ƐSITA 5
5
Ɛsita i Mahei kɛ Haman Lolinga Mɛhɛɛ Mɛ Gomɛ ma
1Foloi yee sawei ma, Ɛsita i ngi nyaha maha mayii wielɔ kɛ i loonga kitilewemei gohu wɛlei bu mahei wɛlei bu, mahei jɛmɛɛ lengahu. Mahei yɛ heini ngi maha heimei lɔ ngi wɛlei gohu maha wɛlei lamei leengahu. 2Kia lekee mahei i nyaha Mahei Ɛsita lɔni i looni kitilewemei, ngi hinda nɛɛlɔ ngi wɛ, kɛ i ngi ganigbɔlu likpɔi loonga ngi leenga na yɛ ngi yeya. Na wooma Ɛsita liilɔ kɛ i jaanga a tikpɔi mahui. 3Mahei ndeilɔ ngi ma yɛɛ, “Gbɛ mia, nyaha Mahei Ɛsita? Gbɔɔ bi longɔ la? Ta felɔ bi wɛ, ina bɛ nya mahawui yee kaka yila le.” 4Na wooma Ɛsita ndeilɔ yɛɛ, “Ina i nɛɛlɔ mahei wɛ, mahei kɛ Haman ti wa ha mɛhɛɛ mɛ gomei na hu ngi hu gbatɛnga mahei va.” 5Na wooma mahei ndeilɔ yɛɛ, “Wa a Haman kaka, kɔɔ mu na wie Ɛsita longɔ la.” Fale mahei taa Haman ti wailɔ mɛhɛɛ mɛ gomei hu na Ɛsita i yɛ hugbatɛni. 6Kia ti yɛ a ndɔ gbɔli, mahei ndeilɔ Ɛsita ma yɛɛ, “Gbɛ mia bi longɔ la? A wielɔ bi gama. Tawao gbɔɔ bi mɔli ma? Kɛ bɛ nya mahawui ye kaka yila le, a wielɔ.” 7Na wooma Ɛsita ndeilɔ yɛɛ, “Ji mia nya longɔ la kɛ na nya mɔli le: 8Ina nya hinda nɛɛnga mahei wɛ, tawao ina i nɛɛnga mahei wɛ kɔɔ i na ve nya longɔ la, tawao i na ve nya longɔ ngi mɔli, mahei taa Haman ti wa sina mɛhɛɛ mɛ gomei na hu ngi hugbatɛnga ti va, tawao na wooma nga pielɔ kia mahei i ndenga la.”
Haman Hugbatɛ Wienga Mɔldekai Waa va
9Haman gbuailɔ a foloi na a kohunɛɛ kɛ ndiinɛɛ. Kɛɛ ji Haman i Mɔldekai lɔni mahei gɔlɔi lama, kɛ i tɔnga kɛ ii hiyeni tawao ngi maa ii gbɛlini ngi gulɔ, ngi lii lewelɔ Mɔldekai ma; 10na hu gbi Haman tayekpe huhouilɔ, kɛ i yaa ngi yee kohu. Na wooma i pielɔ ti ngi ndiamɔisia kɛ ngi nyahei Sɛlɛsi loli, 11tawao Haman i ngi gbateisia ti nyandeyii lelɔ ti ma, ngi hingalengeisia ti jikei, kɛ toomeisia mahei i yɛ fenga ngi wɛ, kɛ kia i yɛ ngi loonga mahangeisia mahu kɛ nasia ta yenge mahei va. 12Haman yɛpɛlɔ gbɔma yɛɛ, “Nyaha Mahei Ɛsita ii mɛhɛɛ mɛ gomei hugbatɛni numu gbi va kɛlekee nya vulii kɛ mahei. Sina bɛ i nya lolinga, maa mahei. 13Na hu gbi ji kpɛlɛɛ ɛɛ kpekpeya wie a nge ina lekee nyaa Juumɔi Mɔldekai lɔma heini mahei gɔlɔi lama.” 14Na wooma ngi nyahei Sɛlɛsi kɛ ngi ndiamɔisia gbi ti ndeilɔ ngi ma tɛɛ, “Ti numu hɛlɛmei gbatɛ ngi yaalɛyii hou nuu gbɔyɔngɔ mahu lɔɔlu, tawao a ngendei nde mahei ma kɔɔ ti Mɔldekai hɛlɛ ma; na wooma wa mahei a li mɛhɛɛ mɛ gomei hu a kohunɛɛ.” Ndahin ji nɛɛlɔ Haman wɛ, kɛ i numu hɛlɛmei gbatɛnga.
Currently Selected:
ƐSITA 5: RMB
Highlight
Share
Copy
Want to have your highlights saved across all your devices? Sign up or sign in
Mende Bible Portions © Bible Society in Sierra Leone and Lutheran Bible Translators, 2020.
