Lɛvitikɔs 14
14
Aw Fɔ Biev To Pɔsin We Bin Gɛt Bad Sik Na In Bɔdi
1PAPA GƆD tɛl Mozis se, 2na di lɔ dɛn dis we pɔsin we bin gɛt bad sik nain bɔdi fɔ du di de we di man we de mek sakrifays fɔ pipul sin tɔk se i klin na PAPA GƆD yay. Dɛn fɔ briŋ am kam to di man we de mek sakrifays fɔ pipul sin; 3ɛn di man we de mek sakrifays fɔ pipul sin go tek am kɔmɔt insay di kamp go na do fɔ go ɛgzamin am. Dɛn if di bad sik nain bɔdi dɔn wɛl, 4di man we de mek sakrifays fɔ pipul sin go tɛl sɔmbɔdi fɔ briŋ tu layf bɔd we PAPA GƆD se dɛn kin it, wit sida wud, dak rɛd pisis ɛn wan isɔp plant fɔ di man; 5di man we de mek sakrifays fɔ pipul sin go tɛl dɛn fɔ kil wan pan di bɔd dɛn oba bekin pɔt usay klin wata de bɔs na grɔn. 6I go tek di layf bɔd wit di sida wud, di dak rɛd pisis ɛn di isɔp, dɔk dɛn ɛn di layf bɔd insay di wan we dɛn bin kil usay klin wata de bɔs na grɔn; 7ɛn i go sprinkul am sɛvin tɛm pan di man we gɛt di bad sik; dɔn di man we de mek sakrifays fɔ pipul sin go lɛ ɔlman no se i klin na PAPA GƆD yay ɛn i go lɛf di layf bɔd fɔ flay go usay i want. 8Di man we bin gɛt di bad sik go was in klos dɛn, krep in ed ɛn was in bɔdi, dɔn i go klin na PAPA GƆD yay; ɛn na afta dat i go go insay di kamp, bɔt i go wet na do fɔ sɛvin de mɔ bifo i go insay in tɛnt. 9Afta di sɛvin de dɔn pas i go krep in ed bak, shev in biabia, ɛn pul ɔl di ia we de nain yay. Dɛn i go was in klos dɛn ɛn was in bɔdi bak bifo i klin prɔpa wan na PAPA GƆD yay.
10Di de we mek et, i go tek tu yɔŋ manship we nɔ gɛt bɔt, wan yɔŋ uman ship we nɔ gɛt bɔt ɛn fayv pawn flawa we miks wit ɔyl, fɔ sid ɔfrin ɛn af paynt ɔliv ɔyl. 11Ɛn di man we de mek sakrifays fɔ pipul sin go mek di man we bin gɛt di bad sik tinap wit ɔl in ɔfrin bifo PAPA GƆD na di tɛnt usay dɛn kin mit PAPA GƆD in domɔt. 12Ɛn di man we de mek sakrifays fɔ pipul sin go tek wan pan di yɔŋ man ship ɛn gi PAPA GƆD as sɔntin we i fɔ gi PAPA GƆD, wit di af paynt ɔliv ɔyl, ɛn wev dɛn as spɛshal prɛzɛnt to PAPA GƆD; 13ɛn i go kil di yɔŋ man ship na di sem ples usay dɛn bin dɔn kil di animal fɔ di sin ɔfrin ɛn di bɔn ɔfrin na di tɛnt in kɔmpawnd. Na di man we de mek sakrifays fɔ pipul sin we de dyuti, nain gɛt di ɔfrin we dɛn gi PAPA GƆD fɔseka wetin i fɔ sɔfa; i oli pas ɔltin. 14Di man we de mek sakrifays fɔ pipul sin go tek sɔm pan di blɔd frɔm di ɔfrin we na fɔseka wetin i fɔ sɔfa ɛn put am na di pɔsin in rayt yes kɔna, na di big fiŋa nain raytan ɛn na di big to nain rayt fut. 15Dɔn i go tek sɔm pan di ɔliv ɔyl ɛn put am nain yon lɛfan, 16dɔk di fiŋa we i de tek pɔynt nain raytan insay di ɔyl we de nain lɛfan ɛn sprinkul am bifo PAPA GƆD sɛvin tɛm. 17I put sɔm pan di ɔyl we lɛf nain an ɛn di blɔd pan di ɔfrin kɔna di pɔsin in rayt yes, ɛn nain big fiŋa nain raytan wit in big to nain rayt fut; 18dɔn i go rɔb di wan we lɛf nain an na di pɔsin in ed ɛn beg padin fɔ am bifo PAPA GƆD.
