Luk 10
10
1Kədarəŋ ka mȧtȧy ame ɔMarki ɔ thith akarande alɔm sɔ, təgba təsas tɔfɔt, kɔ som ŋa ŋarəŋ ŋarəŋ tə kətəma kɔ kədi rə kəpet o kəpet yi rə dɛr o dɛr ro kɔn kɔnɔnɛ ɔ ba kəkɔ. 2kɔ pa ro rɔŋaŋ, Karɔk kə bana kɛrɛ aŋrɔk a than. Tiyȧŋ nɛmthɛnɛ nu ɔMarki ka karɔk kȧmȧ ɔ somra arɔk ka karɔk kɔŋ. 3Kɔnɛ nu. Kəla i som nu mɔ təlɔmɛ təfɛth kətɔŋ ka tathɔlu. 4Te nu keranɛ abuthu-o, agbaŋfa-o, thalɔm ɛkɔftha. Ɔwa te kori wuni o wuni ro roŋ. 5Rə aseth o seth mə nə wɔŋ-e, mɔtha pa, Ta məthɔfəl mə yi ka ȧŋseth aŋe. 6Ɔwa bepi uwan ka məthɔfəl ɔ yi ri-e, mathɔfəl ma nu mə tə rensa kɔ, kɛrɛ bepi ɔ yi hɛ ri-e, mə tə kȧl ro rɔnu. 7Tia nu ka ȧŋseth ŋati, di ɔwa mun ɛyɛt ɛwunɔŋ ɛyɛ mə a sɔŋ nu, kotȧy-e ɔyɔ məpanth ɔ mari tə kəsɔthɔ ȧŋrȧm ŋɔŋ. Te nu tepnɛ tepnɛ ɛseth. 8Rə kəpet o pet nə wɔŋ-e, bepi a malanɛ nu-e, di nu ɛyɛt ɛwunɔŋ ɛyɛ mə a təməra nu. 9Ɔwa yenkəs aŋtui aŋa yi ri, tɔri ŋa kəpa, Rȧbȧy ra Kuru rə po nu fat. 10Kɛrɛ rə kəpet o pet mə nə wɔŋ-e, bepi aŋ te malanɛ nu-e, wur nu rokaŋ kati, ɔwa pa nu, 11Hali kabof ka kȧpet ka nu ȧke gbapsa ȧtȧtək ta su, sə nasi ki; kɛrɛ tȧrȧ nu kəpa, tɛntɛnɛ rȧbȧy ra Kuru rə po nu fat. 12I kanɛ nu, Pə tə yi ɔfisa ta Sɔdɔm ka ȧŋrey ŋati pəthasi kȧpet kati. 13Mɔnɛ ro mu, Korasin! Mɔnɛ ro mu Bɛthsayda! kotȧy-e bepi mȧyɔs məkabanɛ ama a yɔ kətɔŋ ka nu mə po yɔnɛ ro Tair yi ro Sidon-e, aŋ tə po thupi ɔwoni, kəyira rə kotha kəkasa yi rə ros. 14Kɛrɛ pə tə yi ɔfinɔ ta ro Tair yi ro Sidon ka karɔk ɛpa, pəthasi ta ȧtȧ nu. 15Ɔwa munɔ, Kepaniyɔm, mə tə ŋatanɛ ro riana-i? A tə thora mu ro kərəfi. 16Ɔwe mə təlȧ nu ɔ təlȧ mi, ɔwa ɔwe mə pɛnsa nu ɔ pɛnsa mi sɔ. Ɔwa ɔwe mə pɛnsa mi ɔ pɛnsa kɔnɔ ɔwe som mi.
17Ma aŋkarande təgba təsas tɔfɔt aŋ kalanɛ-e, aŋ pa yi məbɔnɛ, Pa, hali aŋkərəfi aləs aŋ sanɛ ro rɔsu ma sə bont ȧŋes a mu. 18kɔ pa ro ŋaŋ, I nənk Sethani ɔ fumpɔ mɔ ɔnakthinɛ kəwur ka ȧkuru.
19Ɔwa i po sɔŋ nu afɔsɔ tə kənas ɛbok yi atulis, dɛ yi kətham rokɔm ka aŋfɔsɔ bɛ ŋa ɔtheranɛ; ɔwa koko bɛ rə gbəli hɛ yɔ nu ɔbaŋ. 20Kɛrɛ te ti ba məbɔnɛ ta ma nə po tham aŋkərəfi, kɛrɛ ta pə bɔnɛ nu pəkasifɛ a po gbal ames ma nu ro riyana. 21Ȧŋlɔkɔ ŋati ɔYina məsəm ɔ lasər Yisɔsȧŋ yi məbɔnɛ, kɔ pa, I mɔmɔ mu ɔKas, ɔMarki ka ro riyana yi ȧdȧru, ma mə po maŋk mȧtȧy ame ka aŋtempi yi aŋtara tȧy, ɔwa mə tɔri ma ka aŋfɛth. Yao ɔKas pəkasifɛ ame mə yi mȧselɔ ma mu. 22ƆKas kȧmi ɔ po maŋkər mi mȧtȧy bɛ, ɔwa wuni o wuni ɔ tȧrȧ hɛ ɔWan thambe ɔKas; yi ɔ tȧrȧ hɛ ɔKas thambe ɔWan yi kɔnɔ ka ɔwe ɔWan mɔ ŋaibia kɔ. 23Ka Yisɔsȧŋ ɔ fəlɛ ka aŋkarande, kɔ pa ro rɔŋaŋ sɔy, Aruba aŋ yi ka ɛfɔr ɛyɛ nənk mȧtȧy ama naŋ nə nənk, 24kotȧy-e i kanɛ nu anȧbi yi abȧy agbȧthi aŋ fela tə kənəŋk mȧtȧy ama naŋ nə nənk, kɛrɛ aŋ nənk hɛ ma. Ɔwa tə kətəl mȧtȧy ama naŋ nə təl, kɛrɛ aŋ təl hɛ ma.
