ƐSLA 6

Ti Mahei Sailɔsi jawa langɔi lɔnga gbɔma

1Na wooma Mahei Dalɔsi i sawa lailɔ kɛ ti gɔfɛgbua wienga kɔleisia hu mia ti yɛ ndamagbatɛni na Babilɔn. 2Kɛɛ Ɛkbatana, ta wai na Mɛdia gbalatɛi hu, ti kɔlɔ hɔkpɔ nyɛingɔ yila lɔni na, ji mia yɛ nyɛini hu: “Ndamagbatɛ gɔlei. 3Mahei Sailɔsi vooi yee halayɛi hu, i sawa lailɔ: Kɔloongɔ Ngewɔ wɛlei ma Jelusalɛmi, ti yee pɛlei loo gbɔma, hindei na ta saagbua na tawao mia ta wa na a mɔjaahanisia; ngi yalɛyii a yɛ a hou numu gbɔyɔngɔ mahu puu lɔ kɛ ngi yawɔlɔyii numu gbɔyɔngɔ mahu puu, 4taa kɔtu wawanga kpekpa sawa kɛ gbemgbelei kpekpa yila; yee pawei a gbua mahei navo lamagbatɛmei lɔ. 5Kpɛlɛngɔ na ma, kanigbɔlui kɛ kanigolei hakei nasia ti yɛni Ngewɔ wɛlei bu, nasia Nɛbukadnɛsa i ti gbuani Ngewɔ wɛlei bu Jelusalɛmi kɛ i wanga a tie Babilɔn, ba yamalɔ a tie Ngewɔ wɛlei bu Jelusalɛmi, yee ngila gbi lekee ngi nda lomei; ba ti wulɔ Ngewɔ wɛlei bu.”

Mahei Dalɔsi i ndenga yɛ ti li gulɔma a ngengei

6“Kiahuna bia Tatɛnai, kpalatahu gɔminei Yufletisi yei wooma, Sɛtaa Bɔsɛnai, kɛ bia, kɛ ti gbɛlɛmableisia, ti womableisia ti Yufletisi yei wooma, a wu mahuguha; 7a gbee Ngewɔ wɛlɛ yengei ji ma; Juubleisia ti gɔminei kɛ ti gbakoisia ti Ngewɔ wɛlei ji loo gbɔma ngi lomei. 8Kɛ gbɔma ngi sawa langa kɔloongɔ na ma wa pie a Juublei jisia ti gbakoisia Ngewɔ wɛlei loolei va gbɔma: wa yee sɔngɔi ji ve yee nungei jisia lɔ wɛ, ndavendangɔ tawao waa kula kɔlɛ hu, a kpua maha navo lamagbatɛmei, Yufletisi ya wooma navoi hu. 9Na gbi lekee ti gbeengɔ fa, nika hina lɔgbɛisia, mbala hina lɔgbɛisia, ɔɔ mbala mɔ jaahani va ngelegohu Yewɔi va, a mba, kpolo, ndɔ, ɔɔ ngulɔ, kia leekee saagbuableisia ti Jelusalɛmi ta mɔli, ti na ve ti wɛ folo gbi ma taa hunyani, 10kɔ wɔi ti ngelegohu Yewɔi liima jaasia gbua tawao ti hɛ wie mahei va tia ngi lengeisia. 11Kɛ gbɔma ngi sawa langa ngɛɛ numui na gbi lekee a njiɛi ji maluve, ti ndɔkɔ gbua ngi wɛlei bu, ti ngi hɛlɛ ma. Yee pɛlei a wote a kawɛɛma lɔ. 12Ngewɔ na i ngi biyei heinga na i maha ɔɔ numu gbi gbua ngi loomei ɔɔ ngi heimei yee njiɛi ji yawote va, ɔɔ Ngewɔ wɛlei hunyani va Jelusalɛmi. Nya, Dalɔsi, ngi sawa langa; i wie a nɛmahulewe hu wee.”

Ti Ngewɔ Wɛlei magayenga

13Na wooma, kɔloongɔ njiɛi na ma Mahei Dalɔsi joyoni, Tatɛnai kpalatɛi na hu gɔminei Yufletisi yei wooma, Sɛtaa Bɔsɛnai, kɛ ti magbɛlɛmableisia ti na gbi wielɔ a nɛmahulewe kia Mahei Dalɔsi yɛ ndeni a kpɔndama. 14Fale Juubleisia ti gbakoisia ti heima looilɔ kɛ ti nafanga, a kulɔmayei na hu wee kulɔmayialebleisia Hagai kɛ Sɛkalaya Ido hindoloi ti yɛ ndeni. Ti kpɔyɔilɔ a ti wɛlei loola kia Isleɛl Yewɔi ndeni la, kɛ Sailɔsi kɛ Dalɔsi kɛ Aatasasi Paasia mahei jawei langɔ yɛla; 15tawao ti pɛlei ji loolei gbɔyɔilɔ foloi yee sawɛi ma Ada yalui hu, fooi yee weitei hu Mahei Dalɔsi mahayei hu.

16Isleɛl nungaa, saagbuableisia kɛ Livaitisia kɛ nasia gbi ti gbuani kɔhou hu, ti Ngewɔ wɛlei magayengɔi ji gomei gaailɔ a kohunɛɛ. 17Ti nika hɔndɔ yila, mbala hina hɔndɔ fele, mbalalo hɔndɔ naani gbuailɔ a saa Ngewɔ wɛlei ji magayelei va, kɛ jumbu jaahani va Isleɛl gbi va, nje hina puu mahu fele, kia Isleɛl gɛnyɛwuisia ti jikei yɛ na. 18Na wooma ti saagbuableisia loilɔ ti yakeisia ma kɛ Livaitisia ti yakeisia ma Ngewɔ yengei wie va Jelusalɛmi, kia nyɛingɔ yɛla Mojisi ngɔlei hu.

Tewemahu gomei

19Foloi yee puu mahu naani ma ngalui yee haala yee hu kɔhoui nungeisia ti yamani ti tewemahu gomei houilɔ. 20Gbamaile saagbuableisia kɛ Livaitisia ti tiayekpe mawailɔ; ti kpɛlɛɛ ti yɛnilɔ sɛwɛsɛwɛ. Fale ti tewemahu mbalaloi wanilɔ kɔhou nungeisia gbi va ti yamani, ti mbaa saagbuableisia va kɛ tiayekpe va. 21Isleɛl nungei nasia ti gbuani kɔhou hu, kɛ gbɔma nasia gbi ti gbɛlɛni ti ma tawao ti tiayekpe gbuani ndɔɔlɔhubleisia ti manɔhɔ hindei hu Ndemɔi Isleɛl Yewɔi vɛli va ti mɛlɔ. 22Ti lɛwɛmɔngɔi na huvehani ii hu gomei houilɔ a kohunɛɛ folo wɔfila va; gbamaile Ndemɔi mia pienga ti gohunɛnga, tawao i Asilia mahei lii wotenga ti gama, nahi i gbɔ ti ma Ngewɔ wɛlei loo va gbɔma, Isleɛl Yewɔi.

Currently Selected:

ƐSLA 6: RMB

Highlight

Copy