Luku 11

Yisɔs thanani ba kuraminɛ

(Mathiyu 6:9-13; 7:7-11)

1Lɔkɔ banthe, Yisɔs kɔŋ nde ni kuraminɛ ka tha banthe. Naa thanki wundɛ niya kuraminɛ, wunthe ka bakarandeni nama beŋ tepe kɛnama, na “Mariki, thaninuwa mina na na niye kuraminɛ nɔŋ na thanani Yɔni bakarandeni nama beŋ na.”

2Huna tepe Yisɔs, na “Naa beŋ kɔ ni kuraminɛ, tɛpaŋ, na

‘Fanda ntuŋ woŋ,

haliko biya niya yiki keŋ nda koŋ.

Haliko malɔkɔ ma saa ma Hugbakine

nda haŋ maŋ keriŋe.

3Nkaa mina timo tima muthɔŋ ntuŋ.

4Pɛniyɛ mina hakɛŋ bikɛntuŋ

baa miŋ pɛniyɛ wɔ yo wɔ wo mina ni wunɛnɔy.

Ba mina kati ka miŋ ka gbɛriŋinuwo.’”

5Kɛna tepe Yisɔs ka bakarandeni nama beŋ, na “Mbu na wuŋ niyɔy na wunthe ka beŋ key ka banka ba ka nyathiki nama huyɛ teete, e niŋ ka tepe, na ‘Nyathiki, mase yama ba muthɔma. 6Ntɔŋ wo key biyasi na pɛnkɛ yama huyɛ baŋ baŋ ka banka niŋ ka, awa yaŋ ka iŋ muthɔma kɛndɛ’? 7Nyathiki nda mɛyi kaake ba dɔma, na ‘Ba yama ni thɔrɔ. Yaŋ lɔŋ nda biyo haŋ, awa yaŋ ŋɔyɛ nda iŋ mpatiŋ. Yaŋ sa nda punku ŋayi ba yina dunkune ntha o ntha.’ 8Mbɛ mu nda niyɔ? Hali na niyɔy wuŋ na na wundɛ tha ŋayi e yina dunkune muthɔma mu yawe yi muŋ na na wundɛ nyathiki nda, kɛrɛ saathɛ ba kunapi kukɛnda koŋ, yɔkɔŋ nthɔŋ wundɛ be ŋayi e yina dunkune mu thimo yi muŋ. 9Huna yaŋ tepe bena: Thɔnthiŋinaŋ; beŋ kɔŋ dunkuno. Deethuwaŋ; beŋ koŋ kutu. Gbɛdiŋaŋ; awa beŋ kɔŋ pɛthiya iŋ Masaala. 10Baa wɔ yo wɔ wo thɔnthɔŋɔŋ, ndɛ kɔŋ dunkuno ntha; wɔ yo wɔ wo deethi, wundɛ kɔŋ kutu; wɔ yo wɔ wo gbɛdɛŋ, wundɛ kɔŋ pɛthiya. 11Mbɛ komisa wobɛina ka mateete makendeŋ wo, mɛnɛ hati nda thɔnthɔŋɔŋ yina ba he, saanuŋ yi ba niŋ dunkune he, adunkune niŋ wokɛkɛŋ? 12Maa mɛnɛ wundɛ thɔnthɔŋɔŋ ba heeli, e yi kɔŋ niŋ dunkune thokoŋa? 13Mɛnɛ beŋ, bendo nɛnɔy beŋ beŋ, thɔyiŋ ba dunkuna munki muyɔhɔy ka mpati bikendeŋ, mbu ntiŋ nda Fanda ndeŋ woŋ ka ariana? E wundɛ sa dunkuŋ Yina Wokɛnama woŋ ka bi niŋ thɔnthɔŋɔŋ beŋ?”

Yisɔs tepiyo ba dɔma na wo kanthe mbayiŋ ka sɛmbɛ ba ka gbaku wo ka mbayiŋ beŋ baŋ

(Mathiyu 12:22-30; Maki 3:20-27)

14Lɔkɔ banthe Yisɔs kanthe wayi wo thiyɛ hati lamgba wunthe hubobo. Naa fuŋ wayi woŋ, babobo woŋ dunkunɔkɔy, awa biya beŋ ni kukabanɛ wumandiŋ. 15Kɛrɛ binɔndi tepe, na “Wundɛ kɔŋ kanthe mbayiŋ binɛnɔy beŋ ka sɛmbɛ ba ka Beelesibuli, gbaku wo ka mbayiŋ beŋ woŋ.”#Math 9:34; 10:25

