Mȧyɔs ma aŋsom 4
4
1Ɔwa maŋ fɔfȧnɛ aŋfəm-e, aŋfode-o, ɔwe yi rȧbomp ka ȧŋseth ŋa Kuru-o, yi aŋSadusi aŋ bəp ŋa, 2ka pə bansȧnɛ ŋa ta maŋ thəksa aŋfəm-e, dɛ yi kətȧŋȧnɛ Yisɔsȧŋ, kȧyokanɛ ka aŋfi. 3kaŋ wop ŋa mȧwop ma rȧbȧy haŋ pə sɔk, pəkasifɛ ȧŋsum aŋ po thɔŋ wɔŋ. 4Kɛrɛ agbȧthi aŋa təl ȧrim aŋ lanɛ; ɔwa aŋyirka ŋa aŋfəm aruni aŋ yi mɔlɔ ma ɛwul tamath.
5Ka pə re yi ka ȧŋrey alɔm-e, aŋgbəka-o, aŋbȧki-o, yi aŋkarmɔkɔ aŋ thoŋklanɛ dɛr rɔkin ro Yerusalɛm. 6Ka Anas-əŋ, ɔfode ubana, yi Kayafasȧŋ, yi Yɔnȧŋ, yi Alɛksandaŋ, dɛ yi ŋaŋ aŋa yi ka rȧkomra ra ɔfode ubana aŋ bəpər. 7Maŋ po təmər ŋa ratɔŋ-e, aŋ yif ŋa, aŋ pa, Ko afɔsɔ, thalɔm ka ȧŋes areke nə yɔ ȧte-e? 8Ka Pitaŋ ɔ la ɔYina məsəm, ɔ pa ro ŋaŋ, Naŋ agbəka ŋa aŋfəm, yi abȧki ŋa Isrɛl, 9bepi a gbɛlɛŋ su thonɔŋ salata mayɔ məfinɔ a po yɔ ka ulaŋgba ugbɛba, to som ɔ sɔthɔ kəyeŋk mədɛr-e; 10ta naŋ bɛ yi aŋfəm ŋa ro Isrɛl bɛ, nə tȧrȧ kəpa, ka ȧŋes ŋa Yisɔs Krayst ɔwe ro Nasarɛth ɔwe nə tȧŋ ka akənt kəpəŋkinɛ-e, ɔwe Kuru ɔ yokas ka rəfi, ka ȧŋes ŋɔŋ gbeŋ ɔlaŋgba ɔwe ɔ təmȧ rodi ka nu uyeŋki mədɛr. 11Kɔnɔ ɔ yi aŋsar aŋa naŋ atəmər ȧŋseth nə po sai sai, ŋa a po səki rȧbomp ra ȧŋkoŋ. 12Ɔwa kakisi kə yi hɛ ka wuni o wuni ulɔm, kotȧy-e, ŋes o ŋes alɔm aŋ yi hɛ ka ȧdȧru are aŋa a sɔŋ kətɔŋ ka aŋfəm ro sə gbəli sɔthɔ kakisi.
13Ɔwa maŋ nənk kamintha ka Pitaŋ yi Yɔnȧŋ, ɔwa aŋ tȧrȧ kəpa aŋ yi hɛ afəm atempi ɔwa aŋ sɔthɔ hɛ kəkaraŋ-e, aŋ kabanɛ; ɔwa aŋ sɔthnɛ kəpa aŋ la yi yi Yisɔs. 14Ɔwa maŋ nənk ɔlaŋgba ɔwe a yenkəs ɔ təmȧ yi ŋaŋ-e, aŋ gbəli hɛ sɔ pa koko. 15Kɛrɛ maŋ yamari ŋa kȧmȧ aŋ wur ka aŋSanhedrin aŋ nəŋkanɛ, 16aŋ pa, To mə sə yɔ aŋfəm aŋe-e, ȧtesoma-e aŋfəm bɛ ro Yerusalɛm aŋ tȧrȧ kəpa tɛntɛnɛ a po yɔ tȧy təkabanɛ ka kȧta ka ŋaŋ, ɔwa saŋ sə gbəli hɛ pɛnsa ti. 17Kɛrɛ kȧmȧ tə te bȧr gbanthɛnɛ kətɔŋ ka aŋfəm, maŋ ninisnɛ ŋa nu kȧmȧ aŋ te sɔ fɔfȧnɛ wuni o wuni ka ȧŋes aŋe. 18kaŋ tela ŋa, kaŋ yamari ŋa kȧmȧ aŋ te sɔ fɔf thalɔm aŋ thəksa ka ȧŋes ŋa Yisɔs. 19Kɛrɛ Pitaŋ yi Yɔnȧŋ aŋ lasi aŋ pa ro rɔŋaŋ, Bepi pə yi ɔlompi rodi ka Kuru tə kətəla nu pəthasi Kuru-e, gbək ti nu; 20kotȧy-e saŋ sə gbəli gbo fɔf mȧtȧy ama sə po nənk yi ama sə po təl. 21Ɔwa maŋ po bȧr ninisnɛ ŋa-e, aŋ tera ŋa aŋ kɔnɛ, maŋ te fir roŋ ro mə aŋ tȧŋ tə kəsɔmpa ŋa ta ȧŋsabu ŋa aŋfəm, pəkasifɛ aŋfəm bɛ aŋ yikis Kuru ta ȧtȧ po yɔnɛ. 22kotȧy-e ɔlaŋgba ka ɔwe a yɔ ȧtȧy təkabanɛ ȧte; ɔ bȧk ɔthasi təren təgba tərəŋ.
