Ko-Dabirɛnu 46

Yakoba Yirindi-Koe Iyipiti Nyamanɛ Rɔ

1Yakoba wulita ka a bolo-fannu bi ka ta. A kera Biri-Siba soe burɔ tumɛ min, a ya sarakɛnu bɔ a fa Isiyakata Alla ye nyɔ.

2Alla ya ko-rayirɛ kɛ Yakoba ye suyi rɔ ka a rakele. Yakoba ya a labira.

3Alla ko, “Alla le nde la, i fata Alla, kɔni. I kana kilan ka ta Iyipiti nyamanɛ rɔ kamasɔrɔn n si i bɔnsɔn lasiyaya nyɔ. 4N si ta i fɛ Iyipiti nyamanɛ rɔ. N si na i la Kenan nyamanɛ rɔ yan tɔ tun serr! I si faga ila den Yusufu bolo tɔ.”

5-7 # Kɛwɔlɛnu 7.15 Yanni anu ni bɔ Biri-Siba, Yakobala dannu ya anu fa anubɛ anuna denbayɛ bɛɛ bi ka anu sigi mansɛla kirindi wonu tɔ. Anu ya anuna kolo-fannu anubɛ anu bolo-fan mumɛ bɛɛ bi anu ya minnu sɔrɔn Kenan nyamanɛ rɔ ka ta anu na Iyipiti nyamanɛ rɔ.

8Yakoba bɔra ala denbayɛ minnu na Kenan nyamanɛ rɔ ka ta Iyipiti nyamanɛ rɔ, wonu tɔgɛ le kɛnu na. Ala den-kei-fɔlɔtɛ tɔgɛ le Rubɛn. 9Rubɛn wo tara ala den-kei mɔgɔ nanɛ la a bolo, Hanoki wo, Palu wo, Hɛsirɔn wo, anubɛ Karimi. 10Yakobala den Simiyɔn wo tara ala den-kei mɔgɔ wɔrɛ la a bolo, Yɛmuwɛli wo, Yamin wo, Ohadu wo, Yakin wo, Sohari wo, anubɛ Kenan nyamanɛ musila den Sala. 11Yakobala den Lifayi wo tara ala den-kei mɔgɔ sawɛ la a bolo, Kɛrisɔn wo, Kohati wo, anubɛ Mɛrari. 12Yakobala den Yuda wo tara ala den-kei mɔgɔ sawɛ la a bolo, Sela wo, Pɛrɛsi wo, anubɛ Sera. Kɔnɔ Pɛrɛsi wo tara ala den-kei mɔgɔ fila la a bolo, Hɛsirɔn anubɛ Hamula. Kɔnɔ Yudala den-kei mɔgɔ filɛ, Ɛra anubɛ Onan, wonu fagara Kenan nyamanɛ rɔ. 13Yakobala den Isakari wo tara ala den-kei mɔgɔ nanɛ la a bolo, Tola wo, Puwa wo, Iyobi wo, anubɛ Simirɔn. 14Yakobala den Sɛbulɔn wo tara ala den-kei mɔgɔ sawɛ la a bolo, Sɛrɛdi wo, Helon wo, anubɛ Yaliyɛli. 15Liya sɔrɛ le kɛnu na anubɛ Yakoba ya minnu sɔrɔn Mɛsopotemiya nyamanɛ rɔ, anubɛ ala dunmusi Daina. Liya sɔrɛ mumɛ bɛɛsi yatɛ bɛnta mɔgɔ bi-sawa ani mɔgɔ sawa (33) ma.

16Yakobala den Kadi wo tara ala den-kei mɔgɔ wɔrɔnfilɛ la a bolo, Sɛfiyon wo, Hagi wo, Suni wo, Ɛsibɔn wo, Ɛri wo, Arodi wo, anubɛ Arɛli. 17Yakobala den Asɛra wo tara ala den-kei mɔgɔ nanɛ la a bolo, Imina wo, Isifa wo, Isifi wo, Bɛriya wo, anubɛ anu tirisan-musi Sera. Bɛriya wo tara ala den-kei mɔgɔ fila la a bolo, Hibera anubɛ Makiyɛli. 18Leban ya ala yɔɔn-musi Silipa min di ala dunmusi Liya ma, wo sɔrɛ le kɛnu na anubɛ Yakoba ya minnu sɔrɔn. Silipa wo sɔrɛ yatɛ bɛnta mɔgɔ tan-ni-wɔrɔ (16) ma.

