Ɛksodɔs 6
6
1PAPA GƆD ansa Mozis I se, “Yu go si wetin a go du wit di kiŋ. A go fos am fɔ mek i lɛf di pipul dɛn fɔ go. Wetin a go du, go mek na drɛb i go drɛb dɛn fɔ kɔmɔt na di kɔntri.
PAPA GƆD Sɛn Mozis
2PAPA GƆD tɔk bak to Mozis se, “Mi na PAPA GƆD. 3A apia to Ebraam, to Ayzak ɛn Jekɔb as PAPA GƆD Ɔlmayti, bɔt a nɔ bin mek dɛn no mi bay mi oli nem. 4A bin mek Kɔvinant wit dɛn ɛn a prɔmis se a go gi dɛn Kenan, dat na di ples we dɛn bin tap as trenja. 5A want yu fɔ no se a dɔn yɛri di Izrɛlayt dɛn, we di Ijipshian dɛn tek mek slev dɛn kɔmplen ɛn a dɔn mɛmba di Kɔvinant we a bi mek wit dɛn papa dɛn. 6So tɛl di Izrɛlayt pipul dɛn se, Mi na PAPA GƆD ɛn a go pul una kɔmɔt pan di waala we di Ijipshian dɛn put pan dɛn. A go pul dɛn kɔmɔt pan di slev layf we dɛn liv ɛn a go sho dɛn mi pawa. 7A go mek una bi mi yon pipul dɛn ɛn a go bi dɛn PAPA GƆD. Da tɛm de dɛn go no se mi na dɛn PAPA GƆD we a pul dɛn kɔmɔt pan slev layf na Ijipt. 8A go gi dɛn di land we a bin dɔn swɛ se a go gi dɛn papa dɛn - Ebraam Ayzak ɛn Jekɔb. Ɛn di land go bi dɛn yon prɔpati sote go. Mi na PAPA GƆD.” 9We Mozis tɛl di Izrɛlayt dɛn wetin PAPA GƆD se, dɛn nɔ lisin to am sɛf. Dɛn at bin pwɛl bikɔs ɔf aw dɛn bin de sɔfa lɛkɛ slev.
10Na de PAPA GƆD tɛl Mozis se, 11“Go bak go tɛl di kiŋ na Ijipt se lɛ i lɛf di Izrɛlayt dɛn mek dɛn kɔmɔt nain kɔntri.”
12Bɔt Mozis ansa PAPA GƆD se, “We di Izrɛlayt dɛn nɔ lisin to mi, wetin a go se to di kiŋ we mek i lisin to mi? Infakt mi na pɔsin we nɔ ebul tɔk.”
13Dis mek PAPA GƆD ɔda Mozis ɛn Erɔn fɔ go bak to di kiŋ na Ijipt ɛn tɛl am se, i fɔ lɛf di Izrɛlayt dɛn mek dɛn Kɔmɔt na Ijipt.
Smɔl Tin Bɔt Mozis Ɛn Erɔn Dɛn Famili Layn
14Na di big wan dɛn na di famili dɛn dis: Rubɛn, we na Jekɔb in fɔs-bɔy-pikin, bin gɛt fo bɔypikin dɛn we na: Anɔk, Palu, Ɛzrɔn ɛn Kami. Dɛn ɔl na bin Rubɛn in yon jɛnareshɔn dɛn. 15Simiɔn bin gɛt siks bɔypikin dɛn we na: Jɛmuɛl, Jamin, Oad, akin, Zoa ɛn Shaul we in yon mami na bin wan Kenanayt uman. Dɛn wan ya na Simiɔn in yon Jɛnareshɔn. 16Livay bin gɛt tri bɔypikin dɛn we na: Gashɔn, Koath ɛn Mɛrari. Dɛn na bin di papa dɛn fɔ di fambul dɛn we gɛt dɛn nem. Livay bin ol wan ɔndrɛd ɛn tati sɛvin ia we i day. 17Gashɔn bin gɛt tu bɔypikin dɛn we na Libni ɛn Shimɛi. Dɛn jɛnareshɔn dɛn bin bɔku. 18Koath bin gɛt fo bɔypikin dɛn we na: Amram, Iza, Ɛbrɔn ɛn Uziɛl. Dɛn i bin ol wan ɔndrɛd ɛn tati tri ia we i day. 19Mɛrari bin bɔn tu bɔypikin dɛn we na: Mali ɛn Mushi. Dɛn wan ya na Livay in jɛnareshɔn dɛn akɔdin to dɛn famili.
20Amram mared in dadi in sista Jokabɛd. Jokabɛd bɔn Erɔn ɛn Mozis fɔ am. Amram bi ol wan ɔndrɛd ɛn tati sɛvin ia we i day. 21Iza bin bɔn tri bɔypikin dɛn we na: Kora, Nɛfɛg ɛn Zikray. 22Uzrɛl bin bɔn tri bɔypikin dɛn we na Mishaɛl, Ɛlzafan ɛn Sitri.
23Erɔn mared Ilishɛba, we na Aminadab in gyal pikin ɛn Nashɔn in sista. Ilishɛba bɔn Nadab, Abiu, Ɛlieza ɛn Itama fɔ Erɔn. 24Kora bin gɛt tri bɔypikin dɛn we na: Asa, Elkena ɛn Abiasaf. Dɛn na bin di papa dɛn fɔ di fambul dɛn we kɔmɔt na Kora in jɛnareshɔn. 25Erɔn i bɔypikin Ɛlieza mared wan pan Pyutiɛl in gyal pikin dɛn, we bɔn Finɛas fɔ am. Dɛn wan ya na di big wan dɛn na di Livayt famili bay dɛn fambul.
26Na dɛn sem Erɔn ɛn Mozis ya, PAPA GƆD bin sɛn fɔ go pul di Izrɛlayt dɛn kɔmɔt na Ijipt akɔdin to dɛn fambul. 27Ɛn na dɛn bin go tɛl di kiŋ na Ijipt fɔ lɛf di Izrɛlayt dɛn fɔ go.
Di Tin We PAPA GƆD Kɔmand Mozis Ɛn Erɔn Fɔ Du
28Di tɛm we PAPA GƆD bin tɔk to Mozis ɛn Erɔn na Ijipt, 29i tɛl am se, “Mi na PAPA GƆD. Tɛl di kiŋ na Ijipt ɔl wetin a tɛl una.” 30Bɔt Mozis ansa PAPA GƆD se, “Yu no se a nɔ ebul tɔk. Wetin fɔ mek di kiŋ lisin to mi?”
Currently Selected:
Ɛksodɔs 6: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
