Ko-Dabirɛnu 44

Yi-lafɛ Min Tora-A-Rɔ

1Yusufu ya a fɔ ala wɔli-kɛlɛ-kun-tigi ye ko, “Kei kɛnuna bɔrɛnu takɛ dɔn-fan la tun iko anuna sofɛlɛnu si minnu nɔ ka anu damata wodi sa dɔn-fan wonu kuma anuna bɔrɛnu tɔ. 2I ni nta wodi-gbɛ-yi-lafɛ fanan sa anu dɔgɛta dɔn-fan kuma bɔrɛ rɔ.” Wɔli-kɛlɛ wo ya a ma iko Yusufu ya a fɔ a ye nya min.

3Wo banda kɛ subaga, kei wonu ban anuna dunɛnu kirila anuna sofɛlɛnu kɔ tɛma, anu ya anu masara. 4Anu tara. Yanni anu ni yanfa, Yusufu ya a fɔ ala wɔli-kɛlɛ-kun-tigi wo ye ko, “Ta kei wonu sagaranna. I wa ke anu tɔ tumɛ min, i ni anu manyinika ko nfenna anu bara wɔli-nyimɛ yɛlɛman wɔli-yogomɛ la? 5I ni anu manyinika ko nfenna anu ya i tigila yi-lafɛ kankan ka ta a la anu bolo? A min-kɛ-yi-lafɛ le wo la. Ata nya-nyini-fan le wo la fanan. I ni a fɔ anu ye ko anu bara ko-yogoma-belebele le ma wo la.”

6Wɔli-kɛlɛ-kunyɛ wo ya anu sagaran tumɛ min ka anu taran kilɛ la, a ya Yusufula kumɛ wo bɛɛ rakaran anu ye. 7Yusufu na-kelen-nyɔgɛ wonu ya a yabi ko, “Ma tigi ye kumɛ kɛ fɔla nfenna? Ma ti ko su kɛnu ma muk! 8Hali ma tɛrɛnara wodi minnu na mala bɔrɛnu tɔ ma warɛ Kenan nyamanɛ rɔ, ma nara le wonu na. Ma si na wodi anubɛ sɛnɛ kankan kama wo rɔ? 9Mala bɔrɛnu mafɛlɛn. Ni i ya a yen min bolo, wo ni wo tigi faga. Male si ma ila yɔɔn la.”

10Wɔli-kunyɛ ko, “N bara sɔn wo ma. Kɔnɔ a ye yenna mɔgɔ kelan min bolo wo kurun tɔ, wo si ma nna yɔɔn la. A toenu na si fɛrɛ.”

11Tiriyante wo rɔ, anu ya anuna dunɛnu sigi dugi ma ka anu nafulen. 12Anu ya yi-lafɛ wo nyinɛ dabira anu kɔrɔ sarɛta dunɛ rɔ ha anu tara a laban anu dɔgɛ wota dunɛ ma. Yaga, anu ya yi-lafɛ wo yen Bɛnyamɛta bɔrɛ rɔ. 13Bɛnyamɛ kɔrɔnu ya anuna durukinu tafara anu kan na yisi-tinya bolo. Anu ya anuna dunɛ wonu bi tun ka anu kiri anuna sofɛlɛnu kɔ tɛma. Anu sɛgira anu kɔma Iyipiti nyamanɛ rɔ.

14Yuda anubɛ a na-kelen-nyɔgɛnu tara Yusufu wara bɔn la tumɛ min, anu ya anu sa dugi ma Yusufu kɔrɔ. 15Yusufu ya a fɔ anu ye ko, “Wo ara nfen ma kɛ la? Wo ma a lɔn nun ko wo mɔgɛ le nde la min si nya-nyini-kɛ ka ko sufa kɛnu gba bɔ?”

16Yuda ya a fɔ tun ko, “Kuma sa male bolo tun ma si min fɔ. Male si ke kɛ masɔsɔla kama ka a fɔ ko male gba ma. Alla ara ma sɔn-yogomɛ labɔ gbɛ rɔ. Yi-lafɛ yenta ma dɔgɛ min bolo nun, wo dɔrɔn sa mala yɔɔn la. Ma dama le mala yɔɔn la gbɛ!”

