔɛ n ma. Wo ma chɛ ɔ gbɛ ni? Mɔ gbu e min don i da a, an mbe ee a ma, i ma ni nyamui Yataa ya kɔɔ, fɔ e min na bɔ i da ɔ. 19Koe min na mu, mɔ gbu ɛ fenɛ min daun, a ee ta a faa ɔ wan. Chɛɛ ɛ yii mɔ bu ɔ wan, mbɛ a ta‑a kumbai a kanɛ ɔ.” (Chisɔsi‑a a fɔ wan ka, mbɛ daun fenɛ kan kɔ kan nyin fan, a daun koe a).

20Mbɛ a ɔ te to, “Fenɛ min mbe bɔ mɔ gbu faa ɔ, an mbe a ma, a ma ni nyamui Yataa ya kɔɔ. 21Koe min na mu, mɔ gbu bu ɔ mu, a faa ɔ, ko yama n mbe bɔ. Yiinachii yama nu, miin mbe mɔɛ sɔ ko tɛ ma, kanka chɛ, ni mɔ fa koe. 22A ni ma waa ma basan koe an na mɔɛ a, mɔ ee fuu ɔ min na, bɛncha mu, a basan ko yama tɔɛ gbɛɛ a. Mɔɛ bun koe, kan baiya, toomaya, tɔ ɔ tɛ yama chɛ, yonka, wooya. 23Ko yama chɛ n gbɛɛ, an mbe bɔ mɔ gbu faa an dɔ. An sin fan mbe a ma, mɔ gbu ma ni nyamui Yataa ya kɔɔ.”

Musu 'a danaya‑a a ma, a 'a denɛ baun‑da

(Matiu 15:21-28)

24Mbɛ Chisɔsi ka‑a nɔ, an bɛ a fɛ denɛ n na, mbɛ an ta‑a tanda ɔ, Taya duu wa a tindanɛ. A don‑da chenɛ a, a sin nii ma to ni, mɔ ɔ mɔ ni a ɔ sɔn, mbɛ ɛ wan nɔ. Chɛɛ a nii ma che ni to‑a an nun chɛ ɔ. 25Mbɛ musu dɔndɔ, nyina yama ni min 'na den musuenɛ fɛ, a‑a Chisɔsi ma tɔɛ a min. Mbɛ a ya kɔɔɛ a, a na‑a a tena, mbɛ a bea‑a a chen kɔɔ. 26Chu mɔ nii ma an musu chɛ a. A sin, a suun‑da Siyia chɛnyɛ ɔ wan, Fonisia tanda ɔ. A‑a Chisɔsi disa wan, nyina yama chɛ gbain koe a 'a den chɛ fɛ. 27Chɛɛ Chisɔsi ɔ, “Den mɛsɛ n ni daunɛ chɛ pɛn. A ma nyin, mɔɛ ni den mɛsɛ n 'na daun fenɛ bɔ an da a, a ni a be wuu n ma.”

28Chɛɛ musu chɛ ɔ, “Kai, wuu gbu wɛɛ ɛ ma si ɔ den mɛsɛ n baima, ni an da a pɛɛ bea‑a duu ma, an mbe a daun fan.”

29Mbɛ Chisɔsi ɔ te gbɛ, “I da a bai chɛ ko a, yɛ i waa chenɛ a. I‑a a tan‑da wan, nyina yama chɛ kaenɛ ɛ gbɛ i 'a denɛ fɛ.”

30Musu chɛ yɛ‑a a waa a, mbɛ a‑a a 'a denɛ tan sa ɔ sofa ma, nyina yama gbu nii to a fɛ.

Chisɔsi‑a mumunɛ baun, min too wɛɛ nii koe a min

31Mbɛ Chisɔsi bɔ‑a Taya duu baima, mbɛ a ben‑da Sidon duu bu ɔ. Mbɛ a ta‑a chɛnyɛ dɔndɔ ɔ, an ni min chee, an dɔ, Duu Tan. A don‑da a ɔ, mbɛ a che‑a Kadidi yii wa ma. 32Mɔɛ dɔ n na‑a kaminɛ a, Chisɔsi tena, min too nii koe a min, a sin, a koɔ koe wɛɛ ni gbɛɛ. An na‑a Chisɔsi ma nande wan, an dɔ, a ni a boo bun a ma, a baun koe a. 33Mbɛ Chisɔsi‑a mɔ kaima chɛ ya, a ka‑a a fanka chɛ baima. Mbɛ a‑a a boo don kamin chɛ too fea ɔ. Mbɛ a‑a a da yii a bɔ, mbɛ a tu‑a mumun chɛ nɛnɛnɛ a. 34Mbɛ Chisɔsi‑a a ya a sɛ banda a. Mbɛ a kuun‑da dioo. Mbɛ a ɔ kamin chɛ ma, “A ɔ ni ka.”#7:34 An ta chɛnyɛ koɛ ɔ, a na‑a a fɔ ka wan, a ɔ, “Ɛfata.”

35A ya kɔɔɛ a, kamin chɛ che‑a koe a min‑da. A yɛ to, a koɔ koe min ni gbɛɛ ka, a bun‑da koɔ‑a chɛndɛ chɛ. 36Mbɛ Chisɔsi‑a a fɔ mɔɛ chɛ n ye, a ɔ, an ma a ɔ yian mɔ ɔ mɔ a. Chɛɛ a ni a fɔ buɛ min dɔ an ye, an ni ben ka wan a ɔ yian‑da mɔ dɔ gbɛɛ n na. 37A sin, mɔɛ miin gbɛɛ na‑a a min, an da ɔ gbaa‑a wan gbechee. An dɔ, “Gba! A kosan a 'a wai chɛ‑a. Ɛ a ma wan too gbee tɔɛ wɛɛ ni koe a min, mumunɛ ni koɔ.”

Currently Selected:

MAKI 7: KONONT

Highlight

Copy