Luka 9
9
Karan-Den Tan-ni-Filɛ Sɔ-Koe
(Matiyu 10.5-15; Maraka 6.7-13)
1Yisa ya ala karan-den tan-ni-filɛ kele anu nyɔgɔn fɛ ka nyina-gben-sɛnbɛ anubɛ kirayato-dandan-fanka di anu ma. 2A ya anu sɔ Allala mansaya-wara-ko-kawandili bɔ tinɛ anubɛ ka kiriyatoenu nakɛndɛya. 3A ya a fɔ anu ye ko, “Wo kana ta fenfen na wo bolo wola tagama rɔ. Sewuri wo, tagama-bɔrɔ wo, dɔn-fen wo, wodi wo, hali duruku-gbɛrɛ, wo kana ta wo fenfen na wo bolo. 4Wo ni to wo yiya fɔlɔtɛ la, ha wo bɔ-tumɛ ni ke soe wo burɔ. 5#Luka 10.4-11; Kɛwɔlɛnu 13.51 Ni anu ma wo rabira soe min tɔ, wo tenbi soe wo bolokala, wo ni wo kian ragbɔngbɔn nyɔ. Wo si ma sereyɛ la anu kan ma.”
6Karan-dannu tagamanta so-mɛsɛ bɛɛ rɔ ka kibara-nyimɛ-kawandili bɔ anubɛ ka mɔgɛnu dandan kan tinɛ wo bɛɛ rɔ.
Mansa Hɛrodi Kɔndɔfili-Koe
(Matiyu 14.1-12; Maraka 6.14-29)
7Mansa Hɛrodi min siginɛ Kalili sigisɔn kun na, wo ya koe kɛ bɛɛ lamɔɛn tumɛ min, a kɔndɔfilita wola ko la bawo mɔgɛ donu ko Yɔni-Batasi-Kɛlɛ ara sɛgi a niyi la tun! 8#Matiyu 16.14; Maraka 8.28; Luka 9.19 Donu ko Ilaya ara bɔ gbɛ rɔ kɔnɔ donu fanan ko nɛbi-kɔrɔmɛ do ara wuli tun. 9Mansa Hɛrodi ko, “N bara Yɔni kunyɛ tɛgɛ a la nun. N bara ko-sufa min namɔɛn ka a bɛn mɔgɛ kɛ ma, yon bi wo la.” A ya a raya Yisa yen-koe ma!
Mɔgɔ Waga Loli De-Nyini-Koe
(Matiyu 14.13-21; Maraka 6.30-44; Yɔni 6.1-14)
10Yisala kilayɛnu sɛgira. Min bɛɛ mara, anu ya wo dantɛgɛlɛ sa Yisa ye. A tara anu na anu dan na soe do rɔ min tɔgɛ Bɛti-Sayida. 11Nyama ya wo lamɔɛn tumɛ min, anu bilara a fɛ. A ya anu kɔndɔn ka kuma anu ye Allala mansayɛla ko la. Minnu makoe ye kɛndɛyɛ la, a ya wonu dandan.
12Tele-yigi-tumɛ, ala karan-den tan-ni-filɛ nara a wara. Anu ko, “Karan-mɔgɔ, wula-da-rakolɔn le yan na. I ni mɔgɛnu nata so-mɛsɛnu tɔ anubɛ yan-dafɛ-sɛnɛnu alako anu ni dɔn-fan san anu nyɛrɛ ye ka anu yiyɛ sɔrɔn.”
13Kɔnɔ Yisa ya a fɔ anu ye ko, “Wole nyɛrɛ ni dɔn-fan di anu ma.”
Anu ya a yabi ko, “Biredi loli anubɛ yɛgɛ fila pe le ma bolo yan. I ye a fɛ, ma ni ta dɔn-fen san nyama kɛ bɛɛ ye?” 14(Ado nfan, kei min bi nyɔ nun, wo si waga loli nyɔgɔn (5,000) bɔ le.)
