Lɛvitikɔs 17
17
Wetin Fɔ Du Wit Di Blɔd Pan Sakrifays
1PAPA GƆD tɛl Mozis se, 2i fɔ tɛl Erɔn, in bɔypikin dɛn ɛn ɔl di Izrɛlayt dɛn wetin in, PAPA GƆD se dɛn fɔ du. 3Nɔn Izrɛlayt nɔ fɔ kil man kaw ɔ yɔŋ ship ɔ got ɛnisay na di kamp wɛda nainsay ɔ na do, 4pas i kɛr am go na di tɛnt usay dɛn kin mit PAPA GƆD in domɔt, ɛn gi PAPA GƆD de ɔ nɔ so dɛn go se di pɔsin dɔn kil ɛn i nɔ go miks wit di ɔda Izrɛlayt dɛn igen 5I se dis lɔ na fɔ mek di Izrɛlayt dɛn no se naw, dɛn fɔ nɔ kɛr dɛn animal we dɛn kin kil ɛni ɔda say, pas to PAPA GƆD, dat na to di man we de mek sakrifays fɔ pipul sin na di tɛnt usay dɛn kin mit PAPA GƆD in domɔt, ɛn kil am de as pis sakrifays to PAPA GƆD; 6ɛn di man we de mek sakrifays fɔ pipul sin go sprinkul di blɔd na PAPA GƆD in ɔlta we de na di tɛnt usay dɛn kin mit PAPA GƆD, in domɔt de, ɛn bɔn di fat so dat i go pul fayn sɛnt we go mek PAPA GƆD gladi. 7I se dat fɔ mek dɛn lɛf fɔ mek sakrifays to ɔda gɔd dɛn, lɛk dɛn got-dɛbul we de mek lɛ dɛn biev to am lɛk rare gyal. I se dis fɔ bi lɔ na ɔl di jɛnareshɔn sote go.
8I se Mozis fɔ tɛl dɛn bak se, ɛni Izrɛlayt ɔ fɔrina we tap wit dɛn, we mek bɔn ɔfrin ɔ bɔn sakrifays, 9ɛn nɔ kɛr am go na di tɛnt usay dɛn kin mit PAPA GƆD in domɔt, fɔ sakrifays am to PAPA GƆD, nɔ fɔ miks wit di ɔda Izrɛlayt dɛn igen
10I se if ɛni Izrɛlayt ɔ fɔrina we tap wit dɛn it ɛnitin we gɛt blɔd, PAPA GƆD go dison da pɔsin de ɛn i nɔ go mek i miks wit in di Izrɛlayt dɛn igen 11PAPA GƆD se na di blɔd di layf de; ɛn in dɔn gi dɛn fɔ put na di ɔlta fɔ pul sin na dɛn sol. Na di blɔd de beg fɔ dɛn bikɔs i gɛt layf. 12Na dat mek PAPA GƆD se ɛni Izrɛlayt ɔ fɔrina we tap wit dɛn nɔ fɔ it ɛnitin we gɛt blɔd.
13I se ɛni Izrɛlayt ɔ fɔrina we tap wit dɛn we de go ɔntin ɔ kech bɔd fɔ it, fɔ dig ol, put di blɔd afta i dɔn kil di animal ɔ bɔd, ɛn kɔba am wit dɔti. 14Bikɔs we blɔd de pan ɛnitin dat min se i gɛt layf, na dat mek PAPA GƆD se nɔ fɔ it ɛnitin we gɛt blɔd, as na we ɛnitin gɛt blɔd yu go se i gɛt layf; if pɔsin it blɔd i nɔ go miks wit ɔda pipul igen
15Ɛnibɔdi we it bif we day fɔ insɛf ɔ we wayl bist kil, wɛda na Izrɛlayt ɔ na fɔrina, fɔ was in klos, was insɛf ɛn nɔ klin na PAPA GƆD yay te ivintɛm, bifo i go klin na PAPA GƆD yay. 16Bɔt if i nɔ was in klos ɛn was insɛf, i go bia wetin go bi to am.
Currently Selected:
Lɛvitikɔs 17: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.