Ɛksodɔs 21

Di Lɔ Bɔt Aw Fɔ Trit Ibru Man Slev Dɛn

(Ditarɔnɔmi 15:12-18)

1“Tɛl di Izrɛlayt dɛn se, 2if dɛn bay Ibru man slev, i fɔ wok fɔ dɛn fɔ siks ia, dɔn di ia we mek sɛvin i fɔ go fri. I nɔ fɔ pe natin. 3If na bin palampo we i tɔn to slev, dɔn i mared we i de to in masta, i nɔ fɔ kɛr in wɛf go we i de go bak; i bɔt if i bin mared bifo i tɔn to slev i fɔ kɛr in wɛf go. 4If in masta gi am uman we mek dɛn bɔn bɔy ɔ gyal pikin dɛn, di masta fɔ tek di uman ɛn di pikin dɛn. Na di man in waŋren fɔ go. 5Bɔt if di slev se in lɛk in masta wit in wɛf ɛn pikin dɛn ɛn i nɔ want mek dɛn fri am, 6in masta fɔ kɛr am go na di say we dɛn de wɔship PAPA GƆD, ɛn mek i tinap bifo di domɔt ɛn bo in yes. Dɔn i go bi in slev sote i day.”

7“If man sɛl in gyal pikin as slev, dɛn nɔ fɔ fri di titi lɛkɛ aw dɛn de fri di man slev dɛn. 8If man bay am fɔ mek am wɛf bɔt fɛnɔt se i nɔ lɛk am, i fɔ sɛl am gi in papa bak. I nɔ fɔ sɛl am gi fɔrina bikɔs if i du so, i dɔn brok di lɔ. 9If i bay di titi fɔ in bɔypikin, i fɔ trit am lɛkɛ in yon gyal pikin. 10If di man tek ɔda uman, i nɔ fɔ kɔt natin we i bin de gi di fɔs wan, lɛkɛ it, klos ɔ ɔda tin dɛn. I fɔ gi am ɔl in bɛnifit lɛkɛ mared uman nɔmɔ. 11Bɔt if di man nɔ du dɛn tri tin ya fɔ di uman, i fɔ lɛf am lɛ i go, i nɔ fɔ aks in pipul dɛn fɔ wan sɛnt.”

Di Lɔ Bɔt Kraym

12“Ɛnibɔdi we nak in kɔmpin ɛn kil am, dɛn fɔ kil insɛf. 13Bɔt if i nɔ min fɔ kil am ɛn na PAPA GƆD se na bay da pɔsin de in an i fɔ day, a go fɛn sef ples fɔ am we i go go ayd. 14Bɔt if man tek wikɛdnɛs kil in kɔmpin, i lɛk i go ayd na mi ɔlta, una fɔ pul am kɔmɔt de ɛn kil am. 15Ɛnibɔdi we nak in mami ɔ dadi, fɔ day. 16Ɛnibɔdi we kidnap in kɔmpin ɔ abdɔkt am fɔ sɛl am ɔ tɔn am to slev, fɔ day.

17“Ɛnibɔdi we molɛs in mami ɔ dadi fɔ day.

18“If tu pipul dɛn mek plaba ɛn fɛt, dɔn wan blo in kɔmpin ɔ wap am wit ston ɛn wund am; i nɔ day bɔt i lidɔm sik na bed; 19if i ebul fɔ grap bak bɔt na wɔkinstik i de yuz, nain kɔmpin fɔ pe di bil te i wɛl. Dɔn i fɔ pe fɔ di tɛm we in kɔmpin bin lidɔm sik wan na bed.

20If masta bit in slev wit tik te i day, dɛn fɔ pɔnish di masta, 21bɔt if di slev nɔ day da momɛnt de, i de fɔ tu-tri de, dɛn nɔ fɔ pɔnish di masta bikɔs di lɔsis we i dɔn si du fɔ am.

22If tu man dɛn fɛt te dɛn go fɔdɔm pan bɛlɛ uman, dɔn di uman in bɛlɛ wes, bɔt nɔn ɔda tin nɔ du di uman, di man we fɔdɔm pan di uman fɔ pe damej. Ɛnitin we di uman in man se fɔ pe nain i fɔ pe, ɛn na di jɔj dɛn fɔ gri to dat. 23Bɔt if di uman day, di pe fɔ bi layf fɔ layf, 24yay fɔ yay, tit fɔ tat, an fɔ an, fut fɔ fut, 25wund fɔ wund, brus fɔ brus. 26If man bit in slev te i bɔs in yay, i fɔ fri di slev fɔseka di yay we i bɔs. 27If na di slev in tit i pul, i fɔ fri am fɔseka di tit we i pul.

Aw Dɛn Wan We Gɛt Animal Fɔ Biev

28If kaw buk pɔsin ɛn kil am, una fɔ ston di kaw te i day, ɛn una nɔ fɔ it am. Una nɔ fɔ ol di pɔsin we gɛt am rɛspɔnsibul. 29Bɔt if na kaw we dɔn yus fɔ de buk ɛn kil, ɛn dɛn dɔn wɔn di pɔsin we gɛt am bɔt i nɔ tay am ɔ du ɛnitin, ɛn di kaw buk pɔsin ɛn kil am, una fɔ ston di kaw te i day. Dɔn di wan we gɛt di kaw insɛf fɔ day. 30Bɔt if una alaw am fɔ pe fayn fɔ sev in layf, i fɔ pe ɛnitin we dɛn aks fɔ. 31If na pɔsin in bɔypikin ɔ gyal pikin di kaw kil, na di sem lɔ una fɔ yuz. 32If na pɔsin in man ɔ uman slev i kil, di pɔsin we gɛt am fɔ pe tati silva kɔpɔ, dɔn una fɔ ston di kaw te i day.

33If pɔsin lɛf ol opin, ɔ i dig ol ɛn nɔ kɔba am te kaw ɔ dɔŋki fɔdɔm insay, 34i fɔ pe fɔ di animal. I fɔ pe mɔni to di wan we gɛt am, dɔn in kin tek di day animal. 35If sɔmbɔdi in animal kil ɔda pɔsin in animal, dɛn fɔ sɛl di animal we kil in kɔmpin ɛn sheb di kɔpɔ; dɔn dɛn fɔ bucha di day animal ɛn sheb am. 36If ɔlman no se da patikla animal de dɔn yus fɔ de kil in kɔmpin ɛn di wan we gɛt am nɔ tay am, ɔ du ɛnitin bɔt dat, i fɔ pe animal fɔ animal, dɔn in tek di day wan.

Currently Selected:

Ɛksodɔs 21: KRIO13

Highlight

Copy