Luka 24

Yisa Lawuli-Koe

(Matiyu 28.1-10; Maraka 16.1-8; Yɔni 20.1-10)

1Lɛhɛrɛ subaga-dɛ ma, musinu tara kanbɛ dɛ la. Anu ya sɛnti min tabɛn, wo ye anu bolo. 2Anu ya farɛ kurukurunnɛ bɔnɛ taran kanbɛ dɛ la. 3Anu donta nyɔ burɔ tumɛ min, anu ma Mari Yisa furi yen. 4Anu kɔndɔfilinɛ sɔra nyɔ kɛla ko la. Tiriyante wo rɔ, kei kura-gbɛ-tigi filɛ minna kurɛnu bi malan-malanna anu ma, wonu sɔra anu dafɛ. 5Musinu kilanta kati! Anu ya anu maburun dugi ma. Kei wonu ya a fɔ anu ye ko, “Nfenna ko la, wo ye mɔgɔ-kɛndɛ nyinina mɔgɔ -faganɛnu tɛma? 6A sa yan. A la ara wuli. Wo ye Kalili tumɛ min, a ya min fɔ wo ye, wo ni wo hɛnkili to wo ko. 7#Matiyu 16.21; 17.22-23; 20.18-19; Maraka 8.31; 9.31; 10.33-34; Luka 9.22; 18.31-33 A ko nun fɔ ale, Hadama-dan ni don hakɛ-tiginu bolo minnu si a gbangban kɔlɔma ma. A ko a tele sawa nyɔgɛ, a si wuli ka a niyi lafɛ tun.”

8Wo kɔma, musinu ya anu hɛnkili lamiri Yisala kumɛnu ma. 9Anu sɛgira ka bɔ kanbɛ dɛ la tumɛ min, anu ya kɛ bɛɛ fɔ ala karan-den tan-ni-kelan ye anubɛ mɔgɔ-toe bɛɛ. 10Musi kɛnu tɔgɛ le Mariyama, Magadala kɛ anubɛ Yowana anubɛ Yemesi na Mariyama. Wonubɛ musi donu ya koe kɛnu fɔ kilayɛnu ye. 11Kɔnɔ Yisala kilayɛnu ya anu miri ko musinu ya min fɔ, yuwaya-kumɛ le wo la. Anu ma la wo la. 12Kɔnɔ Pita burimatoe tara ha kanbɛ dɛ la. A ya a burun ka kasankɛ-rakolɔn yen kanbɛ burɔ. A sɛgira a warɛ. Koe min bara ma, a ye kawala wola ko la.

Yisa Yen-Koe Ɛmeyasi Kilɛ La

(Maraka 16.12-13)

13Wo tele nyɛrɛ rɔ, Yisa gba-fɛ-bilala fila ye tala so-nɛ do rɔ min tɔgɛ Ɛmeyasi. Ka bɔ Yerusalɛm ka ta nyɔ, mɛli wɔrɔnfila le. 14Koe min bɛɛ mara, anu bi wo rakaranna anu nyɔgɔn ye. 15Anu bi a rakaranna tumɛ min, Yisa nyɛrɛ nara anu dafɛ ka tagama anu fɛ. 16Anu ya a yen kɔnɔ hali wo, anu ma a lɔn Yisa la. 17Yisa ya a fɔ anu ye ko, “Wo ye nfen fɔ tinɛ wo nyɔgɔn tɛma kilɛ fɛ yan?”

Anu yisi-tinyanɛ sɔnɛ! 18Kelen min tɔgɛ Kaliyopasi, wo ya Yisa manyinika, a ko, “Sundan le ile la Yerusalɛm soe burɔ, wa? Koe min bɛɛ ara ma tele-dande kɛnu kɔrɔ, ile le kelen pe ma wonu lɔn, ba?”

19Yisa ya a manyinika ko, “Koe nyamintannu?”

Anu ya a yabi ko, “Koe minnu bara ma Yisa Nasarɛti kɛ la. Nɛbi le kei wo la nun. Sɛnbɛ ye ala kɛwɔlɛnu anubɛ ala kumɛnu tɔ Alla anubɛ mɔgɛ bɛɛ yala. 20Mala saraka-masɔla-wɛnu anubɛ nyɔ-kun-tiginu ya a don a yogenu bolo tɔ a faga-koe la. Anu ya a gbangban kɔlɔma ma. 21Ma yili ye a ma nun ko ale le wo la min bi nala Isirɛla mɔgɛnu kunkala! Ka tenbi wo bɛɛ la, a tele sawa nyɔgɛ le kɛ la kebi wo mara. 22Musi minnu bi ma tɛma, wonu donu nara dantɛgɛli-makawanɛ la. Anu tara kanbɛ dɛ la subaga-dɛ kɛ ma, 23anu nara, anu ko anu ma Yisa furi yen. Anu sɛgira ka a fɔ ma ye ko anu ya fen yen minnu muninyanɛ melikanu na. Wonu ko a ye a niyi la. 24Ma ta-nyɔgɛ donu tara kanbɛ dɛ la. Anu ya a yen iko musinu ya a fɔ nya min, ado anu denu fanan ma ale Yisa yen.”

25Yisa ya a fɔ kei filɛ wonu ye ko, “Wole ko-nya-yenbɛlɛnu? Nɛbinu ya min bɛɛ fɔ, wo ti la wonu na yona! 26Ko Allata-Mɔgɔ-Yabɔnɛ ni tɔrɔ, wo kɔma, a ni don ata gbiliyɛ rɔ, wo ma bɛn, wa?” 27Wo kɔma, min sɛbɛnɛ alela ko la Allata kitabu rɔ ka a dabira Nɛbi Musala kitabunu ma ka a sigi nɛbinuna kɛdi-sɛbɛnɛ bɛɛ ma, Yisa ya wo bɛɛ fɛsɛfɛsɛ anu ye.

