Mȧyɔs ma aŋsom 14
14
1Ka pə re yi ro Ikoniɔm, kəpa ŋa ŋarəŋ aŋ wɔŋ ka ȧŋseth agbanɛ ŋa aŋYuda, ɔwa ka aŋYuda-o yi aŋKrik-o, ȧruniya rəbana rə lanɛ ta ȧŋsabu ŋa kafɔf ka ŋaŋ. 2Kɛrɛ aŋYuda aŋa te lanɛ aŋ pər ɛmerȧ ya tȧbona təlɔm, kaŋ ləsər ɛmerȧ yaŋ ta aŋwɔnt. 3Tiyȧŋ Pɔlȧŋ yi Banabasȧŋ aŋ wɔŋ ri, aŋ fɔf yi kəmintha ta ɔMarki ɔwe sɔŋ məseri ta ȧrim ra ȧŋboŋa ŋɔŋ, ɔ yɔ ɛmisali yi mȧtȧy məkabanɛ mə yɔnɛ ka mȧta maŋ. 4Kɛrɛ ȧruniya ra kȧpet rə gbayanɛ; alɔm aŋ yi ka ȧŋgbȧp ŋa aŋYuda, aŋlɔm ka ȧŋgbȧp ŋa aŋsom. 5Ɔwa ma tȧbona təlɔm yi aŋYuda yi aŋgbəka ŋaŋ aŋ ba ȧmerȧ ŋin tə kəyɔ ŋa ɔləs-e, dɛ yi tə kələməs ŋa məsar-e, 6Maŋ sɔthnɛ ti, kaŋ gbukɛ ro Listra yi ro Dabi, təpet ta ro Lekonia, yi ka ȧŋthɔf aŋa gbətɔnɛ ri. 7kaŋ tɔri ri ȧkɛra kəfinɔ.
8Ɔwa wuni lɔm ɔ yi ro Listra, ɔ ba hɛ afɔsɔ ka ȧtȧtək tɔŋ, ugbɛba wɔŋ kȧbi ka akor ka ɔkara kɔŋ, ɔ la hɛ kɔth bɛ. 9Kɔnɔ kati ɔ təlȧ Pɔlȧŋ mɔ mɔ fɔf; ɔwe kəli kɔ təŋ, ɔ nənk kəpa ɔ ba kəlanɛ tə kəsɔthɔ kəyeŋk mədɛr, 10kɔ pa rə rim rəbana, Təmȧ toloŋ ka ȧtȧtək ta mu. Kɔ pai, ɔ kɔth. 11Ɔwa ma ȧruniya rə nənk ȧtȧ Pɔlȧŋ ɔ po yɔ-e, aŋ ŋata ȧsim taŋ, aŋ fɔf ka akənt ka ro Lekonia, Aturu aŋ po thor ro rɔsu rə mȧbȧlȧnɛ ma afəm. 12kaŋ bont Banabasȧŋ Yupita, ɔwa Pɔlȧŋ Mərkuri, ȧtesoma-e kɔnɔ təmȧ kədi ka kafɔf. 13Ka ɔfode ka Yupita ɔwe ba ȧŋseth ŋɔŋ abȧtho ka kȧpet rodi, ɔ kȧrȧ ɛthura yi məlɛŋi məbɔthi kəli ka tarare kȧmȧ kɔnɔ dɛ yi aŋfəm aŋ wurɔ ŋa sathka. 14Ma aŋsom Barnabas yi Pɔl aŋ təl ti-e, aŋ piməs ȧsuma taŋ, kaŋ wɔŋ lɛmp kətɔŋ ka aŋfəm, aŋ pa lɛɔ, 15Pa-ŋaŋ, kɔyɛŋ mə nə yɔ mȧtȧy ame-e? Saŋ sɔ sə yi afəm mɔ naŋ, sə kȧrȧ nu kɛra kəfinɔ kȧmȧ nə tey mȧtȧy məyai ame tə kəlafthɛ ka ɔKuru ukəli ɔwe bɛmpa akuru-o, anthɔf-o, kȧbȧŋ-o yi koko ara yi ri. 16Ɔwe pə yi, ka ɛlɔkɔ ɛyɛ po thas ɔ ter tȧbona bɛ tə kəkɔth ka asoŋ taŋ. 17Kɛrɛ ɔ tey hɛ ŋa kəte ba məseri ta atɔŋ, ma ɔ yɔ nu ɔfinɔ, ɔ sɔŋ nu tɔm kəwur ka ȧkuru yi ɛlɔkɔ ɛkoməs ɛgbathi, kɔ lasər ɛmerȧ ɛ nu yi ɛwɔnth yi məbɔnɛ. 18Kɛrɛ hali ka ȧsim ȧte aŋ bun thamrɔ tə kəbɛnt aŋfəm kȧmȧ aŋ te wurɔ sathka ro rɔŋaŋ.
19Kɛrɛ aŋYuda alɔm aŋ der kəwur ro Antiɔk yi ro Ikoniɔm; ɔwa maŋ po pər aŋfəm-e, aŋ ləməs Pɔlȧŋ məsar, kaŋ liŋ kɔ aŋ wurɔ kɔ ro pet, aŋ nanɛ kəpa ɔ po fi. 20Kɛrɛ ma aŋkarande aŋ gbətɔ kɔ-e, ɔ yokanɛ, kɔ wɔŋ ro pet. Ka ȧŋrey alɔm-e, kɔnɔ yi Banabasȧŋ aŋ kɔnɛ ro Dabi. 21Ɔwa maŋ po tɔri ȧkɛra kəfinɔ ka kȧpet kati, ka aŋ po səki afəm agbȧthi akarande-e, aŋ kȧlanɛ ro Listra, ro Ikoniɔm yi ro Antiɔk. 22kaŋ bȧksər ɛmerȧ ya aŋkarande, aŋ maŋ ŋa tə kəbasər ka kȧlanɛ, ɔwa aŋ kanɛ ŋa sɔ kəpa, ka ɛsɔmpanɛ ɛgbathi sə tə wɔŋ ka rȧbȧy ra Kuru. 23lƆwa maŋ po thithəsȧ ŋa abȧki rə ȧchɔch o chɔch-e, ɔwa maŋ po ramnɛ yi kəwop asum-e, aŋ maŋkər ŋa ka ɔMarki ka ɔwe aŋ po lanɛ.
24kaŋ thas ro Pisidiya, aŋ der ro Pamfiliya. 25Ɔwa maŋ po kanɛ ȧrim ro Paka-e aŋ thor ro Ataliya. 26kaŋ bȧkȧ ri rə abil, aŋ kɔnɛ ro Antiɔk ro a po maŋkər ŋa ka ȧŋboŋa ŋa Kuru ta mapanth ama aŋ po gbenthis. 27Ɔwa maŋ bek-e, aŋ thoŋkla aŋchɔch dɛr rɔkin, aŋ lɔma ŋa mȧtȧy bɛ ama Kuru ɔ yɔ ka mȧta maŋ, yi to ɔ po kanthi karare ka kȧlanɛ ka tȧbona təlɔm. 28Ɔwa aŋ bora kəwon ro Antiɔk yi aŋkarande.
Currently Selected:
Mȧyɔs ma aŋsom 14: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