25Ɔwa kəla ukarmɔkɔ ka aŋthɔ ɔ yokanɛ, ɔ mɛm Yisɔsȧŋ ɔ pa, Karmɔkɔ, to mə i yɔ kȧmȧ i sɔthɔ aŋesəm thəbana-e? 26kɔ pa ro ŋɔŋ, To a gbal ka aŋthɔ-e? To mə karaŋ ri-e? 27kɔ wosa ɔ pa, Ta mə bɔthər ɔMarki ɔKuru ka mu yi ȧŋmerȧ a mu bɛ, yi aŋesəm a mu bɛ, yi aŋfɔsɔ a mu bɛ, yi aŋnanɛ a mu bɛ; ɔwa ɔfatanɛ ka mu sɔ mɔ mȧ mə bɔthərnɛ. 28Ka Yisɔsȧŋ ɔ pa ro ŋɔŋ, Mə po gbaki ɔlompi. Yɔ ȧte, mə tə sɔthɔ aŋesəm. 29Kɛrɛ kɔnɔ, ma ɔ yema lompəsnɛ-e, ɔ yif sɔ, Kanɛ yi ɔfatanɛ ka mi-e? 30Yisɔsȧŋ ɔ lasi ɔ pa, Ulaŋgba ulɔm ɔ thor kəwur ro Yerusalɛm tə kəkɔ ro Yɛriko. Ma ɔ yi ro roŋ-e, ɔ fumpɔ ka mȧta ma aŋkey abana, kaŋ bus ȧsuma tɔŋ, aŋ sap kɔ, aŋ kɔnɛ, kaŋ tey kɔ ɔ bun fi. 31Ka pə bɛŋȧnɛ ufode ulɔm ɔ thor ri; ma ɔ nənk kɔ-e, ɔ thas rolɛŋkɛn. 32Ya pə yi sɔ uLibay, ma ɔ bek ka ɔdɛr ɔwe, ɔ kəli kɔ kɛrɛ kɔnɔ sɔ ɔ thas rolɛŋkɛn. 33Kɛrɛ uSamaria ulɔm, ma ɔ yi ka ȧŋbiyas ŋɔŋ-e, ɔ bek ro ɔ yi. Ma ɔ nənk kɔ-e, ȧney aŋ wop kɔ, 34kɔ der ro ŋɔŋ, ɔ sek tȧsam tɔŋ, ɔ kus ri mȧro yi məber məfɛth, kɔ reŋ kɔ ka ȧŋsoy ŋɔŋ, ɔ kera kɔ rə aseth ayiya, kɔ kəlianɛ kɔ. 35Ka rabəth rəlɔm ɔ wurɔ ɛsiliŋ yɛrəŋ, ɔ sɔŋ yi ɔkas ka ȧŋseth ayiya, ɔ pa, Kəlȧnɛ kɔ, ɔwa ara mə ləsər pəthas are, ma i kȧl der-e, i ti ram mu ti. 36Ka aŋsas aŋe-e, kanɛ mə nanɛ kəpa ɔ yi ufȧtȧnɛ ka kɔn ɔwe fumpɔ ka mȧta ma aŋkey abana-e? 37kɔ pa, Kɔnɔ ɔwe ba kɔ ȧney. Ka Yisɔsȧŋ ɔ pa Kɔnɛ, mə yɔ yaŋ.
38Maŋ kɔnɛ ka ȧŋbiyas ŋaŋ, ɔ wɔŋ ka kȧpet kəlɔm. Ka ubɛra ulɔm, ȧŋes ŋɔŋ ŋə yi Martha-e, ɔ wɔŋȧ kɔ ka ȧŋseth ŋɔŋ. 39Ɔ ba wɔnt bɛra, ȧŋes ŋɔŋ ŋə yi Meri, ɔwe yirȧ ka ȧtȧtək ta Yisɔsȧŋ, kɔ su ɛləns ka tafɔf tɔŋ. 40Kɛrɛ Mathaŋ ɔ ba asoli ta kəbɛnɛnɛ kəbana. Ɔ der ro ŋɔŋ, ɔ pa, Pa, tə ba hɛ mu tȧy kəpa ɔwɔnt kȧmi ubɛra ɔ tey mi son tə kəbɛnɛnɛ-i? Tiyȧŋ kanɛ kɔ kȧmȧ ɔ mar mi. 41Ka Yisɔsȧŋ ɔ pa ro ŋɔŋ, Matha, Matha mə soli, ɔwa ȧŋmerȧ a mu aŋ sɔmpanɛ ta mȧtȧy məgbathi. 42Kɛrɛ tȧy tin gbo mə paŋ, ɔwa Meri ɔ po thith ȧte yi təfinɔ, ȧtȧ mə a te kɔ nɔy.
Currently Selected:
Luk 10: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
