Jɛnɛsis 43

Josɛf In Brɔda Dɛn Go Bak Na Ijipt Wit Bɛnjamin

1Di aŋri bin dɔn traŋa na Kenan 2ɛn we Izrɛl#43:2 Izrɛl Na Jekɔb in ɔda nem. ɛn in fambul dɛn dɔn it ɔl wetin dɛn bin briŋ kɔmɔt Ijipt, Izrɛl bin tɛl in bɔypikin dɛn fɔ go bak go bay it fɔ dɛn ɔl.

3Juda tɛl am se di man bin wɔn dɛn traŋa wan se i nɔ go gri lɛ dɛn si am pas dɛn kɛr dɛn smɔl brɔda go. 4If Izrɛl gri fɔ lɛ dɛn ɛn dɛn brɔda go, dɛn go go bay di it kam, 5bɔt if in nɔ gri, dɛn nɔ go go, bikɔs di man bin tɛl dɛn se in nɔ go gri lɛ dɛn si am pas dɛn brɔda go wit dɛn.

6Dat mek Izrɛl aks dɛn uskayn waala dɛn dɔn put pan am so. Wetin mek dɛn fɔ tɛl di man se dɛn gɛt smɔl brɔda. 7Dɛn tɛl am se, di man aks bɔt dɛn fambul dɛn, if dɛn papa nɔ day yet ɛn if dɛn gɛt ɔda brɔda. Dɛn se dɛn bin jɛs gɛt fɔ ansa am. Ɛn dɛn nɔ bin no se i bin go tɛl dɛn fɔ kɛr dɛn brɔda go.

8Juda tɛl in papa se lɛ i gi am di pikin, lɛ dɛn go wantɛm mek aŋri nɔ kil dɛn ɛn dɛn pikin dɛn. 9I se in de le in layf dɔŋ. I go briŋ am bak to am. If i nɔ briŋ am kam bak in go tek di blem sote go. 10I se dɛn de westɛm, lɛk dɛn dɔn go ɛn kam tu tɛm sɛf. 11Dɛn papa tɛl dɛn se if na so i gɛt fɔ bi, fayn. Bɔt lɛ dɛn tek sɔm fayn tin dɛn we dɛn gɛt go gi di gɔvna fɔ prɛzɛnt: lɛkɛ tin fɔ rɔb, ɔni, spays, pistashio ɛn almɔn.#43:11 Pistashio ɛn Almɔn Na tin dɛn lɛkɛ granat we dɛn de it. 12I se lɛ dɛn dɔbul di mɔni we dɛn de kɛr go, bikɔs dɛn gɛt fɔ kɛr di mɔni we dɛn bin fɛn insay dɛn bag go bak. Sɔntɛm na sɔmbɔdi mek mistek. 13I se lɛ dɛn tek dɛn brɔda de go wantɛm, 14ɛn pre mek PAPA GƆD Ɔlmayti mek di man sɔri fɔ dɛn, ɛn lɛ i mek Bɛnjamin ɛn dɛn ɔda brɔda kam bak wit dɛn. I se as fɔ in di Izrɛl, if na so in fɔ lɔs in pikin dɛn, lɛ i bi so.

15Di brɔda dɛn tek Bɛnjamin, di prɛzɛnt dɛn ɛn di dɔbul mɔni, ɛn go Ijipt go sho dɛnsɛf to Josɛf. 16We Josɛf si Bɛnjamin wit dɛn, i tɛl di wokman nain os fɔ kɛr di man dɛn go insay in os. I se, dɛn go it wit am da aftanun de, so lɛ i kil wan animal ɛn rɛdi it fɔ dɛn. 17Di wokman du wetin Josɛf tɛl am fɔ du.

18We dɛn bin de go na di os, dɛn bin de fred. Dɛn tink se na fɔ di mɔni we dɛn fɛn insay dɛn bag dɛn, mek i mek dɛn de kɛr dɛn go nain os. Dɛn se Josɛf want tek dat mek ɛskyuz fɔ siz dɛn dɔŋki dɛn ɛn tɔn dɛn to slev. 19We dɛn rich na di domɔt, dɛn tɛl di wokman 20se dɛn bin dɔn kam de wan tɛm fɔ kam bay it. 21Dɛn se we dɛn de go na os dɛn bin blo smɔl bit na rod. We dɛn opin dɛn bag dɛn, dɛn fɛn dɛn mɔni insay dɛn bag bɔt dɛn dɔn briŋ am kam bak. 22Dɛn se dɛn briŋ sɔm mɔni kam bak fɔ bay mɔ it ɛn dɛn nɔ no udat bin put dɛn mɔni bak insay dɛn bag.

23Di wokman se lɛ dɛn put dɛn at dɔŋ lɛ dɛn ɔ fred. I se dɛn PAPA GƆD, we na dɛn papa in PAPA GƆD, nain go put di mɔni na dɛn bag. I se in gɛt dɛn mɔni. Afta dat i go briŋ Simiɔn kam.

24Di wokman kɛr di brɔda dɛn go insay di os. I gi dɛn wata fɔ was dɛn fut, ɛn gi dɛn dɔŋki dɛn it. 25Dɛn rɛdi di prɛzɛnt dɛn fɔ gi Josɛf we i kam fɔ it santɛm, bikɔs dɛn bin dɔn tɛl dɛn se dɛn gɛt fɔ it wit am. 26We Josɛf rich na os, dɛn kɛr di prɛzɛnt dɛn we dɛn bin dɔn briŋ insay di os, go gi am ɛn dɛn baw to am. 27I aks dɛn if dɛn wɛl ɛn se dɛn bin tɛl am bɔt dɛn papa, so aw i de du, if i stil ɛn de alayv ɛn if i wɛl. 28Dɛn ansa am se dɛn papa de ɛn i wɛl. Dɔn dɛn baw to am fɔ sho rɛspɛkt. 29We Josɛf si in bɛlɛ bɔn brɔda Bɛnjamin i aks dɛn if na dɛn smɔl brɔda da wande we dɛn bin tɛl am bɔt. Dɔn i se “Mek PAPA GƆD blɛs yu mi pikin.” 30We Josɛf si in brɔda, i want bɔs kray. I luk fɔ ples fɔ go kray, so i rɔn go insay in rum ɛn go kray. 31We i dɔn was in fes ɛn bɔkɔp insɛf, i kɔmɔt na do ɛn gi ɔda fɔ mek dɛn sav di it. 32Dɛn bin sav Josɛf na wan tebul, ɛn in brɔda dɛn na ɔda tebul, di Ijipshian dɛn na di ɔda tebul bikɔs na bad bad tin fɔ mek di Ijipshian ɛn Ibru pipul dɛn it wan say as di Ijipshian dɛn nɔ lɛk dat. 33Josɛf tɛl in brɔda dɛn usay fɔ sidɔm na di tebul. I mek dɛn sidɔm lɛkɛ aw dɛn ol frɔm di big wan to di smɔl wan. We dɛn si aw dɛn sidɔm, dɛn luk dɛnsɛf ɛn wɔnda. 34Di it we dɛn bin sav dɛn na pan di wan we bin de na Josɛf in tebul. Bɛnjamin in yon it bin bɔku fayv tɛm pas dɛn ɔl. So dɛn it ɛn drink fri wan wit Josɛf.

Currently Selected:

Jɛnɛsis 43: KRIO13

Highlight

Copy