Ko-Dabirɛnu 35

Yakoba Sɛgi-Koe Bɛtɛli

1 # Ko-Dabirɛnu 28.11-17 Alla ya a fɔ Yakoba ye ko, “I lasɔ. I ni ta Bɛtɛli tun, n bɔra i ye gbɛ rɔ kan min wo tumɛ i ye i burila i kɔrɔ-kei Isɔ kɔrɔ. I ni saraka-mintan-tinɛ sɔ nde, Alla ye ka i sigi nyɔ.”

2Yakoba ya a fɔ ala denbayɛnu anubɛ ala wɔli-kɛlɛnu ye ko, “Wo ye bɛsɛ minnu kɔla, wo ni wonu nakɛ a rɔ. Wo ni wo ku ka wo sɛninya. Wo ni wo mayɛlɛma kura-kunɛnu na alako ka a yira ko wo ara wo kan-kɔ sɔ wola bɛsɛnu na. 3Ma ni wuli wona ka ta Bɛtɛli. N si saraka-mintan-tinɛ sɔ Alla ye nyɔ bawo wo tumɛ n bi tɔrɔyɛ rɔ, Alla ya n denkun. A tora n fɛ ka n kandan nta tagama bɛɛ rɔ.”

4Yakobala mɔgɛnu ya anuta bɛsɛnu don a bolo anubɛ anuna tolola-fan minnu tugunnɛ anuna bɛsi-kɔ-koe la. Yakoba ya denkɛ sin ka wo bɛɛ togon kɔlɔma-kuru-wɛ do kɔrɔ Sɛkɛm soe dafɛ.

5Anu ya tagama dabira tumɛ min, Alla ya kilan don anu dafɛ-sorɔ-mɔgɛnu tɔ. Wo le ya a ma, anu ma Yakoba anubɛ ala den-keinu sagaran.

6Yakoba anubɛ ala mɔgɛnu tara hɛrɛ rɔ ha ka ke Lusi soe burɔ min bi Kenan nyamanɛ rɔ. Kɔnɔ tɔ-a-la, anu ya Lusi tɔgɛ yɛlɛman ko Bɛtɛli. 7Yakoba ya a buri a kɔrɔ Isɔ kɔrɔ tumɛ min, Alla bɔra gbɛ rɔ a ye Bɛtɛli, woletɔ Yakoba ya saraka-mintan-tinɛ sɔ nyɔ ka a tɔgɔ sa “Allata Bɛtɛli.”

8Kɔnɔ wo wati rɔ, Rebɛka fɛ-biralɛ Dɛbora fagara. Anu ya a togon Bɛtɛli soe kɔlɔma do kɔrɔ. Anu ya kɔlɔma wo tɔgɔ sa “Di-Kɛ-Kɔlɔma.”

9Yakoba bɔɛ Mɛsopotemiya nyamanɛ rɔ, Alla bɔra a ye gbɛ rɔ tun ka ata duwɛ layigi a kuma. 10#Ko-Dabirɛnu 32.28 Alla sɛgira a gbɛ ma tun, a ko, “I tɔgɔ ma tun Yakoba.#35.10 Yakoba: Ni i ya a lamɔɛn Hiburu-kan rɔ ko, “Yakoba,” wo kɔrɛ le, “Yanfanteyɛ.” I tɔgɛ le gbɛ Isirɛla.”#35.10 Isirɛla: Ni i ya a lamɔɛn Hiburu-kan rɔ ko, “Isirɛla,” wo kɔrɛ le, “Minnubɛ Alla ya turunɛ kɛ.” Woletɔ anu ya a kele Isirɛla.

11 # Ko-Dabirɛnu 17.4-8 Alla ya a fɔ a ye tun ko, “Alla Sɛnbɛ-Bɛɛ-Tigi le nde la. I ni yiri ka siyaya. Bɔnsɔn siyaman si bɔ ile rɔ. Mansɛnu si bɔ i bɔnsɔn wonu tɔ. 12N ya lanyiri kiri nyamanɛ minna ko la i benba Iburayima anubɛ i fa Isiyaka ye, n si wo di ile anubɛ i kegeyɛnu ma.” 13A ban kumɛ wo fɔla Yakoba ye nyɔ, Alla bɔra a dafɛ. A yɛlɛta san ma.

