Lɛvitikɔs 11
11
Wetin Fɔ It Ɛn Wetin nɔ Fɔ It
(Ditarɔnɔmi 14:3-21)
1PAPA GƆD tɛl Mozis ɛn Erɔn, 2fɔ tɛl di Izrɛlayt dɛn se na dɛn wan ya pan di animal dɛn we de na wɔl dɛn fɔ it. 3I fayn fɔ it animal we tan lɛk se in fut plit midul, ɛn we kin de cham ɔltɛm. 4Bɔt nɔto ɛniwan we de cham ɔltɛm ɔ we in fut plit midul fɔ it. Nɔ fɔ it dɛn wan ya: kamɛl,#11:4 Kamɛl Na animal we gɛt smɔl bɔmp nain bak ɛn dɛn kin mek i tot lod go fawe. dat na bikɔs pan ɔl we i de cham ɔltɛm, i nɔ gɛt fut we plit midul. I nɔ klin na PAPA GƆD yay. 5Nɔ fɔ it rɔk badja, dat na wan animal we de nia Ist ɛn Nɔth Afrika ɛn we kin de it gras. Dis na bikɔs pan ɔl we i de cham ɔltɛm, i nɔ gɛt fut we plit midul. I nɔ klin na PAPA GƆD yay. 6Nɔ fɔ it wan ɔda kayn animal we dɛn kɔl ɛa#11:6 Ɛa Na animal we fiba rabit bɔt in yes lɔŋ pas am. bikɔs pan ɔl we i de cham ɔltɛm, insɛf nɔ gɛt fut we plit midul. Insɛf nɔ klin na PAPA GƆD yay. 7Nɔ fɔ it bush ɔg bikɔs pan ɔl we in fut dɛn plit midul, i nɔ de cham ɔltɛm. I nɔ klin na PAPA GƆD yay. 8Nɔ fɔ it dɛn animal ya dɛn bif ɛn nɔ fɔ ivin tɔch di wan we dɔn day; dɛn nɔ klin na PAPA GƆD yay.
9I se na dɛn wan ya we de na wata fɔ it. Ɔltin we gɛt fin ɛn skel. Di wan dɛn we de na si ɔ na riva, yu kin it dɛn. 10Nɔ fɔ it ɛnitin we de na wata bɔt we nɔ gɛt fin ɛn skel wɛda i de wit ɔda wan dɛn ɔ i gɛt layf. Fɔ et ɔl. 11Fɔ et dɛn ɔl; nɔ fɔ it dɛn bif ɛn nɔ fɔ tɔch dɛn day wan. 12Fɔ et ɔltin we de na wata we nɔ gɛt fin ɛn skel na abɔmineshɔn to yu.
13Una nɔ fɔ it dɛn bɔd dɛn ya. Dɛn na abɔmineshɔn to PAPA GƆD: ak, yuba, kɔkɔ, 14big bɔd we de flay lɛkɛ kayt we dɛn kin kɔl kayt, ɛn 15dɛn difrɛn gridi bɔd dɛn we dɛn kɔl revɛn, 16da bɔd we dɛn kin kɔl ɔstrich, difrɛn kayn ak, dɛn bɔd dɛn we kin de togɛda de flay oba wata fɔ kech fish we dɛn go it, 17kɔkɔ, da blak bɔd we gɛt lɔŋ nɛk we kin de flay oba wata, wan ɔda kayn bɔd we tap nia wata, i gɛt lɔŋ nɛk, lɔŋ fut ɛn in bik sɛf lɔŋ, 18wata fɔl, kaw enjɛl, wan kayn yuba 19ɛn bat#11:19 Bat Sɔm pipul kin se bat nɔto bɔd bɔt na ya so dɛn put am as bɔd.
20Ɔl insɛkt we gɛt fɛda ɛn de waka wit fo fut na abɔmineshɔn. 21Pan di insɛkt dɛn we gɛt fɛda ɛn de waka wit fo fut, una kin it dɛn wan dɛn we gɛt lɛg ɔp dɛn fut we dɛn kin tek jomp. 22Fɔ it ɛni kayn lokɔs, ɛni kayn krikit ɔ grasɔpa. 23Bɔt fɔ et ɔl di ɔda kayn insɛkt dɛn we gɛt fɛda ɛn de waka wit fo fut.
24I se if dɛn du dɛn tin ya, dɛn nɔ go klin na PAPA GƆD yay: ɛnibɔdi we tɔch di animal ɔ insɛkt in day wan nɔ go klin na PAPA GƆD yay te ivintɛm, 25ɛn if ɛnibɔdi tot ɛni pat pan dɛn day wan, i fɔ was in klos ɛn i nɔ go klin na PAPA GƆD yay te ivintɛm. 26Ɔl animal we in fut plit midul bɔt gɛt sus ɔ nɔ de cham ɔltɛm nɔ klin na PAPA GƆD yay; ɛnibɔdi we tɔch dɛn insɛf nɔ go klin na PAPA GƆD yay. 27Pan di animal dɛn we de waka wit fo fut, di wan dɛn we de put dɛn fo fut flat na grɔn nɔ klin na PAPA GƆD yay ɛn if pɔsin tɔch dɛn day wan, insɛf nɔ go klin na PAPA GƆD yay te ivintɛm, 28ɛn if pɔsin tot dɛn day wan, i fɔ was in klos, dɔn i nɔ go klin na PAPA GƆD yay te ivintɛm; dɛn nɔ klin na PAPA GƆD yay.
