Mȧyɔs ma aŋsom 21
21
1Ɔwa ka pə re yi kədarəŋ ka ma sə sakanɛ yi ŋaŋ-e, sə bȧkȧ ka sə der toloŋ ro Kos, ɔwa ka ȧŋrey alɔm ro Rods, ɔwa kəwur ri sə der ro Patara. 2Ɔwa ma sə bəp ri abil aŋa yema fəsi ro Finisia-e, sə bȧkȧ ka sə kɔnɛ. 3Ma sə po nənk ro Saiprɔs-e, sə tey ki ka kȧmɛrɔ, sə kɔ ro Siria, ka sə sɔ ro Tair; kotȧy-e rə mə a bȧk akothe ka ȧŋbil. 4Ma sə po bəp aŋkarande-e, sə yirȧ ri mərey tȧmthədɛrəŋ. Aŋe aŋ kanɛ Pɔlȧŋ ka aŋfɔsɔ ŋa ɔYina kȧmȧ ɔ te na ro Yerusalɛm. 5Ɔwa ma aŋkori a su aŋ poŋ-e, sə kɔnɛ ȧŋbiyas a su, ka ŋa bɛ yi aŋrani ŋaŋ yi aŋwuth ŋaŋ aŋ paya su ro roŋ haŋ sə wur ro pet. Ka sə sɔ təwu ro baŋ dayɛr, sə ramnɛ. 6Ma sə po lemnɛ ŋa-e, sə bȧkȧ, kaŋ kȧlanɛ ka ɛseth yaŋ.
7Ma ȧŋbiyas kəwur ro Tair aŋ poŋ-e, sə der ro Tolameis, ka sə kori aŋwɔnt, ɔwa sə yi yi ŋaŋ ȧrey ŋin. 8Ka ȧŋrey alɔm sə wur ri, sə der ro Sisaria, ka sə wɔŋ ka ȧŋseth ŋa Filip ɔtaməs ȧkɛra kəfinɔ ɔwe yi ukin ka antamthədɛrəŋ. Ɔwa sə yirȧ ro ŋɔŋ. 9Ɔwa ɔlaŋgba ɔwe ɔ ba awuth abɛra afanɛ ŋanlɛ aŋa mə nȧbi. 10Ɔwa ma sə yirȧ ri mərey məfisa-e, unabi ulɔm ɔ wur ro Yudia, ɔ ba ȧŋes ŋa Akabɔs. 11Ma ɔ der ro rɔsu-e, ɔ gbasi rasakoi ra Pɔlȧŋ, ɔ sek ȧtȧtək tɔŋ yi mȧta mɔŋ, ɔ pa, ɔYina məsəm ɔ kanɛ kəpa, ya aŋYuda ro Yerusalɛm mə aŋ sek ɔwan duni ɔwe ba rasakoi are, ɔwa aŋ tə lȧnki kɔ ka mȧta ma tȧbona təlɔm. 12Ma sə təl ȧsim ȧte-e, saŋ yi ŋaŋ aŋa yi ka ɔdɛr wati, sə nɛmthɛnɛ kɔ kȧmȧ ɔ te kɔ ro Yerusalɛm. 13Ka Pɔlȧŋ ɔ pa, kɔyɛŋ mə nə bok-e, ɔwa nə rantəs ȧŋmerȧ a mi-e? Min bɛnɛnɛ thɔŋ, pə yi hɛ gbo kȧmȧ a sek mi, kɛrɛ tə kəfi sɔ ro Yerusalɛm ta ȧŋes ŋa ɔMarki Yisɔs. 14Ɔwa ma ɔ te selɔ gbasi kəŋal ka su-e, sə tey, sə pa, Ta mȧselɔ ma Kuru mə yɔnɛ.
15Kədarəŋ ka marey ame-e, sə gbasi atothe ta su, ka sə kɔ ro Yerusalɛm. 16Akarande alɔm ŋa ro Sisaria aŋ paya su, aŋ kȧrȧ Neson ɔwe ro Saiprɔs, ukarande ukur, ka ɔwe sə yi tə kəyianɛ.
