Jɛnɛsis 19

Di Bad Tin dɛn We Pipul Dɛn Bin De Du Na Sɔdɔm

1We di tu enjɛl dɛn rich na Sɔdɔm da ivin tɛm de, dɛn mit Lɔt sidɔm na di siti in get. As i si dɛn de kam so, i grap go mit dɛn. I butu in fes na grɔn bifo dɛn, 2ɛn se, “Du sa, una nɔ pas mi os go. Mek a briŋ wata fɔ una fɔ was una fut. Duya una slip to mi dis nɛt, dɛn una kin grap ali mɔnin ɛn go usay una de go.”

Bɔt di man dɛn ansa se, “Nɔ-o, wi go go slip na trit midul siti.”

3Bɔt Lɔt fos dɛn, ɛn dɛn go wit am insay in os. Lɔt mek gud it fɔ dɛn ɛn sav dɛn bred we nɔ gɛt yist, dɔn dɛn it. 4Bay di tɛm we dɛn de rɛdi fɔ go lidɔm, ɔl di man dɛn na di siti dɔn sɔrawnd di os, big wan ɛn smɔl wan dɛn. 5Dɛn ala aks Lɔt se, “We di trenja dɛn we kam slip to yu dis nɛt? Pul dɛn na do mek wi lidɔm wit dɛn.

6Lɔt kɔmɔt go na do ɛn lɔk di do. 7I beg dɛn mek dɛn nɔ du da kayn wikɛdnɛs de. 8I se, “A gɛt tu gyal pikin dɛn we na vajin. Mek a gi una lɛ una du wetin una want du wit dɛn. Bɔt duya, una nɔ ambɔg dɛn po man dɛn ya, dɛn na mi trenja.”

9Bɔt dɛn se, “Bo kɔmɔt bifo wi, yu we na trenja! Na yu de kam tɛl wi wetin fɔ du? Bo kɔmɔt bifo wi ya! Ɔ nɔ so wi go du yu wɔs tin pas wetin wi want du dɛn.” Dɛn push Lɔt te dɛn wan brok di do. 10Bɔt di tu man dɛn we bin de insay, ol Lɔt ɛn drɔ am bak insay di os, ɛn lɔk di do. 11Dɔn dɛn mek ɔl di man dɛn we bin de na do dɛn yay blɛn so dat dɛn nɔ go ebul fɔ si di domɔt.

Lɔt Kɔmɔt na Sɔdɔm

12Di tu man dɛn aks Lɔt, if i gɛt ɛnibɔdi na di siti lɛkɛ bɔypikin, gyal pikin, sɔnɛnlɔ, ɔ ɛni ɔda fambul, lɛ i pul dɛn kɔmɔt de, 13bikɔs dɛn de kam pwɛl di siti kpatakpata. Dɛn se PAPA GƆD dɔn yɛri bɔt di bad bad tin dɛn we di pipul dɛn na di siti de du, ɛn i dɔn sɛn dɛn fɔ kam pwɛl di siti.

14So Lɔt go to di man dɛn we gɛt fɔ mared in gyal pikin dɛn ɛn tɛl dɛn fɔ mekes kɔmɔt na di siti, as PAPA GƆD want fɔ pwɛl dis siti kpatakpata. Bɔt dɛn fil se na ple i de ple.

15We do klin di enjɛl dɛn tɛl Lɔt bak fɔ mekes. Dɛn tɛl am se, mek i mekes tek in wɛf ɛn tu gyal pikin dɛn we de wit am ɛn kɔmɔt de kwik kwik wan ɔ nɔ so dɛnsɛf go miks pan di pwɛl we di siti gɛt fɔ pwɛl. 16Lɔt bigin drɛg fut. Bɔt PAPA GƆD sɔri fɔ am, so di tu man dɛn kapu Lɔt, in wɛf ɛn in tu gyal pikin dɛn bonikali ɛn drɛg dɛn kɔmɔt na di siti. 17We di enjɛl dɛn dɔn pul dɛn kɔmɔt de, wan pan di enjɛl ala se, “Una rɔn fɔ una layf! Una nɔ luk biɛn ɛn una nɔ tinap na di vali. Una rɔn go na dɛn il fɔ lɛ una nɔ go day.”