Yisa ya a fɔ ala karan-dannu ye ko, “Wo ni mɔgɛnu nasigi, bi-loli bi-lolinyɛ ma.” 15Karan-dannu ya anu dama lasigi. 16Yisa ya biredi loli anubɛ yɛgɛ filɛ wonu bi ka a yɛ layɛlɛ san ma. A ya baraka bira Alla ye anuna ko la ka anu takeri ka anu don ala karan-dannu bolo alako anu ni a ratala mɔgɛnu tɛma. 17Anu dama ya wo dɔn ka fa pen! Mɔgɛnu datoe, ala karan-dannu ya gbengberan tan-ni-fila lafa wo la.
Yisa Lɔn-Koe Pita Bolo
(Matiyu 16.13-19; Maraka 8.27-29)
18Yisa kelen pe ye Alla madiyala tumɛ min a dan na, ala karan-dannu nara a wara. A ya anu manyinika ko, “Mɔgɛnu ko kama nna ko la? Yon bi nde la?”
19 #
Matiyu 14.1-2; Maraka 6.14-15; Luka 9.7-8 Anu ya a yabi ko, “Donu ko Yɔni-Batasi-Kɛlɛ le ile la. Donu ko Nɛbi Ilaya le ile la. Donu fanan ko nɛbi-kɔrɔmɛ do ara wuli tun.”
20 #
Yɔni 6.68-69
A ya anu manyinika ko, “Wole don? Wole ko kama? Yon bi nde la?”
Pita ya a yabi ko, “Allata-Mɔgɔ-Yabɔnɛ le ile la!”
21Yisa ya anu makawandi ko anu kana kɛ fɔ mɔgɔ-wo-mɔgɔ ye.
Yisata Tɔrɔyɛ anubɛ Ala Sayɛ Fɔ-Koe
(Matiyu 16.20-28; Maraka 8.30–9.1)
22Yisa ko, “Anu si nde, Hadama-dan tɔrɔ kati! Kɛmɔgɛnu anubɛ saraka-masɔlɛnu anubɛ tɔn-karan-mɔgɛnu si anu ban n na. Anu si n faga kɔnɔ a tele sawa nyɔgɛ, n si wuli tun.”
23 #
Matiyu 10.38; Luka 14.27 A ya a fɔ anu damasi ye ko, “Ni mɔgɔ-wo-mɔgɔ ye a fɛ ka bila nde fɛ, a ni a nyɛrɛ wara-koe bɔrɔbɔ. Tele-wo-tele, a ni a nyɛrɛ faga-kɔlɔma bi ka bila n fɛ. 24#Matiyu 10.39; Luka 17.33; Yɔni 12.25 Bawo mɔgɛ min bi a fɛ ka a nyɛrɛ niyi lakisi, wo tigi si bɔnɔ a niyi la. Kɔnɔ min bi bɔnɔna a niyi la ndela ko la, wo tigi niyi la si kisi. 25Ni mɔgɛ ya duninya fan bɛɛ sɔrɔn kɔnɔ a ni bɔnɔ a niyi la, a si nfen tɔnɛ sɔrɔn? 26Ni mɔgɛ ya a kan-kɔ sɔ nde anubɛ nna karan la, nde, Hadama-dan wa na nta gbiliyɛ anubɛ n Fa Allata gbiliyɛ anubɛ melika-sɛnimɛnuta wati wa ke tumɛ min, nde fanan si n kan-kɔ sɔ wo tigi la. 27Wo ni wo hɛnkili to kɛ ko! Donu bi yan, wonu ti faga fɔ anu ba Allala mansayɛ yen.”
