Luk 15
15
1Ɔwa aŋthoŋkla ɛfȧk yi aŋfəm ŋa ɛhakɛ aŋ fatər kɔ kȧmȧ aŋ təlȧ kɔ. 2Kɛrɛ aŋFarisi yi aŋkarmɔkɔ aŋ fɔfəthanɛ, aŋ pa, Ɔwuni ɔwe ɔ malanɛ aŋfəm ŋa ɛhakɛ, ɔwa ɔ di yi ŋaŋ.
3kɔ fɔf aŋlomɔ aŋe ro ŋaŋ, ɔ pa, 4Wuni reke ka nu ɔwe mə ba təlɔmɛ kɛmɛ kin, ɔwa ukin ka ŋaŋ ɔ dinɛ kɔ-e, mɔ te tey tȧgba tanlɛ tɔfɔt tȧmthərɛŋanlɛ ro wula, ɔ kɔ thɛns ɔkin ɔwe dinɛ kɔ-e, haŋ ɔ fir kɔ-e? 5Ɔwa ma ɔ po fir kɔ-e, ɔ gbanɛ kɔ ka ȧŋkənklȧ ŋɔŋ yi məbɔnɛ. 6Ɔwa ma ɔ bek ro seth kɔŋ-e, ɔ tela aŋyathki yi aŋfatanɛ ŋɔŋ rɔkin, ɔ pa ro ŋaŋ, Ba nu məbɔnɛ yi minɛŋ, ȧtesoma-e i po fir kalɔmɛ kȧmi ɔwe dinɛ. 7I kanɛ nu məbɔnɛ mə tə yi ro riyana ta ɔwuni kin uləs ɔwe thupi pəthasi afəm alompi təgba tanlɛ tɔfɔt tȧmthərɛŋanlɛ aŋa te ba kəthupi.
8Thalɔm wuni bom ureke ɔwe ba akala ȧferȧ tɔfɔt-e, bepi ŋin aŋ dinɛ kɔ-e, mɔ te moth kəmulɛ, ɔ gbəl ȧŋseth, ɔ thɛns thɛns finɔ haŋ ɔ fir ŋi-e? 9Ɔwa ma ɔ po fir ŋi-e, ɔ tela aŋyathki yi aŋfatanɛ ŋɔŋ rɔkin, ɔ pa, Ba nu məbɔnɛ yi minɛŋ ȧtesoma-e i po fir aŋkala aŋa dinɛ mi. 10I kanɛ nu, ya pə yi sɔ-e, məbɔnɛ mə tə yi ka kȧbəprȧnɛ ka aŋmȧleka ŋa Kuru ta ɔwuni kin ɔwe thupi.
11kɔ pa, Ulaŋgba ulɔm ɔ ba awuth aruni ŋarəŋ; 12ka ɔfɛth ɔ pa ka ɔkas kɔŋ, Pa, sɔŋ mi ɛyɛt ɛ mi ɛyɛ i ba tə kəsɔthɔ. Ɔwa ɔ yerəs ŋa ɛyɛt yɔŋ. 13Kədarəŋ ka mərey məthan-e, ɔwan uruni ufɛth ɔ thoŋkla ɛyɛt yɔŋ bɛ-e, ɔ kɔnɛ ȧbiyas rə athɔf abɔli, kɔ ləsər ɛyɛt yɔŋ rə kəyɔ ɔləs. 14Ma ɔ po ləsər aŋkala ŋɔŋ bɛ-e, dor rəbana rə wɔŋ ka ȧŋthɔf ŋati, ka amɔnɛ mə təp kəwop kɔ. 15kɔ kɔ panthnɛ ka udure ukin ka ȧŋthɔf ŋati, kɔ somra kɔ ka atɔr tɔŋ tə kəwɔnthər təsɔp. 16kɔ fela tə kəlasər akor kɔŋ yi ɛwula ɛyɛ tasɔp mə aŋ di; ɔwa wuni o wuni ɔ yer hɛ kɔ. 17Ma ɔ kȧl sɔthɔ amera-e, ɔ pa, To ɛbɔy ɛyamɔ ya ɔkas kȧmi aŋ yi kəgbath bɛ, aŋ ba təbo təbeki haŋ tə kətiyanɛ, ɔwa minɛŋ i dinɛ nɔ yi dorȧŋ! 