19Di man we de mek sakrifays fɔ pipul sin go gi di animal fɔ di sin ɔfrin so dat i go beg padin fɔ di man we wan klin na PAPA GƆD yay. Ɛn we i dɔn i go kil di wan fɔ di bɔn ɔfrin; 20dɛn di man we de mek sakrifays fɔ pipul sin go gi di bɔn ɔfrin ɛn di sid ɔfrin na di ɔlta. Na so di man we de mek sakrifays fɔ pipul sin go beg padin fɔ am ɛn i go klin na PAPA GƆD yay.
21I se if di pɔsin po ɛn nɔ mitɔp fɔ bay dɛn tin dɛn de, i fɔ kɛr wan yɔŋ man ship we na fɔseka wetin i fɔ sɔfa we i go wev as spɛshal prɛzɛnt fɔ beg PAPA GƆD fɔ am ɛn et kɔp fayn flawa miks wit ɔyl fɔ di sid ɔfrin wit af paynt ɔyl; 22dɔn igen tu bush pijin ɔ tu yɔŋ pijin, bay wetin i ebul bay; wan fɔ bi fɔ sin ɔfrin ɛn di ɔda wan fɔ bi fɔ di bɔn ɔfrin. 23Di de we mek et, i fɔ kɛr dɛn go to di man we de mek sakrifays fɔ pipul sin na di tɛnt usay dɛn kin mit PAPA GƆD in domɔt bifo PAPA GƆD; 24ɛn di man we de mek sakrifays fɔ pipul sin go tek di yɔŋ ship fɔ di ɔfrin we na fɔseka wetin go bi ɛn di ɔyl, wev am as wev ɔfrin we na spɛshal prɛzɛnt to PAPA GƆD. 25Ɛn i go kil di yɔŋ man ship we i gi fɔseka wetin i fɔ sɔfa; ɛn di man we de mek sakrifays fɔ sin we de dyuti go tek sɔm pan di ɔfrin we na fɔseka wetin pɔsin fɔ sɔfa in blɔd ɛn put am na di man in rayt yes kɔna, na di big fiŋa nain raytan ɛn na di big to nain rayt fut. 26Dɔn di man we de mek sakrifays fɔ pipul sin go tɔn sɔm pan di ɔliv ɔyl nain yon lɛfan; 27ɛn i go dɔk di fiŋa we i de tek pɔynt nain raytan insay di ɔyl we de nain lɛfan ɛn sprinkul am bifo PAPA GƆD sɛvin tɛm; 28dɔn i put sɔm pan di ɔyl we lɛf nain an na di pɔsin in rayt yes kɔna, ɛn nain big fiŋa nain raytan wit in big to nain rayt fut na di sem ples we i bin put di blɔd we kɔmɔt pan di ɔfrin we i gi fɔseka wetin fɔ bi; 29dɔn i go rɔb di wan we lɛf nain an na di pɔsin in ed ɛn beg padin fɔ am bifo PAPA GƆD. 30Na da tɛm de i go gi di tu bush pijin ɔ di tu yɔŋ pijin bay wetin i ebul bay, 31Wan pan dɛn fɔ di sin ɔfrin ɛn di ɔda wan fɔ di bɔn ɔfrin wit in sid ɔfrin; ɛn di man we de mek sakrifays fɔ pipul sin go beg padin to PAPA GƆD fɔ di man we wan klin na PAPA GƆD yay. 32Na di lɔ dis fɔ man we gɛt bad sik nain bɔdi we nɔ mitɔp fɔ bay di tin dɛn we fɔ tek mek ɔfrin lɛ i go klin.
