Mȧyɔs ma aŋsom 8
8
1Ka Sɔl-əŋ ɔ ba dim din yi ŋaŋ ta kadif kɔ. Ɔwa ka ȧŋlɔkɔ ŋati athalər abana aŋ təp ro Yerusalɛm ka aŋchɔch. Ka ŋa bɛ aŋ sakanɛ ro Yudia yi ro Samaria, thambe aŋsom. 2Ka afəm aruni aŋa bȧtho Kuru aŋ maŋk Stifɛn-əŋ, kaŋ bok kɔ kəbok kəbana. 3Kɛrɛ Sɔl-əŋ ɔ thalər aŋchɔch, ɔ wɔŋ rə aseth o seth, ɔ lins aŋfəm aruni yi aŋfəm abɛra, kɔ wɔŋȧ ŋa ka ȧŋseth ŋa tərəŋka. 4Tiyȧŋ ŋaŋ aŋa sakanɛ aŋ kɔnɛ kətɔri ȧrim-əŋ dɛr o dɛr. 5Ka Filip ɔ thor ka kȧpet ka Samaria, ɔ taməs Krayst ro rɔŋaŋ. 6Ɔwa aŋfəm aŋ malanɛ mȧtȧy ama Filipȧŋ ɔ fɔf rə ȧmerȧ ŋin, maŋ təl-e, aŋ kȧl nənk ɛmisali ɛyɛ ɔ yɔ. 7kotȧy-e akərəfi aləs aŋ wur rə kəsel ɛrɔŋ ka agbȧthi aŋa ba ŋa; ɔwa ɔ yenkəs afəm agbȧthi aŋa ba məthanthaŋ yi aŋa yi atətkɛ. 8Ɔwa məbɔnɛ məbana mə yi ka kȧpet kati.
9Kɛrɛ ulaŋgba ulɔm ɔ yi ri, ȧŋes ŋɔŋ ŋə yi Saymɔn, ɔ la thupəs, ɔ yɔ kȧmȧ aŋfəm ŋa ro Samaria aŋ kabanɛ, kɔ kolonɛ kəpa kɔnɔ ɔ yi wuni bana. 10Ka ŋa bɛ aŋ sua kɔ ɛləns kətəp ka ɔlɔl haŋ ka ɔbana, aŋ pa, Ɔlaŋgba ɔwe ɔ yi aŋfɔsɔ abana ŋa Kuru. 11kaŋ sua kɔ ɛləns pəkasifɛ ɔwoni thɔŋ ɔ yɔ ŋa aŋ kabanɛ yi kathupəs kɔŋ. 12Kɛrɛ maŋ lanɛ Filipȧŋ, mɔ mɔ tɔri ŋa ta ȧkɛra kəfinɔ ka rȧbȧy ra Kuru-e, yi ta ȧŋes ŋa Yisɔs-e, a baftays ŋa, runi-ŋaŋ yi bom-ŋaŋ. 13Ɔwa Saymɔnȧŋ, kɔnɔ sɔ ɔ lanɛ; ɔwa ma a baftays kɔ-e, ɔ tiyȧ yi Filipȧŋ, kɔ kabanɛ ma ɔ nənk ɛmisali yi mȧtȧy məkabanɛ ama yɔnɛ.
14Ɔwa ma aŋsom aŋa yi ro Yerusalɛm aŋ təl kəpa aŋSameriya aŋ po malanɛ ȧrim ra Kuru-e, aŋ som Pitaŋ yi Yɔnȧŋ ro rɔŋaŋ. 15Ɔwa ma aŋe aŋ po der-e, aŋ ramnɛ ta ȧtȧ ŋaŋ kȧmȧ aŋ sɔthɔ ɔYina məsəm, 16kotȧy-e ɔ tha thorər hɛ ukin ka ŋaŋ; a po gbo baftays ŋa ka ȧŋes ŋa ɔMarki Yisɔs. 17Ka Pitaŋ yi Yɔnȧŋ aŋ rend ŋa mȧta maŋ, kaŋ sɔthɔ ɔYina məsəm. 18Ɔwa ma Saymɔnȧŋ ɔ nənk kəpa rə kərend mȧta ma aŋsom a sɔŋ ɔYina məsəm-e, ɔ taka ŋa akala, 19kɔ pa, Sɔŋ mi aŋfɔsɔ aŋe kȧmȧ pə yi wuni o wuni ka ɔwe mə i reŋ mȧta ma mi-e, ɔ tə sɔthɔ ɔYina məsəm. 20Kɛrɛ Pitaŋ ɔ kanɛ kɔ, Kaŋka aŋkala ȧferȧ a mu aŋ dinɛ yi munɔŋ-e, pəkasifɛ mə nanɛ tə kəsɔthɔ ȧŋboya ŋa Kuru yi akala. 21Mə ba hɛ ȧgbȧp thalɔm ani ka ȧŋpa aŋe, kotȧy-e ȧŋmerȧ a mu aŋ yi hɛ alompi rodi ka Kuru. 22Tiyȧŋ thupi ta maləs ma mu ame, nɛmthɛnɛ Kuru, kȧmȧ bepi pə gbəli yi-e, ɔ tə tera mu ȧŋnanɛ ŋa ȧŋmerȧ a mu. 23kotȧy-e i nənk kəpa mə yi ka ɔroŋkəth wa kȧtut yi ka ɔsekəranɛ wa mȧləs. 24Ka Saymɔn ɔ pa, Na bɛ, nɛmthɛnɛ nu Kuru ta ȧtȧ mi, kȧmȧ mȧtȧy ama nə pa mə te wop mi.