17Ma sə po bek ro Yerusalɛm-e, aŋwɔnt aŋ malanɛ su yi məbɔnɛ. 18Ɔwa ka ȧŋrey aŋa tanda-e, Pɔlȧŋ yi saŋ sə wɔŋ ka Yeməsȧŋ. Ɔwa aŋbȧki bɛ aŋ bəpər ri. 19Ɔwa ma Pɔlȧŋ ɔ po kori ŋa-e, ɔ təp ka ɔtəpɛr tə kəlɔma ŋa ȧtȧ Kurɔŋ ɔ po yɔ kətɔŋ ka tȧbona təlɔm ka mȧta mɔŋ. 20Maŋ təl ȧte-e, aŋ thɔkəs Kuru, aŋ kanɛ Pɔlȧŋ, Wɔnt su, mə nənk ma aŋYuda ɛwul ɛwul aŋ lanɛ. Ɔwa ŋaŋ bɛ aŋ ba afela tə kəwop ȧŋthɔ. 21Ɔwa a po kanɛ ŋa ta ȧtȧ mu kəpa mə thəksa aŋYuda bɛ aŋa yi kətɔŋ ka tȧbona təlɔm tə kəgbȧpɛ Mosisȧŋ, dɛ yi kȧmȧ aŋ te birons aŋwuth ŋaŋ, thalɔm tə kətȧŋȧnɛ matanɛ. 22Tiyȧŋ to pə yi-e? Tɛntɛnɛ aŋ tə təl kəpa mə po der. 23Tiyȧŋ yɔ ȧte ȧtȧ sə kanɛ mu; sə ba afəm aruni ŋanlɛ aŋa ba asekəranɛ. 24Gbasi aŋe kȧmȧ mə fethərnɛ yi ŋaŋ, mə rama ŋa kȧmȧ aŋ fon tabomp taŋ. Ɔwa aŋfəm bɛ aŋ tə tȧrȧ kəpa pə yi hɛ mɔ aŋ təl ta ȧtȧ mu, kɛrɛ mun munɔnɛ mə kɔth ɔlompi, rə kəwop ȧŋthɔ. 25Kɛrɛ ta tȧbona təlɔm ȧtȧ po lanɛ-e, sə po thɔŋ gbal ti kəpa sə gbək kəpa aŋ yi tə kətei ɛyɛt ɛdi ɛyɛ a po wurɔ sathka ka ɛyɛt ɛbumərnɛ, yi mətir, ɛyɛt ɛyifa, dɛ yi kərəp. 26Ka Pɔl ɔ gbasi aŋlaŋgba, ɔwa ka ȧŋrey aŋa tanda, ɔ fethərnɛ yi ŋaŋ, ɔ wɔŋ ka ȧŋseth ŋa Kuru, ɔ tɔri kalasər ka marey ma kafethərnɛ, ɔwa aŋ yi ri haŋ ɔ wurɔ sathka ta ukin o kin ka ŋaŋ.
27Ɔwa ma marey tȧmthədɛrəŋ mə yema poŋ-e, aŋYuda aŋa wur ro Asia, maŋ nənk kɔ ka ȧŋseth ŋa Kuru-e, aŋ pər ȧruniya bɛ, kaŋ wop kɔ, aŋ ŋata sim aŋ pa, 28Alaŋgba ŋa ro Isrɛl, mar nu. Ɔlaŋgba kɔnɔ ɔwe ɔwe mə thəksa aŋfəm bɛ dɛr o dɛr kəŋamnɛ aŋfəm, yi ȧŋthɔ yi ɔdɛr ɔwe. Ma pə thas ri-e, ɔ wɔŋȧ sɔ aŋKrik ka ȧŋseth ŋa Kuru, kɔ nɔkɔs ɔdɛr ɔsəm ɔwe. 29(kotȧy-e aŋ la nənk Trofimɔs ɔwe ro Ɛfisɔs yi Pɔlȧŋ ro pet, ɔwa aŋ nanɛ kəpa ɔ po wɔŋȧ kɔ ka ȧŋseth ŋa Kuru). 30Ka kȧpet bɛ kə yagba, ɔwa aŋfəm aŋ gbukɛ rɔkin. Kaŋ lɛsa Pɔlȧŋ, aŋ lins kɔ kəwur ka ȧŋseth ŋa Kuru, ɔwa ka ɔlɛmp wati aŋ kantha tadare. 31Ɔwa mɔ mə aŋ yema dif kɔ-e, kɛra kə der ka ɔkaptin ka akobali kəpa atotok abana aŋ yi ro Yerusalɛm. 32Ka ɔlɛmp wati ɔ gbasi atim yi akaptin, kɔ thorər ŋa. Ɔwa ŋaŋ-e, maŋ nənk ɔkaptin ubana yi antim-e, aŋ tey kəsapəth Pɔlȧŋ. 33Ka ɔkaptin ubana ɔ wop kɔ, ɔ yamari kȧmȧ a tand kɔ yi tɔrɛntha tərəŋ; kɔ yif kɔn kanɛ-e, ɔwa ȧtȧ ɔ po yɔ-e? 34Ɔwa alɔm kətɔŋ ka ȧruniya aŋ woŋa tȧy tin, alɔm tȧy təlɔm. Ma ɔ te tȧrȧ ȧŋsabu ŋa antotok-e, ɔ yamari kȧmȧ a kȧrȧ kɔ ro barak. 35Ma ɔ bek ka ɔgbepər-e, antim aŋ kɛkər kɔ salata rabaŋ ra aŋfəm, 36kotȧy-e ȧruniya ra aŋfəm rə tȧŋ, aŋ woŋa, Sibos kɔ nu.
37Ɔwa mɔ mə a yema wɔŋȧ Pɔlȧŋ ro barak-e, ɔ pa ka ɔkaptin ubana, Mə selɔ i pa tȧy ro mu-i? kɔ yif kɔ, Mə tȧrȧ kaKrik-i? 38Mun tha yi ɔEyipt ɔwe fak atotok ȧŋlɔkɔ, ɔwa mə wurɔ ȧruniya adifəth ɛwul yanlɛ ro wula-e? 39Kɛrɛ Pɔlȧŋ ɔ pa, Minɛ i yi uYuda ka ro Tarsɔs ȧke ro Silisia, udure ka kəpet kəyay thahɔ. Ɔwa i nɛmthɛnɛ mu kȧmȧ mə selɔ i fɔfȧnɛ aŋfəm. 40Ɔwa ma ɔ po selɔ-e, Pɔlȧŋ ɔ təmȧ ka ɔgbepər, ɔ tak takər aŋfəm kəta. Maŋ po taŋk-e, ɔ fɔfȧnɛ ŋa ka akənt ka kaHibru, ɔ pa ye,
Currently Selected:
Mȧyɔs ma aŋsom 21: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
