Ɛksodɔs 2

Di Stori Bɔt Aw Dɛn Mozis Bɔn

1Wan man we kɔmɔt na Livay in fambul layn mared wan uman we insɛf kɔmɔt na Livay in fambul layn. 2Di uman gɛt bɛlɛ ɛn bɔn wan bɔypikin. We di uman si se dis pikin fayn so i ayd am na os tri mɔnt. 3We i nɔ ebul ayd di pikin igen, i put am insay wan blay we dɛn mek wit papirɔs,#2:3 Papirɔs Na plant lɛkɛ bambu, we dɛn kin tek mek blay. ɛn rɔb ta rawnd di baskit so wata nɔ go go insay. Dɔn i put di bebi insay di baskit ɛn put di baskit kɔnasay na di riva usay lɔŋ lɔŋ gras dɛn bi de gro. 4Di bebi in sista bin tinap fawe de wach wetin go apin to am.

5Afta sɔm tɛm, kiŋ in gyal pikin bin go fɔ go was na di riva. In savant gyal dɛn we bin de wit am bin de waka nia di wata. Di kiŋ in gyal pikin si dis baskit midul di lɔŋ lɔŋ gras dɛn, so i sɛn wan pan dɛn fɔ go briŋ am kam. 6We i opin di blay i si di pikin insay ɛn di pikin bigin fɔ kray. I sɔri fɔ no wantɛm se dis na wan pan dɛn Ibru dɛn pikin. 7Di pikin in sista bin de wach. I aks di kiŋ in gyal pikin if i fɔ go fɛn wan pan dɛn Ibru uman fɔ mɛn di pikin fɔ am. 8Di kiŋ in gyal pikin gri so di pikin in sista go kɔl in mama. 9Di kiŋ in gyal pikin tɛl di pikin in mama se lɛ i mɛn di pikin fɔ am ɛn in go pe am. So di uman tek di pikin go mɛn am. 10We di pikin dɔn big, in mama kɛr am go to di kiŋ in gyal pikin. Di kiŋ in gyal pikin tek di pikin lɛkɛ in yon pikin. I gi am nem Mozis#2:10 Mozis Tan lɛk di Ibru wɔd we min “fɔ pul kɔmɔt.” bikɔs i se, “Na wata a pul am kɔmɔt.”

Wetin Mek Mozis Rɔnawe Go Midian

11Wande we Mozis bin dɔn bi bigman, i go usay dɛn Ibru pipul dɛn bin de ɛn i si aw dɛn bin de fos dɛn fɔ wok. I si wan Ijipshian man de bit wan pan di Ibru slev dɛn. 12Mozis luk rawnd, ɛn we i nɔ si pɔsin de luk, i kil di Ijipshian ɛn bɛr in bɔdi na di sansan. 13Di nɛks de we Mozis go waka bak, i se tu Ibru man dɛn de fɛt, nain i aks di wan we rɔŋ wetin mek i de fɛt in yon kɔntri man. 14Di man aks am udat gi am pawa fɔ bi rula ɛn jɔj fɔ dɛn kes? I se if i wan kil am lɛkɛ aw i kil da Ijipshian. Dat mek Mozis fred. I bigin tink se ɔlman dɔn no bɔt wetin i bin du. 15We di kiŋ yɛri bɔt wetin Mozis du i tray fɔ kil am, bɔt Mozis rɔnawe go tap na Midian.

We i rich na Midian i go sidɔm nia wan wɛl.

16Wan man bi de Midian we bin de mek sakrifays fɔ pipul sin. I bin gɛt sɛvin gyal pikin. Dɛn bin go na di wɛl fut gɛt wata tɔn am na di dɛn papa in ship ɛn got dɛn de drink. 17Sɔm man dɛn we bin de mɛn ship kam drɛb dɛn kɔmɔt na di wɛl, bɔt Mozis tinap fɔ dɛn. I ɛp dɛn fɔ gɛt wata fɔ dɛn ship ɛn got. 18Wɛn dɛn rich na os to dɛn papa Ruɛl, i aks dɛn wetindu dɛn tɔn bak kwik. 19Dɛn tɛl am se na wan Ijipshian man tinap fɔ dɛn. I nɔ gri fɔ mek dɛn man we de mɛn ship drɛb dɛn kɔmɔt na di wɛl. Dɛn tɛl am se i ivin drɔ wata fɔ dɛn ɛn fɔ dɛn ship got di. 20I aks dɛn fɔ di man ɛn wetindu dɛn nɔ kɔl am fɔ kam it sɔntin. I tɛl dɛn mek dɛn go kɔl am fɔ kam it.

21Mozis gri fɔ tap wit di man ɛn i gi am in gyal pikin Zipora fɔ mared. 22Zipora bɔn wan bɔypikin fɔ Mozis ɛn gi am nem Gashɔm.#2:22 Gashɔm Tan lɛk di Ibru wɔd we min fɔrina. I gi am dis nem bikɔs i se i na fɔrina na pipul kɔntri.

23I tek sɔm tɛm dɔn di kiŋ na Ijipt day. Di Izrɛlayt dɛn bin dɔn taya fɔ de du slev wok. So dɛn beg PAPA GƆD fɔ pul dɛn pan di sɔfa we dɛn bin de sɔfa. 24PAPA GƆD yɛri we dɛn de kray ɛn i mɛmba di Kɔvinant we i bin dɔn mek wit Ebraam, Ayzak ɛn Jekɔb. 25PAPA GƆD bin si aw di Izrɛlayt dɛn de sɔfa i sɔri fɔ dɛn, ɛn i bin rɛdi fɔ ɛp dɛn.

Currently Selected:

Ɛksodɔs 2: KRIO13

Highlight

Copy