Jɛnɛsis 41

Josɛf Intaprit Di Kiŋ In Drim

1Afta tu ia dɔn pas, di kiŋ na Ijipt drim se i tinap nia Riva Nayl. 2I si sɛvin fat kaw dɛn we bin fayn fɔ luk, kɔmɔt insay di riva ɛn dɛn bigin fɔ it di gras. 3Dɛn i si sɛvin ɔda kaw dɛnsɛf kɔmɔt insay di riva; bɔt dɛn bin wɔwɔ ɛn dray tumɔs. Dɛn dray wɔwɔ kaw ya kam tinap nia di fat fayn kaw dɛn nia di riva. 4Di dray wɔwɔ kaw dɛn it di fat, fayn kaw dɛn. Nain i skyad wek.

5Di kiŋ lidɔm slip bak ɛn drim igen Insay dis drim i si sɛvin ed kɔn we dɔn ful ɛn trɔŋ de gro na wan tik. 6Sɛvin ɔda ed kɔn bin bɔs, bɔt di briz we kɔmɔt na di ist bin mek dɛn dray bad bad wan. 7Nain dɛn dray ed kɔn dɛn ya so, swɛla di wan dɛn we bin dɔn ful. Di kiŋ skyad wek ɛn kechɔp se na drim i bin de drim. 8We do klin i bin wɔri, so i sɛn kɔl ɔl in majikman ɛn sɛnsman dɛn we de na Ijipt. I tɛl dɛn in drim, bɔt nɔn pan dɛn nɔ bin ebul fɔ intaprit dɛn.

9Na de di man we de sav wayn to di kiŋ se, na da de de in mɛmba wetin i fɔ dɔn du. 10I se wan tɛm bin de we di kiŋ bin vɛks pan am ɛn di edman fɔ di bekaman dɛn, so i put dɛn na jel na di kapten fɔ di gyad dɛn, in os. 11Wan nɛt dɛn ɔl tu bin drim ɛn di drim dɛn bin gɛt difrɛn minin. 12I se wan yɔŋ Ibru bɔy bin de na jel wit dɛn, we bin de wok fɔ di gyad dɛn bɔsman. I se dɛn tɛl am dɛn drim, ɛn i intaprit di drim fɔ dɛn. 13Tin dɛn bi, jɛs lɛkɛ aw i bin se. I se di kiŋ bin gi am in wok bak, ɛn i bin kil di bekaman. 14Di kiŋ sɛn kɔl Josɛf, ɛn dɛn pul am kɔmɔt na jel wantɛm. We i dɔn shev ɛn chenj in klos, i go mit di kiŋ. 15Di kiŋ tɛl am se in drim wan drim bɔt nɔbɔdi nɔ ebul fɔ intaprit am fɔ am, bɔt dɛn tɛl am se i kin intaprit drim.

16Josɛf ansa am se di kiŋ se, nɔto in de intaprit drim, bɔt PAPA GƆD go intaprit am fɔ am.

17Di kiŋ se, in drim se i tinap nia Riva Nayl, 18nain sɛvin fat kaw dɛn we fayn fɔ luk, kɔmɔt insay di riva ɛn dɛn bigin fɔ it di gras. 19Dɛn sɛvin ɔda dray kaw dɛn we gɛt soso bon bon apia. I se in nɔ wande si dɛn kayn wɔwɔ kaw de na Ijipt. 20Di dray kaw dɛn it di fat wan dɛn, 21bɔt ɔl we dɛn dɔn it di fat wan dɛn dɔn, na so dɛn dray lɛkɛ aw dɛn bin tan. Na de in skyad wek. 22Dɔn i drim bak se i si sɛvin ed kɔn we ful ɛn trɔŋ bin de gro na di sem tik. 23Dɔn ɔda sɛvin ed kɔn bɔs na di sem tik we di ist briz blo dɛn mek dɛn dray bad bad wan. 24Di dray ed kɔn dɛn swɛla di wan dɛn we ful ɛn trɔŋ. I se we i tɛl di majikman dɛn in drim dɛn nɔn nɔ ebul intaprit am fɔ am.

25Josɛf tɛl di kiŋ se, di tu drim dɛn min di sem tin; PAPA GƆD dɔn sho am wetin i gɛt fɔ du. 26Di sɛvin fat kaw na sɛvin ia, ɛn di sɛvin ed ful trɔŋ kɔn dɛnsɛf na sɛvin ia; dɛn gɛt di sem minin. 27Di sɛvin dray kaw dɛn ɛn di sɛvin ed dray kɔn min sɛvin ia aŋri. 28Jɛs lɛkɛ aw i tɛl am, PAPA GƆD dɔn sho am wetin i gɛt fɔ du. 29Sɛvin ia go de we it go de bɔku na Ijipt, 30bɔt afta dat aŋri go de fɔ sɛvin ɔda ia. Ɔlman go fɔgɛt bɔt di tɛm we it bin de bikɔs di aŋri go so bad dat i go pwɛl di kɔntri. 31Dɛn go fɔgɛt bɔt di tɛm we tin bin plɛnti, bikɔs di aŋri we go kam go traŋa bad bad wan. 32I se di kiŋ drim di sem tin tu tɛm bikɔs na tin we PAPA GƆD dɔn disayd fɔ du, ɛn i go bi jisnɔ.

