MAAKI Yeemagonɛi
Yeemagonɛi
Ngowili yekpei Kenɛi Maaki nyɛini i tɔtoni a njɛpɛ wo lɔ yɛ, “Ngowili yekpei lɔ Kɔloongɔ Yesu Kristi ma, Ngewɔ Hindoloi.”
I kɛilɔ a mue kɛ yangeyangemɔ mia wɔɔ a Yesu tawao kpaya waa ngi wɛ. Ma ngi gbayei yɛyii lɔlɔ kaa hu i yɛ nungaa gaa la, ngi leweyii ngafa nyamuisia ma, kɛɛ ji i yɛ gu a manula nungaa ti jumbuisia ma. Yesu i yɛlɔ a ta yekpe loli a Nuuvu Hindoloi na wani ngi nda lɛɛvui lava aako i nungaa wumawo i ti gbua jumbu luwɔyɛi bu.
Maaki i Yesu lɛvuhu hinde hugɛilɔ gbalauŋ, i laa liigba gboŋ na ma Yesu i yɛ pie, i lewe na ma i yɛ nde kɛɛ kaa nasia i yɛ nungaa gaa la. Kia Maaki kpɔyɔni a njɛpɛ gutu le la kɔloongɔ Jɔn Nguamɔi ma kɛɛ Yesu wualei taa ngi gɔlɛlei ma, i laa njaalɔ yakpe a ngengei na Yesu i pieni a ji i yɛ heegbɛbleisia bawo, a nungaa gaa. Kia watii yɛ lini gulɔma, Yesu gaalopoisia ti tɔtoilɔ a ngi huvaa gɔla pandawanda, kɛɛ nasia tii yɛ loni a ngie, ti toloma yagbalɛngɔ waa hitɛilɔ ngi woma. Yeekɔlɛi ji yakpuamɛi yɛpɛma hinde nasia valɔ ti wieni kɛlɛma hokii goohu Yesu lɛvui hu dunyei hu, kakaye ngi gbakpalei krɔsii ma kɛɛ ji i vuluni i hiye hee hu.
Ngowili ji yakpuami, mia kalɛ felei na blangɔ na, numu gboto ti gilingɔi la kɛ numu weka lɔ i nyɛini, Maaki ii le.
NGUISIA KƆLƐI JI GOOHU
Ngowili yekpei lɔtomɛi 1.1-13
Yesu yenge lokoisia kpawama leeŋ Galili lɔlei hu 1.14—9.50
I gbuama Galili lɔlei hu i lima Jelusalɛm 10.1-52
Njiahu i gani kɛlɛma woki hu Jelusalɛm gbalateisia hu kɛɛ yeekohui 11.1—15.47
Yesu hiye le hee hu 16.1-8
Ndemɔi na i hiyeni ngi gbualei ma nungaa yaama kɛɛ ngi lɛlei ma ngelegoohu 16.9-20
Currently Selected:
MAAKI Yeemagonɛi: MENNT
Highlight
Share
Copy
Want to have your highlights saved across all your devices? Sign up or sign in
Mende New Testament © The Bible Society of Sierra Leone, 2002.