Luku 15
15
Taka wopiriŋɛ woŋ
(Mathiyu 18:12-14)
1Lɔkɔ banthe bathuuni duthu woŋ beŋ iŋ biya bi simeke bayahɛŋ bi ka dina wo ka biYusu beŋ woŋ ba bindɛ niyɔ bahakɛŋ thuriye Yisɔs na ba niŋ poniyɛ kuiha. 2Kɛna bohe biFaresini beŋ iŋ karimɔkɔiŋ bi ka Siraŋ baŋ beŋ gbonkiyɔkɔ e kɔ tɛpa, na “Hati lamgba woŋ baŋ ayɛrɔkɔ bahakɛŋ beŋ e ka thɔma iŋ bindɛ.”#Luku 5:29-30 3Kɛna tepe Yisɔs bindɛ mbɔrɔ kɔŋ kɔŋ:
4na “Mbu na wuŋ niyɔy naa wɔ wunthe ka mateete makendeŋ kɔŋ iŋ takɛŋ kɛmɛ wunthe, e wunthe niŋ kɛndɛ si piriŋe? Nama wundɛ ni? Wundɛ kɔŋ pɛyɛŋ bikɔnthɔ kasɔŋ-kanaŋ beŋ iŋ bisɔŋ-binaŋ beŋ bi si thɛri ka wula ka, e kaa kaŋ deethuwa wunthe wo piriŋe niŋ woŋ haaŋ ndɛ niŋ kuta. 5Awa naa wundɛ kute niŋ, wundɛ kɔŋ niŋ yinthɔkɔ iŋ mayehitɔkɔ mamandiŋ. 6Naa wundɛ tɛŋ ka banka nama ka, wundɛ kɔŋ thiyi binyathikɔŋ nama iŋ biya bi thuriyande wundɛ beŋ fooma. Wundɛ kɔŋ bindɛ tepe, na ‘Nyehitɔkɔŋ, baa yaŋ kute taka niŋ wo piriŋe nɔŋ yama woŋ.’ 7Yaŋ tepe bena, mayehitɔkɔ ma yamɛ mɛ kɔŋ niyɔ ka ariana ba bahakɛ wunthe wo sikinɛ sɔkɔrɔ hakɛŋ nama baŋ ayaŋ ba bikɔnthɔ kasɔŋ-kanaŋ iŋ bisɔŋ-binaŋ bithumbɛ bi ka nda ba sikina sɔkɔrɔ hakɛŋ namɛŋ baŋ.
Kɔbiri wopiriŋɛ woŋ
8“Mbu na wuŋ niyɔy naa wɔ yɛrɛmɛ kɔŋ iŋ kɔbiri wo siliniŋ kɔhi nagbɛti, e siliŋ wunthe kɛndɛ piriŋa? Nama wundɛ ni? Wundɛ kɔŋ mɔɔli mumɔɔli e pithinuwa banka baŋ fooma e deethuwa kuthɛgbɛ haaŋ ndɛ niŋ kuta. 9Naa wundɛ kute niŋ, wundɛ kɔŋ thiyi binyathikɔŋ nama beŋ iŋ bithuriyuwande wundɛ beŋ ka tha banthe e tepe bindɛ, na ‘Yaŋ kɔŋ iŋ mayehitɔkɔ, baa yaŋ kute kɔbiri niŋ wo piriŋe yama woŋ. Miŋ yehitɔkɔyŋ ka tha banthe!’ 10Yaŋ tepe bena, nɛna hɛlɛŋ wuŋ niyɔ ka malekɛŋ bi ka Masaala beŋ. Bi kɔŋ yehitɔkɔ wumandiŋ ba bahakɛ wunthe wo sikinɛ sɔkɔrɔ hakɛŋ nama baŋ.”
Hati wowathe wopiriŋɛ woŋ
11Huna tepe wundɛ hɛlɛŋ, na “Wɔ wunthe kɔŋ nde wo iŋ mpati biye bibiyɛthɛŋ. 12Wohatiyɛ woŋ tepe ka fandama, na ‘Papaŋ, haninande mina kɛɛ bakɛnda baŋ e yama yi dunkune kufɛŋ ku yaŋ ba kuta.’ Fandamɛŋ hakinande bindɛ kɛɛ baŋ. 13Naa sɛsi wuŋ hurukuta, wohatiyɛ woŋ sekithe kɛɛ bakɛnama baŋ. Wundɛ fuŋutɔkɔy iŋ kɔbiri woŋ. Wundɛ key ka kuyɛkɛŋ kuthokiye napooŋ. Wundɛ key thanki teetuwa kɔbiri nama woŋ ka maniyɔ manɛnɔy. 14Wundɛ teeti ntha yo ntha ki iŋ wundɛ. Kɛna see kɔnthɔ kumandiŋ ŋɔti ka kuyɛkɛŋ kubɛyna. Wundɛ nda, ntha yo ntha ka nda iŋ wundɛ. 15Kɛna key wundɛ thɔnthɔŋɔŋ lasiri wunthe ba dunkuno wali. Lasiri woŋ baŋ toŋite niŋ ka dumgbu ba ka kɔsɛŋ beŋ ba kaa ka thɛriyɛ kɔsɛŋ nama beŋ. 16Wundɛ kaho kɔnthɔ haaŋ e wundɛ nda niyɔ kufiyo ba thɔma muthɔma mu ka kɔsɛŋ beŋ muŋ, kɛrɛ wɔ ka wo niŋ nkii muthɔma. 17Ka wumankɛ nda nagbɔŋ thukuma nama haŋ see ntiŋ duu, huna tepe ndɛ, na ‘Fooma bawaliŋ bigbako beŋ iŋ papaŋ athɔŋ e bindɛ pɛyɛta, kɛrɛ yaŋ yama see ka tuka dondo woŋ iŋ kɔnthɔ. 18Yaŋ kɔŋ ŋayi dondo. Yaŋ kɔŋ duu ka fandaŋ ka. Yaŋ kɔŋ niŋ ka tepe, na “Papaŋ, yaŋ thanki niya hakɛ ba sɔkinɔkɔ Masaala na mɛnɛ ba yina sɔkinɔkɔ. 19Yaŋ ka nda yando tɛŋɛ ba domo na hati nda, kɛrɛ sɛkitha nda yama nɔŋ wunthe ka bawaliŋ nda bigbako beŋ.” ’ 20Kɛna ŋaye wundɛ. Wundɛ bohe gboŋa ba duwa ka fandama ka.