16Binɔndi niŋ kɔ yɔla ba gbɛriŋinuwa ka thɔnthiŋina niŋ ba wundɛ be ni bɛyiniŋ bathakaba ba tɔŋɔŋ ba dɔma na Masaala na ŋindɛ niŋ.#Math 12:38; 16:1; Maki 8:11 17Kɛrɛ Yisɔs, naa kɔthɛ wundɛ masimɔkɔ makɛnamɛŋ maŋ, wundɛ tepe, na “Mɛnɛ hugbakine hakande e huŋ kɔ dekiyande, hu kɔŋ teetuwɔ; awa mɛnɛ mpoo hakande e kɔŋ kɔ dekiyande, ki kɔŋ teetuwɔ. 18Beŋ tepe na yando kanthe mbayiŋ ka sɛmbɛ ba ka gbaku wo ka mbayiŋ beŋ woŋ. Kɛrɛ yaŋ be hɛ bena thɔnthɔŋɔŋ, mɛnɛ biya bi ka hugbakine hu ka Sithani haŋ hakande e bindɛ ka dekiyande, nama huŋ kooye? 19Mɛnɛ yaŋ kɔŋ kanthe mbayiŋ ka sɛmbɛ ba ka gbaku wo ka mbayiŋ beŋ baŋ, mbu mbɛ sɛmbɛ ba bakarandeni bikendeŋ beŋ kanthe mbayiŋ? Bakarandeni bikendeŋ beŋ gbeeŋ, bindɛ bina bena kɔnsɔŋɔŋ. 20Kɛrɛ mɛnɛ wu kɔŋ nɛnɛ ba dɔma na ka sɛmbɛ ba ka Masaala baŋ na yaŋ wuŋ niye, wuŋ tɔŋɔŋ nagberekethe ba dɔma na Hugbakine hu ka Masaala haŋ thuriye bena.

21“Mɛnɛ wɔ kahɛ wo iŋ mudekiye mukɛnama kɔɔyɛ e kɔ pama banka bakɛnama baŋ, munki mukɛnama muŋ mu kɔŋ mupankɔy bɛyi. 22Kɛrɛ mɛnɛ wɔ yamɛ kahuwa ba wundɛ see niŋ ŋote e niŋ punka, wundɛ kɔŋ kanati niŋ mudekiye nama muŋ mu dekinteke wundɛ muŋ. Wundɛ kɔŋ sɛkɛthi munki mu tuwe wundɛ muŋ e hanuwa muŋ bi yemɛ niŋ beŋ.

23“Wɔ yo wɔ wo ka ba yaŋ, wundɛ kooyeŋ ba yama dekiya yaathi.#Maki 9:40 Wɔ yo wɔ wo sa yama mase kɔminande haŋ, yaathi pankitinuwande huna wundɛ pankitinuwande.

Duwa hu ka wayi wonɛnɔy woŋ haŋ

(Mathiyu 12:43-45)

24“Naa wayi wonɛnɔy fuŋ ka wɔmɛti, wundɛ kɔŋ key kaŋ tharɔkɔ ka wulani ka ba kaa kaŋ deethuwa mahemuwe. Mɛnɛ wundɛ tha kutu, wundɛ kɔŋ tɛpi, na ‘Yaŋ kɔŋ duu ka banka ba ka ŋaye nde yaŋ ka baŋ.’ 25Mɛnɛ wundɛ see, wundɛ kɔŋ bɛŋ pɛnki bapithinuwɔy natharaŋ, bakosinoko wuyɔhɔy. 26Wundɛ kɔŋ fuŋ, e wundɛ ka diŋa mbayiŋ bisɔŋ-biye bihɛna bi yamɛ nɛnɔ ba wundɛ. Bindɛ fooma bi kɔŋ si biyande, e bindɛ kɛndɛ dɔŋɔ, awa makooye ma ka wɔ bɛina mɛ kɔŋ nda si yaŋ nɛnɔ daŋande na nde wundɛ mayoŋ na.”

Mayehitɔkɔ magbeeŋ maŋ

27Naa thanki nthɔŋ wundɛ huŋ gbonkiya, wɔ yɛrɛmɛ yele thampa mateete ka sɛthɛ baŋ e tepe niŋ, na “Mayehitɔkɔ ma kɔŋ ka wɔ yɛrɛmɛ wo mpɛɛ yina woŋ e bɔpina yina!”

28Kɛrɛ Yisɔs tepe, na “Mayehitɔkɔ ma yameŋ niyɔ ka biya bi yuyɛ thampɛŋ tha ka Masaala thaŋ beŋ e bindɛ thɛŋ bɔha.”