33I tɛl di kiŋ se lɛ i pik man we gɛt sɛns ɛn put am inchaj ɔf di wanol kɔntri. 34Dɔn lɛ i pik ɔda man dɛn we go de inchaj fɔ kɔlɛkt wan pan fayv pat pan di tin dɛn we dɛn go avɛst insay di fɔs sɛvin ia we it go bɔku. 35Dɛn fɔ gɛda dɛn it ya ɛn kip dɛn na di kiŋ in yon sto so dat it go de ɔlsay na di kɔntri. 36Dɛn fɔ kip dɛn it ya so fɔ di sɛvin ia dɛn we it nɔ go de na di kɔntri so aŋri nɔ go kil di pipul dɛn.

Dɛn Mek Josɛf Bi Gɔvna Na Ijipt.

37Di kiŋ ɛn di ɔfisa dɛn bin gri fɔ du wetin Josɛf se. 38Ɛn i tɛl dɛn se, nɔbɔdi nɔ go ebul du di wok bɛtɛ pas Josɛf, we gɛt PAPA GƆD in spirit insay am 39I tɔn to Josɛf ɛn tɛl am se, as PAPA GƆD dɔn sho am ɔl dis, nɔbɔdi nɔ de igen we gɛt da kayn sɛns de nain kɔntri. 40So i go mek am bi edman nain kɔntri fɔ di projɛkt, ɛn ɔl in pipul dɛn go obe am. Di wan tin nɔmɔ, Josɛf go de sɛkɛn to am. 41Ɛn frɔm da de de in di kiŋ dɔn mek Josɛf bi gɔvna na di kɔntri. 42Di kiŋ pul in riŋ nain fiŋa we gɛt in mak pan am ɛn put am na Josɛf in fiŋa fɔ sho se i dɔn gɛt pawa. I wɛr fayn linin klos pan am, ɛn put gold chen rawnd in nɛk. 43I mek i rayd pan di ɔs ɛn karej we di sɛkɛn in kɔmand kin rayd ɛn in sikyɔriti dɛn de bifo de ala se, “Una gi rod! Una gi rod!” Na so Josɛf tek bi gɔvna na Ijipt. 44Dɛn di kiŋ tɛl am se, “Mi na di kiŋ bɔt nɔbɔdi na Ijipt nɔ go muf wan inch if yu nɔ tɛl am fɔ du so.” 45Di kiŋ chenj Josɛf in nem to Zafɛnath Pania we na Ijipshian nem, ɛn gi am Asɛnath we na Pɔtifɛra in gyal pikin fɔ bi in wɛf. Pɔtifɛra na bin man we de mek sakrifays fɔ pipul sin na On. So Josɛf ebul fɔ go ɔlsay insay Ijipt. 46Josɛf bin ol tati ia we i bigin fɔ sav di kiŋ na Ijipt. I bin kɔmɔt na di kiŋ in ples ɛn i waka ɔlsay na di kɔntri. 47We di fɔs sɛvin ia kam it bin plɛnti na di kɔntri. 48Josɛf gɛda bɔku it ɛn kip dɛn na di big siti dɛn sto. I kip di it we kɔmɔt na ɛni fam na di big siti in sto we de nia da fam de. 49Di it bin so plɛnti dat Josɛf tap fɔ mɛnshɔ am. It bin bɔku lɛkɛ sansan na bich.

50Bifo di ia dɛn kam we di aŋri fɔ de, Asɛnath dat na Pɔtifɛra di man we kin mek sakrifays fɔ pipul sin, in gyal pikin bin dɔn bɔn tu bɔypikin dɛn fɔ Josɛf. 51Josɛf gi in fɔs-bɔy-pikin nem Manasɛ.#41:51 Manasɛ I fiba di Ibru fɔ fɔgɛt. I se, “PAPA GƆD dɔn mek a fɔgɛt ɔl mi waala ɛn ɔl mi papa in fambul dɛn.” 52I gi in sɛkɛn pikin nem Ifrem.#41:52 Ifrem I fiba di Ibru fɔ frutful. I tɔk se, “PAPA GƆD dɔn gi mi pikin na di kɔntri usay a sɔfa.” 53Di sɛvin ia we it bin plɛnti na Ijipt bin kam ɛn pas, 54dɔn di sɛvin ia we di aŋri fɔ bigin kam lɛkɛ aw nɔmɔ Josɛf bin se. Aŋri bin de na dɛn ɔda kɔntri, bɔt it bin de na Ijipt. 55We di aŋri bigin fɔ mɔna di pipul dɛn na Ijipt, dɛn go kray to di kiŋ fɔ it, so di kiŋ tɛl dɛn fɔ go to Josɛf, ɛn du wetin i tɛl dɛn fɔ du. 56Di aŋri bin traŋa dat i prɛd ɔlɔbɔt na di kɔntri. Josɛf opin di sto ɛn sɛl kɔn gi di pipul dɛn na Ijipt. 57Pipul dɛn bin de kɔmɔt ɔlsay na di wɔl fɔ go bay it to Josɛf na Ijipt, bikɔs di aŋri bin dɔn pasmak ɔlsay.

Currently Selected:

Jɛnɛsis 41: KRIO13

Highlight

Copy