NƐHIMAYA 10
10
1Nasia ti ti leisia jɛwɛni kɔlɔ nyɛingɔ lagbɔwungɔi na hu mia a gɔminei Nɛhimaya Hakalaya hindoloi kɛ Sɛdɛkaya 2Sɛlaya kɛ Asalaya kɛ Jɛlimaya 3Pasɔɔ kɛ Amalaya, kɛ Makaija 4kɛ Hatusi, kɛ Sɛbanaya kɛ Maluki 5Halimi, kɛ Mɛlɛmɔti, kɛ Obadaya 6kɛ Daniɛl, kɛ Ginɛtɔni, kɛ Baluki 7kɛ Mɛsulami, kɛ Abija, kɛ Mijamini 8kɛ Masaya, kɛ Biligai kɛ Sɛmaya; jisia mia ti yɛni a saagbuableisia. 9Kɛ Livaitisia: Jɛsua Asanaya hindoloi, kɛ Binui Hɛnedadi hingalengeisia yee ngila, Kadimiɛli; 10kɛ ti magbɛlɛmablaa, kɛ Sɛbanaya, kɛ Hodaya, kɛ Kɛlita, kɛ Pɛlaya, kɛ Henani, 11kɛ Maika, kɛ Lehɔbi, kɛ Hasabaya, 12kɛ Sakɔ kɛ Sɛlɛbaya, kɛ Sɛbanaya 13kɛ Hodaya, kɛ Banai, kɛ Bɛninu 14Nungeisia ti gulɔlobleisia; Palɔsi, kɛ Pahati Moabi, kɛ Iilami, kɛ Satu, kɛ Banai 15Bunai, kɛ Asigadi, kɛ Bɛbai 16kɛ Adɔnaija, kɛ Bigivai, kɛ Adini 17kɛ Ata, kɛ Hɛsɛkaya, kɛ Asɔ 18kɛ Hodaya kɛ Hasumi, kɛ Bɛsai 19kɛ Halifi kɛ Anatɔti, kɛ Nɛbai, 20kɛ Magipasi, kɛ Mɛsulami, kɛ Hɛsia, 21kɛ Mɛsɛsabɛli, Sadɔki, kɛ Jadua, 22kɛ Pɛlataya, kɛ Henani, kɛ Anaya 23kɛ Hosea, kɛ Hananaya, kɛ Hasubi 24kɛ Halohɛsi, kɛ Piliha, kɛ Sɔbɛki 25kɛ Lehumi, kɛ Hasabina, kɛ Maseya 26kɛ Ahaya, kɛ Henani, kɛ Anani 27kɛ Maluki, Halimi kɛ Bana.
Hindayayilingɔi
28Nungaa wekeisia, saagbuablaa, Livaitisia, gɔlɔ lama mahugbeebleisia, ngoleyaableisia, Ngewɔ wɛlɛbu bɔilopoisia, kɛ nungeisia kpɛlɛɛ ti ti luahu gɔlɛni a ndɔɔlei na hubleisia Ngewɔ jawei wie va ma, ti nyahangeisia, ti hingalengeisia, ti nyahalengeisia, nasia kpɛlɛɛ kɛ lihema, 29kpɛlɛngɔ ti ndewengeisia ma, ti jamangeisia ma, kɛ ti lahedi wumbunga Ngewɔ jawei hou va, na yɛ veni a Mojisi Ngewɔ bɔilopoi hu wee tawao ti Ndemɔi jaweisia, kɛ ngi lahinsia gbi hou va tawao ti yee hindeisia wie. 30Muɛɛ mu nyahalengeisia ve ndɔɔlɔhubleisia wɛ, tawao muɛɛ ti nyahalengeisia wumbu mu hingalengeisia va, 31tawao ina ndɔɔlɔhublaa ti wailɔ a felehakangaa ɔɔ mɛhɛɛ gbi majia va kayema lɛvu voloi ma muɛɛ ngeya kayema lɛvu voloi ma ɔɔ kayema voloi ma; tawao ma gbeelɔ foo wɔfila luhanisia ma kɛ kpa gbi gbua la va.
32Mu ndanga mua yekpe yeya foo ma kanigolei navo gɔlɛngɔ kaka sawa veva Ngewɔ wɛlei magbeegbua va: 33lɛwɛmɔngɔ gbambiisia va, watii gbi mɛhɛɛ jaahani, watii gbi mɔ jaahani, kayema lɛvu voloi va, ngawu nineisia va, komɛ watii gɛngɔisia va, kayema vehanisia, kɛ jumbu jaahanisia kɔɔ Isleɛl jumbuisia ti gbua ti ma, kɛ ngengei na kpɛlɛɛ wie va mu Yewɔi wɛlei bu. 34Mu tɔtɔi gbeilɔ gbɔma saagbuableisia lia, Livaitisia, kɛ nungeisia, kɔwu jaagbualei va, wa va la Ngewɔ wɛlei bu, a mbonda wɛleisia hu wee, watii gɛngɔisia ma, foo gbi lekee, mɔ va Ndemɔi mu Yewɔi jaagbuamei kia nyɛingɔ yɛla sawei hu. 35Mu lumanga muayekpe wa va a haala wulu wuɛisia ta gbua mu lɔɔlei ma kɛ haala wulu wuɛi ngulu wuɛi nasia gbi va ngulu gbi va, foo gbi lekee, Ndemɔi wɛlei bu; 36wa va gbɔma mu Yewɔ wɛlei bu, saagbuablei nasia gama ta yenge wu Yewɔi wɛlei bu, mu gbela hingalengeisia kɛ mu haala lohanisia, kia nyɛingɔ la sawei hu kɛ mu haala nikangaa kɛ mu haala mbala guluisia; 37tawao mu wa a mu haala lɛwɛgateisia, kɛ fe hanisia, ngulu gbi ngi wuɛi, ndɔi, ngulɔi, saagbuableisia gama, mu Yewɔ wɛlei bu; kɛ wa va Livaitisia gama fe hani kaka puuisia a gbua mu lɔɔlei hu, gbamaile Livaitisia mia ta fe haani kaka puuisia gbi wɔyɔ mu gbaalateisia hu gbi. 38Kɛ saagbuamɔi, na a gbua Elɔn mbondawui hu, a yɛlɔ Livaitisia gblanga ji Livaitisia ta fe haka kaka puuisia majɔɔ; tawao Livaitisia ta walɔ a fe haka kaka puuisia ta kpua haka kaka puuisia hu mu Yewɔi wɛlei bu, haka lamagbatɛma wɛlei bu. 39Gbamaile Isleɛl nungeisia kɛ Livai hingalengeisia ta wa lɔ a mba, ndɔi, kɛ ngulɔi miando Ngewɔ wɛlɛbu hakeisia ti na, kɛ mia saagbuablei nasia ta yenge na, kɛ gɔlɔ lama mahugbeebleisia kɛ ngoleyaableisia ta yɛ na. Muɛɛ gbee gbua mu Yewɔi wɛlei ma.
Currently Selected:
NƐHIMAYA 10: RMB
Highlight
Share
Copy
Want to have your highlights saved across all your devices? Sign up or sign in
Mende Bible Portions © Bible Society in Sierra Leone and Lutheran Bible Translators, 2020.