28Anu bi tala kan min nun, anu gbɛrɛnta so-nɛ wo ma. Yisa ya a ma iko a ye tenbila nyɔ la 29kɔnɔ anu ya a madiya bɛrɛkɛ! Anu ko, “To ma fɛ fɔlɔn. Tele ara ta, suyi ketoe le.” Woletɔ a donta ka to anu fɛ. 30A sigira anu fɛ tebulu la. A ya biredi bi ka baraka bira Alla ye. Wo kɔma, a ya biredi rakerikeri ka a di anu ma. 31Wo mɛ, anu yɛ lakara. Anu ya a lɔn Yisa la. Kɔnɔ tiriyante wo rɔ, a tununta anu ma yen! 32Anu ya a fɔ anu nyɔgɔn ye ko, “A ye kumala ma ye tumɛ min kilɛ la ka Allata kitabu faranfasi ma ye, a manɛ de nun iko ma kɔntɔ-diyanɛ bɛrɛkɛ!”

33Anu wulita ka sɛgi Yerusalɛm kelenna! Anu ya ala karan-den tan-ni-kelen nadɛnnɛ taran anubɛ mɔgɛ donu. 34Karan-dannu ya a fɔ anu ye, ko, “Mari ara wuli serr! Saimon ara a yen!”

35Min mara kilɛ la, mɔgɔ filɛ wonu ya wo rakaran anu ye. A ya biredi rakerikeri tumɛ min, anu ya a lɔn kelenna ko Mari le. Anu ya wo bɛɛ rakaran anu ye.

Yisa Bɔ-Koe Gbɛ rɔ Karan-Dannu Ye

(Matiyu 28.16-20; Maraka 16.14-18; Yɔni 20.19-23; Kɛwɔlɛnu 1.6-8)

36Anu bi kɛ fɔɛ kun na tumɛ min, Mari nyɛrɛ sɔra anu tɛma ka a fɔ anu ye ko, “Wo yisi ni kimɛ.”

37Anu kilanta bɛrɛkɛ! Anu ya anu miri ko anu bara yiyɛ yen. 38Yisa ya a fɔ anu ye ko, “Wo yisi tɔrɔnɛ nfen na? Sikɛ kɛ bɛɛ donnɛ wo rɔ kama? 39Wo ni n bolenu anubɛ n kiannu mafɛlɛn. Wo ni a lɔn ko nde le yati! Wo ni wo bole maga n na ka a lɔn ko nde le bawo fɛrɛ-bɔnkɛ anubɛ kole sa yiyɛ rɔ iko wo ye a yenna nde rɔ nya min.”

40A ban kɛ fɔla, a ya a bolenu anubɛ a kiannu yira anu na. 41Anu sewanɛ kɔnɔ kabana-koenu ya a ma, anu ma ke lala a la yona. Woletɔ a ya anu manyinika ko, “Dɔn-fan do ye wo bolo yan, ba?” 42Anu ya yɛgɛ-tenɛ do di a ma. 43A ya a bi ka wo dɔn anu yala.

44Wo kɔma, a ya a fɔ anu ye ko, “N bi wo fɛ tumɛ min nun, n ya koe kɛnu fɔ wo ye nun. Koe min bɛɛ sɛbɛnɛ ndela ko la Nɛbi Musala tɔn rɔ anubɛ nɛbinuna kitabunu tɔ anubɛ Yaburi kitabu rɔ, fɔ wonu ni bɔ-a-la.”

45A ya anu hɛnkili ya-maka alako anu ni Allata kitabu nya-yen. 46A ya a fɔ anu ye ko, “Kɛ le sɛbɛnɛ ko fɔ nde, Allata-Mɔgɔ-Yabɔnɛ ni tɔrɔ, a tele sawa nyɔgɛ ma, n ni wuli ka bɔ sayɛ rɔ. 47A sɛbɛnɛ fanan ko tubi koe anubɛ hakɛ-makoto-ko-kawandilɛ si bɔ sibole bɛɛ ye n tɔgɛ rɔ ka a dabira Yerusalɛm yan. 48Koe kɛnu bɛɛ sereyɛ le wole la. 49#Kɛwɔlɛnu 1.4 N fa ya lanyiri kiri min na, nde nyɛrɛ si wo lana wo ma. Kɔnɔ wo ni to Yerusalɛm fɔlɔn ha sɛnbɛ wo ni na ka bɔ san ma ka yigi wo kuma.”

Yisa Yɛlɛ-Koe Arinyɛni Tɔ

(Maraka 16.19-20; Kɛwɔlɛnu 1.9-11)

50 # Kɛwɔlɛnu 1.9-11 Wo kɔma, Yisa tara anu na ha Bɛtani soe burɔ. A ya a bole layɛlɛ san ma ka duwa anu ye. 51Nba, a ye duwala anu ye tumɛ min, a bɔra anu dafɛ. A layɛlɛta Arinyɛni tɔ. 52Anu fara sewa-ba la. Anu ya a bato ka anu kɔ-sɛgi Yerusalɛm. 53Anu tora Alla-Bato-Bɔn la tumɛ bɛɛ baraka birala Alla ye.

Currently Selected:

Luka 24: KCLB

Highlight

Copy