17Kɔnɔ Yusufu ko, “Ka a fɔ wo dama ni ma yɔɔn la, alamɛ nde tankara wo ma. Nta yi-lafɛ yenta min bolo, wo le dɔrɔn si ma nta yɔɔn la. Wole lafɛrɛnɛ ni ta wo fa warɛ.”

Yudata Madiyalɛ Bɛnyamɛla Ko La

18Yuda ya a madon Yusufu la. A ya a fɔ a ye ko, “E, n tigi, i si sɔn i wɔlɔ matɔlɔla n na? N ni kuma? Hali i manɛ iko mansɛ, i kana i fonde magboya n na. 19N tigi, ile le ma ma manyinika ma fa anubɛ ma dɔgɛ kɛla ko ma nun, ba? 20Ma ya a fɔ i ye ko ma fa-kɛmɔgɛ ye nyɔ. Ma ya a fɔ tun ko ma dɔgɔ-kei ye nyɔ, ma fala kɛmɔgɔ-dan, kɔni. Ma ya a fɔ i ye fanan ko ma dɔgɛ, wo kɔrɔ-keminɛ ara faga. Ale kelen pe le tonɛ gbɛ a na buyi rɔ, ado a di ma fa ye kati!

21“Ma tigi, ile nyɛrɛ-nyɛrɛ le ya a fɔ ma ye ko ma ni na ma dɔgɛ la ma bolo, i ni a yen i yɛ la. 22Male ya a fɔ i ye ko ni ma dɔgɛ wo bɔra ma fa dafɛ, ma fa ti si-yan sɔrɔn. 23I ya a fɔ ma ye tun ko ma kana na ma dɔgɛ kɔma. I ko ni ma nara ma dɔgɛ wo kɔma, ma kana i kolonkɛ yen. 24Ma ke ma fa ma, ma ya ma dantɛgɛ a ye.

25“Wo kɔma, ma fa ya a fɔ ma ye tun ko ma ni na dɔn-fen san tinɛ. 26Ma ya a fɔ a ye ko ma ti ke nala i warɛ yan tɔ tun, ni ma ma na ma dɔgɛ wo la ma bolo. 27Ma fa ya a fɔ ma ye ko ala musi Resɛli ya den-kei fila pe le sɔrɔn a ye. 28A ara bɔnɔ mɔgɔ kelen tɔ. A ko a manɛ iko sogo-yogomɛ le ya a rafarafara bawo a ma a yen wo kɔma tun. 29A ko ni ma ya ma dɔgɛ kɛ fanan bɔ a fɛ, ko ni na ma a la ma bolo yan, wo hɛnkili lamiri si a ma, ma fa-kɔrɔyanɛ ni faga yisi-tinya bolo.

30-31“Nba, n tigi, ni n tara n fa wara n dɔgɛ kɛ kɔma, ni a ma ma mɔgɔ filɛ yen, a kɔrɔyanɛ si faga yisi-tinya bolo. Ma fa niyi nɔrɔnɛ ma dɔgɛ kɛ ma le. Ni a ma a yen ma fɛ, a si a nyɛrɛ faga hɛnkili-lamiri bolo bawo a ara kɔrɔya kɔbɔkɔbɔ! 32Min sanɛ wo kuma, n bara n nyɛrɛ niyi sigi tulumɛ la n fa ma n dɔgɛ kɛ niyila ko la. N ya a fɔ ko ni n ma sɛgi ala den Bɛnyamɛ la a ma tun, wo nanparan si to nde kuma wo rɔ n siyi-tele-bɛɛ rɔ.

33“I yandi n tigi, yanni n dɔgɛ kɛ ni to yɔɔnyɛ la yan, a ma, nde ni to n dɔgɛ kɛ gbɛ rɔ alako n dɔgɛ ni ta a kɔrɔnu fɛ a fa wara. 34N si sɛgi kama n fa wara ni n dɔgɛ kɛ sa n fɛ? Nde ti ke tɔrɔya sufa wonu yenna sigila n fa la.”

Currently Selected:

Ko-Dabirɛnu 44: KCLB

Highlight

Copy