ƐSLA 9
9
Ɛsla i heinyɔuya yawupungɔ hungɔɔnga a nasia Juublaa yaa a tie
1Hindei jisia wooma, tokulɔisia ti wanilɔ nya gama kɛ ti ndenga tɛ, “Isleɛl nungeisia, saagbuableisia kɛ Livaitisia tii yaa tiayekpe gbuani ndɔɔlɔ hubleisia ma ndaloongɔ ti liigbuama hindeisia ma, Kenanaitibleisia kɛ Hitaitibleisia, kɛ Pɛlisaitisia, kɛ Jɛbusaitisia, kɛ Amɔnaitisia kɛ Moabaitisia, kɛ Ijiptibleisia, kɛ Amɔlaitisia. 2Gbamaile ti ti nyaha lengeisia lɛnga wumbunga tiayekpe va kɛ ti hingalengaa va a ti nyahangeisia. Fale kayema nungeisia ti tiayekpe yawupunga a ndɔɔlɔ hublaa, tawao lanayavɛli ji hu, gulɔloobleisia kɛ tokulɔisia ti wotenga a haalablaa ji wie va.” 3Ji ngi ji humɛnini, ngi nya gulei kɛ nya lomei mblamblalɔ, kɛ ngi nya wundei kɛ nya gbɛlei wolenga, kɛ ngi heinga ndinyanihu. 4Na wooma nasia gbi ti magbɛlini Isleɛl Yewɔi layeisia va, kɔhouisia ti lanayavɛli va, ti gomɛnilɔ ti nya gala, a watii na ngi yɛ heini ndinyanihu haaŋ i too kpɔkɔ jaagbualei ma.
5A kpɔkɔ jaagbua gbelemei ngi hiyenilɔ nya juu houlei hu, a nya lomei kɛ nya gula mblamblangɔi, kɛ ngi wɔmbii gbakpanga, ngi nya lokoisia lambo Ndemɔi nya Yewɔi gama, 6kɛ ngi ndenga ngɛɛ,
“O nya Yewɔi, nya wufengɔ waa le tawao ŋanya wungɔi nya yɔngɔlu ya, nya yamei lɛva bi gama, nya Yewɔi, ajifa mu jumbuisia ti yalɛnga i lewe mu wunga ma, tawao mu hinda nyamuisia ti lɛnga ngelegohu. 7I hiye mu kɛkɛni ti voloisia ma, i too foloi ji ma mu yɛnga nyamu waa hu, tawao mu jumbuisia va, mua mu mahangeisia, kɛ mu jaagbuableisia, ti mu venga ndɔɔlɔ hublaa ti mahangaa wɛ, kɔbowɛi wɛ, kɔhou wɛ, hunyani wɛ, kɛ ngufema hinda waa wɛ kia i na na. 8Kɛɛ kiahuna watii wulo va Ndemɔi mu Yewɔi i manuma gɛnga, na i mu loonga a numuvulu mɔnungɔngaa tawao i mu gɔnga a heima ngi magaye wɛlei bu, kɔɔ nahi i mu yameisia voo, tawao i laha wulo ve mu wɛ mu luwɔyei hu. 9Gbamaile mu yɛni a nduwɔngaa lɔ; nahu gbi mu Yewɔi ii yaa gbuani mu wooma mu luwɔyei hu, kɛɛ i ngi loma gbaukpaui gɛnga a mue, Paasia mahangeisia gulɔ, mu gɔ va a ndɛvu nina kɔɔ mu mu Yewɔi wɛlei loo, kɔɔ mu yee nyaningɔisia gbatɛ, tawao bundi ve va mu wɛ Juda kɛ Jelusalɛmi.
10“Kɛ kiahuna, mu Yewɔi, gbɔɔ ma nde ji wooma? Ajifa mu gbelenga bi jaweisia ma, 11na bi ndeni mu ma a bi bɔilopoisia, kulɔmayialebleisia hu wee, bɛɛ, ‘Ndɔɔlei na wu jɔkɔ ma na majɔɔ va i yɛni a ndɔɔlɔ manɔhɔngɔ lɔ a yee nungaa ti manɔhɔi, taa ti ligbuama hindeisia. Ti na vendanga a ti manɔhɔ hindeisia i hiye kaka yila ma i too yepekei ma. 12Fale waa wu nyahalengaa ve ti hingalengaa wɛ, tawao waa ti nyahalengaa wumbu wu hingalengaa va, tawao waa ti lilɛli gɔkɔli ɔɔ ti lɛlei gulɔma; kɔɔ wɔi wu gbaya tawao wu na mɛ kpekpengɔ a gbua ndɔɔlei hu, tawao wu ndo a poohani wu lengeisia yeya kunafɔ va.’ 13Na gbi wooma i mu maleni mu hinda nyamuisia va, kɛ mu jumbuisia, tɔɔ va kɛ bia, mu Yewɔi bi mu yamɔnɛnga kulohi na ii hitini mu jumbuisia hu tawao bi mu longa mɔnuyei ji hu, 14ma bi jaweisia nyanilɔ gbɔma, tawao mu nyahajɔɔ huwupungɔ hugbatɛ a nungei nasia ta ndigbuama hindei jisia wie? Bi lii ɛɛ lewe mu ma haaŋ bi mu jukuu, nahi numu gbi ma ɛɛ bawo? 15O Ndemɔi, Isleɛl Yewɔi, bi wɔnangɔe; kɛɛ mua mu bawonga, kia i na na, mua gbee bi gulɔ mu hinda nyamuisia hu, kia bɛ numu gbi ɛɛ gu aa loo bi gulɔ hindei ji va.”
Currently Selected:
ƐSLA 9: RMB
Highlight
Share
Copy
Want to have your highlights saved across all your devices? Sign up or sign in
Mende Bible Portions © Bible Society in Sierra Leone and Lutheran Bible Translators, 2020.
