Kɛwɔlɛnu 11
11
Pita Dantɛgɛ-Koe Mari Yisata Mɔgɛnu ye Yerusalɛm
1Kilayɛnu anubɛ dɛnkɛninya-mɔgɛ minnu bi Yudiya fan bɛɛ, wonu ya a lamɔɛn ko sibolo-gbɛrɛnu fanan bara Allala kumɛ rabira. 2Nba, Pita tara Yerusalɛm tumɛ min, a di minnu ye ko sibolo-gbɛrɛnu ni kemininya iko Yahudiyanu, wonu ya a makuma. 3Anu ko, “Sibolo-gbɛrɛ minnu kemininyani ma, i wara yiya wonu barɛ ka fen-dɔn-kɛ anu fɛ fanan! Wo tɛgɛnɛ nfen ma?”
4Woletɔ koe min bɛɛ kɛra kebi a dabira tumɛ, Pita ya wo bɛɛ rakaran anu ye. 5A ko, “N bi Alla-matarɛ kun na Yapa tumɛ min, n ya ko-rayirɛ do yen. N ya fan do yen yigila min manɛ iko kura-belebele. A dunnɛ a tɔnkɔn nanɛ ma. A ye yigila ka bɔ Arinyɛni tɔ ka sɔ n dafɛ. 6N ya a burɛ rafɛlɛn tumɛ min, n ya sogenu yen anubɛ firarɔ-sogenu anubɛ sagan-fannu anubɛ konanu. 7N ya kuman-kan do lamɔɛn, a ye a fɔla n ye ko, ‘Pita, i lasɔ. I ni kɛnu faga ka anu dɔn!’ 8Kɔnɔ n ya a fɔ ko, ‘Ade, Mari! N ma fenfen dɔn bɛ n tanɛ ye min na. N ti fen-kɔsɔnɛ dɔn mumɛ!’ 9Kuman-kan bɔra Arinyɛni tɔ tun ko, ‘Alla ara min sɛninya, i kana i miri ko wo kɔsɔnɛ.’ 10Kɛ mara kinyama sawa, ala ban, a bɛɛ sɛgira Arinyɛni tɔ tun. 11Wo wati nyɛrɛ rɔ, kei mɔgɔ sawɛ minnu nanara n ma ka bɔ Sɛsariya, wonu kera bɔn wo la, n bi kan min nun. 12Allata Ni-Sɛnimɛ ya a fɔ n ye ko n kana sika, n ni ta anu fɛ. N na-kelen-nyɔgɔ mɔgɔ wɔrɛ kɛnu fanan tara n fɛ Sɛsariya, ado ma dama donta Kɔniliyasila bɔn la. 13A ya melika sɔnɛ yen ala bɔn la nya min, a ya wo bɛɛ fɔ ma ye. Melika wo ya a fɔ a ye ko a ni mɔgɛ do lata Yapa soe burɔ, mɔgɛ do nyini tinɛ min tɔgɛ Saimon Pita. 14A ko a si kumɛnu fɔ a ye anubɛ ala denbayɛ bɛɛ si kisi min fɛ. 15Nba, n wulita kumala tumɛ min, Allata Ni-Sɛnimɛ yigira anu fanan kuma iko a yigira male kuma nya min fɔlɔ-nun. 16#Kɛwɔlɛnu 1.5 Mari ya kumɛ min fɔ, n nabilara wo la ko, ‘Yɔni ya batasili kɛ yi rɔ kɔnɔ wole si batasi Allata Ni-Sɛnimɛ la,’ 17ado a ara gbɛ feu, ko male dɛnkɛninyara Mari Yisa, Allata-Mɔgɔ-Yabɔnɛ ma tumɛ min ko Alla ya kɔ-fan min di male ma, a ara wo sifa le di sibolo-gbɛrɛnu ma. Nba, nfen bi nde la nun worɔ ko n ni Alla lakala?”
