Ɛksodɔs 28

Di Kayn Klos Fɔ Di Man Dɛn We De Mek Sakrifays Fɔ Pipul Sin

(Ɛksodɔs 39:1-7)

1PAPA GƆD tɔk to Mozis bak. I se, “Kɔl yu brɔda Erɔn wit in bɔypikin dɛn, we na Nadab, Abiu, Ɛlieza ɛn Ithama. Pul dɛn kɔmɔt to di Izrɛlayt dɛn. Dɛn yon wok fɔ mi na fɔ de mek sakrifays fɔ pipul sin. 2Mek fayn oli gawn fɔ Erɔn we di edman fɔ dɛn man we de mek sakrifays fɔ pipul sin fit fɔ wɛr. 3Fɛn dɛn gud telaman we a dɔn gi skil fɔ sabi so, fɔ so Erɔn in gawn, bikɔs na di gawn i go wɛr fɔ in ɔdineshɔn as mi yon wokman we de mek sakrifays fɔ pipul sin.

4Na dis kayn klos dɛn fɔ mek; di pawch we de de nain chɛst,#28:4 Pawch Di pawch we de nain chɛst ɔ chɛst kot: dis pawch yaso nain kin de na di man we de mek sakrifays in chɛst, ɛn nainsay am i kin put di Yurim ɛn Thumim, dat na di tin we i de yuz (lɛkɛ fɔ luk grɔn so), fɔ no wetin de na PAPA GƆD in at. di ifɔd,#28:4 Ifɔd Na lɛkɛ eprɔn we gɛt strap nain sholda. di gawn,#28:4 Lɔŋ gawn Na lɔŋ gawn we kam dɔŋ di ni lilibit, lɛkɛ midi, ɛn i nɔ gɛt sliv; dɛn kin wɛr am ɔnda di chɛst kot. ɔda lɔŋ chɛk gawn lɛkɛ kasɔk,#28:4 Kasɔk Gɛt lɔŋ sliv. I lɔŋ te i kɔba di fut. Tɔban#28:4 Tɔban Na tin fɔ wɛr na ed. ɛn sash.#28:4 Sash Na matirial lɛkɛ bɛlt we dɛn kin yuz fɔ tay rawnd di wes. I brɔd lɛkɛ kɔmaband bɛlɛband. Dɛn fɔ mek oli klos fɔ yu brɔda Erɔn ɛn in bɔypikin dɛn fɔ de wok fɔ mi as man dɛn we de mek sakrifays fɔ pipul sin. 5Di telaman dɛn fɔ yuz fayn gold tred; blu, pɔpul ɛn rɛd wul matirial, ɛn fayn linin matirial fɔ mek dɛn gawn ya. 6Dɛn fɔ yuz blu, pɔpul, rɛd wul, gold trɛd ɛn fayn linin matirial wit fayn dizayn fɔ mek di ifɔd. 7I fɔ gɛt tu sholda strap dɛn lɛkɛ bresis. Di strap dɛn fɔ fasin pan di ifɔd in tu sayd. 8Dɛn fɔ yuz di sem kayn matirial we dɛn yuz fɔ mek di ifɔd fɔ mek di sash. I fɔ gɛt fayn dizayn ɛn dɛn fɔ fasin am pan di ifɔd. 9Tek tu ɔniks ston dɛn ɛn rayt Izrɛl in bɔypikin dɛn nem pan dɛn lɛkɛ aw dɛn bɔn, 10siks na wan ston ɛn siks na di ɔda ston. 11Lɛkɛ aw dɛn man we de mek ston tablɛt de wok nɔmɔ, na so fɔ rayt Izrɛl in bɔypikin dɛn nem pan di ston dɛn. Di ston dɛn fɔ gɛt gold frem. 12Yu fɔ fasin di ston dɛn pan di sholda strap dɛn pan di ifɔd. Na dɛn go rɛprizɛnt di twɛlv fambul dɛn na Izrɛl. Dɛn go ɛŋ na Erɔn in sholda fɔ de mɛmba dɛn ɔltɛm, ɛn misɛf we na PAPA GƆD go de mɛmba mi pipul dɛn. 13Dɔn, mek tu gold frem 14ɛn tu gold chen we na piɔ gold; put di gold chen dɛn rawnd di gold frem.

Di Pawch

(Ɛksodɔs 39:8-21)

