Jɛnɛsis 33
33
Jekɔb Ɛn Isɔ Mitɔp
1As Jekɔb de go so, i si Isɔ de kam wit di fo ɔndrɛd amiman dɛn, so i mek Lia, Rechɛl ɛn di tu savant-gyal dɛn ɔl ol dɛn yon pikin dɛn. 2I put di savant-gyal dɛn ɛn dɛn pikin dɛn fɔ lid, dɛn nɛks na Lia ɛn in pikin dɛn, ɛn las na Rechɛl ɛn Josɛf. 3Jekɔb in go bifo. As i de rich nia Isɔ so i baw bifo am sɛvin tɛm. 4Isɔ rɔn go mit am, grip am ɛn kis am. Dɛn ɔl tu bɔs kray. 5We Isɔ luk rawnd ɛn si di uman dɛn ɛn di pikin dɛn, i aks Jekɔb udat na ɔl dɛn pipul dɛn ya we de wit am.
Jekɔb ansa am dɛn se na di pikin dɛn we PAPA GƆD blɛs am wit. 6Di uman dɛn ɛn dɛn pikin dɛn kam baw bifo Isɔ. Fɔs na di savant-gyal dɛn ɛn dɛn pikin dɛn, 7dɔn Lia ɛn in yon pikin dɛn, dɔn Rechɛl ɛn Josɛf.
8Isɔ aks Jekɔb wetin ɔl dɛn animal we i mit na rod min.
Jekɔb ansa am se dɛn na prɛzɛnt fɔ mek in at go kol
9Bɔt Isɔ tɛl Jekɔb se in gɛt bɔku lɛ i kip wetin i gɛt.
10Jekɔb beg am se nɔ, if in at dɔn kol ɛn if i gladi fɔ am bak, lɛ i tek di prɛzɛnt dɛn. I se we in dɔn si Isɔ in fes bak i tan lɛkɛ na PAPA GƆD in fes i dɔn si; nɔ lɛkɛ we i dɔn lus bɔdi to am. 11I beg am lɛ i tek di prɛzɛnt dɛn bikɔs i se PAPA GƆD nɔ gridi am ɛn i dɔn gi am ɔl wetin i want. Jekɔb koks Isɔ sote i gri fɔ tek di prɛzɛnt dɛn.
12So Isɔ tɛl am se lɛ dɛn de go ɛn in go de bifo.
13Bɔt Jekɔb ansa am se i si se di pikin dɛn smɔl smɔl, ɛn dɛn uman ship ɛn kaw dɛnsɛf gɛt yɔŋ wan dɛn fɔ fid. If dɛn waka tumɔs fɔ wanol de, dɛn ɔl go day. 14So, i beg am se lɛ in di Isɔ de bifo, dɛn go de biɛn am. Dɛn go tek dɛn tɛm waka bɔt dɛn go mit am na Sɛir. 15Na de Isɔ se if na so, mek i lɛf sɔm pan in man dɛn fɔ am.
Jekɔb ansa se i nɔ nid fɔ du ɔl dat, wans i dɔn sho se i dɔn sɔri fɔ am 16So Isɔ lɛf da sem de de fɔ go bak na Sɛir. 17Bɔt Jekɔb ɛn in pipul dɛn go na Sɔkɔt, usay i bin bil os fɔ insɛf ɛn mek ples fɔ in animal dɛn fɔ de. Na dat mek dɛn kɔl di ples Sɔkɔt.#33:17 Sɔkɔt I min “ples fɔ tap” pan Ibru. 18Jekɔb ɛn in famili rich sef wan na Shɛkɛm, we na wan big siti na Kenan dɔn i bil in tɛnt nia di big siti. 19I bin bay di grɔn to Amɔ in famili fɔ wan ɔndrɛd silva kɔpɔ#33:19 Ɔndrɛd silva kɔpɔ Na Ibru, na wan ɔndrɛd kɛsita; Kɛsita na wan kayn mɔni we pɔsin nɔ no in valyu. we i bil in tɛnt. Amɔ na bin Shɛkɛm in papa. 20I bil ɔlta de ɛn kɔl am Ɛl-Ɛloe-Izrɛl.#33:20 Ɛl-Ɛloe-Izrɛl I min PAPA GƆD, Izrɛl dɛn PAPA GƆD ɔ Izrɛl dɛn Mayti PAPA GƆD.
Currently Selected:
Jɛnɛsis 33: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