14 # Ko-Dabirɛnu 28.18-19 Alla kumara a ye kan min, Yakoba ya kuri do fanan latelen nyɔ. A ya tuli anubɛ nɔnbɔ-gbɔ-yi labɔn a ma alako ka a dantɛgɛ Alla ma. 15Woletɔ Yakoba ya nyɔ tɔgɔ sa Bɛtɛli.#35.15 Bɛtɛli: Wo kɔrɛ le Hiburu-kan rɔ ko, “Allala Bɔn.”

Resɛli Faga-Koe

16Anu bɔra Bɛtɛli. Yanni anu ni ke Ɛfarati, Resɛli buyi ya a lamaga kilɛ tɛma. Ala dan wo sɔrɔn-koe gbɛlɛyara a kuma. 17A ye tɔrɔyɛ wo kun na tumɛ min, ala tinkɔrɔ-sigilɛ ya a fɔ a ye ko, “I kana kilan. I wara dan do le sɔrɔn tun!” 18-19Hali wo, Resɛli ma beli. Kɔnɔ a niyi ye bɔla tumɛ min, a ya ala dan wo tɔgɔ sa Bɛn-Oni.#35.18 Bɛn-Oni: Wo kɔrɛ le Hiburu-kan rɔ ko, “N tɔrɔ dan.” Kurankɔɛnu si dan su wo tɔgɔ sa Yanba. Kɔnɔ ala kei Yakoba fanan ya dan wo tɔgɔ sa Bɛnyamɛ.#35.19 Bɛnyamɛ: Wo kɔrɛ le Hiburu-kan rɔ ko, “N sisirɔ dan.”

Resɛli fagara. Anu ya a togon Ɛfarati kilɛ la. (Ɛfarati soe wo tɔgɛ le fanan Bɛtalehɛm.) 20Yakoba ya kuri sɔ a kanbɛ kuma. Ha bi,#35.20 Ha bi: Kɛ sɛbɛra wati min, kuri wo sɔnɛ nyɔ kɔnɔ bi, ma ma a lɔn ni a ye nyɔ. kuri sɔnɛ kanbɛ wo kuma nyɔ.

Yakobala Dannu Bara-Koe

(1 Ko-Kɔrɔta-Karan 2.1-2)

21-23 # Ko-Dabirɛnu 49.4 Yakoba ya den mɔgɔ tan-ni-filɛ minnu sɔrɔn, wonu tɔgɛ le kɛnu na, Liya ya den-kei mɔgɔ wɔrɔ sɔrɔn, Rubɛn wo, Simiyɔn wo, Lifayi wo, Yuda wo, Isakari wo, anubɛ Sɛbulɔn. Kɔnɔ Yakobala den-kei-sarɛ le Rubɛn na.

Yakoba tara a daga makɛ kan-tina-layan-bɛ do kɔma min tɔgɛ Idɛri. Anu tenbi nyɔ le, Yakobala den-kei-sarɛ Rubɛn wo ya a sa a fala musila solo-dununɛ Biliha fɛ. Yakoba ya wo lamɔɛn.

24Resɛli ya den mɔgɔ fila sɔrɔn, wonu tɔgɛ le Yusufu anubɛ Bɛnyamɛ.

25Resɛlila solo-dununɛ Biliha ya den-kei mɔgɔ fila sɔrɔn, wonu tɔgɛ le Dan anubɛ Nafatali.

26Liyala solo-dununɛ Silipa ya den-kei mɔgɔ fila sɔrɔn. Wonu tɔgɛ le Kadi anubɛ Asɛra. Yakobala dan le wonu na a ya minnu sɔrɔn Mɛsopotemiya nyamanɛ rɔ.

Isiyaka Faga-Koe

27 # Ko-Dabirɛnu 13.18 Yakoba tara a fa Isiyaka wara Mamireta kɔlɔmanu kɔrɔ Hiburɔn soe dafɛ. Iburayima anubɛ Isiyaka sigi tina kɔrɛ le nyɔ la. 28-29Isiyaka kɔrɔyara kɔbɔkɔbɔ! A siyi-tele bɛnta san kɛmɛ ani san bi-segin (180) ma, a nara to so-sɛgi-kɛla. Ala dan mɔgɔ filɛ Isɔ anubɛ Yakoba ya a lata ala so la.

Currently Selected:

Ko-Dabirɛnu 35: KCLB

Highlight

Copy