Biya beŋ thɔnthɔŋɔŋ ba toŋino bɛyiniŋ bathakaba

(Mathiyu 12:38-42)

29Naa yame sɛthɛ baŋ kɔ ndintɔ, Yisɔs tepe, na “Biya bi ka yamana bahɛ baŋ beŋ anɛnɔ; bi kɔŋ deethi bɛyi bathakaba ba tɔŋɔŋ ba dɔma na Masaala na iŋ yaŋ,#Math 16:4; Maki 8:12 kɛrɛ bɛyi yo bɛyi bathakaba ka nda ba bindɛ Masaala dunkune daŋandeŋ bɛyi bathakaba ba niyɔy nde ka banabi woŋ Yona baŋ. 30Baa, nɔŋ na see nde nthɔŋ Yona niyɔ bɛyi bathakaba na ba biya bi ka Niniba,#Yona 3:4 nɛna hɛlɛŋ Hati ka Wɔ woŋ si niyɔ bɛyi bathakaba ba biya bi ka lɔkɔ bakɔɔyɛ baŋ baŋ. 31Gbaku woyɛrɛmɛ wo ka kuyɛkɛŋ ku ka Siba woŋ kɔŋ nɔŋ ŋayi ka lɔkɔ ba ka kɔnsɔŋ koŋ ba thonkine biya bi ka lɔkɔ bakɔɔyɛ baŋ baŋ, baa wundɛ ŋaye nde napooŋ ka mapeye ma ka dunia baŋ ba si yuyɛ kele hu ka Silamani haŋ.#1 Gb 10:1-10; 2 Mbɔ 9:1-12 Kumaŋ ntiŋ ntha ki yamɛ bukuya ba Silamani ki kɔŋ dondo. 32Biya bi ka Niniba bi kɔŋ nɔŋ ŋayi ka lɔkɔ ba ka kɔnsɔŋ koŋ baŋ iŋ biya bi ka lɔkɔ bahɛ baŋ beŋ e thonkine bena, babiyɛ bindɛ sikɔŋ nde sɔkɔrɔ hakɛŋ namɛŋ baŋ naa ni Yona bindɛ kɛwandi.#Yona 3:5 Kumaŋ ntiŋ ntha ki yamɛ bukuya ba Yona ki kɔŋ dondo.”

Mumɔɔli mu ka kɔtɔ koŋ muŋ

(Mathiyu 5:15; 6:22-23)

33“Wɔ ka wo mɔɔli mumɔɔli ba muŋ nununa, maa ba muŋ pututa ntha. Kɛrɛ ba muŋ tuta ka thinthi,#Math 5:15; Maki 4:21; Luku 8:16 ba haliko biya beŋ fooma bi biyande ka banka baŋ bi be kutu waŋ babɛina. 34Thaaya thakɛnda thaŋ tha kɔŋ nɔŋ mumɔɔli ba kɔtɔ koŋ. Mɛnɛ thaaya thakɛnda thaŋ tha kɔŋ thayɔhɔy, kɔtɔ kukɛnda koŋ fooma ku kɔŋ kuthiŋɛ iŋ waŋ. Kɛrɛ mɛnɛ thaaya nda thaŋ yeheta, kɔtɔ kukɛnda koŋ fooma ku kɔŋ thiŋa iŋ huntuma. 35Dekiyɔkɔ ba kɔthɔ ba dɔma na waŋ ba iŋ yi baŋ huntuma kutɛ. 36Mɛnɛ kɔtɔ kukɛnda koŋ fooma ku kɔŋ kuthiŋɛ napɛ iŋ waŋ, huntuma topeta kɛndɛ; ku kɔŋ niyɔ nagberekethe fooma nɔŋ mumɔɔli muna yina bende.”

Yisɔs thonkine biFaresini beŋ iŋ karimɔkɔiŋ bi ka Siraŋ baŋ beŋ

(Mathiyu 23:1-36; Maki 12:38-40)

37Naa thanki Yisɔs gbonkiya, woFaresi wunthe thiyi niŋ ba kaa ka thɔma iŋ wundɛ. 38Wuŋ niyɔy woFaresi woŋ thɛrɛnaŋ ba na tha Yisɔs yenke looka thɛnkɔ nɔŋ na naamu namɛŋ woŋ na saanuŋ ba thɔma. 39Huna tepe Mariki woŋ, na “Beŋ, bendo biFaresini beŋ, beŋ kɔŋ looki kɔɔpu haŋ iŋ panɛ haŋ kahɛŋ. Kɛrɛ kaake, bendo thiŋɛ iŋ ŋatuwaŋ mɛnɛ banɛnɔy ka thathukuma. 40Bendo mayɛini beŋ beŋ. E wo yehinuwɛ kahɛŋ woŋ kutɛ yehinuwɛ hɛlɛŋ thathukuma ndeŋ thaŋ? 41Dunkunaŋ munki mu ka thathukuma ndeŋ thaŋ munkii mu ka nkinikiniŋ ka bamɔnɛŋ beŋ. Ka lɔkɔ babɛina ntha o ntha ki kɔŋ niyɔ kimɛthɛ ba beŋ.

