Lɛvitikɔs 6
6
1PAPA GƆD tɛl Mozis se, 2sɔpoz pɔsin sin bɔt nɔto bay wilful, bay we i ple rikishi pan in kɔmpin, we gi am sɔntin fɔ kip, dɔn i tif in kɔmpin we mek in kɔmpin vɛks; 3ɔ sɔpoz i fɛn am bɔt lay ɛn ivin swɛ se i nɔ gɛt am, ɔ ɛni ɔda sityueshɔn lɛk dis, 4wɛn i no bɔt di sin, i fɔ gi in kɔmpin wetin i tif ɔ ple rikishi fɔ gɛt, wetin in kɛmpin bin se i lɔs we in fɛn, 5ɔ ɛnitin we i bin dɔn swɛ se i nɔ gɛt, i fɔ ad twɛnti pasɛnt pantap wetin i fɔ gi wɛn i de gi in ɔfrin we i fɔ gi fɔ mek i nɔ sɔfa. 6I fɔ kɛr di man ship we nɔ gɛt bɔt, we i fɔ gi PAPA GƆD fɔ di sɔfa we i fɔ sɔfa go to di man we de mek sakrifays fɔ pipul sin. Da ɔfrin de fɔ gɛt di valyu we ɔfrin we de mek yu nɔ sɔfa gɛt. 7Di man we de mek sakrifays fɔ pipul sin go beg PAPA GƆD padin fɔ am ɛn PAPA GƆD go fɔgiv am fɔ di sin dɛn we i kɔmit.
Wetin Di Man Dɛn We De Mek Sakrifays Fɔ Pipul Sin Fɔ Du We Dɛn De Mek Bɔn Sakrifays Wan Ol Wan.
8PAPA GƆD tɛl Mozis se, 9mek i tɛl Erɔn ɛn in bɔypikin dɛn wetin i se fɔ bi we dɛn de mek bɔn sakrifays. I se di bɔn sakrifays fɔ de na di faya ples na di ɔlta ol nɛt te do klin, ɛn di faya na di ɔlta fɔ de kech. 10Di nɛks de, di man we de mek sakrifays fɔ pipul sin, go wɛr in linin klos wit in lɔŋfut drɔz, gɛda di ashis we kɔmɔt na di faya we bin de ɔnda di bɔn sakrifays na di ɔlta, ɛn put am kɔna say na di ɔlta. 11We i dɔn, i go pul dɛn klos de ɛn wɛr ɔda klos we nain i go wɛr naw fɔ pul di ashis kɔmɔt na di kamp go na klin ples we dɛn dɔn mak. 12Di faya we de na di ɔlta go stil de bɔn, i nɔ fɔ ɛva ɔt; di man we de mek sakrifays fɔ pipul sin fɔ de put wud na di faya ɛvri mɔnin ɛn le di bɔn ɔfrin aw i fɔ de pantap ɛn i go bɔn di fat fɔ di pis ɔfrin sɛf pan am. 13Di faya fɔ de kech ɔltɛm; i nɔ fɔ ɔt.
Wetin PAPA GƆD Want Fɔ Sid Ɔfrin
14Na di lɔ dis fɔ sid ɔfrin: Wan pan Erɔn in bɔypikin dɛn fɔ kɛr am go to PAPA GƆD bifo di ɔlta. 15I go gi wan an pan di fayn flawa we de wit di sid ɔfrin wit di ɔyl ɛn ɔl di insɛns we de pan di sid ɔfrin ɛn bɔn am as di tin we fɔ sho se in na PAPA GƆD yon na di ɔlta so dat i go pul fayn sɛnt we go mek PAPA GƆD gladi. 16Erɔn ɛn in bɔypikin dɛn go it di wan we lɛf; i nɔ fɔ gɛt yist ɛn dɛn fɔ it am na ples we oli dat na di kɔmpawnd we de na di tɛnt usay dɛn kin mit PAPA GƆD. 17Nɔ fɔ put yist pan am we dɛn de bek am. PAPA GƆD se nain i dɔn gi dɛn fɔ dɛn yon pan di ɔfrin dɛn we dɛn de mek na faya; na dɛn oli pas di ɔda tin dɛn. Dɛn tan lɛk di sin ɔfrin ɛn di ɔfrin we dɛn de mek fɔseka wetin dɛn fɔ sɔfa. 18Ɔl di man pikin dɛn na Erɔn in fambul layn kin it pan am, dat na pan di ɔfrin we dɛn mek to PAPA GƆD na faya ɛn na so i fɔ bi na ɔl di jɛnareshɔn dɛn; ɛni ɔda pɔsin we tɔch dɛn go sɔfa fɔ dat#6:18 Na ya so di baybul se di pɔsin go oli. Dat min se sɔntin bad go bi to am.
19PAPA GƆD tɛl Mozis se, 20na di ɔfrin dis we Erɔn ɛn in bɔypikin dɛn fɔ gi PAPA GƆD di de we dɛn pre pan ɛniwan: et kɔp fayn flawa fɔ bi di wan we i de gi ɔltɛm fɔ in sid ɔfrin. I fɔ gi af na mɔnin ɛn af ivintɛm. 21I fɔ miks am wit ɔyl ɛn bek am na pɔt, jɛs lɛk aw dɛn de mek sid ɔfrin ɛn gi PAPA GƆD so dat i go pul fayn sɛnt we go mek i gladi. 22Di pɔsin we dɛn dɔn pre pan se nain fɔ de afta am, go ɔfa am to PAPA GƆD lɛkɛ aw dɛn bin dɔn se fɔ bi; na wanol wan fɔ bɔn am. 23Ɛni sid ɔfrin we di man we de mek sakrifays fɔ pipul sin de mek, fɔ bɔn ɔltin. Nɔ fɔ it am.
Ɔda Tin Dɛn We Fɔ Du We Noto Bay Wilful Yu Sin.
24PAPA GƆD tɛl Mozis se, 25i fɔ tɛl Erɔn ɛn in bɔypikin dɛn wetin dɛn fɔ du we dɛn de mek sin ɔfrin. Na di ples we dɛn kin kil di animal fɔ di bɔn sakrifays, na de dɔn fɔ kil di wan fɔ sin ɔfrin insɛf, frɔnt PAPA GƆD; nain oli pas ɔltin. 26Di man we de mek sakrifays fɔ pipul sin we mek da sakrifays de fɔ it am, ɛn na di oli ples i go it am we nainsay di tɛnt usay dɛn kin mit PAPA GƆD in kɔmpawnd. 27Ɛnibɔdi ɔ ɛnitin we tɔch am go sɔfa fɔ dat;#6:27 Sɔfa fɔ dat Na di sem tin we dɛn tɔk na 6:18. ɛn if blɔd go pan di klos we i wɛr, fɔ was di klos we di blɔd go pan, na di tɛnt in kɔmpawnd. 28Fɔ brok di kɔntri pɔt sɛf we dɛn bwɛl am; bɔt if na ayɛn pɔt dɛn bwɛl am, na fɔ krɔb am ɛn rench am wit wata. 29Ɔl di man dɛn na Erɔn in fambul layn fɔ it pan am, nain oli pas ɔltin. 30Bɔt if dɛn kɛr di blɔd go insay di tɛnt usay dɛn kin mit PAPA GƆD so dat dɛn kin beg padin na di ples we oli, nɔ fɔ it pan am; na bɔn dɛn fɔ bɔn dɛn na faya.
Currently Selected:
Lɛvitikɔs 6: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.