Yisala Gbiliyɛ Yira-Koe
(Matiyu 17.1-8; Maraka 9.2-8)
28Yisa banta koe kɛnu fɔla tumɛ min, a lɔgɔkun kelen nyɔgɛ, a ya Pita anubɛ Yɔni anubɛ Yemesi bi ko anu ni bila a fɛ Alla madiya tinɛ kɔnkɛ kuma. 29A ye Alla madiyala tumɛ min, a yakɔrɛ yɛlɛmanta. Ala kurɛ gbɛra perr! 30Wati-kundunɛ wo kɔrɔ, mɔgɔ fila ye kumala Yisa la, Nɛbi Musa anubɛ Nɛbi Ilaya, kɔni. 31Anu bɔra gbɛ rɔ Arinyɛnɛta gbiliyɛ rɔ ka kuma Yisa la. Anu bi kumala ka a bɛn Yisa faga-nya ma Yerusalɛm soe burɔ iko Alla ara a latɛgɛ nya min nun. 32Pita anubɛ a ta-nyɔgɛnu bi kinɔgɔla nun kɔnɔ anu kundenta tumɛ min, anu ya Yisala gbiliyɛ yen anubɛ mɔgɔ filɛ minnu sɔnɛ a dafɛ. 33Mɔgɔ filɛ wonu sɛgimatoe, Pita ya a fɔ Yisa ye ko, “N tigi, a bɛnta ma ye yan. Ma ni lele sawa sɔ yan, kelen itɛ, kelen Musatɛ, kelan Ilayatɛ.” (Pita ma a lɔn a ye min fɔla nun hali!)
34Pita ye kumala tumɛ min, banda-finyɛ ya anu dama yamatogon. Banda-finyɛ yigira anu kuma tumɛ min, ala karan-dannu kilanta kati! 35#2 Pita 1.17-18 Kuman-kan bɔra banda-finyɛ wo rɔ, a ko, “Nna dan le kɛ la, n bara min yabɔ. Wo ni wo tole masɔ a la!” #Aiseya 42.1; Matiyu 3.17; 12.18; Maraka 1.11; Luka 3.22
36Kuman-kan latora tumɛ min, Yisa kelen pe le nyɔ nun. Anu ya min yen, a ya wati bɔ, ala karan-dannu ma a fɔ mɔgɔ-wo-mɔgɔ ye.
Nyinatoe Lakɛndɛya-Koe Yisa Bolo
(Matiyu 17.14-18; Maraka 9.14-27)
37Wo banda kɛ, Yisa anubɛ ala karan-den sawɛ yigira ka bɔ kɔnkɛ kuma. Nyama-belebele ya Yisa labɛn. 38Kei do gbele-gbelenta nyama tɛma, a ko, “Karan-mɔgɔ, n bi i madiyala, i ni nna den kelen pe mafɛlɛn! 39Nyinɛ si a labui. A si a ma, a ni wɔrɔndɔ wɛ-kɛ ka yɛrɛyɛrɛn ha a da-kanfɛ ni bɔ. A ti a boloka yona fɔ a wa a tɔrɔ. 40N ya ila karan-dannu madiya ko anu ni a gben, a ni bɔ a fɛ kɔnɔ anu ma a nɔ.”
41Yisa ya a fɔ anu ye ko, “Wole fanan. Dɛnkɛninyɛ sa wo bolo, ado wo ma ko-latelennɛ lɔn! N ni to wo fɛ ha tumɛ nyamintan? N si n munyu wo kɔrɔ ha tumɛ nyamintan?” A ya a fɔ kei wo ye ko, “Na ila dan la yan.”
42Anu bi nala dennɛ la tumɛ min, nyinɛ ya a layɛrɛyɛrɛn ka a labui. Yisa ya a fɔ nyina-yogomɛ wo ye ko a ni bɔ a fɛ. A ya denni-lakɛndɛyanɛ don a fa bolo tun. 43Mɔgɛ bɛɛ kawara Allala sɛnbɛ ma.
Yisata Sayɛ, Wo Fɔ-Koe Tun
(Matiyu 17.22-23; Maraka 9.30-32)
Yisa ye kabana-koe min bɛɛ mala, mɔgɛnu tora kawala wo bɛɛ ma. A ya a fɔ ala karan-dannu ye ko, 44“N bi min fɔla wo ye, wo kana nyina wo ko! Anu si nde, Hadama-dan don mɔgɛnuna sɛnbɛ kɔrɔ.” 45Kɔnɔ ala karan-dannu ma kɛ kɔrɛ lɔn. Alla ya wo kɔrɛ dogon anu ma, woletɔ anu ma ke a nya-yenna. Anu kilanta fanan ka a manyinika wo kɔrɛ ma.
Yon Kolo Bɛɛ Ko?