25Ɔwa ŋaŋ-e, maŋ po sɔŋ məseri, dɛ yi aŋ po fɔf ȧrim ra ɔMariki-e, aŋ kȧlanɛ ro Yerusalɛm, kaŋ tɔri ȧkɛra kəfinɔ rə təgbɔm təgbȧthi ta aŋSameriya.
26Ka ɔmaleka ka Kuru ɔ fɔfȧnɛ Filipȧŋ ɔ pa, Yokanɛ, mə kɔ ka aŋdiyɔ, mə lomanɛ ka aroŋ ara wur ro Yerusalɛm kəkɔ ro Kesa, ka aŋwula. 27kɔ yokanɛ ɔ kɔnɛ. Ɔwa kəla, uthem ka ro Ithiyopiya, ulaŋgba ugbai ɔwe ba afɔsɔ abana roratha ka Kandasɛŋ, ɔbȧy ubɛra ka ro Ithiyopiya, ɔwa ɔ yi ɔbɛnɛ ka ɛyɛt yɔŋ ɛbaki mɔlɔ, ɔ po der ro Yerusalɛm tə kəbatho. 28kɔ yi ka kakalanɛ kɔŋ, ɔ yirȧ ka aŋkik ŋɔŋ, ɔ karaŋ ȧkȧfȧ ka ɔnȧbi Isaya. 29Ka ɔYina ɔ kanɛ Filipȧŋ, Kɔ fatər aŋkik aŋe kȧmȧ nə taŋanɛ. 30Ka Filip ɔ gbukɛ, ɔ təlȧ kɔ ɔ karaŋ ȧkȧfȧ ka ɔnȧbi Isaya, kɔ yif kɔ, Mə tȧrȧ ȧte mə karaŋ-i? 31kɔ pa, To mə i gbəli thambe wuni lɔm ɔ tɔri mi-a? kɔ nɛmthɛnɛ Filipȧŋ kȧmȧ ɔ gbep ɔ yirȧ rayɛr kɔŋ. 32Ɔwa ɔdɛr ka mȧgbal məsəm ro ɔ karaŋ ri are,
A kera kɔ mɔ kəlɔmɛ tə kəfai;
Ɔwa mɔ kəlɔmɛ kəfɛth rodi ka ɔwe ma fon kɔ
Yaŋ ɔ te wurɔ dim.
33Ka kathoranɛ kɔŋ a nɔy kɔ mamari mɔŋ;
Kanɛ mə tɔri ta rȧkomra rɔŋ-e?
kotȧy-e a nɔy aŋesəm ŋɔŋ ka ȧdȧru.
34Ka ɔlaŋgba ugbai ɔ yif Filipȧŋ, ɔ pa, Ɔmari mu, ta kanɛ ɔnȧbi ɔ fɔf ȧte-e? Ta kɔn kɔnɔnɛ ba, thalɔm ta wuni lɔm-i? 35Ka Filipȧŋ ɔ wɔŋ kəthəksa kɔ, ɔ təp ka mȧgbal məsəm ame, ɔ tɔri kɔ ta Yisɔs. 36Ɔwa mɔ mə aŋ kɔnɛ ro roŋ-e, aŋ bəp mȧnt məlɔm, ka ɔlaŋgba ugbai ɔ pa, Kəla, mȧnt mi ame, ko mə bɛnt kəbaptais mi-e? 37Ka Filipȧŋ ɔ pa, Bepi mə lanɛ yi ȧŋmerȧ a mu bɛ-e, mə gbəli. Kɔ wosa, ɔ pa, I lanɛ kəpa Yisɔs Krayst ɔ yi ɔWan ka Kuru. 38kɔ yamari kȧmȧ aŋkik aŋ təmȧ soŋ, ka ŋa ŋarəŋ aŋ thor ro mȧnt, Filipȧŋ yi ɔlaŋgba ugbai, kɔ baftays kɔ. 39Ɔwa maŋ wur ro mant-e, ɔYina ka ɔMarki ɔ yɔ kȧmȧ Filipȧŋ ɔ dinɛ kɔ, ka ɔlaŋgba ugbai ɔ nənk hɛ kɔ sɔ; kɔ kɔnɛ yi kəsel məbɔnɛ. 40Kɛrɛ a bəp Filipȧŋ ro Asotɔs. Ɔwa ɔ thas kətɔri ȧkɛra kəfinɔ ka tapet bɛ haŋ ɔ bek ro Sisaria.
Currently Selected:
Mȧyɔs ma aŋsom 8: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