19Yakobala bara-musi Resɛli ya den-kei mɔgɔ fila pe le sɔrɔn a ye, Yusufu anubɛ Bɛnyamɛ. 20#Ko-Dabirɛnu 41.50-52 Wo tumɛ Yakobala den Yusufu ye Iyipiti, ala musi Asɛnati ya den-kei mɔgɔ fila sɔrɔn a ye, Manasa anubɛ Ifɛrɛm. Pɔtifɛra min bi saraka-masɔ-wɔli kɛla Iyipiti bɛsɛnu ye Hɛliyapɔlisi soe burɔ, wola den-sɔrɔnnɛ le Asɛnati wo la. 21Yakobala den Bɛnyamɛ, wo tara ala den-kei mɔgɔ tan la a bolo Iyipiti nyamanɛ rɔ, Bela wo, Bika wo, Asiba wo, Kɛra wo, Neyaman wo, Ehi wo, Rɔsi wo, Mupim wo, Hupim wo, anubɛ Arada. 22Resɛli anubɛ Yakoba sɔrɛ mumɛ bɛɛsi yatɛ bɛnta mɔgɔ tan-ni-nani (14) ma.

23Yakobala dan min tɔgɛ Dan, wo tara ala den-kei kelan la a bolo, Husim. 24Yakobala den Nafatali, wo tara ala den-kei mɔgɔ nanɛ la a bolo, Yasila wo, Kuni wo, Yesa wo, anubɛ Silɛm. 25Leban ya yɔɔn-musi Biliha min di ala dunmusu Resɛli ma, wo sɔrɛ le kɛnu na anubɛ Yakoba ya minnu sɔrɔn. Biliha wo sɔrɛ yatɛ bɛnta mɔgɔ wɔrɔnfila (7) ma.

26Yakoba bɔra ala denbayɛ minnu na Kenan ka ta Iyipiti nyamanɛ rɔ, wonu mumɛ bɛɛsi yatɛ bɛnta mɔgɔ bi-wɔrɔ ani mɔgɔ wɔrɔ (66) ma. Ala den-keinuna musinu bɔnɛ anu na. 27#Kɛwɔlɛnu 7.14 Yusufu ya den-kei fila sɔrɔn Iyipiti nyamanɛ rɔ. Yakoba bɔnsɔn min bɛɛ taranta Iyipiti nyamanɛ rɔ, wo yatɛ bɛnta mɔgɔ bi-wɔrɔnfila (70) ma.#46.27 Mɔgɔ bi-wɔrɔ ani mɔgɔ wɔrɔ minnu tara Iyipiti, Yusufu anubɛ ala den-kei filɛ anubɛ anu fa Yakoba sanɛ mɔgɔ bi-wɔrɔ ani mɔgɔ wɔrɛ kɛnu kuma, anu yatɛ bɛnta mɔgɔ bi-wɔrɔnfila le ma.

Yakoba anubɛ Ala Denbayɛnu Ke-Koe Iyipiti

28Yakoba ya Yuda lata anu yarɔ Yusufu wara alako Yusufu ni na anu nabɛn Kosɛn sigisɔn rɔ. Yakobanu ke Kosɛn, 29a ma mɛ, Yusufu ya ata kirindi bi ka ta a fa labɛn tinɛ Kosɛn sigisɔn rɔ. A ya a fa taran Kosɛn. Anubɛ a fa ya anu nyɔgɔn bira gbuturu! Yusufu donta diyi-kɛ rɔ. A mɛra dila.

30Yakoba ya a fɔ Yusufu ye ko, “Hali n fagara gbɛ, tana ma wo la bawo n bara i kɛndɛ yen n yɛ la.”

31Yusufu ya a fɔ anu ye ko, “N si ta ka wola sundanyɛ dantɛgɛ mansɛ ma ka a fɔ a ye ko n fa anubɛ ala denbayɛnu bara na ka bɔ Kenan nyamanɛ rɔ. 32N si a fɔ a ye ko kolo-fen-makandannɛ le wole la. Woletɔ wo nara wola sagɛnu na anubɛ ninkinu anubɛ wo bolo-fan bɛɛsi la. 33Ni mansɛ ya wo kele tumɛ min ka wo manyinika wola wɔlɛla ko ma, 34wo ni a fɔ a ye ko ka a bi wo benbanu ma ha ka a sigi kaka la, kolo-fen-makandannɛ le wole la. Woletɔ mansɛ si sɔn wo sigi-koe ma Kosɛn sigisɔn rɔ kamasɔrɔn kolo-fen-makandannɛnu ma di Iyipiti kɛnu ye mumɛ!”

Currently Selected:

Ko-Dabirɛnu 46: KCLB

Highlight

Copy