18Anu ya kɛ lamɔɛn tumɛ min, anu ya a makumɛ boloka ka Alla tanto. Anu ko, “Nba, Alla ara fɛrɛ di sibolo-gbɛrɛnu fanan ma ko anu ni tubi ka habadan-nimayɛ sɔrɔn!”
Mari Yisata Mɔgɛnu Bara-Koe Antiyaki Soe Burɔ
19 #
Kɛwɔlɛnu 8.1-4
Dɛnkɛninya-mɔgɛnu ya tɔrɔyɛ min sɔrɔn Sitifen sayɛ kɔma, wo ya a ma, anu nyɛnsɛnta. Donu tara fɔɔ Finisiya anubɛ Saiparasi nyamanɛnu tɔ anubɛ soe min tɔgɛ Antiyaki ka Allala kumɛ fɔ Yahudiyanu dɔrɔn ye. 20Kɔnɔ minnu dɛnkɛninyanɛ Saiparasi anubɛ Sairini soenu burɔ, wo donu tara Antiyaki ka Mari Yisata kibara-nyima-kawandili bɔ sibolo-gbɛrɛnu ye. 21Marita sɛnbɛ tora anu fɛ. Mɔgɔ siyaman dɛnkɛninyara Mari ma ka bila a fɛ.
22Koe wo mankan kera Mari Yisata mɔgɛnu ma Yerusalɛm. Woletɔ anu ya Banabasi lata Antiyaki. 23A kera nyɔ tumɛ min, Alla ara ata duwɛ layigi ata mɔgɛnu kuma nya min, wo yen a bolo, a sewara. A ya anu dama makawandi ko anu ni lanayɛ kɛ ka telen Mari ye anu yisi bɛɛ la. 24Mɔgɔ-nyimɛ le Banabasi la. A fanɛ Allata Ni-Sɛnimɛ anubɛ dɛnkɛninyɛ la, woletɔ mɔgɔ siyaman mara Maritɛ la nyɔ.
25Wo kɔma, Banabasi tara Sɔli nyini tinɛ Tarasa soe burɔ. 26A ya a yen tumɛ min, a nara a la Antiyaki. San kelen kɔrɔ, anu mɔgɔ filɛ tora ladɛn kɛla Mari Yisata mɔgɛnu fɛ nyɔ ka nyama-ba karan. Antiyaki soe burɔ, Yisata mɔgɛnu tɔgɔ kele fɔlɔtɛ kɛra ko Kirasitita mɔgɛnu.#11.26 Kirasitila mɔgɛnu: Ka a fɔ Kirasiti Kiriki-kan rɔ, wo kɔrɛ le Allata-Mɔgɔ-Yabɔnɛ. Hiburu-kan rɔ ko, “Masiya.” Tubabu-kan rɔ, anu si anu kele ko, “Kirasitanu” (Christians).
27Wo wati rɔ, nɛbi donu bɔra Yerusalɛm soe burɔ ka ta Antiyaki. 28#Kɛwɔlɛnu 21.10 Kelen bi anu tɛma min tɔgɛ Agabasi, wo ya a sɔ ka wɔlɔyiyɛ kɛ Allata Ni-Sɛnimɛ sɛnbɛ baraka rɔ ko kɔnkɔ-fitinɛ ye nala duninya bɛɛ rɔ. (Wo kɛra wo tumɛ Kaladiyasi ye Romu nyamanɛ kun-tigiyɛ la.) 29Yisata mɔgɛnu ya a latɛgɛ ko anu kelen-kelennamɛ-bɛɛ wa ke anu bolo-fan fenfen sɔrɔnna, anu ni wo lata anu na-kelen-nyɔgɛnu ma minnu siginɛ Yudiya nyamanɛ rɔ anu dɛnbɛn-koe la. 30Anu ya wodi wo don Banabasi anubɛ Sɔli bolo ka a lata Mari Yisata mɔgɔ-banu ma Yerusalɛm soe burɔ.
Currently Selected:
Kɛwɔlɛnu 11: KCLB
Highlight
Share
Copy
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.