Wetin Fɔ Du If Na Di Os Dɛn Gɛt Miliju
33PAPA GƆD tɛl Mozis ɛn Erɔn se, 34wɛn dɛn rich na di land we i de gi dɛn na Kenan we nain i de gi dɛn as dɛn prɔpati, we i mek di wɔl dɛn na di os dɛn miliju, 35dɛn di wan we gɛt di os fɔ tɛl di man we de mek sakrifays fɔ pipul sin se i tan lɛk in os dɔn miliju. 36Dɛn di man we de mek sakrifays fɔ pipul sin go gi ɔda mek dɛn ɛmti di os bifo i go ɛgzamin am, ɔ nɔ so na ɔl wetin de insay di os i go se nɔ klin na PAPA GƆD yay; bɔt afta dɛn dɔn ɛmti di os, i kin go insay de naw. 37I go ɛgzamin usay di miliju de, ɛn if di mak we i mek na di wɔl grin ɔ rɛd ɛn if i mek lɛk i mek ol na di wɔl, 38dɛn di man we de mek sakrifays fɔ pipul sin go kɔmɔt na di os ɛn lɔk am fɔ sɛvin de. 39I go go de bak di de we mek sɛvin fɔ ɛgzamin am bak; ɛn if i si se di ol we i bin mek na di wɔl dɔn big, 40dɛn i go gi ɔda mek dɛn brok di eria we di ol mek ɛn trowe am na do na di siti we dɛn mek fɔ de trowe dɛn kayn tin de; 41dɔn i go mek dɛn krep ɔl di simɛnt insay di os ɛn kɛr dɛnsɛf go put na di sem ples we na de dɛn kin trowe tin we nɔ klin na PAPA GƆD yay; 42ɛn i go mek dɛn put ɔda blɔk dɛn ɛn plasta di wɔl bak.
43If di os mek miliju bak afta dɛn bin dɔn brok di eria na di wɔl we gɛt di miliju ɛn krep di wɔl, 44dɛn di man we de mek sakrifays fɔ pipul sin fɔ ɛgzamin am bak, ɛn if i dɔn mek ɔda ol na di wɔl, dɛn, na miliju we nɔ fɔ ple wit, i dɔn mek di os nɔ klin na PAPA GƆD yay. 45Di man we gɛt di os fɔ brok di wanol os, di simɛnt, bod, plasta ɛn ɔltin; ɛn i fɔ kɛr ɔl go trowe na do na di siti usay dɛn kin trowe dɛn tin we nɔ klin na PAPA GƆD yay. 46Dɔn igen ɛnibɔdi we go insay di os da tɛm we di man we de mek sakrifays fɔ pipul sin bin se di os fɔ lɔk, nɔ go klin na PAPA GƆD yay te ivintɛm; 47dɔn igen if pɔsin lidɔm insay di os, i fɔ was in klos dɛn; ɛn pɔsin we it insay de, insɛf fɔ was in klos dɛn.
48Bɔt if we di man we de mek sakrifays fɔ pipul sin ɛgzamin di os bak, if i nɔ mek ɔda ol na di wɔl, dɛn di man we de mek sakrifays fɔ pipul sin fɔ lɛ ɔlman no se, di os klin na PAPA GƆD yay, di miliju dɔn dɔn. 49Fɔ mek di os klin na PAPA GƆD yay, di man we de mek sakrifays fɔ pipul sin fɔ gi tu smɔl bɔd wit sida wud, dak rɛd pisis ɛn wan isɔp plant fɔ di man we gɛt di os, 50ɛn i fɔ kil wan pan di bɔd dɛn oba kɔntri pɔt usay klin wata de bɔs na grɔn, 51ɛn i go tek di sida wud, di dak rɛd pisis ɛn di isɔp, wit di layf bɔd dɔk dɛn insay di wan we dɛn bin kil in blɔd, ɛn insay di klin wata we de bɔs na grɔn ɛn sprinkul am na di os sɛvin tɛm. 52Na so fɔ mek di os klin na PAPA GƆD yay wit di bɔd in blɔd, ɛn di klin wata we de bɔs na grɔn, ɛn wit di layf bɔd ɛn wit di sida wud, di dak rɛd pisis ɛn di isɔp; 53dɛn i go lɛf di layf bɔd fɔ flay go usay i want; na so di man we de mek sakrifays fɔ pipul sin go beg padin fɔ di os ɛn i go klin na PAPA GƆD yay. 54Na di lɔ dɛn dis fɔ ɛni kayn bad sik: fɔ lakpalakpa, 55fɔ miliju pan klos ɛn na os, 56fɔ ɔda kayn swɛl we di bɔdi kin swɛl ɔ mek mak. 57Na di lɔ dɛn dis we go mek pɔsin no if i klin ɔ i nɔ klin na PAPA GƆD yay.
Currently Selected:
Lɛvitikɔs 14: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.