29Dɛn smɔl smɔl animal dɛn ya we de na wɔl nɔ klin na PAPA GƆD yay: wivul, arata, ɔl kayn kondo, 30os pikin, krɔkɔdayl we nɔ de na wata, ɛn di kɔmiɛl. 31Dɛn nɔ klin na PAPA GƆD yay ɛn ɛnibɔdi we tɔch dɛn we dɛn dɔn day nɔ go klin na PAPA GƆD yay te ivintɛm. 32Fɔ put ɛnitin wɛda na tin we dɛn mek wit bod ɔ pisis ɔ lɛda ɔ bag ɔ ɛnitin we dɛn de put tin insay fɔ yus, we di day wan fɔdɔm pan, na wata ɛn i nɔ go klin na PAPA GƆD yay te ivintɛm; dɔn i go klin na PAPA GƆD yay. 33Ɛn if ɛniwan fɔdɔm insay sɔntin we dɛn tek kle mek, ɔl wetin de insay de nɔ go klin na PAPA GƆD yay, na fɔ brok am. 34If i tɔch ɛnitin we na tin fɔ it we de na di wata we bin de insay di pɔt i nɔ go klin na PAPA GƆD yay; ɛni drink sɛf we fɔ drink bɔt we kɔmɔt na dɛn tin we dɛn mek wit bod, pisis, lɛda ɔ bag sɛf nɔ klin na PAPA GƆD yay. 35Ɛn ɔltin we ɛni pan dɛn day pat tɔch nɔ go klin na PAPA GƆD yay; i lɛk wetin dɛn tek mek am, na fɔ brok am pis pis; dɛn nɔ klin na PAPA GƆD yay ɛn dɛn nɔ go klin to ɛnibɔdi. 36Pan ɔl we di wɛl we dɛn dig fɔ kip wata go klin na PAPA GƆD yay, if day bɔdi fɔdɔm insay ɛn pɔsin tɔch di day bɔdi, i nɔ go klin na PAPA GƆD yay. 37Ɛn if di day wan fɔdɔm pan sid we na fɔ plant, ɛn dɛn plant am, i klin na PAPA GƆD yay. 38Bɔt if dɛn dɔn sok di sid na wata bifo di day bɔdi tɔch am, i nɔ klin na PAPA GƆD yay.
39If animal we pɔsin kin it ɔdinari wan day ɛnibɔdi we tɔch di day wan nɔ go klin na PAPA GƆD yay te ivintɛm, 40ɛn if pɔsin it pan di day wan, i fɔ was in klos ɛn i nɔ go klin na PAPA GƆD yay te ivintɛm; dɔn bak, di wan we tot di day bɔdi insɛf fɔ was in klos ɛn i nɔ go klin na PAPA GƆD yay te ivintɛm.
41Fɔ et dɛn ɔda tin dɛn ya; nɔ fɔ it dɛn. 42Ɛnitin we nain bɛlɛ i de tek waka, ɛnitin we de waka flat na grɔn wit fo fut, ɛnitin we gɛt bɔku fut ɛn ɔl dɛn tin dɛn kin waka na grɔn, nɔ fɔ it dɛn bikɔs dɛn na abɔmineshɔn. 43I se dɛn nɔ fɔ it dɛn kayn tin de we go mek i et dɛn; dɛn nɔ fɔ mek dɛn tin de ambɔg dɛn bikɔs dɛn nɔ go klin na PAPA GƆD yay. 44I se in na PAPA GƆD we na dɛn Gɔd. I se so dɛn fɔ de klin wan fɔ am ɛn tan lɛk am bikɔs in na oli Gɔd. I se dɛn nɔ fɔ tek dɛn tin dɛn we de krip na wɔl fɔ ambɔg dɛnsɛf. 45I se, in na PAPA GƆD we na di PAPA GƆD we pul dɛn kɔmɔt pan slev layf na Ijipt fɔ mek i bi dɛn PAPA GƆD so dɛn fɔ bi difrɛn frɔm ɔda pipul dɛn lɛk am.
46Na di lɔ dɛn dis bɔt dɛn animal, bɔd ɛn ɔltin we gɛt layf we de na wata ɛn ɔl dɛn smɔl smɔl tin we de pas pas na wɔl, 47so dat pɔsin go no uswan klin na PAPA GƆD yay ɛn uswan nɔ klin na PAPA GƆD yay, uswan fayn fɔ it ɛn uswan nɔ fayn fɔ it.
Currently Selected:
Lɛvitikɔs 11: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.