15Mek di pawch fɔ di edman pan di man dɛn we de mek sakrifays fɔ pipul sin we i go wɛr fɔ de jɔj kes. Na di sem kayn matirial we yu yuz fɔ mek di ifɔd yu fɔ yuz fɔ mek am. 16Fɔ dɔbul di matirial ɛn gi am skwaya shep. I fɔ bi nayn inchis lɔŋ ɛn nayn inchis wayd. 17Dizayn am, mek fo ro wit fayn miniral ston dɛn lɛkɛ rubi, topaz ɛn bɛril we fɔ de na di fɔs ro. 18Di miniral ston we fɔ de na di sɛkɛn ro na tɔkɔys, safaya ɛn ɛmirald; 19dɔn di tɔd ro na jasinth, aget ɛn amɛthist miniral ston dɛn fɔ de de; 20di las ro in fɔ gɛt krosolayt, ɔniks ɛn jaspa ston. Yuz gold waya fɔ fasin, fasin dɛn. 21Na twɛlv ston dɛn fɔ de pan am, dɛn ɔl fɔ rɛprizɛnt wan pan Izrɛl in bɔypikin dɛn, ɛn dɛn fɔ tan lɛkɛ stamp we gɛt ɔlman in nem pan am. 22Mek piɔ gold chen dɛn fɔ di pawch. Dɛn fɔ twis twis di chen lɛkɛ rop, 23dɔn mek tu gold riŋ dɛn ɛn fasin dɛn na di tu ɛj pan di pawch. 24Put di tu gold chen dɛn insay di tu riŋ dɛn pan di pawch; 25fiks di tu ɛnd dɛn na di tu rop dɛn pan di tu gold frem, dɔn yu fiks am pan di ifɔd in sholda strap. 26Mek tu gold riŋ dɛn ɛn put dɛn bɔtɔm, kɔnasay na di pawch nia di ifɔd. 27Dɔn yu mek ɔda tu gold riŋ dɛn, put dɛn bɔtɔm say to di frɔnt pat usay di tu sholda strap de pan di ifɔd to di stichis, nia di fayn dizayn bɛlt. 28Tek blu kɔd tay di riŋ dɛn pan di pawch to di riŋ dɛn pan di ifɔd fɔ lɛ di pawch go le fayn pan di bɛlt so i nɔ go lus.

29We Erɔn de go insay di oli ples, i fɔ wɛr dis pawch we na pan am Izrɛl in bɔypikin dɛn nem rayt, fɔ lɛ dɛn go de nain at, ɛn dat go mek a de mɛmba dɛn ɔltɛm. 30Put di Yurim ɛn Thumim insay di pawch in pɔkit so dat dɛn go de na Erɔn in at we i de kam bifo PAPA GƆD. Erɔn fɔ de wɛr dis pawch ɔltɛm fɔ lɛ i go de no wetin PAPA GƆD mekɔp fɔ in pipul dɛn.

Di Klos Fɔ Di Ɔda Man Dɛn We De Mek Sakrifays Fɔ Pipul Sin

(Ɛksodɔs 39:22-31)

31“Dɛn fɔ tek blu wul mek di gawn we de de ɔnda di ifɔd. 32I fɔ opin fɔ mek ed go pas insay ɛn dɛn fɔ gi am bayndin fɔ lɛ i nɔ go chɛr. 33Dɛn fɔ dizayn pomigranet#28:33 Pomigranet Na frut we fiba apul, dɛn kin dizayn di frut as dɛkɔreshɔn pan klos. wit blu, rɛd ɛn pɔpul wul dɔŋ say pan am ɛn pul gold bɛl dɛn midul dɛn. 34I fɔ bi wan gold bɛl, wan pomigranet dizayn; wan gold bɛl, wan pomigranet. 35Erɔn fɔ wɛr dis gawn we i de du in wok. Di bɛl dɛn fɔ de riŋ we i de go insay di oli ples bifo PAPA GƆD ɛn we i de kɔmɔt na do so i go day.

36“Mek piɔ gold krawn ɛn rayt pan am. “Oli fɔ PAPA GƆD”. 37Tek blu kɔd tay di krawn ɛn fiks am na di frɔnt pat pan di tɔban. 38Erɔn fɔ de wɛr am ɔltɛm nain ed, dat go mek i tot di Izrɛlayt dɛn waala if dɛn mek ɛni mistek we dɛn de ɔfa oli sakrifays to mi. I fɔ wɛr dis tɔban ɔltɛm nain ed fɔ mek PAPA GƆD go aksɛpt di gift we dɛn de ɔfa to am. 39Dɛn fɔ yuz fayn linin trɛd fɔ mek Erɔn in chɛk kot, dɔn na linin dɛn fɔ tek mek di tɔban, insɛf. Dɛn fɔ mek di sash wit fayn dizayn. 40Mek chɛk kot, sash ɛn tɔban fɔ Erɔn in bɔypikin dɛn we go mek dɛnsɛf gɛt smɔl ɛyɛ. 41Yu fɔ wɛr di gawn dɛn pan yu brɔda Erɔn ɛn in bɔypikin dɛn. Yuz ɔliv ɔyl fɔ Ɔden dɛn ɛn anɔynt dɛn fɔ lɛ dɛn go de sav mi as man dɛn we de mek sakrifays fɔ pipul sin. 42Yuz linin matirial mek lɔŋ-fut drɔz fɔ dɛn fɔ kɔba frɔm dɛn wes te go dɔŋ to dɛn ni; 43Erɔn ɛn in bɔypikin dɛn fɔ wɛr am we dɛn de go insay di tɛnt, ɔ wɛn dɛn de go nia di ɔlta fɔ pafɔm dɛn dyuti na di oli ples. If dɛn nɔ wɛr da drɔz de ɛn dɛn kam bifo mi nekɛd wan dɛn go day. Erɔn ɛn ɔl dɛn wan we go gɛt fɔ sav afta am nɔ fɔ brok dis lɔ.”

Currently Selected:

Ɛksodɔs 28: KRIO13

Highlight

Copy