18Bɔt Lɔt beg se, “Duya a nɔ ebul go ɔp di il dɛn bikɔs dɛn de tu fa. 19Du sa yu dɔn du big tin fɔ mi we yu sev mi layf. Bɔt di il dɛn de fa tumɔs; di waala go mit mi na rod, ɛn a go day bifo a rich de. 20Yu si da smɔl siti de oba yanda? I de nia lilibit. Duya, mek a go de; yu kin si se na smɔl ples ɛn natin nɔ go apin to mi de.”

21Di enjɛl gri se i kin go de. I se, “Ɔrayt, A nɔ go pwɛl da siti de. 22Mekes! Rɔn! A nɔ go du natin te yu rich de.” Lɔt se di siti smɔl, na dat mek dɛn kɔl di siti Zoa.#19:22 Zoa Dis na di Ibru wɔd fɔ smɔl.

PAPA GƆD Pwɛl Sɔdɔm ɛn Gomɔra

23Bay di tɛm we Lɔt rich Zoa, san dɔn tinap. 24Da sem tɛm de nain PAPA GƆD mek big, big faya ɛn sɔlfa kɔmɔt na ɛvin ɛn bɔn Sɔdɔm ɛn Gomɔra. 25I pwɛl pwɛl ɔl di siti dɛn, di vali dɛn, di pipul dɛn, di plant ɛn ɔl di animal dɛn. 26Bɔt Lɔt in wɛf tɔn biɛn fɔ luk wetin de apin. As i du dat so, in wanol bɔdi jɛs stif ɛn tɔn to sɔl.

27Ebraam grap di mɔnin go tinap na di ples we in ɛn PAPA GƆD bin tinap de tɔk. 28I luk dɔŋ na Sɔdɔm ɛn Gomɔra ɛn di vali, ɛn si tik tik smok de kɔmɔt dɔŋ de. Di smok tan lɛkɛ we big big faya de kech. 29We PAPA GƆD bin wan pwɛl di siti dɛn we de na di vali usay Lɔt bin tap, i mɛmba Ebraam ɛn na dat mek i sev Lɔt ɛn nɔ mek natin du am.

Aw Di Moabayt Ɛn Amonayt Pipul Dɛn Kam Na Wɔl

30Lɔt bin de fred fɔ tap na Zoa, so in ɛn in tu gyal pikin dɛn muf go ɔp dɛn il go tap na wan kev.#19:30 Kev Na big ol na grɔn we pɔsin kin ebul tap 31Wande big gyal pikin tɛl in sista se, “Wi papa dɔn ol, man nɔ de na ya we go mared wi fɔ lɛ wi go bɔn pikin. 32Yu no wetin lɛ wi gi papa rɔm lɛ i drɔnk we i chak we go go lidɔm wit am so wi go gɛt pikin we go mek wi nem nɔ day.” 33Da nɛt de dɛn gi dɛn papa rɔm fɔ drink we mek i drɔnk, ɛn di big gyal pikin lidɔm wit am. Lɔt bin so drɔnk dat i nɔ no natin.

34Di nɛks de, di big gyal pikin tɛl in sista se, “A lidɔm wit papa yɛstade nɛt; lɛ wi mek i drɔnk bak dis nɛt, so dat yu kin lidɔm wit am. Dɔn wi ɔl tu go gɛt pikin we go mek wi nem nɔ day.” 35Da nɛt de dɛn mek i drɔnk gud, ɛn di smɔl gyal pikin lidɔm wit am. I bin so drɔnk dat i nɔ no natin. 36Na so Lɔt in gyal pikin dɛn tek gɛt bɛlɛ fɔ am. 37Di big wan bɔn bɔypikin, we i gi nem Moab.#19:37 Moab I fiba lɛkɛ di Ibru fɔ, ‘frɔm mi papa.’ Moab na di papa fɔ di Moabayt dɛn we de te tide. 38Di smɔl wan insɛf bɔn bɔypikin, we i gi nem Bɛn Ami,#19:38 Bɛn Ami: I min Mi bɔypikin in fambul; i fiba di Ibru wɔd fɔ Amɔrayt. Bɛn Ami na di papa fɔ di Amonayt dɛn we stil de te tide.

Currently Selected:

Jɛnɛsis 19: KRIO13

Highlight

Copy