TOBLEISIA TI WIEHINDEISIA Yeemagonɛi
Yeemagonɛi
Tobleisia ti wiehindei yɛni a kɔlɔ lalongɔ lɔ heingɔ Ngowili yekpei ya na Kenɛi Luki nyɛini. Yeekɔlɛi ji nyɛi sabui yɛni a hugɛla lɔ kpaukpaungɔ kia Yesu womableisia, yeehaalayei nasia Ngewɔ Yafei yɛ jia a tie, ti guni ti Ngowili Yekpei jɛsiani la hu gbi kɔlooni ngi ma mia “Jelusalɛm laawai goohu, Judia taa Samelia lɔleisia hu, kɛɛ na kuhamɛisia i to ma fa dunyei yeekɛlɛmɛi” (1.8). I yɛni a ngowili lɔ kɔlooni Kristimableisia ti gomɛi yeekpɔkulɛi ma Juubleisia lia, kɛ i ya gulɔma yɛva a lanayablaa ti gomɛi dunyei kpɛlɛɛ va. Gbɔma i yɛ gbewei lɔ kɔlɔ nyɛimɔi ma nda va kpɔtu ngi gɔlɛi yeekaableisia nɛmahu kɛ Kristimableisia tii yɛni wɔɔ a ndɔlɔ jɛsiablaa ta ti maluwa Roma gɔmɛtii yaama; kɛɛ ti gomɛi yɛni wɔɔ a Juubleisia ti nda Yewɔ vɛli welei lɔ gahitingɔ sɔ.
Tobleisia ti gɔlɛi hu a gɔlɛlɔ mbeke waawaa sawa bu na yee kohu gɛngɔ sɛmbɛngɔ kɔlooni Ngowili Yekpei ma ti ndeni kɔloongɔ Yesu ma kɛɛ Sɔsii hiyelei ma: bekei yeehaalayei lɔ hugɛma kia Kristimableisia ti gomɛi yeelɔɔtoni la Jelusalɛm goohu, Yesu lɛngɔi woma ngelegoohu; yeefelei kɛmaa kia ngi gomɛi yeevayafayɛi la Palisain lɔlei hu; kɛɛ na yeesawei yɛni a yeekomɛi ji yajɛmbɛleilɔ tuuŋ, i lini i Mɛditalenia lɔlei hou, i li i fo fa Rom.
Gbɔɔ hindei yeekpaukpau le Tobleisia ti gɔlɛi hu i yɛni a Ngewɔ Yafei ngi yenge lokoi lɔ ji i yeini Yesu wombleisia ma ti yɛ Jelusalɛm lei goohu Pɛntikɔsti voloi ma, kɛɛ i ya gulɔma a Sɔsii loola pele yekpe ma i wote a ndɔkɔ kpaukpau bu, kɛɛ ji i yɛ a Sɔsii gulɔbleisia loo pele yekpe ma na gbi lekee hu yɛni a vaa lɔ kɛngɔ kɔlɛi ji goohu. Kristimableisia ti woowili yeehaalayei tewengɔi kutuma ngowili yiangaa lɛɛnga hugɛngɔ hu, tawao jiahu nasia ti Tobleisia ti gɔlɛi hu i yeengowili ji gbayei lɔ gɛma lanayableisia ti lɛvuhu hindeisia hu kɛɛ mbaaya gomɛi hu ti yɛ hou Sɔsii hu.
NGUISIA KƆLƐI JI GOOHU
Magbatɛi seli yia le va 1.1-26
a. Kɛlɛma lahii Yesu guani kpɛingɔ lahei ma i mbumbuni 1.1-14
b. Numui Judasi womɛi wumbuni 1.15-26
Seli yia le la Jelusalɛm 2.1—8.3
Seli yia le la Judia kɛɛ Samelia lɔleisia hu 8.4—12.25
Pɔɔl yenge lokoi 13.1—28.31
a. Haala jɛsia ngowili leva 13.1—14.28
b. Komɛi Jelusalɛm goohu 15.1-35
c. Jɛsie yeefelei ngowili leva 15.36—18.22
d. Jɛsie yeesawayei ngowili leva 18.23—21.16
e. Pɔɔl wuala kpindiwɛleibu Jelusalɛm, kɛɛ Siisaria kɛɛ na Rom 21.17—28.31
Currently Selected:
TOBLEISIA TI WIEHINDEISIA Yeemagonɛi: MENNT
Highlight
Share
Copy
Want to have your highlights saved across all your devices? Sign up or sign in
Mende New Testament © The Bible Society of Sierra Leone, 2002.