18I ti yokanɛ, i ti kȧl ka ɔkas kȧmi, i ti pa ro ŋɔŋ, Pa, i po yɔ ahakɛ ka ȧriyana yi rodi ka mu. 19I bek hɛ a bont mi uwan ka mu. Yɔ mi mɔ ukin ka ɛbɔy ɛ mu ɛyamɔ. 20kɔ yokanɛ, ɔ der ka ɔkas kɔŋ, kɛrɛ ma ɔ yi ras ɔbɔli poŋ-e, ɔkas kɔŋ ɔ nənk kɔ, ɔwa ȧney aŋ wop kɔ, ɔ gbukɛ, kɔ fumpər kɔ ro lim, ɔ muməl kɔ. 21Ka ɔwan ɔ pa ro ŋɔŋ, Pa, i po yɔ ahakɛ ka ȧriyana, yi rodi ka mu, i bek hɛ sɔ a bont mi uwan ka mu.
22Kɛrɛ ɔkas ɔ pa ka ɛbɔy yɔŋ, Kara aruma ara tha thesa lɛmp, wɔns kɔ ri. Sur kɔ asu, ɔwa wɔns kɔ ɛkɔftha; 23ɔwa kȧrȧ ɔna ufɛth uboi, fai kɔ nu. Maŋ di nu, ɔwa sə yɔ məbɔnɛ! 24Ȧtesoma-e ɔwan kȧmi uruni ɔwe ɔ sa po fi, kɛrɛ ɔ kȧl yi ukəli sɔ; ɔ sa dinɛ kɛrɛ a fir kɔ. Kaŋ təp kəyasanɛ. 25Ɔwa ɔwan kɔŋ uruni ɔbaki ɔ yi ro kɔr. Ma ɔ der-e, ɔ fatər ro seth, ɔ təl a fer, ɔwa a thɔmɔ. 26kɔ tela ukin ka ɛbɔy ro ŋɔŋ, ɔ yif to som mȧtȧy ame mə yi. 27Ȧŋbɔy ɔ pa ro ŋɔŋ, Ɔwɔnt mu ɔ der, ɔwa ɔkas ka mu ɔ po fai ɔna ufɛth uboi pəkasifɛ ɔ po malanɛ kɔ ukəli yi uyeŋki mədɛr. 28kɔ bansȧ ɔ selɔ hɛ wɔŋ, kɛrɛ ɔkas kɔŋ ɔ wur, ɔ thɔnthɔ kɔ. 29Kɛrɛ ɔ lasi ɔ pa ka ɔkas kɔŋ, Kəla, təren tǝgbȧthi i po yɔna mu, ɔwa i tha ləsər hɛ aŋyamari a mu; kɛrɛ haŋ thonɔŋ mə sɔŋ hɛ mi uwir ufɛth kȧmȧ i yɔ məbɔnɛ yi aŋyathki a mi. 30Kɛrɛ ma ɔwan ka mu ɔwe ɔ der-e, ɔwe po ləsər ɛyɛt ɛ mu ka afəm abom arəpi-e, mə po fayȧ kɔ ɔna ufɛth uboi. 31kɔ pa ro ŋɔŋ, Wan kȧmi, munɔ mə yi yi minɛŋ thəbana, ɔwa ɛyɛt bɛ ɛyɛ i ba, munɔ ba yi. 32Pə yi ɔlompi tə kəyɔ met yi kəsel məbɔnɛ, ȧtesoma-e ɔwɔnt mu ɔwe ɔ sa po fi, kɛrɛ ɔ kȧl yi ukəli, ɔ sa dinɛ, kɛrɛ a fir kɔ.
Currently Selected:
Luk 15: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
