Jɛnɛsis 47
47
1Josɛf go to di kiŋ ɛn tɛl am se, in papa ɛn in brɔda dɛn dɔn kɔmɔt Kenan wit ɔl dɛn animal dɛn ɛn ɔl wetin dɛn gɛt. I se dɛn tap na Goshɛn. 2I sho fayv pan in brɔda dɛn to di kiŋ. 3Di kiŋ aks dɛn uskayn wok dɛn de du. Dɛn ansa am se, dɛn na man dɛn we de mɛn ship jɛs lɛkɛ dɛn papa dɛn. 4Dɛn se dɛn dɔn kam fɔ tap na dis kɔntri, bikɔs dɛn kɔntri Kenan nɔ gɛt it fɔ dɛn animal dɛn ɛn di aŋri dɔn pasmak de. So, dɛn beg se lɛ dɛn tap na Goshɛn. 5Na de di kiŋ tɛl Josɛf se, as in papa ɛn in brɔda dɛn dɔn kam, 6Ijipt na dɛn yon. I se lɛ dɛn pik ɛnisay fɔ tap ɛn lɛ Josɛf gi dɛn di bɛst say na di kɔntri. I se Goshɛn nɔto bad ples fɔ tap ɛn if ɛniwan pan dɛn sabi di wok mek i ɛp in mɛn in yon animal dɛn.
7Na da tɛm de Josɛf kɛr in papa, Jekɔb go sho am to di kiŋ. Jekɔb blɛs di kiŋ, 8ɛn di kiŋ aks am ɔmɔs ia i ol Jekɔb ansa se, 9in dɔn de fɔ wan ɔndrɛd ɛn tati ia ɛn di tin dɛn we in yay dɔn si, i nɔ smɔl. Ɛn i nɔ rich in pipul dɛn ej yet. 10Jekɔb blɛs di kiŋ bak ɛn se gudbay. 11Dɔn Josɛf mek in papa ɛn in brɔda dɛn tap na Ijipt, ɛn i gi dɛn di bɛst land we na di land na Ramisis distrikt, lɛkɛ aw di kiŋ bin se. 12Josɛf gi in papa, in brɔda dɛn ɛn ɔl in papa in fambul dɛn it lɛkɛ aw dɛn tap na os.
Wetin Josɛf Du We Aŋri De
13Bay dis tɛm, di aŋri bin so traŋa ɛn it nɔ bin de. Dat mek di pipul dɛn na Ijipt ɛn Kenan wik. 14Josɛf bin gɛda ɔl di mɔni we de na Ijipt ɛn Kenan as i bin de sɛl it gi di pipul dɛn, ɛn put dis mɔni ya na di kiŋ in os. 15We di pipul dɛn na Ijipt ɛn Kenan dɛn kɔpɔ dɔn, dɛn kin kam na Ijipt to Josɛf ɛn tɛl am se, lɛ i gi dɛn it, lɛ i nɔ mek dɛn day bifo in yay. Dɛn se ɔl dɛn kɔpɔ dɔn dɔn.
16Josɛf ansa dɛn se, lɛ dɛn briŋ dɛn animal dɛn kam, in go gi dɛn it if dɛn kɔpɔ dɔn. 17So dɛn briŋ dɛn animal dɛn kam to Josɛf; dɛn ɔs, ship, got, kaw ɛn dɔŋki dɛn. Dɔn i gi dɛn it. Na dat mek dɛn nɔ day da ia de. 18Di ɔda ia dɛn kam bak, ɛn beg am se, dɛn nɔ go ayd tru pan am, ɔl dɛn kɔpɔ dɔn dɔn ɛn dɛn animal dɛn ɔl de nain an. Natin nɔ lɛf pas dɛn bɔdi ɛn dɛn land. 19Dɛn beg am se duya, lɛ i du sɔntin fɔ dɛn. Lɛ i nɔ mek dɛn day ɛn lɛ dɛn fam dɛn lɛf ɛmti wan. Dɛn se lɛ i bay dɛn ɛn dɛn land dɛn bɔt lɛ i gi dɛn it fɔ it. Dɛn se dɛn go bi di kiŋ in slev ɛn in go gɛt dɛn ɛn dɛn land. Dɛn beg am lɛ i gi dɛn it we go mek dɛn nɔ day, ɛn sid fɔ plant na dɛn fam.
20Josɛf bin bay ɔl di land na Ijipt fɔ di kiŋ. Ɔlman na Ijipt bin gɛt fɔ sɛl dɛn land, bikɔs di aŋri bin dɔn traŋa. Na so ɔl di land dɛn tɔn di kiŋ in prɔpati. 21Dat mek di pipul dɛn ɔl bi slev to di kiŋ na di wanol Ijipt. 22Di land dɛn nɔmɔ we i nɔ tek na di wan dɛn we dɛn man we de mek sakrifays fɔ di pipul dɛn gɛt, bikɔs di kiŋ bin mek shɔ se dɛn de gɛt it, so dɛn nɔ bin gɛt fɔ sɛl dɛn land. 23Josɛf tɛl di pipul dɛn se in dɔn bay dɛn ɛn dɛn land dɛn fɔ di kiŋ. So i de gi dɛn sid naw fɔ plant na dɛn fam. 24We di tɛm rich fɔ avɛst wetin dɛn plant, dɛn fɔ sheb am fayv pat ɛn wan pat go bi di kiŋ in yon. Di wan we lɛf dɛn go kip sɔm fɔ plant ɛn yuz di balans fɔ dɛnsɛf ɛn dɛn fambul dɛn.
25Dɛn ansa se i dɔn sev dɛn layf; lɛ dɛnsɛf nɔ pruv ɔngretful to am. Dɛn se dɛn gri fɔ bi di kiŋ in slev dɛn. 26So Josɛf pas lɔ bɔt land biznɛs na Ijipt we de te tide.#47:26 Tide Na di tɛm we dɛn rayt dis buk. Di lɔ se ɔlman fɔ sheb in avɛst fayv pat ɛn wan pat fɔ go to di kiŋ. Bɔt bikɔs di kiŋ nɔ bin tek di man dɛn we de tɔk to PAPA GƆD fɔ dɛn, dɛn nɔ bin gɛt fɔ pe ɛn taks land.
27So di Izrɛlayt dɛn kam tap na Goshɛn insay Ijipt. We dɛn de de dɛn gɛt bɔku bɔku prɔpati ɛn pikin dɛn. 28So Jekɔb bin de Ijipt fɔ sɛvintin ia. I ol wan ɔndrɛd ɛn fɔti sɛvin ia we i day. 29Wɛn Jekɔb bin no se i wan day, i sɛn kɔl in bɔypikin Josɛf ɛn se if i no se i lɛk am fɔ tru tru, put lɛ Josɛf put in an midul in di Jekɔb in lɛg ɛn swɛ se i nɔ go bɛr am insay Ijipt. 30Ɛn i day in di Josɛf go tek in dedebɔdi kɔmɔt na Ijipt go bɛr am wit in yon pipul dɛn.
Josɛf se in go du wetin i se.
31Jekɔb pin se Josɛf fɔ swɛ, so Josɛf insɛf swɛ. We i dɔn, Jekɔb baw in ed na di bed ed ɛn wɔship PAPA GƆD.
Currently Selected:
Jɛnɛsis 47: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
