Mȧyɔs ma aŋsom 6
6
1Ɔwa ka marey mati, ma aŋyirka ŋa aŋkarande aŋ bȧrnɛ-e, aŋYuda aŋa a kom ro Kris aŋ fɔfəthanɛ salata aŋHibru, pəkasifɛ a pəl ȧŋbora ŋaŋ ka mapanth ma kəyerəs ȧrey o rei. 2Ka antɔfɔt ŋarəŋ aŋ tela ȧruniya ra aŋkarande ro rɔŋaŋ, aŋ pa, Pə mar hɛ kəpa saŋ sə tey ȧrim ra Kuru tə kəyɔ mapanth ma ɛthebəl. 3Tiyȧŋ awɔnt, thith nu kətɔŋ ka nu afəm aruni tȧmthədɛrəŋ aŋa ba mes məfinɔ, aŋa la ɔYina məsəm yi kətemp, kȧmȧ sə bot ŋa ka mapanth ame. 4Kɛrɛ saŋ sə tə bȧsər ka təramnɛ yi ka kətɔri mapa ma Kuru. 5Ka tapa ȧte tə bɔnɛ ȧruniya bɛ, kaŋ thith Stifɛnȧŋ, wuni ulasər ka kəlanɛ yi ka ɔYina məsəm, Filipȧŋ, Prokɔrɔs-əŋ, Nikenɔrȧŋ, Timɔnȧŋ, Parmenasȧŋ yi Nikolasȧŋ, ɔwe a səki ulanɛ ro Antiɔk. 6Ɔwa aŋ təmər aŋe rodi ka aŋfəm; maŋ po ramnɛ-e, aŋ reŋ ŋa mȧta maŋ.
7Ka ȧrim ra Kuru rə bȧrnɛ, ɔwa aŋyirka ŋa aŋkarande aŋ bȧrnɛ ro Yerusalɛm, ka afode agbȧthi aŋ wop kȧlanɛ.
8Ka Stifɛnȧŋ ɔ la aboŋa yi afɔsɔ, ɔ yɔ mȧtȧy məkabanɛ yi ɛmisali kətɔŋ ka aŋfəm. 9Kɛrɛ afəm alɔm aŋa yi ka ȧŋseth agbanɛ ŋa aŋLibertin, yi alɔm ro Sirini, yi ro Alɛksandri, yi ro Silisia, yi ro Esiya, aŋ thoŋka yi Stifɛnȧŋ. 10Kɛrɛ aŋ gbəli hɛ tham kȧtemp kɔŋ dɛ yi aŋyina aŋa mɔ fɔfa. 11kaŋ thɛns afəm sɔy aŋa pa, Sə təlȧ kɔ ɔ fɔf sim tələs ta Mosis yi ta Kuru. 12kaŋ pər aŋfəm yi aŋbȧki, yi aŋkarmɔkɔ, kaŋ lɛsa kɔ, aŋ kera kɔ ka aŋSanhedrin, 13kaŋ təmər məseri ayem aŋa pa, Ɔlaŋgba ɔwe ɔ tey hɛ kəfɔf sim tələs ta ɔdɛr ɔsəm ɔwe yi ta ȧŋthɔ; 14kotȧy-e, sə po təlȧ kɔ ɔ pa, Yisɔs ɔwe ro Nasarɛth ɔ tə dim ɔdɛr ɔwe, ɔwa ɔ tə siŋkar matanɛ ama Mosis ɔ tiyȧ su. 15Ka ŋa bɛ aŋa yirȧ ka aŋSanhedrin aŋ kəli kɔ təŋ, aŋ nənk ader rɔŋ mɔ ader ra ɔmaleka.
Currently Selected:
Mȧyɔs ma aŋsom 6: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