42“Kɛrɛ nambara bɛ kɔŋ see ba beŋ, bendo biFaresini beŋ, baa beŋ kɔŋ dunkuŋ wu tɛŋɛŋ kɔhi wuŋ naa beŋ kɔ thubututu muthuuni mu yamɛ nthɔŋ nda thahuwɔ muŋ fooma ŋaye ka thasayo ndeŋ thaŋ,#Lɛb 27:30 kɛrɛ beŋ pɛyɛŋ mathumbɛ iŋ ba tɔŋina mathimo ka Masaala. Wuŋ, beŋ kɔŋ ba wuŋ niya ka nanthe iŋ bɛyiniŋ baŋ baŋ fooma.

43“Nambara bɛ kɔŋ see ba beŋ, bendo biFaresini beŋ, baa beŋ athimo ba deŋo ka madoŋeŋ mayɔhɔy maŋ nthɔŋ nda fooma ka bankɛŋ bathuŋuyande baŋ iŋ ba niyo yiki ka maano naa beŋ kɔ daŋande ka thani ka gbɔni baŋ niyo ka. 44Nambara ba beŋ, baa beŋ athɔyande nɔŋ thayoma tha sa kuta kaake; biya bi kɔŋ kaande thɛŋ ka thinthi, kɛrɛ bindɛ kuita nɔŋ na neniye thɛŋ kaake.”

45Wɔ wunthe ka karimɔkɔiŋ bi ka Siraŋ baŋ beŋ tepe, na “Karimɔkɔ, naa gbonkiye yi nanaŋ na, yi gbonkiye mina kɛnsɛma.”

46Huna tepe Yisɔs, na “Nambara ba beŋ, bendo karimɔkɔiŋ bi ka Siraŋ baŋ beŋ, baa beŋ kɔŋ tutuŋ biya doniŋ badimbɔy-dimbɔy, kɛrɛ beŋ ka yɛthɛ bakendeŋ, beŋ sa hintiŋ nthɔŋ bɛŋ tɔpɔŋ kuthenke kunthe ba bindɛ mase ba bɛŋ kata. 47Nambara ba beŋ, baa beŋ thoyite thayoma tha ka banabiŋ bi kore nde mbembɛŋ ndeŋ kɔŋ beŋ. 48Awa beŋ, beŋ see nda tɔŋɔŋ nagberekethe ba dɔma na beŋ yɛrɔkɔy wali ba ni nde mbembɛŋ ndeŋ kɔŋ baŋ; baa bindɛ kore nde banabiŋ beŋ, awa beŋ, beŋ see thoyiti thayoma namɛŋ thaŋ. 49Ba kolo baŋ baŋ, kele hu ka Masaala haŋ tepe, na ‘Yaŋ kɔŋ bindɛ tɔŋɔti banabiŋ iŋ baseriŋ; bi kɔŋ kɔri binɔndi e gbasiŋita binɔndi.’ 50Huna biya bi ka dunia bahɛ baŋ beŋ, bi kɔŋ gbasiŋita ba koruwo hu koruwo nde banabiŋ beŋ haŋ there nthɔŋ na thɛri dunia baŋ. 51There nthɔŋ nda ka koro hu ka Ebɛli#Mthr 4:8 haŋ iŋ hu ka Sɛkaraiya,#2 Mbɔ 24:20-21 wo koro nde mateete ma ka banka ba ka Masaala baŋ mɛnɛ bɛsɛ baŋ ka saraka baŋ fuŋuno kɛ. Yaathi, biya bi ka dunia bahɛ baŋ beŋ, bi kɔŋ nɔŋ gbasiŋita ba bi koro nde beŋ beŋ.

52“Nambara ba beŋ, bendo karimɔkɔiŋ bi ka Siraŋ baŋ beŋ, beŋ kosineŋ masaapa ma pɛthɛ biyo hu ka kele haŋ maŋ, kɛrɛ beŋ, beŋ biyandeta kaake, e beŋ ntiŋ kɔ pinda bi yɔli ba biyande kaake beŋ.”

53-54Naa ŋaye kɛndɛ Yisɔs, karimɔkɔiŋ bi ka Siraŋ baŋ beŋ iŋ biFaresini beŋ thɛrɛŋ ba niŋ sɔkinɔkɔ wusɔbɛ-sɔbɛ e kɔ thɔnthiŋinuwa niŋ ŋathɔnthɔŋɔŋ ŋabɔyɛ e nda niŋ kɛntha ba niŋ bɔha ka Siraŋ mɛnɛ wundɛ kɔŋ piriŋinɔ ka gbonkiya.

Currently Selected:

Luku 11: LMBNT

Highlight

Copy