“Fandama kute niŋ naa wundɛ wuthokiye. Kɛna see niŋ nkinikiniŋ bohi. Kɛna thare wundɛ; wundɛ key niŋ pɔpitɔkɔ; wundɛ dɔɔkɔy niŋ. 21Huna tepe hati woŋ, na ‘Papaŋ, yaŋ ni hakɛ ba sɔkinɔkɔ Masaala na mɛnɛ ba yina sɔkinɔkɔ. Yaŋ ka nda yando tɛŋɛ ba domo na hati nda.’ 22Kɛrɛ fandama thiyi bawaliŋ nama beŋ, na ‘Sisaŋ yako kuhɔli ku yamɛ yɔhɔ koŋ, e beŋ niŋ kuŋ si thiya. Thiyaŋ niŋ gbɛtu iŋ dagbalɛŋ ka ŋathaki. 23Kaayiyaŋ manaŋ wo yamɛ bukuya woŋ nthɔŋ nda fooma, e beŋ niŋ si kɔra, awa miŋ thɔmɛŋ iŋ mayehitɔkɔ. 24Baa hati niŋ woŋ wotukɛ na nde nda, kɛrɛ hɛ ndɛ thɔhɔy; wopiriŋɛ na nde nda, kɛrɛ hɛ yaŋ kute niŋ?’ Kɛna bohe bindɛ fooma yehitɔkɔ.
25“Ka lɔkɔ babɛina, hati nama wowathe wobakalaŋ woŋ kɔŋ nde ka dumgbu ka. Naa kooye wundɛ gboŋa ba duwa ka mɛti ka, wundɛ si nthɔŋ thuriye, wundɛ yuye sɔnkɔ ba muhaŋ muŋ mɛnɛ kama hubɛina. 26Huna thiye wundɛ wunthe ka bawaliŋ bi ka fandama beŋ, na ‘Mbɛ mu niyɔy?’ 27Huna dome wundɛ, na ‘Wɛnda wohatiyɛ wo kaayɛ nde woŋ na tɛŋɛ, awa fanda kore manaŋ wo yamɛ bukuya woŋ nthɔŋ nda fooma, baa wundɛ kute hɛlɛŋ niŋ wopethɔy nakeŋ!’ 28Wɛndama wobakalaŋ woŋ thɔɔyɛ ka mathoŋ. Wundɛ tha mɛyi ba biyande ka banka ka. Kɛna see niŋ fandama theteke ba wundɛ be biyande. 29Kɛrɛ wundɛ tepe fandama na, na ‘Detha, thaninɛŋ thaŋ thaŋ fooma yaŋ bareŋ nɔŋ yina niyiyɛ wali. Hanthe yaŋ baŋineta hɛ yamari nda, kɛrɛ mbɛ mu dunkune yi yama? Hali hintiŋ baahu woyete ba yaŋ be yehitɔkɔ iŋ binyathikɔŋ niŋ, yi tha yama niŋ dunkune. 30Kɛrɛ hati nda woŋ baŋ, wo teetuwɛ kɛɛ bakɛnda baŋ fooma ka yɛrɛmɛŋ bi katitoko nama yo nama beŋ, naa see hɛ wundɛ, yi koriye niŋ manaŋ wo yamɛ bukuya woŋ nthɔŋ nda fooma!’ 31Huna tepe fandama, na ‘Hatiŋ woŋ, yi, yi kɔŋ iŋ yaŋ dondo timo tima awa ntha yo ntha kikiyaŋ yina biyɛ. 32Kɛrɛ miŋ kɔŋ ba niya yakali, e miŋ yehitɔkɔ, baa wɛnda woŋ baŋ ndɛ tuku nde nda, kɛrɛ hɛ ndɛ thɔhɔy; wundɛ piriŋe nde, kɛrɛ hɛ ndɛ kuto.’”
Currently Selected:
Luku 15: LMBNT
Highlight
Share
Copy
Want to have your highlights saved across all your devices? Sign up or sign in
© The Bible Society of Sierra Leone, 2011