23Ma a tera ŋa-e, aŋ kɔnɛ ka aŋkos ŋaŋ, aŋ kanɛ ŋa bɛ ȧte aŋkərbomp kətɔŋ ka aŋfode yi aŋbȧki aŋ kanɛ ŋa. 24Maŋ təl ti-e, aŋ ŋata ȧsim taŋ ka Kuru yawin-əŋ, aŋ pa, ƆMariki, munɔ po bɛmpa ȧkuru yi ȧŋthɔf, yi kȧbȧŋ, yi ɛyɛ yi ri bɛ; 25ɔwe ka ɔYina məsəm ka kȧsəŋ ka ɔkas kȧsu Debidȧŋ ȧŋbɔy a mu, mə pa,
To som tȧbona təlɔm tə bansȧ-e?
Ɔwa aŋfəm aŋ tȧmtȧmnɛ mȧtȧy məyai-e?
26aŋbȧy ŋa ȧdȧru aŋ bɛnɛnɛ ɛsəfa,
Ɔwa aŋgbəka aŋ thoŋklanɛ dɛr rɔkin,
Tə kəŋamnɛ ɔMarki yi ɔKrayst kɔŋ;
27ȧtesoma-e ka təteŋ ka kȧpet ake pə yi hɛ gbo Hɛrɔdȧŋ yi Pɔntiɔs Paylet son, kɛrɛ təbona təlɔm yi aŋfəm ŋa Isrɛl sɔ, aŋ po thoŋklanɛ tə kəkȧsi Yisɔsȧŋ ȧŋBɔy a mu usəm ɔwe mə po pɔlɔ 28tə kəyɔ tȧy o tȧy ȧtȧ aŋfɔsɔ yi kȧtȧrȧ ka mu kə botəs thəpaŋ tə kəyɔnɛ. 29Ɔwa ka-ake ɔMarki, kəli mȧgbind maŋ, ɔwa mar ɛbɔy ɛ mu kȧmȧ aŋ kanɛ mapa ma mu rə kəmintha, 30ma munɔ mə thanthi kȧta ka mu tə kəyeŋkəs afəm; ɔwa kȧmȧ ɛmisali yi mȧtȧy məkabanɛ mə yɔnɛ salata ȧŋes ŋa ȧŋBɔy a mu usəm Yisɔsȧŋ. 31Ɔwa maŋ po ramnɛ-e, ɔdɛr ro aŋ thoŋklanɛ dɛr rɔkin-e, pə yiŋkthanɛ ri, kaŋ la ɔYina məsəm, ɔwa aŋ fɔf ȧrim ra Kuru rə kəmintha.
32Ɔwa ȧruniya ara lanɛ rə ba ȧmerȧ ŋin yi afela ŋin; hali wuni kin ɔ pa hɛ ta ɛyɛt yɔŋ ɛyɛ ɔ ba kəpa ɛ yi ɛyɔŋ, kɛrɛ aŋ ba ɛyɛt bɛ ɔthənanɛ. 33Aŋsom aŋ seri ta kȧyokanɛ ka ɔMarki Yisɔs rə afɔsɔ abana; ɔwa aboŋa abana aŋ yi rokɔm ka ŋaŋ. 34Wuni o wuni ɔ yi hɛ kətɔŋ ka ŋaŋ ɔwe paŋ rəka ȧtesoma-e ŋaŋ aŋa ba təkai thalɔm ɛseth aŋ thila yi, kaŋ kȧrȧ amɔlɔ ma ɛyɛt ɛyɛ aŋ thila, 35ɔwa aŋ bot ŋi ka ȧtȧtək ta aŋsom, kaŋ yerəs rə wuni o wuni mɔlɔ ma kapaŋ kɔŋ kə yi. 36Ɔwa Yosɛfȧŋ ɔwe aŋsom aŋ sɔŋ ȧŋes ŋa Barnabas, (bepi a tepa ŋi ŋə yi Wan ka kȧBɛfəth), uLifay wɔŋ, wuni ka ro Siprɔs, 37ma ɔ po thila ȧŋkay ŋɔŋ, ɔ kȧrȧ aŋkala ŋati, ɔ bot ŋi ka ȧtȧtək ta aŋsom.
Currently Selected:
Mȧyɔs ma aŋsom 4: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