(Matiyu 18.1-5; Maraka 9.33-37)
46 #
Luka 22.24
Sɔsɔlɛ do wulita Yisala karan-dannu tɛma alako ni min si ma mɔgɔ-ba la anu tɛma. 47Yisa ya anu miriya lɔn. Woletɔ a ya dennɛ do bi ka a sɔ a dafɛ. 48#Matiyu 10.40; Luka 10.16; Yɔni 13.20 A ya a fɔ anu ye ko, “Ni min ya dennɛ kɛ rabira n tɔgɛ rɔ, wo ara nde rabira, ado ni min ya nde rabira, wo ara n sɔlɛ fanan tabira. Min famayiginɛ wo dama ko wo tɛma, wo le kolo wo dama ko.”
Ni min Sa I Kan Ma, Wo ye Ila Ko La
(Maraka 9.38-40)
49Yɔni ko, “N tigi, ma ya kei do yen nyinɛnu gbenna i tɔgɛ rɔ. Ma ya a fɔ a ye ko a ni fara wo la bawo mala mɔgɔ ma ale la.”
50Yisa ya a fɔ a ye ko, “Wo kana a lakala bawo min sa wo kan ma, a ye wola ko la.”
Mɔgɛnu Ban-Koe Yisa la Samariya Kɛnuna Soe Do Burɔ
51Yisa-yɛlɛ-tumɛ Arinyɛni tɔ, wo gbɛrɛnta tumɛ min, a ya a latɛgɛ ko a ni ta Yerusalɛm. 52A ya kilayɛnu sɔ a yarɔ ko anu ni ta Samariya kɛnuna soe do burɔ ka fan bɛɛ rabɛn a yarɔ. 53Kɔnɔ nyɔ-mɔgɛnu ma a rabira bawo anu ya a lɔn ko a ye tala Yerusalɛm. 54#2 Mansɛnu 1.9-16 Ala karan-dannu, Yemesi anubɛ Yɔni ya kɛ yen tumɛ min, anu ko, “Ma tigi, i ye a fɛ, ma ni tɛ kele ka bɔ san-kole rɔ anu halaki-koe la, wa?”
55Yisa ya a tintan anu na ka anu makuma. [Yisa ko, “Wo ma a lɔn wo sɔndɔmɛnu bi nya min. Nde, Hadama-dan ma na ka mɔgɛnu niyi kasara kɔnɔ fɔ ka anu kisi.”] 56Anu tara so-gbɛrɛkɛ rɔ.
Minnu Bi A fɛ ka Bila Yisa Fɛ
(Matiyu 8.19-22)
57Anu bi kilɛ la tumɛ min, kei do ya a fɔ Yisa ye ko, “I tara kan-bo-kan, n tabɛnnɛ ka bila i fɛ nyɔ.”
58Yisa ya a fɔ a ye ko, “Farannu bi banbannu bolo anu si ki kan min. Kona-nyagannu bi konanu bolo fanan kɔnɔ kun sa tinɛ sa nde, Hadama-dan bolo.”
59Yisa ya a fɔ kei do ye ko, “Bila n fɛ.”
Kɔnɔ wo ko, “N fa, sɔn, n ni ta n fa togon fɔlɔn.”
60Yisa ya a yabi ko, “Mɔgɔ-faganɛnu ni anuna mɔgɔ-faganɛ#9.60 Mɔgɔ-faganɛ: Ka a fɔ mɔgɔ-faganɛnu ni anuna mɔgɔ-faganɛnu togon, wo kɔrɛ le Yisa bolo ko mɔgɛ minnu ma ni-bɛrɛ sɔrɔn, wonu ni anuna furinu togon. togon. Ile ni ta ka Allala-mansayɛ-kawandili bɔ.”
61 #
1 Mansɛnu 19.20
Kei-gbɛrɛkɛ ko, “N fa, n si ta i fɛ kɔnɔ sɔn, n ni ta fɔlɔn ka n masara nna denbayɛ la.”
62Yisa ya a fɔ wo ye ko, “Mɔgɔ-wo-mɔgɔ ya sara-ninki bi dugu-wɔrɔ tinɛ, ni a tora a yɛ lasɛgila a kɔma, wo ti bɛn Allala mansayɛ ma.”
Currently Selected:
Luka 9: KCLB
Highlight
Share
Copy
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.
